Mata 25

Fare sḭḭ ge van kale ge wol ma way

1Go mbe no, muluk ge Dok ne mbo kaɗ dinna ge fare ge van kale ge wol ma way go, num ge hê maa lampe ma ndwa mbo ge gwale jin̰al obe ndwa zì yà. 2Ago, ge num mbe ge wol ma buwal zì, nuwan̰ kaa nda ge dàle ma, ge nuwan̰ gegene ma kaa nda ge zwam ma me. 3Ge sok hee maa lampe ma go, ge dàle ma mbô be nùm ge maa tok go. 4Nda ge zwam ma me ɗe, àa hee maa lampe ma, àa mbô ge nùm ge maa faal ma zì me. 5Ajo̰o̰ gwale jin̰al obe pagal wa̰a̰ gḛḛ ɗe, van kale mbe ma mɔɗwag mbô ya lwageya, àa dol dwam galgatag. 6Ge ɗaal ga̰a̰l zì, àa za̰a̰ ka̰a̰l oyya kolol go: Na! Gwale jin̰al obe yan ja no, ḛ wuwa ya zum mbo ne ndwa zì! 7Sok mbe go gaw, van kale mbe ma mɔɗwag kore digi, àa dun maa lampe ma digi. 8Guwa̰ swag, nda ge dàle ma ele ge zwam ma go: Ḛ ho̰ i ḛ nùm nde, ago i lampe ma piri go piri. 9Nda ge zwam ma gwan ge num janna go: Nùm mbe mbyaɗ nè mɔɗwag to, ke kwaɗa go, ḛ mbo ge nda ge seŋe tok ma ta, ḛ yaɗ ge ta pe me. 10Sok ge àa mbô ɓyare nùm go, gwale jin̰al obe yan-na num guwa̰, num mbe ge kaa nuusiya ma waɗ ge sok vḛḛso sanna zì dagre ge ne. Àa dibi zok wa ya maa pagal ge kòko. 11Guwa̰ go fyalag, van kale gegene mbe ma yan-na waɗme, àa tol sok go: Bagezok, Bagezok, hage i zok wa. 12Ɗaŋɗe, gwale jin̰al obe gwan ge num janna go: Fareba mbi jan ḛ ne no, mbi kuwa ḛ to. 13Zeso gwan jan num go, ajo̰o̰ ḛ kuwa dwam koo ler to ɗe, ḛ kaa jejew.

Fare sḭḭ ge nda ge tèmel ge taa ma way

Luk 19.12-27

14 Muluk ge Dok ne mbo kaɗ dinna ge ndu ge ɗege mbo gɔswal go. Sok ɗege mbo gɔswal go, tol na nda ge tèmel ma ya na ndwa se, n̰a na kaŋ kwaɗa ma ge num tok go. 15Hon ndu ge diige kaŋ ge ne pool pagal tem. Hon ndu ge zḛḛge bware ge àa tol ne tala̰#25.15 Tala̰ ɗu guwa ge miliyo̰ ɗu ge bware ge go go ge, a bware ge gḛḛ ne. nuwan̰, ndu ge zi, tala̰ zi, ndu ge taa tala̰ ɗu, dol tene mbo gɔswal. 16Sok ge ndu ge tèmel ge zḛḛge see na tala̰ mbe ge nuwan̰ ma gaw, mbo seŋe na tok ge num, seɗ bware tala̰ ya ta pagal nuwan̰ me. 17Ndu ge zi, kee ge mojo̰o̰ na kon ge zḛḛge go, seɗ bware tala̰ ge ɗogle ma ya ta pagal zi me. 18Ndu ge see bware tala̰ ɗu mbo al sok ge suwa zì, way bware tala̰ ge na ndu ge zok ne mbe se. 19Num ndu ge zok mbe kee ya kaal nde, kan na ko, ɗege ele na bware ma pe. 20Ndu ge see bware tala̰ nuwan̰ mbo ya ge na ndu ge zok ndwa se, ge bware tala̰ ge ɗogle ma ta nuwan̰, jan go: Mbi ndu ge zok-goo, mo ho̰ mbi dee bware tala̰ nuwan̰, ge sego, mbi seɗ ge ɗogle ma ja pagal no ta nuwan̰. 21Ne ndu ge zok jan ne go: A gag, ndu ge tèmel ge kwaɗa, mo n̰a wa to. Mo kaa ndu ge ɗeŋer ge kaŋ ge hoɗege guwa ma zì, mbi mbo ee mo kàɗɗa ge kaŋ ge gḛḛ ceɗeɗ ma wa go. Mbo ya kee laa saal ge mbi dagre. 22Ndu ge see bware tala̰ zi mbo ya na ndu ge zok ndwa se waɗme, jan ne go: Mbi ndu ge zok-goo, mo ho̰ mbi dee bware tala̰ zi, ge sego, mbi seɗ ge ɗogle ma ja pagal no ta zi me. 23Ne ndu ge zok jan ne go: A gag, ndu ge tèmel ge kwaɗa, mo n̰a wa to, mo kaa ndu ge ɗeŋer ge kaŋ ge hoɗege guwa ma zì, mbi mbo ee mo kàɗɗa ge kaŋ ge gḛḛ ceɗeɗ ma wa go. Mbo ya kee laa saal ge mbi dagre. 24Ndu ge see bware tala̰ ɗu yan-na guwa̰ dwab, ge na ndu ge zok ndwa se, jan ne go: Mbi ndu ge zok-goo, mbi kuwa kuwa go mo ndu ge ndwa ndaa ne, mo syaɗ kaŋ ge mo zare ne to, mo kwate kaŋ ge mo in̰ale ne to me. 25A ge pe, voo wa̰a̰ mbi no, mbi mbo way mo bware tala̰ ge ɗu kikiɗ mbe ge suwa se no. Na! Mo kaŋ no, ame ne. 26Ne ndu ge zok gwan ge ne janna go: Ndu ge tèmel ge laa pisil, ge uwal sabtag! Mo kuwa kuwa go, mbi syaɗ kaŋ ge mbi zare ne to. Mbi kwate kaŋ ge mbi in̰ale ne to me. 27Ke kwaɗa daa go, mo mbo kan mbi bware tala̰ mbe ge sok koy bware zì yà. Mbi daa gwan-na no ɗe, mbi daa mà mbo ame ne ya zum ge mam. 28Ḛ ame ne bware tala̰ ge ɗu mbe gezi ge ne tok go ɗaŋ, ḛ hon ne ndu ge bware tala̰ wol ne. 29Ago ndu ge no go ge a̰me, àa mbo gwan hon ne ge kon pagal iya, ndwa go ne zuli se ceɗeɗ. Ɗaŋɗe, ndu ge no go be a̰me, koo ne ne ge fyalag ge no ne tok go puy, àa mbo ame ne, ne gezi. 30Kaɗɗa ge ndu ge tèmel ge mbaa a̰me pe to mbe no, ḛ doo ne ge tṵṵ ge ɗeɗeg zum yà, sok ge nda oy fiyaso mage sul kin̰a no ne go.

Sariya kunna ge guwa̰ dwab

31Sok ge Van ge ndu ne mbo gwan ja ge pateya ge na ne, ɓanna ge na malayka ma peɗ, mbo kaɗ ge hòol muluk ge na ne ge pool pagal. 32Pe rusu ge suwa pagal ma peɗ mbo twage ya ne ndwa se. Mbo caɗe nda duwana ma se pe zi, ge mojo̰o̰ ba ge koy kaŋ kogor ma caɗe tame mage ɓin̰a ma buwal se go. 33Mbo kwate tame ma ge na tok matoson pagal, ɓin̰a ma ge na tok magul pagal me. 34Ge sok mbe go, gan ga̰a̰l mbo jan nda ge mbo kàɗɗa ge na tok matoson pagal ma go: Ḛ mbo ya, ḛ ge Dok kê ḛ wa tare ma, ḛ za joo#25.34 Joo koo zam joo ge muluk ge Dok ne, ago mo waɗ ja Dok van ma buwal zì. ge muluk ne mbe ge àa ee ne ge ḛ pe ge dunin̰a pe dolla ya day. 35Ge dape, camal kê mbi, ḛ ho̰ mbi kaŋ zam no. Mam njuwal kê mbi, ḛ ho̰ mbi mam njoɗɗa no. Mbi kaa gɔswal ḛ buwal zì, ḛ ame mbi ḛ zok ma diŋ no. 36Mbi kaa swala, ḛ lâ mbi pe no. Tuguɗi ka kee mbi, ḛ mbo ndil mbi no. Mbi kaa ge daŋay zì, ḛ mbo kuwa mbi ndwa no. 37Ge sok mbe go, nda ge kee laa ɓyareya ge Dok ne ma mbo gwan ge ne janna go: Bagezok, a ge mà sok go ɗoo, i kuwa no go mo camal, i ho̰ mo kaŋ zam no de? Koo i kuwa mam njuwal ka kee mo ɗoo, i ho̰ mo mam njoɗɗa no de? 38A ge mà sok go ɗoo, i kuwa no go mo gɔswal ne, i ame mo i zok ma diŋ no de? Koo ge mà sok go swala ɗoo, i lâ mo pe no de? 39A ge mà sok go ɗoo, i kuwa mo kee tuguɗi no de? Koo lee dii ge daŋay zì ɗoo, i mbo kuwa mo ndwa no me de? 40Gan ga̰a̰l mbo gwan ge num janna go: Fareba mbi jan ḛ ne no, ɗaɗag ge ḛ ka kee ne ge num ge hoɗege jiyale dinna ge mbi na̰ van ma buwal zì ma, ḛ ka kee ne mbi. 41Guwa̰ go, mbo jan nda ge mbo kaɗ-ɗa ge na tok magul pagal ma go: Ḛ ge Dok vḛḛne na wa no ḛ pagal ma, ḛ wa̰a̰ ta gezi yà kaal ge mbi, ḛ mbo ge ol ge ɗiŋ ge din ge àa nuusi ne, ge Ba ge ho̰o̰l mage na malayka ma pe zì yà. 42Ago, camal kê mbi, ḛ be hon mbi kaŋ zam to. Mam njuwal kê mbi, ḛ be hon mbi mam njoɗɗa to. 43Mbi kaa gɔswal ḛ buwal zì, ḛ be ame mbi diŋ to. Mbi kaa swala, ḛ be hon mbi a̰me laa pe to. Mbi kê tuguɗi mbi kaɗ daŋay zì me, ḛ be mbo kuwa mbi ndwa to me. 44Sok mbe go, num sḛ ma mbo gwan ne janna waɗme go: Bagezok-goo, a mà sok go ɗoo, i kuwa no go mo camal, i kuwa mam njuwal kee mo no, koo mbo ya gɔswal, koo swala, koo kee tuguɗi koo daŋay zì, i chiya mo kṵwa̰ to no de? 45Go no me, mbo gwan ge num janna go: Fareba mbi jan ḛ no, ɗaɗag ge ḛ ka kee ne ge num ge hoɗege jiyale ma ta to, ḛ ka kee ano mbe to mbi. 46Num mbe ma no, àa mbo mbo ge yal njoɗɗa ge ɗiŋ ge din zì. Ɗaŋɗe, nda ge kee laa ɓyareya ge Dok ne ma seɗ ndwa ge ɗiŋ ge din me.

Pilihan Saat Ini:

Mata 25: kiaGRB

Sorotan

Berbagi

Salin