San Mateo 6
6
Jesús ku kʌ'sik yok'o a metik oxp'e ba' tuka we'sik ka ch'eik otsi ti' a bojo'
1»A teche'x tuk'in ka' mete'x tsoy ba' ti' a winik, ma' laj mʌn a tsikbʌte, wo ka laj mʌna tsikbʌte, a Tet K'uj a tiʌ kʌ', muj bin u ts'ae u bo'ri tech.
1. A sijik tak'in ti' a mok mʌnʌ' u tak'in
2»Bein, tuk'in ka wʌntik a bix mʌnʌ' u tak'in, ma' mʌn a tsikbʌte yok'o u nʌji tuku much'ik u bʌjo' a judíos u xake u t'ʌn K'uj, mix tuku mʌn winik, a mok ku mʌn u tsikbʌte lʌji' ku metik bex ku metko' a winik a moko' ku tus e'siko' tsoy tuko' chen tusukao', poch u yirik a winik u ya'ba tsoy ba' ti'. Jach toj tu jay kin toj ki' ei'k te'x o bex ka metik, a lay toj jari u bo'ri teche'x ku bin ts'aba tech. 3Chen tuk'in ka wʌntik ti' a mok mʌnʌ' u tak'in, ti' mix mok ka tsikbʌtik ti'. 4Wa ka wʌntik a bojo' muku ts'abi y a Tet K'uj ku yirik ta muku ts'a, K'uj ku bin u ts'ae u bo'ri tech tu pimai a winik.
2. A kʌ'sa yok'o u t'ʌna' K'uj
(Lc. 11.2-4)
5»Tuk'in a te'x ka' t'ʌne'x K'uj, ma' metke'x a bix a ku tus metik u bʌj tsoy u tuku chen tusukao', a tio' jach tsoyik u yi'ri ten a winik tus tʌn u t'ʌnko' K'uj, la'jen tio' ku t'ʌnik K'uj ch'ijikba yok'o u nʌji tuku much'ik u bʌjo' a judíos u xake u t'ʌn K'uj y yok'o tu ku mʌn winik ne pim. Toj ki wei'k te'x toj ja'ri' a lay u bo'ri ku bij ts'aba tio' y mʌnʌ' tu jer ku bin ts'aba tio'. 6Tuk'in teche'x ka t'ʌnik K'uj, oken ta way y mʌke u jor a wai y t'ʌne a Tet muku t'ʌnbi. Y a Tet K'uj ku yirik tʌn a t'ʌnik muku t'ʌnbi, jeu ts'ek u bo'ri ti' tech tu pimai a winik.
7»Tuk'in a teche'x ka' t'ʌne'x K'uj, ma' wei'k ya'p lʌi lʌi a t'ʌn, ka wirik bex ku metko' a mok mo' judíos. A tio' ku tu'k'riko' jeu jach ua u t'ʌn ti' K'uj, wo yap' ku t'ʌn tak lʌi lʌi ku yei'ko'. 8Ma' metik a bʌje'x a bix ku metko' a tio', ka wirik a Tet toj u yue bay a k'ate'x. 9Teche'x ka bin a tʌ'ne K'uj bexe':
»“Tet, ka' u k'oo'tech tu woro a winik,
jach ja'ri' techech K'uj.
10Ko'ten a wesinteno',
Mete a baiki a k'at way ix lu'm,
a bex ka metik ix kʌ'.
11Y Ts'aten in wo'cho' tu woro k'in.
12Y sa'se tu woro a mo' tsoy ba' in mebo',
bex ten kin sa'sko'.
A mok mo' tsoy ba' mebo' ten.
13Y ma' cheik u tunta in woro',
tako' ti' a mo' tsoy ba' ku tasik a kisin,
in weo' jach tech ka wesintik tu woro ba',
tech ne chich a muk' tu woro yaxk'in
y mʌnʌ' xu'pu a muk' tak ku mʌn tu woro yaxk'in. Amén.”
14»Wo teche'x ka sa'sik a mo' tsoy ba' ku metik teche'x a boje'x, a Tet K'uj a tiʌ kʌ' bexi' jeu sa'sik teche'x a mo' tsoy ba' ta mete'x. 15O maj sa'sik a ba' tu meta teche'x a boje'x bexi' a Tet K'uj mu biu sa'se a si'pie'x.
3. U muk'ta jʌnʌ a ku ya'bati' ayuno
16»Tuk'in ka' mete'x ayuno a muk'tabi jʌnʌ, ma' metik a wich p'is ta ne tukrik a bʌje'x a bex ku metko' a moko' ku tus metko' u bʌjo' ne tsoy u tuko', chen jay tusukao', u k'ato' u yira' ten a winiko' tʌn u metko' u ayuno. Toj ki wei'k te'x toj ja'ri' a lay u bo'ri tio' y mʌnʌ' tu jer ku bin ts'aba tio'. 17Chen teche'x tuk'in ka muk'tike'x a jʌne'x, ki p'oe a wich y ki uts'kintabʌjex. 18Ti' mu' yirko' a winik tʌn a muk'tik a jʌne'x ti' K'uj. Jari a Tet K'uj ku bin u yire a to'o ku laj irik a ba' a to'o mix mok ku yirik, y ti' ku bin u ts'ate'x u bo'ri teche'x tu pimai.
Tu woro a ba' a ne ko'o tiʌ ix kʌ'
(Lc. 12.32-34)
19»Ma' kʌxtike'x a ts'urche'x yoko wai a lu'm, tu jeu yoko u k'ʌmʌs y jeu laj jʌntik y tu woro a ba' jeu laj la'p'a, bexi' tuba jeu yoko' a ku yakra bao' u laj akre teche'x. 20Toj ti' a kʌxtike'x a ts'urche'x yoko kʌ', tu muj yoko aj k'ʌmʌs y muj jʌntik a ba', mix k'ʌs a ba' ku k'asta, mix a ku yakra bao' ku yoko u yakre tech. 21Tu ka ts'urche'x teche'x, tita tiʌ a pixʌne'x.
U kip'i a bʌk'e
(Lc. 11.33-36)
22»U kip'i a bʌk'e la' wich, tuk'in a wich ne tsoy ba' ku yirik bexi' a tu woro a bʌk'e ne tsoy p'is a kip', 23chen tuk'in a wich ne mo' tsoy ba' ku yik bexi' a bʌk'e p'is tiʌ ix ts'uakbi. Wo a kip' a tiʌ ti' tech bexi' ts'uak'ʌ, ¡Jach k'ux ts'uak'ʌ u bʌji' a ak'ʌ'!
K'uj o a ts'urchʌ
(Lc. 16.13)
24Mix mok je'e u meaj ti' ka'to' u ts'uri; o ku meaj ti' ka'to' u ts'uri, ku bin u pʌkte junturi' y a juntu ku bin u yakunte o jay ti juntu ku bin ki meaj y ti a juntu mʌnʌ' u ki meaj ti'. Mo' bik a meaje'x ti' K'uj wa ja'ri' tʌn a tukrik más a kʌxtik ne ya'p a tak'in.».
K'uj ku kʌnʌntik tu woro u ti'a
(Lc. 12.22-31)
25»Ten kin wei'k teche'x: Ma' tukrike'x baij ka bin jʌnte'x o baij ka bin wuk'ex ti' a kuxte'x. Ma' tukrike'x baij ka bin a bukinte'x. ¿Mo más ko'o a kuxte'x, y u ka' sut a wo'che'x mo' ko'o, y bexi' mo' más ko'o a bʌk'e'x y u ka' sut a nok'e'x mo' ko'o? 26Chʌ'te a ch'ich'o', a tio' muj pʌk'ik u yo'ch y mix ku li'sik u yo'ch ix kʌ'che' y ak Tet a tiʌ kʌ' ku ts'ek u jʌnʌ. ¡A teche'x más ko'je'x y mo' bexe'x a bex ch'ich'o'! 27¿A tukrike'x a teche'x, tak ne ka tuke'x, yʌn wa je'e a ti'psik a bake'x ka' nʌp' ku ta chumuk (medio metro)?
28»¿Biken ka tukrik a bʌje'x yok'o a nok'e'x, ire bik ku ch'iji u top' a chʌk che' a jach tsoy u top', a tio' muj meajo', muj chuyo'. 29Chen ten kin wei'k teche'x, aj wes a lʌji' Salomón, tak u bukimʌ u nok' uch jach tsoy y ne ko'o, chen moj jach kuchi ket u tsoyi yete a chʌk che', tarak lʌji' aj wes. 30Wa K'uj bex ku ki metik jach ne tsoy a topche' y pachi ku tiji y ku tokik ix k'ak' ¿Mo' bex je'e u jach metik teche'x? Kin wirik a teche'x maj ki' waksik ta wor ti'. 31Ma' tukrik a bʌje'x y ma' wei'ke'x: “¿Baij kak bin ʌk jʌnte'x o baij kak bin ʌk uk'e o baij kak bin ak bukinte?” 32Toj jari a je' a ba' ku tukriko' a moko' mo' judíos, chen teche'x a Tet toj u yue a k'at tu woro a je' a ba'. 33Yʌ kʌxte'x K'uj a tiʌ kʌ' y a metik tsoy ba' y tu woro a je' a ba' ku bij ts'aba teche'x. 34Ma' tukrik a bʌj baij ku bij tar yok'o u jer k'in, toj yʌn u ti'ri baij ka bin a tukre a lay u k'ini, tu woro jujump'e kin yʌn baij ku bij mʌn.
Pilihan Saat Ini:
San Mateo 6: PLacNaha
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sociedad Biblica de México AC
