Mata 27

Seɗ ta aaram pe vḛḛ ge Yahuɗ ma ga̰a̰l ge kun sariya ma way

Mrk 15.1; Luk 22.66-71; 23.1

1Sok ɓaa ya gezi, ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma mbo ya seɗ ta ge Zeso fare pagal, àa za̰a̰ ta go maa hṵṵ ne gezi. 2Guwa̰ ge àa vuwa ne go, àa gene ne mbo ɓyan ge goformo̰ Pilaɗ tok yà.

Swày ge Yudas ne

Tkt 1.16-20

3Sok ge Yudas, ndu ge ɓin̰a Zeso gezi za̰a̰ go sariya wan ne ya go, fare mbe kee ne yal, gwan ge silay tapool ɗu mbe ma ya hon ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma. 4Jan num go: Mbi kee sone, sok ɓyan ndu ge be fare na pagal gezi go. Àa gwan ge ne janna go: Be paa i zì daa to, ano a mo fare ne. 5Yudas kan num, num silay ma ge zok ge Dok ne pul se yà, chiya mbo kan tàal ge na ka̰a̰l zì, hun tene gezi. 6Ga̰a̰l ge nda ge kee tuwaleya ma way ma ɔwabe silay mbe ma, àa jan ta go: Nè wa yuwaleya ma hon nè vin̰a ge gwan ge num kanna ge zok ge Dok ne sok koy bware zì to, ndwa go a yee ge swàm nee ne. 7Guwa̰ ge àa vḭḭ ta ge fare mbe no pagal, àa mbo yaɗ gaaso ge ndu ge sin il ne, ge bware mbe ndwa go ne gaa sok mbul ta ge nda ge gɔswal ma pe. 8A ge pe no, àa tol gaaso mbe ɗiŋ màno go, ne gaaso ge swàm nee ne. 9A mbe go no, fare janna ge ndu ge zwagre Dok wa Jeremi ne ma wa huy no, sok ge jin̰a go: Àa ɔwabe silay ge tapool ɗu ma, bware ge Izrayel van ma duwa honna ge ne pagal ne, 10àa ho̰ num ge yee ge gaaso ge ndu ge sin il ne pagal, dinna ge Bagezok ho mbi na wa ne pagal, ndwa jan num ne go.#Zak 11.12-13.

Zeso ge goformo̰ Pilaɗ ndwa se

Mrk 15.2-20; Luk 23.1-4, 13-25; Yoh 18.28–19.16

11Àa gene Zeso ge goformo̰ ndwa se yà, ne sḛ ele ne go: Mo gan ga̰a̰l ge Yahuɗ ma way ne ɗaŋ de? Zeso gwan ge ne janna go: Mo jan ne no. 12Sok ge ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma ɗege ee fare a̰me ma ne pagal go, gwan ge num fare janna pagal ɗu to. 13Sok mbe go, Pilaɗ jan ne go: Mo za̰a̰ fare ge àa ee num no mo pagal ma go ɓade? 14Ano peɗ puy, Zeso gwan ge ne fare janna, ge fare eleya a̰me pagal ɗu to baɗ, ano mbe kee goformo̰ ajab gḛḛ ge be to.

Sariya swày kunna ge Zeso pagal go ge

15Ge vḛḛso ge Paska ne ma go tatab, goformo̰ ha̰a̰le dol ndu ɗu zum ge daŋay zì, ge laa ɓyareya ge ɓase ma way pagal. 16Sok mbe go, ndu ge daŋay a̰me ɗu, ge nda ka faa ge ne dḭḭl, àa ka tol ne Barabas. 17Ajo̰o̰ nda kwate ya gḛḛ go ɗe, Pilaɗ ele ɓase mbe ma go: Mbi ɓyare dol ndu ɗu ge daŋay zì ya zum, ḛ ɓyare go mbi doo ḛ ya zum huɗi, Barabas koo Zeso ge àa tol ne Krist, ndu ge Dok taa ne de? 18Ago, Pilaɗ kaa ge kuwaya tyatyaɗ go, ne yil ee num ne ɓyan na Zeso ya gezi. 19Ne sḛ gale sok kee sariya go, ne gwale ee tèmel ya, àa jin̰a ne go, ne pa tene ge ndu mbe fare zì to, ne ndu ge temel ne. Ago, mà ɗaal no, kin̰a vuuɗi na gḛḛ ge ne pe. 20Ga̰a̰l ge nda ge kee tuwaleya ma way mage Yahuɗ ma ga̰a̰l ge ɗeme num ma paa fare ge ɓase ma zì num ele go, àa doo maa Barabas, àa hṵṵ Zeso gezi me. 21Goformo̰ hee fare jan num go: A huɗi ge num ge zi mbe ma buwal zì, ḛ ɓyare go, mbi doo ḛ ne ya zum ge daŋay zì ya ne de? Àa gwan ge ne janna go: Barabas. 22Goformo̰ Pilaɗ jan num go: Ḛ ɓyare go mbi ke ge Zeso ge àa tol ne Krist, ndu ge Dok taa ne gyana de? Àa gwan ge ne janna mɔɗwag go: Pee ne ge ɔwara kaŋre ta digi. 23Goformo̰ gwan ele num go: «Kee ma̰ sone de?» Àa gwan oy digi ge ka̰a̰l ndaal waɗeya go: «Pee ne ge ɔwara kaŋre ta!» 24Sok ge Pilaɗ kuwa go fare mbe tane na go ndwa me no, ɓase ma haɗ sok ya digi sḭ̀ḭl giliw me ɗe, zal mam, usi na tok ma ge ɓase ma ndwa go peɗ, jan go me: Mbi tok ge swày ge ndu ge temel mbe no ne zì to. Ano gaa ḛ fare. 25Ɓase ma peɗ gwan ge ne janna go: N̰a ne swàm kaa ge i ge i van ma pagal! 26Sok mbe go Pilaɗ dol num Barabas ya digi, guwa̰ ge àa dwagle Zeso ge bol baba, ɓyan num ne go, num mbo pel ne ge ɔwara kaŋre ta digi. 27Asagar ge goformo̰ ne ma gene Zeso ge ne sok kun sariya zì yà, àa kwate ta ya peɗ vee ne se me. 28Àa fwage ne ba̰a̰ ma ge ne ta gezi, àa kan ne ba̰a̰ ga̰a̰l kapoɗ ge kàal sasaw ge ne ta. 29Àa tiɗ balme ge gumi, àa kubi ne ge ne pagal, àa hon ne kɔn̰a ge ne tok matoson zì me. Guwa̰, àa guu maa ko ma ge ne ndwa se, àa ka jan ne go: I sa̰a̰ mo wa, gan ga̰a̰l ge Yahuɗ ma way. 30Àa ka too watwa ge ne ta, àa ka ɔwabe kɔn̰a, àa ka warge ne ge ne pagal digi. 31Guwa̰ ge àa lasage ne go, àa fwage ba̰a̰ ga̰a̰l kapoɗ ge ne ta gezi, àa gwan ge ne ba̰a̰ ma kanna ge ne ta, àa gene ne mbo pella ge ɔwara kaŋre ta digi.

Zeso ge ɔwara kaŋre ta digi

Mrk 15.21-41; Luk 23.26-49; Yoh 19.16-30

32Sok ge àa wuwa ya zum ge suwal ga̰a̰l diŋ ya, àa seɗ ndu a̰me ɗu ge suwal Siren ne ge àa ka tol ne Simo̰, àa ee ne ge pool in ɔwara kaŋre ge Zeso ne. 33Sok ge àa dee ya ge sok ge àa tol ne Golgota go, ge ne pe wanna no go: Sok ge dḭḭ pagal kal, 34àa hon ne on̰or jìn̰al kirgiya ge kaŋ a̰me zwala babag njoɗɗa. Ɗaŋɗe, sok ge tare ne go, kuri ne be njoɗɗa#27.34 On̰or jìn̰al kirgiya ge kaŋ a̰me ge zwala babag mbe ee ndu àa kee ne yal be kuwa yal ge àa kee na ne. A ne ge ee Zeso kuri nee ne, ndwa go, ne sḛ ɓyare na za̰a̰ yal ɗiŋ mbo wa yà.. 35Guwa̰ ge àa pee ne ge ɔwara kaŋre ta digi go, sok ɓyare vaa ta ne ba̰a̰ ma go, àa ee daŋ ta buwal zì, ndwa kuwaya go, ne huɗi seɗ ne ba̰a̰ ma mà ne de. [Ano mbe kee ndwa go, ndu ge zwagre Dok wa fare ge dee jin̰a ma wa huy: Àa vâ ta mbi ba̰a̰ ma, àa ee daŋ ge mbi ba̰a̰ ga̰a̰l kapoɗ pe no]. 36Guwa̰, àa gaa kàɗɗa sok mbe go koy ne. 37Àa njaŋe kaŋ a̰me byalga go pella ne pagal digi, ndwa ngay kaŋ ge ee go, àa kṵṵ sariya swày ge ne pagal. Njaŋe digi go: Ndu mbe no a Zeso ne, gan ga̰a̰l ge Yahuɗ ma way. 38Sok mbe go, àa pel nda ge fiiri vin̰a ma zi ge ne waɗme, ge diige ge na kaŋre ta, ɗu ge ne tok matoson go, gegene ge ne tok magul go me. 39Nda ge ka kale mboya ge sok mbe go ma ka pisigi maa pagal, àa ka sal Zeso, 40àa ka janna go: Mo ge gul zok ge Dok ne se, mo gwan sin ne digi ge dwam ge taa ma pul zì baba, mo̰o̰ tene sḛ gale ɗaŋ! Kaɗɗa mo Dok Van ne, ka̰a̰ mo ko ge ɔwara kaŋre ta digi ya se. 41Ga̰a̰l ge nda ge kee tuwaleya ma way ma, nda ge hate eeya ge Moyiz ne mage Yahuɗ ma ga̰a̰l ge ɗeme num ma ka lasage ne waɗme, àa ka janna go: 42Mon nda ge ɗogle ma ɗag, ne mo̰o̰ tene sḛ gale ɗaŋ! Kaɗɗa na gan ga̰a̰l ge Izrayel ma way ne, ne ka̰a̰ na ko ge ɔwara kaŋre ta digi ya ge sego, i mà hoɗ fareba ge ne ta. 43Isi ge Dok pagal ɗeŋew ɗe, kaɗɗa Dok laa wa̰a̰ ne wan, ne mo̰o̰ ne ge sego ɗaŋ. Kaɗ jan dana go: Mbi Dok Van ne. 44Nda ge fiiri vin̰a ge àa pee num kaŋre ta ne ziya ma puy, àa ka sal ne mbe go waɗme. 45Sok mbo ya saa se tṵṵ ɗeɗeg ge suwa pagal peɗ, ge gyala pɔgwa go ɗiŋ mbo gyala swa saa. 46#Mkm 22.2.Sok ge gyala swa saa mbiya go: Zeso oy ge ka̰a̰l ndaal go: Eli, Eli, lama sabaktani, ne pe wanna go: Dok ge mbi, Dok ge mbi, ge dape, mo wa seŋe mbi mo guwa̰ go de? 47Nda a̰me ge kaa sok mbe go ma za̰a̰ ne, àa ka janna go: Ḛ za̰a̰ a tol Eli go ne chiya na kṵwa̰ ba! 48Ndu a̰me ɗu ge num buwal zige, chiya gaw mbo hee chifo̰ ya, paa ne ge on̰or jìn̰al ge haɗ-ɗa ka̰a̰mal pagal, tyal ne ge kɔn̰a wa zì, tare ne ne digi yà njoɗɗa. 49Ɗaŋɗe, nda gegene ma jan ne go: N̰a ne gale, nè ndi go, Eli mà mbo ya mon ne de. 50Zeso gwan oy digi ge ka̰a̰l ndaal, ne on̰om ndage me. 51Ge sok mbe go gaw, ba̰a̰ ge vâ zok ge Dok ne pul, taabe tene se buwal zi ge digi ya ɗiŋ mbo se, suwa ndaɗ, njal ma mbo ya wage ta se, 52tugul swày ma wa hage ta gezi, nda ge ho fareba ge dee suu ma gḛḛ mbo ya tan digi. 53Guwa̰ ge Zeso tanna ne go, àa waɗ-ɗa zum ge maa tugul swày ma zì ya, àa mbo ge suwal ga̰a̰l ge harcal diŋ yà, àa dyan ta ge nda ndwa go gḛḛ. 54Sok ge ga̰a̰l ge asagar ge kis ma way mage na nda ge maa ge num kaa dagre koy Zeso ma kuwa suwa ndaɗɗa mage kaŋ ge kê ma peɗ go ɗe, voo ge ɓaŋlaŋ mbo ya wan num, àa ka janna go: «Fareba, ndu mbe no, a Dok Van ne.» 55Nda zaab kaɗ sok mbe go gḛḛ, num ge kàre Zeso pe ge Galile ya ndwa mbaa ne ge tèmel ma, àa mḛḛ ge zum ya kaal day ndil sok. 56Ge num buwal zì, Mari ge Magdala ne kaa, Mari ge Jak mage Jozef na̰ ɓanna ge Zebede van ma na̰ kaa me.

Eeya ge Zeso duul ne ge tugul swày zì

Mrk 15.42-47; Luk 23.50-56; Yoh 19.38-42

57Sok ge gyala wa ya be dinna se, ndu ge seɗ kaŋ a̰me ɗu ge suwa Arimate ne, ge àa tol ne Jozef, ge kaa ndu ge ame hateya ge Zeso ne waɗme, deɗ-ɗa me. 58Mbo ge Pilaɗ ta yà, kaɗe ne, ne mà kaɗ ge hon na Zeso duul swày nde de. Sok mbe go, Pilaɗ hoɗ na wa go, a ho̰ ne ne. 59Jozef hee duul swày mbe, warge ne ge pakta jin̰al zì, 60mbo ee ne ge tugul mbul ta ge àa gale câ ne jin̰al ge njal zì. Guwa̰, viŋri njal ge ga̰a̰l ya ɗu, mbo ya dibi tugul mbe wa digi ge ne, dol tene mbo ya me. 61Mari ge suwal Magdala ne mage Mari gegene go kàɗɗa sok mbe go, ge tugul wa nga.

Koyya ge tugul swày wa ne

62Sok yan kin̰are, ajo̰o̰ na dwam ge mbo ya nuusi vḛḛso ge Paska nee ne ndwa go dwam ge menengal, ga̰a̰l ge nda ge kee tuwaleya ma way mage Farisi ma ɓan dagre mbo seɗ Pilaɗ, 63àa jan ne go: Bagezok, i dwaɗ ge fare a̰me ge ndu ge hày gḛḛ mbe dee jin̰a ne pagal, sok ge gale wa ya ge na ndwa nè buwal zì go go: Dwam taa guwa̰, mbi mbo tan digi. 64Ho mo wa go, asagar ma num koy tugul swày wa ɗiŋ dwam taa, ne kaa ge go ne nda ge ame hateya ma mbo ya chel ne duul swày ɗoo, num mbo jan ɓase ma go: Tanna go ge swày se! Num hày kunna ge guwa̰-ge mbe, mbo kaɗ sone gḛḛ waɗe ge wal#27.64 Hày ge wal, a fare ge Zeso ka janna go na Krist, ndu ge Dok taa nee ne.. 65Pilaɗ jan num go: Ḛ sḛ ma go ge nda ge koy sok ma, ḛ mbo ɓyare vin̰a ge koy tugul mbe wa, ge mojo̰o̰ ḛ ɓyare go. 66Àa kan ta mboya, àa mbo ndilla go tugul wa koy go, àa nuusi ne wa dibiya ɓereɗ, àa n̰a asagar ma ne wa go.

Pilihan Saat Ini:

Mata 27: kiaGRB

Sorotan

Berbagi

Salin