Mark 12

Nda ge koy gaaso ge on̰or ne ge laa pisil ma

Mat 21.33-46; Luk 20.9-19; Eza 5.1-7

1Guwa̰, Zeso ɗege jan ga̰a̰l ge nda ge kee tuwaleya ma way ma, ge nda ge hate eeya ge Moyiz ne ma ɓanna ge Yahuɗ ma ga̰a̰l ge ɗeme num mbe ma fare ge fare sḭḭ go: Ndu a̰me ɗu ɗḭḭ on̰or, vê ne zì ge gulum no, câ tugul ge njal zì ge ɓerse on̰or pe no, ɗû acagaɗa ge haal ge gaaso mbe pe koyya no me. Guwa̰, hon nda ge kee tèmel gaaso on̰or ma ne wanna, dol tene mbo gɔswal kaal ndiɗ. 2Sok ge sok kan siyal ge on̰or ne mbiya, teme na ndu ge tèmel a̰me ya ɗu, ge nda ge kee gaaso on̰or tèmel ma ta, ndwa go na see na ne ndwa. 3Sok ge ne dore mbe dee yà ge num ta, àa wan ne, àa iyal ne, àa n̰a ne mboya tok bàŋ. 4Sok ge ne ba ge temeya kuwa go, ne guwa̰ ya tok bàŋ, teme na ndu ge tèmel a̰me ge ɗogle yà iya ge num ta. Sok ge ne ndu ge tèmel mbe dee ge num ta yà, àa wan ne, àa poɗ ne pagal se kɔkɔm, àa sal ne mamaɗ me. 5Sok ge ne ba ge temeya kuwa go num iya ne iyalla ge sone, teme ndu ge taa ya ge num ta. Àa wan ne, àa hun ne gezi. Guwa̰, gwan teme nda ge ɗogle ma ya gḛḛ-gḛḛ, àa iyal a̰me ma, gegene ma, àa hun num. 6Ndu ge gaa guwa̰ dwab, a ndu ge gaaso mbe van sḛ, ne laa wa̰a̰ ne gḛḛ, teme ne ge num ta yà, ka dwaɗ go: Gegene mbe no, ajo̰o̰ a mbi van ne, àa mà hon ne hormo. 7Sok ge nda ge kee gaaso on̰or tèmel ma kuwa ne van ya mboya, àa jan ta ta buwal zì go: A ndu ge zam ne joo ne no, ḛ mbo nè ya, nè hṵṵ ne, joo mbe wa gaa nè ne. 8Sok ge dee ya num ta zì, àa wa̰a̰ ne no, àa hṵṵ ne gezi no, àa doo ne duul swày ge gaaso on̰or guwa̰ zum yà no. 9Zeso ele num go: Ba ge gaaso on̰or gaa kee num gyana de? Mbo mbo ya, mbo puu nda ge kee gaaso on̰or tèmel mbe ma gezi, hee gaaso on̰or mbe hon nda ge ɗogle ma ne wanna. 10Mbi ge kuwaya tyatyaɗ go ḛ isi fare mbe ya go, ge Njaŋeya ge Dok ne zì. Jin̰a zì go:

«Njal ge nda ge sin zok ma doo ne gezi,

A ne gaa ya njal ge gag ge zok keŋ pe ne,

11Ano mbe mbo ge Bagezok ta ya,

A kaŋ ajab ne ge nè kuwa ne no.» #Mkm 118.22-23.

12Sok ge ga̰a̰l ge Yahuɗ ma way mbe ma see go Zeso kê na fare sḭḭ mbe ma ge maa pagal, sok mbe go, àa ɗege ɓyare vin̰a ge ee maa tok ne pagal, ɗaŋɗe, àa ka chiya voo ge ɓase mbe ge nɔnɔg ma pe. Àa n̰a ne, àa kan ta mboya.

Pe heeya, ge fare ge siyal honna ne pagal

Mat 22.15-22; Luk 20.20-26

13Ga̰a̰l mbe ma teme Farisi a̰me ma ya ɓanna ge Heroɗ nda ma, ge Zeso ta ndwa hee ne pe go, maa wa za̰a̰ fare ge ne wa zige. 14Sok ge àa dee ya ne ta, àa jan ne go: Ba ge hateya, i kuwa kuwa go mo ndu ge jan fare ge fareba ne. Mo chiya ndu a̰me ndwa voo to, mo vare nda to me. Mo hate vin̰a ge Dok ne ge fareba pagal. I ɓyare ele mo go, vin̰a hage hage ge eeya ge nè ne ma pagal go, àa poo siyal hon Sezar de? Jin̰a i gale: Mbiya go i poɗ ne koo i poɗ ne to de? 15Ajo̰o̰ na kuwa ndwa mbuɗiya ge num way kuwa ɗe, gwan ge num fare janna go: Ge dape ḛ wa ka hee mbi pe ge fare go de? Ḛ gene mbi silay ya ɗu mbi ndi ne gale. 16Àa gene ne silay ya ɗu. Ele num go: Pagal mage kaŋ njaŋeya mbe ge ne ta ma huɗi ne ma ne de? Àa gwan ge ne janna go: A Sezar ne ma ne. 17Sok mbe go, jan num go: Kaŋ ge go na ge Sezar nee ne, ḛ ho̰ ne ne, ge go na ge Dok nee ne, ḛ ho̰ Dok ne kaŋ me. Ge ne fare janna mbe ta, àa gaa a̰a̰le maa wa ndil ta.

Fare eleya ge tanna ge nda ge swày ma way pagal

Mat 22.23-33; Luk 20.27-40

18 Saduki ma, num mbe ge hate go tanna ge nda ge swày ma way to ma, gwan ta ya Zeso ta, àa ele ne go: 19Ba ge hate nda, Moyiz ho̰ i na wa ge maktub ge Dok ne zì go: «Kaɗɗa ndu son mage ndu gwale kaɗ zok ya, ndu son wan suu, n̰a kumu be van, ago ne na̰ van hee gwale kumu mbe, ne ke na na̰ van mbe ge suu rusu.»#Dwa 25.5. 20Ḛ za̰a̰, nda a̰me ma kaa ta pe go nda soɗob ɓỳala na̰ van ge ba ɗu mage na̰ ɗu. Ge pul sway san gwale, wan suu be n̰a rusu a̰me. 21Ge zi ame kumu mbe, gwan suu be n̰a rusu a̰me. Ge taa ame ne, gwan suu mbe go waɗme. Fare mbe pe mbo ya kee na̰ van ge ɓỳala mbe ma mɔɗwag. 22A̰me ɗu ge num ge ɓỳala mbe ma buwal zì, be n̰a rusu ge gwale mbe to. Ge num guwa̰ go peɗ, gwale mbe wan suu ge num pe ya waɗme. 23Ajo̰o̰ go num mbe ge ɓỳala ma mɔɗwag kaa zok ge ne, mbo kaɗ dee ge diige gwale ne ge dwam tanna ge nda ge swày ma way go ɗaŋ de? 24Zeso jan num go: Ajo̰o̰ ḛ wan Njaŋeya ge Dok ne koo pool ge ne ne kaŋ ge mbiya keeya pe to ɗe, a ge pe, fare ge ḛ jan go nda ge suu ma mbo tan to ɗe, a ge na vin̰a go to. 25Ago, ge dwam tanna ge nda ge swày ma way go, nda soɗob mbo kaɗ ge gwale ma to, koo nda zaab kaɗ ge obe ma to me. Ɗaŋɗe, àa mbo kaɗ dinna ge malayka ge no ge pḭḭ zì yà ma go. 26Kaɗɗa ge tanna ge nda ge swày ma way ɗe, mbi ge kuwaya tyatyaɗ go ḛ isi ne ya ge maktub ge Moyiz ne zì. Fare ge Dok jin̰a ne num ma, ge kore za̰a̰l zì ya go: «Mbi, mbi Dok ge Abraham ne, Dok ge Isak ne, Dok ge Jakob ne me.»#Waz 3.6. 27Ago Dok mbe, a Dok ge nda ge ndwa ma way ne, a be Dok ge nda ge swày ma way ne to. Koo nda ge suu wal ma, àa ge ndwa ge Dok ta. A ge pe, ḛ n̰aame no.

Wa yuwaleya ge ne fare no walay nde ge na ka̰a̰m

Mat 22.34-46; Luk 10.25-37; Rom 13.8-10

28Ɗu ge nda ge hate eeya ge Moyiz ne ma buwal zì, ge kaa sok mbe go, za̰a̰ Zeso mage Saduki ma fare pee ta mbe, seɗ go ne guwa̰ num fare janna kwaɗa. Sok ge guwa̰ tene ya ge ne ta zì, ele ne go: Wa yuwaleya ge ne fare no walay nde ge na ka̰a̰m ge diige de? 29Zeso gwan ge ne janna go: Wa yuwaleya ge ne fare no walay nde ge na ka̰a̰m no: «Ḛ za̰a̰ Izrayel van ma, Bagezok, Dok ge nè ne, a ne sḛ ne melaw ɗu kikiɗ Bagezok. 30Mbiya go mo laa wa̰a̰ mo Bagezok Dok ge amo, ge mo dul wa mɔɗwag, ge mo sḛ mɔɗwag, ge mo dwaɗɗa mɔɗwag me.»#Dwa 6.4-5. 31Ge zi no: «Mo laa mbo wan mo kon dinna ge mo laa wa̰a̰ tene go.» Wa yuwaleya a̰me ge ɗogle ge walay waɗe num ge zi mbe ma no to.#Lev 19.18. 32Ndu ge hate eeya ge Moyiz ne, jan ne go: A kwaɗa Ba ge hate nda, mo jin̰a fare ge fareba: Ago a Dok sḛ ne melaw ɗu, ndu a̰me ge ɗogle dinna ge ne go to.#Dwa 6.4. 33Mbiya go mo laa wa̰a̰ ne, ge mo dul wa ɗu, ge kaŋ keeya ge amo ma zì peɗ me. Mo laa wa̰a̰ mo kon dinna ge mo sḛ go. Ago, ano mbe no, waɗe tuwaleya ge tilla mɔɗwag ma peɗ, ge tuwaleya gegene ma peɗ, ge nè mà kee num ya hon Dok ma waɗe.#Dwa 6.5. 34Zeso kuwa go, ne guwa̰ na vinna mbe ge andaŋ, jan ne go: Mo kaal ge muluk ge Dok ne to. Àa ngwabe, ndu a̰me da gwan tal tene ele ne fare a̰me ɗu ge guwa̰ to baɗ.

Krist huɗi ne de?

35Zeso ɗege hate nda fare ge zok ge Dok ne zì, ele num go: Ge dape, nda ge hate eeya ge Moyiz ne ma wa ka janna go Krist, Ndu ge Dok taa ne, ne Daviɗ Baŋ ne boo de? 36Daviɗ sḛ ge na pagal, On̰om ge Harcal ee ne janna go:

«Bagezok Dok jin̰a mbi Bagezok go:

Mbo ya kaɗ ge mbi tok matoson pagal go,

Ɗiŋ ge go mbi ee mo nda ge ho̰o̰l ma

Gwan maa pagal ge mo ko pul se.»#Mkm 110.1.

37Daviɗ sḛ ge na pagal, tol Krist, Ndu ge Dok taa ne go, na Bagezok-noo, kee mà pe gyana, ne Bagezok mbe wa gwan seŋe kaɗ ne baŋ de? Tabeya ma kaa ge ene ge za̰a̰ Zeso.

Mḛḛreya ge Zeso mḛḛre nda ge hate eeya ge Moyiz ne ma

Mat 23.1-14; Luk 20.45-47

38Ge sok hate nda go, Zeso ka jan num go: Ḛ koy ta kwaɗa ge nda ge hate eeya ge Moyiz ne ma ta, num laa wa̰a̰ anna ge ba̰a̰ ga̰a̰l ma ndwa ngay ta, wa sanna ge hormo ge sok ɓase ma go, 39sok kàɗɗa ge nda ndwa zḛḛge ma, ge zok kee kaɗeya ge Yahuɗ ma way ma zì, sok kàɗɗa ge nda ge hormo ma way ge sok vḛḛso zam kaŋ zam ma go me. 40Àa aa nda zaab ge kumu ma tok zamma ge num zok ma diŋ, àa ka kee kaɗeya twala lindiŋ ndwa ngayya go maa nda ge kee Dok kwaɗa ma ne. Ge kaŋ keeya ge go mbe pe, Dok mbo wan num ge sariya ge ndaa kaka.

Bobo ge gwale kumu ne

Luk 21.1-4

41Guwa̰, Zeso mbo ya ge zok ge Dok ne zì, kaɗ ge kaŋ ge nda dol bware ne zì ndwa nga. Ka ndil ɓase ma dolla ge àa dol bware no ge kaŋ dol bware mbe zì. Nda ge pwal ma ka ɓyan maa tok pe zum gḛḛ, ge sok dol bware go. 42Gwale kumu a̰me ɗu ge gaa ɔg go, mbo ya waɗme, kan na soŋo van ma zi, ge ne zì. A be bware ge gḛḛ ne to peɗ. 43Sok mbe go, Zeso tol na nda ge ame hateya ma, jan num go: Fareba mbi jan ḛ ne no, gwale kumu ge gaa ɔg go mbe no, ho̰ kaŋ waɗe num ge ɓyan maa tok pe no zum ge kaŋ dol bware zì ma. 44Ago, nda gegene ma peɗ ho̰ kaŋ wa boyo ge maa bware ma way boo, ɗaŋɗe, ne sḛ ho̰ kaŋ ge no na tok go ge ɓul mɔɗwag, kaŋ mbe ge na kaa no ge ne pe ndwa dol dwam.

Pilihan Saat Ini:

Mark 12: kiaGRB

Sorotan

Salin