मत्ती 27

राज्यपाल पिलातुसे अगर यीशु पेशी

मरकुस 15:1; लूका 23:1-2; यूहन्ना 18:28-32

1पथवारी ईं मुख्य पुजारे त टजे स्याणी यीशु मारणे ब्योरा कइ छड़ा। 2तोउं तेन्हि से बन्हा त घिन कइ राज्यपाल पिलातुसे धे दी छड़ा।

यहूदा इस्कारियती मरुण

प्रतिनिधि 1:18-19

3पता, जपल तेस टोवाणे बाड़ा यहूदे हेरु कि यीशु मारणे ब्योरा भोई गो असा त से पछताण लगा। तेन तिह चन्नी मेलकी मुख्य पुजारे त टजे स्याणी केईं वापस अण्हे। 4त बोलु, “मेईं यक नरदोष मेह्‍णु टोवाई कइ पाप किओ असा।” तेन्हि बोलु, “असी की? तुईएं जाण।” 5तोउं से तेन्हि मेलकी देहेर अन्तर फटाई कइ नश गा, त गादौड़ दी कइ मर गा। 6पर मुख्य पुजारे से मेलकी चुण कइ बोलु, “ए रुपेई देहरे भण्डार अन्तर रखण ठीक नेईं, किस कि ए केसे लहुए कीमत भो।” 7तोउं तेन्हि बोक विचार कर कइ तेन्हि मेलकी बइ परदेशी मेह्‍णु पथण जे यक कुम्हार केआं जिम मुले नी। 8इस बझई जोई तेस जे आज तकर “लहुए जिम” बोते। 9इसे बेलि से भविष्य वाणि पूरी भुई, जे यिर्मयाह भविष्य वक्ते बोलो थी। तेन बोलो थिउ कि

“तोउं तेन्हि से तिह मेलकी, जे इस्राएले कुछ मेह्‍णु तसे मुल किओ थी, नी छड़े।

10तोउं जीं प्रभु मोउं जे निआंग दुतो थी से कुम्हारे बगे मुल दी छउ।”#यिर्मयाह 32:6-9; जकर्याह 11:12,13

पिलातुस यीशु पूछताछ करण

मरकुस 15:2-5; लूका 23:3-5; यूहन्ना 18:33-38

11तोउं जपल यीशु राज्यपाल पिलातुसे सामणि पेश भुआ त पिलातुसे तेस जे बोलु, “तु कि यहूदी मेह्‍णु के राजा भो ना?” यीशु तेस जे बोलु, “तु अपफ बोलुण लगो असा।” 12पर जपल मुख्य पुजारे त टजे स्याणे तेस पुठ दोष लाण लगे त तेन कोई जवाब न दिता। 13त पिलातुस तेस जे बोलुण लगा, “तोउ न शुणतु ना, ए तोउ पुठ कत दोष लाण लगो असे?” 14पर तेन तसे यक बि बोकी के जवाब न दिता। त राजा सुआ हैरान भोई गा।

यीशु मारणे सज्जा मेण

मरकुस 15:6-15; लूका 23:13-25; यूहन्ना 18:39—19:16

15तठि ईं यक रिवाज राज्यपाले बणो थिआ कि त्योहारे रोज मेह्‍णु के मर्जी मुताविक केस यक कैदी अजाद कतेथ। 16तेस टेम तेन्के कैद अन्तर बरअब्बा नओएं यक खतरनाक कैदी थिआ। 17त जपल मेह्‍णु तठि किठिए त पिलातुसे तेन्हि जे बोलु, “तुस कैद केआं केस छुड़ाण चहन्ते? ‘बरअब्बा’ या ‘यीशु’ जेस जे ‘मसीह’ बोते?” 18किस कि पिलातुस जाणताथ कि यहूदी नेती यीशु हेर जड़ कइ टातो थिआ। 19इस केआं अलावा, जपल से न्याये गद्दी पुठ बिशा, त तसे जुएली तेस जे ई बोलुण जे अपु नौखर लंघा कि, “तुस तेस धर्मी मेह्‍णु मामले अन्तर कुछ न बोले, किस कि मोउं आज सुपने अन्तर तसे बझई जोई सुआ दुख मेओ असा।” 20पर मुख्य पुजारे त टजे स्याणे किठिए मेह्‍णु बेहकाए कि से बरअब्बा अजाद करण त यीशु मारण जे मांग करे। 21राज्यपाले तेन्हि केआं दुबारी पुछु, “इन्हि दुहि बिचा तुस केस चहन्ते कि मोउं तुसी जे छड़ देण?” तेन्हि बोलु, “बरअब्बा।” 22पिलातुसे तेन्हि केआं पुछु, “तोउं जेस जे ‘मसीह’ बोते, एस ‘यीशु’ की करुण?” सोबी बोलु, “एस क्रूस पुठ ढना!” 23पिलातुसे बोलु, “किस, एन की गलती किओ असी?” पर से हउ बि जोरी जोरी बोलुण लगे, “एस क्रूस पुठ ढना।”

24त जपल पिलातुसे हेरु कि कुछ नेईं बणुण लगो, होर पुठे केआं हल्ला बधण लगो असा त तेन पुओणि टातु त हुसुड़े सामणि अपु हथ धोई कइ बोलु, “एस धर्मी मेह्‍णु लहु जुए में कोई वास्ता नेईं। अउं नरदोष असा; तुसे ईं जाणे तुस की कते।” 25सोबी जवाब दुतु, “एसे लहु असी पुठ त हें गभुर पुठ भो लौतु!” 26तोउं तेन बरअब्बा छड़ दिता। होर यीशु चाबुके बइ मडाई कइ क्रूस पुठ ढनाण जे अपु सपाही के हवाले कइ छड़ा।

सपाही यीशु बेज्जती करीण

मरकुस 15:16-20; यूहन्ना 19:2-3

27तोउं पिलातुसे सपाही यीशु राजवाड़ी अन्तर नीआ त पूरी पलटन तसे बियेर बइ किठि गई। 28तोउं तेन्हि तसे झिणे खोल कइ तेस लाल रंगे चोगा डबा, 29त कंटि के मुकुट बड़ाई कइ तसे मगिर पुठ ला। तोउं देहणे हथ अन्तर लठि टोवाई कइ तसे अगर बिश गे, होर तसे ईं बोल कइ फूल बणाण लगे कि “ए यहूदी मेह्‍णु के राजीया, तें जइ भो।” 30तोउं तेस पुठ थुकु; त सेईंए लठि टाइ कइ तसे मगिर पुठ देण लगे। 31जपल से तसे मखोल बड़ाई बिशे, तोउं तेन्हि तसे चोगा खोला त दुबारी तसे झिणे डबाए, तोउं क्रूस पुठ ढनाण जे घिन गे।

यीशु क्रूस पुठ ढनाण

मरकुस 15:21-32; लूका 23:26-43; यूहन्ना 19:17-27

32बाहर घेन्त पेंत पिलातुसे सपाही शमौन नओएं कुरेन शेहरे यक मेह्‍णु मेईंया। तेन्हि से टाता त तसे पिठ पुठ जब्बरदस्ती से थम छड़ा, जेस पुठ यीशु ढनाण थिआ। 33त जपल से गुलगुता नओएं जगाई पुजे जेस जे “खोपड़ी के जगाह” बि बोते त, 34तेन्हि पितकाड़ु मिओ अराख यीशु धे पीण जे दिता#छुआंरी 69:21, पर तेन चख कइ ना कइ छड़ा। 35तोउं तेन्हि तसे हथि खुरी जुए मिएखि डूबाई कइ से क्रूस पुठ ढनाई छड़ा त तसे झिणे अपफ बुछ बांटण जे लखिर छइ। 36तोउं से तठि बिशे त तसे पेहरा देण लगे। 37त तसे दोष यक पट्टि पुठ लिख कइ मगिरि पुठे क्रूस पुठ लाई छड़ा, जेस पुठ लिखो थिउ कि “ए यहूदी मेह्‍णु के राजा, यीशु भो”। 38तोउं तेस जुए साते दुई डाकु बि क्रूस पुठ ढनाई छड़े, यक तसे देहणा कना त होरा बउंआ कना। 39त एन्ते घेन्ते सोब जेईं अपु अपु मगिर हिलाई कइ तसे बेज्जती कतेथ। 40से ईं बोतेथ, “देहेर ढाणे बाड़िआ त टाई रोज अन्तर दुबारी बणाणे बाड़िआ! अपु अपफ त बचा! अगर सच्चे तु परमेश्वरे कुआ भो त क्रूस पुठा भीं आई।”#मत्ती 26:61; यूहन्ना 2:19 41तिहांणि मुख्य पुजारे, धर्मशास्त्री त टजे स्याणे सोब तसे मखोल बड़ाई कइ बोलु, 42“एनि होरे बचाए, पर अपफ न बचाई बटता। ए ‘इस्राएले राजा’ भो ना? एस अभेईं क्रूस पुठा भीं एण दिए त अस विश्वास कते। 43एन परमेश्वर पुठ विश्वास किओ असा। त अगर परमेश्वर एस चहन्ता त से एस जरूर छुड़कान्ता, किस कि एन बोलो थिउ कि ‘अउं परमेश्वरे कुआ भो।’” 44तिहांणि से डाकु बि, जे तेस जोई साते क्रूस पुठ ढनाओ थिए, तेन्हि बि तसे बेज्जती की।

यीशु मरुण

मरकुस 15:33-41; लूका 23:44-49; यूहन्ना 19:28-30

45तिएस दिसाई बाराह बज केआं टाई बज तकर तेस देश अन्तर अन्हारु भोई गोउ। 46टाई बज टेम यीशु जोरी हक दी कइ बोलु, “एली एली लमा शबक्तनी?” मतलब “ए में परमेश्वरा, ए में परमेश्वरा! तेईं अउं किस छड़ दिता?” 47जे तठि खड़ खड़ बिशो थिए, कत जेईं ईं शुण कइ बोलु, “ए त एलिय्याह भविष्य वक्ता जे हक देण लगो असा।” 48तेन्हि अन्तरा यक जेईं झठ दौड़ा त स्पंज अण्ह कइ सिरके अन्तर डूबा त लम्मी लठि पुठ रख कइ तेस चुशाण लगा। 49होरु बोलु, “इठि बिशे, हेरते कि एलिय्याह एस बचाण जे एन्ता कि ना एन्ता।” 50तोउं यीशु फिर जोरी हक दिती त तसे शाह निस गे। 51त शुणे, देहरे चादुर पुठे केआं बुन्ह तकर चीरी कइ दुई टुकुड़ भोई गे, भुंजल गा त फाट फूट गे। 52कब्र खुल गई त सुआ शुचे मेह्‍णु जी गे। 53यीशु दुबारी जीण केआं पता से कब्र अन्तरा निस कइ शुचा शेहर यरुशलेम जे गे त सुआ जेईं से काए।

54अब से सुबेदार त तसे सपाही जे यीशु पेहरा देण लगो थिए, भुंजल त होरे घटना हेर कइ डर गे त बोलु, “सच्चे, ए परमेश्वरे कुआ थिआ!”

55तठि सुआ जिल्हाणु बि थी, जे गलीले राज्य केआं यीशु पतोती सेवा कती अओ थी। से दूर केआं सोब हेरण लगो थी।#लूका 8:2,3 56तेन्हि अन्तर मगदला ग्रांए मरियम थी। याकूब त योसेसे ई मरियम थी, होर जबदी जुएली थी, जे याकूब त यूसुफे ई भो।

यीशु पथण

मरकुस 15:42-47; लूका 23:50-56; यूहन्ना 19:38-42

57जपल ब्यादि भुई त अरिमतिया ग्रांए यूसुफ नओएं यक अमीर मेह्‍णु आ। से बि यीशु चेली बिचा यक थिआ। 58से पिलातुस केईं गा त यीशु लाश मगी। त पिलातुसे लाश देणे बोल छउ। 59तोउं यूसुफे लाश नी कइ यक हच्छे कपड़े अन्तर लपेटी। 60त से यक नोई ईं खनो कुड अन्तर छड़ी, जे तेन फाट अन्तर अपफ जे बड़ो थी। तोउं कुडे मुंह पुठ यक बोडा पठ दी कइ घेई गा। 61मगदला ग्रांए मरियम त दोकी मरियम जे याकूबे त यूहन्ने ई थी, तठि कुडे सामणि बिश कइ हेरण लगो थी।

सपाही यीशु कुड पुठ पेहरा देण

62दोके रोज, मतलब भक्ति करणे रोज मुख्य पुजारे त फरीसी पिलातुस केईं एई कइ बोलु, 63“राज्यपाल जी, असी याद असु कि से भरमाणे बाड़ा यीशु जपल जीन्ता थिआ, तेन बोलो थिउ, ‘अउं टेके रोजे जी घेन्ता।’#मत्ती 16:21; 17:23; 20:19; मरकुस 8:31; 9:31; 10:33,34; लूका 9:22; 18:31-33 64त टाई रोज तकर तेस कुडे पेहरा देण जे निआंग दिए। ईं न भोल कि तसे चेले एई कइ लाश चोरियेल, होर मेह्‍णु जे झूठ बोलियेल कि ‘हेरे! से मरो तेन्हि अन्तरा दुबारी जी गा।’ तोउं ई धोखा पेहलकण तेस केआं बि सुआ बुरा भुन्ता।” 65पिलातुसे तेन्हि जे बोलु, “कोई नेईं! तुसी केईं पेहरेदार असे। घिए, त पेहरेदारी करे।” 66तोउं तेन्हि पेहरेदार जोई नीए, त पठ पुठ मुहर लाई कइ तसे पेहरेदारी करण लगे।

Pilihan Saat Ini:

मत्ती 27: pgg

Sorotan

Berbagi

Salin