Mark 1

Fare oyya ge Yohana ba ge kee nda baptem ne

Mat 3.1-12; Luk 3.1-18

1Fare ge maktub mbe no ne, faa Fare ge Kwaɗa ge Zeso Krist ge Dok Van ne. 2Ano mbe ee pe ge mojo̰o̰ ndu ge zwagre Dok wa Ezay njaŋe ne ge na maktub zì go. Njaŋe zì go, Dok jin̰a go:

«Kuwa, mbi teme mbi ndu ge vin̰a

Ge mo ndwa zḛḛ yà, ndwa go ne nuusi mo vin̰a.#Mal 3.1.

3Ano a ka̰a̰l ge ndu ge oy no ge babur pul go nee ne, jan go:

Ḛ ca vin̰a ge Bagezok pe, ḛ haa vin̰a ma temel ge ne pe me!»#Eza 40.3. #1.3 Ca vin̰a mage ɗaɗe vin̰a ma, a nuusi ta koo nuusi nè dul wa ma ndwa ame Bagezok Zeso Krist.

4Ge fare janna mbe no pagal, Yohana zuu ya ge babur pul go no, ka kee nda baptem no, ka oy fare no go: Ḛ seŋe ta se, mbi wa kee ḛ baptem ndwa go Dok wa pore ḛ ge ḛ kaŋ keeya ge sone ma go gezi. 5Nda ge kaa no ge suwa ge Jude ne go ma peɗ, ge nda ge kaa no suwal ga̰a̰l Jerusalem diŋ ma peɗ me, àa ka mbo ya za̰a̰ ne no, àa ka jan maa sone ma zum no, ne sḛ ka kee num baptem ge mangaɗam Urdun se no me.

6Yohana ka̰a̰ ba̰a̰ ge àa kê ne ge jambal ge jujul zi susu ge na ta, kaɗ ge hoo dab vwalla ge na pul go. Ka wal tene ge tere mage daram nùm ge ful zige ma. 7Ka oy fare janna go: Ndu a̰me mbo ge mbi guwa̰ ya, ne pool waɗe mbi waɗe, mbi be mbyaɗ hugi se saa ne tyako tàal ma to. 8Mbi, mbi kee ḛ baptem ge mam se, ɗaŋɗe, ne sḛ mbo kee ḛ baptem ge On̰om ge Harcal.

Baptem keeya mage pe heeya ge Zeso Krist ne

Mat 3.13-17; 4.1-11; Luk 3.21-23; 4.1-13

9Dwam a̰me ɗu, Zeso ɗege ge suwal ga̰a̰l Nazareɗ diŋ, ge suwa ge Galile ne go, mbo ya ge Yohana ta. Yohana kee ne baptem ge mangaɗam Urdun se. 10Sok ge ka ndee ge mam se ya, kuwa pḭḭ ma hageya gezi, On̰om ge Harcal siri ya se ne pagal dinna ge maale go. 11Nda za̰a̰ ka̰a̰l a̰me ge pḭḭ ma zì ya, janna go: Mo mbi Van ne, mbi laa wa̰a̰ mo gḛḛ, mbi sḛ kee tii gḛḛ ge mo pe. 12Sok mbe go gaw, On̰om ge Dok ne ee ne mbo ɗiŋ ge babur pul yà. 13Sok ge kê dwam warndà ge sok mbe go, Saytan ka hee ne pe. Kaa ge sok ge kavaar ma no go, malayka ge Dok ne ma mbo ya ge ne ta, àa ka kee tèmel hon ne me.

Tolla ge àa too nda geame hateya ge ndà ma

Mat 4.12-22; Luk 4.14-15; 5.1-11; Yoh 1.35-43

14Guwa̰, àa wan Yohana, ba ge kee nda baptem, àa dol ne ge daŋay zì. Sok mbe go, Zeso ɗege, mbo ge suwa ge Galile ne yà, ka oy Fare ge Kwaɗa ge Dok ne, 15ka janna go me: Sok ge Dok mbo ya kee muluk ḛ pagal mbyaɗ-ɗa go, ḛ seŋe ta se, ḛ ho fareba ge Fare ge Kwaɗa ta.

16Sok ge ka kale mboya ge mangaɗam ga̰a̰l ge Galile ne wa go, kuwa Simo̰ mage na na̰ van Andre, àa wa ya dol kuwal, ago, àa kaa nda ge swaɗ soso ma ne. 17Jan num go: Ḛ gaa kàre mbi pe. Ajo̰o̰ ḛ nda ge wan sini ma ne, mbi mbo seŋe ḛ nda ge gene nda duwana ma ya ge mbi ta ma. 18Ge sok mbe go gaw, àa n̰a maa kuwal ma, àa kàre ne pe ya me. 19Sok ge mbo zḛḛ yà kaal nde, kuwa Zebede van ma: Jak mage na na̰ van Yohana, àa wa ya kàɗɗa ge faa go zoo maa kuwal ndwal ma. 20Sok ge ka̰a̰ na ndwa kuwa num, avun cab, tol num, àa n̰a maa ba Zebede ge faa yà ɓanna ge nda ge àa wa̰a̰ num ya kee maa tèmel ma, àa kàre ne pe ya me.

Zonna ge tuguɗi ma way pe hini-hini

Mat 8.14-17; Luk 4.31-44; Tkt 10.38

21Àa ɗege ge sok mbe go, àa mbo suwal ga̰a̰l Kapernawom yà. Ge dwam sabaɗ go, Zeso waɗ ge zok kee kaɗeya ge Yahuɗ ma way zì, ka hate nda me. 22Nda ge ka za̰a̰ ne ma ka kee ajab ge ne fare hateya mbe ma pe, ago, ka hateya ge pool ge Dok ne, be ge nda ge hate eeya ge Moyiz ne ma go to. 23Ge sok ge ka hate fare go, ndu a̰me ɗu ge kaa ge on̰om ge sone na zì wa ya ge zok kee kaɗeya ge Yahuɗ ma way zì. Ka oyya go: 24Zeso ge suwal Nazareɗ ne, mo ɓyare da ge i ta de? Mo mbo ya ndwa ban i gezi de? Mbi kuwa mo kuwa tyatyaɗ. Mo Ndu ge Harcal ge Dok teme ne ya ne. 25Zeso ngwabe ne ol kekeŋ, jan ne go: Zane mo wa, wuwa zum ge ndu mbe zì. 26On̰om ge sone mbe ka pil ne zazan̰, sok ndage zum ge ne zì go, ka oy digi ge ka̰a̰l ndaal me. 27Voo mbo ya wan nda ge kaa sok mbe go ma peɗ, ge àa gaa ele ta ta buwal zì go: Ḛ gale ndi ɗoo me! Hon na hateya mbe ge pool ɗoo! Koo on̰om ge sone ma puy, hoɗ num na wa ge pool ɗoo. On̰om mbe ma me, àa ka gwan maa pagal ge ne pe se ba! 28Sok mbe go, ne dḭḭl mbo ya dasare ge suwa ge Galile ne pagal peɗ. 29Sok ge wuwa ge zok kee kaɗeya ge Yahuɗ ma way zì ya zum, mbo ge Simo̰ mage Andre yà ɓanna ge Jak mage Yohana. 30Sok ge àa dee yà, mbɔgwam dol Simo̰ tisi ge gwale ya se. Avun cab, àa jan Zeso ne fare. 31Gwan tene ge ne ta zì, wan ne tok digi mḛḛya, mbɔgwam jay ge ne ta, ne sḛ ɗege kee kaŋ zam hon num. 32Guwa̰ ge gyala dḭḭ se go, àa gene ne nda ge kee tuguɗi mage nda ge no ge on̰om ge sone maa zì ma ya peɗ me. 33Nda ge suwal ga̰a̰l diŋ-ge ma peɗ kwate ya ge zok mbe wa go. 34Ge sok mbe go, zon nda ge kee tuguɗi ma gḛḛ, ge ka njoɗ yal ge tuguɗi ma pe hini-hini me. Yan on̰om ge sone ma gḛḛ gezi waɗme, ɗaŋɗe, be n̰a on̰om ge sone ma jan fare to, ge dape, àa kuwa kuwa go ne Zeso ne. 35Lee aaram pagal, sok gale wa ya pisil pupurum, Zeso waɗ zum ge suwal diŋ, mbo ge sok babur a̰me, ge kṵwa̰ no go to yà, ɗege kee kaɗeya. 36Simo̰ ɓanna ge nda ge kaa dagre ge ne ma ɗege haa ta ɓyare ne pe. 37Sok ge àa see ne, àa jan ne go: Nda peɗ ɓyare mo go. 38Gwan ge num janna go: Ḛ mbo nè sok ge ɗogle, ge suwal van ge jiyale guguwa ma diŋ. Ɓyare go mbi oy fare ge suwal mbe ma diŋ waɗme, ago, mbi mbo ya ge ano mbe no pe. 39A mbe go no, a̰a̰ ge suwa ge Galile ne pagal no peɗ, ka oy fare ge zok kee kaɗeya ge Yahuɗ ma way ma zì no, ka yan on̰om ge sone ma gezi no me.

Zonna ge ndu ge kṵṵ swàm ne

Mat 8.2-4; Luk 5.12-16; 17.12-19

40Guwa̰, ndu ge kṵṵ swàm a̰me ɗu mbo ya ge ne ta, guu na ko ge ne ndwa se, gwarge tene ge ne ta, jan ne go: Kaɗɗa mo vinna, mo ge pool zon mbi, mbi wa haɗ kɔn̰al. 41Zeso kuwa ne a̰se, ee na tok ge ne ta, jan ne go: Mbi vin-na go, see zonna, mo haɗ kɔn̰al. 42Sok mbe go gaw, ndu ge kṵṵ swàm mbe seɗ zonna, ne bol haɗ somndol mbambala, haɗ kɔn̰al me. 43Guwa̰ go, Zeso ndiri ne tɔgwa ge fare mbe ma pagal, 44jan ne go: Fare mbe no, ne kaa ge mo jan ndu a̰me ne to, ɗaŋɗe, mbo ngay tene ge ba ge kee tuwaleya ta, mo hon ne kaŋ ge kee tuwaleya, ge eeya ge Moyiz njaŋe ne pagal, ndwa go nda kuwa peɗ go mo zon-na go, mo haɗ-ɗa kɔn̰al. Guwa̰ ge jin̰a ne fare ge ndaa kaka mbe go, n̰a ne mboya. 45Ndu mbe, sok ge wuwa ya zum gaw, ɗege oy fare mbe digi ge ka̰a̰l ndaal, dasare fare mbe ge nda ta peɗ, kaɗ ge go Zeso daa gwan seɗ vin̰a ge waɗ ge suwal ga̰a̰l a̰me diŋ daa to. Gaa kàɗɗa ge suwal guwa̰ zum yà, sok ge nda kaa no num go to ma go. Nda ka mbo ge sok ma ya peɗ ge ne ta.

Pilihan Saat Ini:

Mark 1: kiaGRB

Sorotan

Berbagi

Salin