मत्ती 6

ईसु धरम काम राः बारे तेय लाय वडकुआ

1 # मत्ती 23:5 “सँवचेती तेपे दोहोनू! अपे होड़कू देखोवा लगड अपे राः धरम काम अलोपे करोवे। नहींता अपे सरग रेनिय अपापे वरी कनर फल एरो पे ञँमतेडा। 2हेनाते अम कनय दान मी ओवाय रेदो, कपटी होड़कू घयते, धरम सभा ते अवुर गली गली ते होड़कू बडेय वकू लगड ढिंढोरा कू एर पिटोआ, हेना घयते अम अलोम कामे। इंञ अम थरे सही मेतेंञ कहनी यडा, हेंकू अनाकू राः फल कू ञँमकेडा। 3लेकिन अम कनय दान मी ओवा रे, जोम गतर हन तीम ची बनो यडा, हेना कोंञ गतर हँडाः तीम अलो पपाड़िऊ। 4ताकि अम एमकेड हेना दान कनय अलो पपाड़ी। हेंडे सीड़िंय ञें-लेअय, सरग रेनिय अपुम, फालिय ओवा मिआँ।”

बिनती

(लूका 11:2-4)

5 # लूका 18:10-14 “अम बिनतीः रे कपटी होड़कू घयते अलोम बिनतीऊ। हेंकू, होड़कू तिःवा लगड धरम सभा ते अवुर सँड़क मोड़न ते चड़ाँ कोःते, बिनतीः बढ़ियाँ वकुआ। इंञ अपे थरे सही मेतेंञ कहनी यडा, हेंकू अनाकू राः फल कू ञँमकेडा। 6लेकिन अम बिनतीः रे कोठरी तम रेम सेनुऊ, अवुर दुवर सींञ केते कनय मेनेकू ञेंल सकोआ, हेंय अपुम थरेम बिनतिऊ। हेंडे सीड़िंय ञें-लेअय अपुम, फालिय ओवा मिआँ। 7बिनतीः तोलोग अनजातकू घयते बे-मतलोब ते अलोपे बक बकोऊ। कहेकि हेंकू अड़ींगा कि अले बगरा टेबोः ले टेबोः रेदो, देवता अलेरअय अँजोमेआँ मेनते। 8हेनाते अपे, हेंकू घयते अलोपे बनोऊ, कहेकि अपे रेनिय अपापे, अपे राः ची ची जरूरत इदाना, हेना असिय वरी पहील तेय पपाड़िआ।”

9“अपे नआँ घयतेपे बिनतिऊ, ‘ओ सरग रेनिय अपाले; अम ञुमू पवितर गिआ।

10अमाः राज मेजुऊ। जेयसे अमाः इक्छा सरग रे पूरा होयाः तना, हेन घयते न धरती रेहो होयाऊ।

11अले दिन भराआ अन्‍न तेसिंञ मी ओवा ले।

12अवुर जेयसे अले राःकू कसूर केडा हेंकू ले माफ केडा, हेन घयते अले कसूर केडा हेना होम माफ गोत्ते।

13अवुर अले परिक्छा रे अलोम एनेम पड़ो वले, लेकिन बुराई वरिम बंचो ले; कहेकि राज अवुर बडेआ सक्‍ति अवुर महिमा हमेसा अनामाआँ होयाऊ।’ आमेन। 14#मरकुस 11:25,26अगर अपे राःकू कसूरेः हेंकू पे माफ रेदो, सरग रेनिय भगवान अपा अपे होय माफ वपेआ। 15अगर अपे एटाःकू मेने पे माफ कू रेदो, अपे रेनिय अपापे हो, अपे कसूर केडा हेना एरोय माफ तेडा।”

ईसु उपासुः बारे तेय चेडतेड कुआ

16“अपे उपासुः रेदो, कपटी कू घयते मन उदास ते अलोपे दोहोनू, कहेकि हेंकू उपास केनाय मेनते कू अड़ींग वकू लगड, अँख मुरथन तकुकू लोरमो गोत्तेआ। इंञ अपे सही मेतेंञ कहनी वपे तना, हेंकू अकू राः फल कू ञँमकेडा। 17लेकिन अम उपासुः रेदो, उब्मी रे सुनूम मी ओजाऊ, अवुर अहाम मी कुरकुरो, 18ताकि होड़कू मेने, लेकिन मेन ञेंलुअय सरग रेनिय अपुम भर उपास केनाम हेनाय पपाड़ी। अवुर अपुम सीड़िंय ञें-लेआ, हेंय अम फालिय ओवा मिआँ।”

सरग राः धन

(लूका 12:33-34; 11:34-36; 16:13)

19 # एकूब 5:2,3 “न धरती रे अपन लगड धन अलोपे जवारे, नआँ रे तीजकू जो-मेआँ, अवुर मुरछो जो-मा, अवुर चोचोराकू बुचाः केतेकू चोराया। 20लेकिन अपे अपन लगड सरग रे धन पे जवारू#6:20 भगवान बेसवाः हेना कामू, काम हेना, सरग रे धन जवर यड राः बरोबर गिआ, , हेना रे तीजकू एरो कू जोम तेडा, अवुर एरो मुरछो एना, अवुर चोचोराकू बुचाः केते एरो कू चोरा तेडा। 21कहेकि जहाँ रे अपे राः धन दोहोना, हें-डे अपे राः मन हो दोहोना।”

देंह राः इंजोत

22अमाः देंह राः ढिबरी मेड मी हवे, अगर मेड मी फरी गिरेदो, अमाः सींड़ देंह रे मरसालेआ। 23लेकिन मेड मी बढ़ियाँ कोवाः रेदो, अमाः गोटा देंह अंधराआ। हेनाते अम थरे इदाना इंजोत, अंधराः रेदो, तीमिन कड़िनकोप ते अंधराआ!

भगवान अवुर धन

(लूका 16:13; 12:22-31)

24कनय हो बा होड़ गिरहत कींञ राः मियाँ मियाँ ते एरोय सेवा सको एना। कहेकि हेंय मियाँहोड़ सुदा मया मिलन तेय दोहोना, अवुर मियाँहोड़ सुदा पटरी तकींञ एरो ढुरो एना, चहे मियाँहोड़ सुदा घुल मिल तेय दोहोना, अवुर मियाँहोड़ एरोय बेस वडिया। अपे भगवान अवुर धन मियाँ मियाँ ते एरो पे सेवा सको एना। 25हेनाते इंञ अपे थरेंञ कहनी यडा, जियोः लगड ची ले जो-मा, अवुर ची ले ञूँआ; अवुर ची ले तुसिञाँ मेनते अपन देंह लगड अलोपे फिकीरुऊ, जीव, जोमुः चरोः वरी अवुर देंह कपड़ा लता वरी हो किमती गिआ। 26अगस तेनकू तितीज कुपे तियागू! हेंकू मेने कू मे-रेआ, अवुर न कू ईरेआ, न हेंकू कोठी रेकू जवारेआ। हेंडे रेहो अपे रेनिय सरग रेया अपा, हेंकुय खियो कुआ। अपे हेंकू वरी हो अखीर किमती कोवा पेआ किदो? 27अपे मेंडे ईया इदाना, फिकीर कोःते अनेज राः उमेर मियाँ घड़ी होय बड़हो सकोआ?#6:27 अवुराः कागद रे अपे मेंडे फिकीर कोःते ईया अनानेज उसुल सकोआ मेनतेआ, 28अपे कपड़ा लता लगड ची पे फिकीर वताना? जंगल राः बहा पे तियागू, हेना काःते बडेआ, हेना न दो मेहनातेआ, न कपड़ा बनोआ। 29हेंडे रेहो इंञ अपे थरेंञ कहनी यडा, सुलेमान राजा घली धनी रह ते, बहा वरी हो हेंय बढ़ियाँः ते मेनेय सिंगार गना। 30अगर तेसींञ इदान हेना डाँड राः बीर घलि, अवुर एटाः चेका सेंगेल राः भट्ठा रेकू अटाड़ेआ, हेना घलि भगवान बढ़ियाँ तेय सींगारेआ, दो ए कमजोर बिसवासिकू, अपे नआँ वरी हो बगरा ते ची लगड एरोय ओवड पेआ?

31“हेनाते अपे ची ले जो-मा, ची ले ञूँआ, अवुर ची ले तुसिञाँ मेनते अलोपे फिकीरुऊ। 32कहेकि दुनिया रेनकू होड़कू, नआँ सींड़ चीज राः खोज रेकू दोहोना, अवुर अपे नआँ सींड़ चीज राः जरूरत इदाना मेनाआँ, सरग रेनिय अपापे पपाड़िअयू। 33हेनाते अपे पहील ते भगवान राः राज, अवुर हेंय राः धरम राः खोज रेपे दोहोन रेदो, नआँ सींड़ चीज अपे लगड ञँमुआँ। 34गपा लगड अलोपे फिकीरुऊ, कहेकि गपा लगड गनापाबू फिकीरुऊ; तेसींञ लगड तेनेसिंञाँः दुख बगरा गिआ।”

Pilihan Saat Ini:

मत्ती 6: ksz

Sorotan

Salin