San Mateo 12
12
U kʌ'sa winiko' a Jesús tʌn jo'jko' u wich a trigo u k'ini ku je'sik u bʌj a Judíos
(Mr. 2.23-28; Lc. 6.1-5)
1A lay u k'ini Jesús tʌn u mʌn tu yʌn pʌk'a u k'ini ku je'sik u bʌjo' a judíos#12.1 U k'ini ku je'sik u bʌjo' a judíos: A lʌji' u k'ini sábado a ku je'sik u bʌjo' a judíos ti' u t'ʌnko' K'uj., u kʌ'sa winiko' wijchʌj y chu'mpʌjo' u jo'jko' u wich a trigo, y tu jʌnto'. 2U winiko' a judíos a ku ya'batio' fariseos tu yira y tu yao' ti Jesús:
—Ire, a kʌ'sa winiko' tʌn u metik ba' a to'o mu chaʌ' a metke'x u k'ini ku je'sa' bʌj.
3Ti tu nuka:
—¿Ma' wa xakbe'x tu ku yei'k a baij tu meta David uchik, kaj wijchʌj ket yete a mok u yet mʌn? 4Kaj oki to' u yatoch K'uj y tu jʌnto' aj pʌn a ts'aʌ' ti' K'uj, a toj mo' chaʌ' a jʌntik ti' y mix u bojo' a mok u yet mʌn, a to'o jai' a moko' ku meajo' yok'o u yatoch K'uj tsoy u jʌnko'. 5¿Ma' ta xake'x u t'ʌn K'uj a ts'aʌ' ti' Moisés uchik, a ku yei'k a moko' ku meajo' yok'o u yatoch K'uj muj kʌxtik u k'ebo' o ku meajo' u k'ini ku je'sa' bʌj? 6Jach taj kin wei'k te'x, tiʌ juntu ne k'ux nuk wai. 7A teche'x ma' ki ue'x baiki u taji a t'ʌn ka ya'a K'uj: “In k'at a ch'eik otsi ti' a boje'x y ya mi' k'at a kinsik bʌk' y a k'ubik ten”. Si wa ka wui'ke'x bik taba mʌnʌ' a pʌk'ik u pach a mok mʌnʌ' u si'pi. 8Toj ki' ue'x, u Ti'a Xi'ra lʌji' u Ts'uri u k'ini ku je'sik u bʌjo' a judíos.
Jesús ku ch'ensik winik u k'ini ku je'sik u bʌjo' a judíos
(Mr. 3.1-6; Lc. 6.6-11)
9Kʌ' mʌni Jesús tita, bini yok'o u nʌji tuku much'ik u bʌjo' a judíos u xake u t'ʌn K'uj. 10Y tita tiʌ junturi' xi'ra mo' uts u k'ʌ' p'is tikin muj pek, ij k'ata ti' a Jesús, ti' kʌxta bik u pʌk'a u pach:
—¿Tsoy u ch'ensa winik u k'ini ku je'sik u bʌjo' a judíos?
11Jesús tu nuka tio':
—¿Moki teche'x o yʌn uj me' y ku jutu yok'o u jor lu'm u k'ini ku je'sa' bʌj, mo' ku bin u jare? 12¡A winik más ne ko'o u bo'ri y mo' bex aj me'! Bein tsoy a metik u taji a ba' u k'ini ku je'sik u bʌjo' a judíos.
13Y tu nuka ti' a lay a xi'ra:
—Xit'e a k'ʌ'.
A xi'ra tu xit'a u k'ʌ' y toj laj ch'eni bex a jump'e u k'ʌ'. 14Y tuk'in kaj jok'o' u winiko' a judíos a ku ya'batio' fariseos, chu'mpʌ u tukriko' bik ku bin u kinso' a Jesús.
U metchʌ a toj aʌ' uchik
15Y Jesús tuk'in tu yueta, lik'i ij bini y pim a winik ku t'urik, y tʌn u laj ch'ensik ya'ji tuku mʌn. 16Y Jesús tu li'sa u t'ʌni tio', mu' yei'ko' tu pimai a winik moki ti'.
17Ti' u metchʌ a ba', a bex toj aʌ' ten a profeta Isaías, tuk'in tu ya'a:
18«Wai tiʌ in k'ʌni', a mok a ten tin tejta.
A ten ne otsi wirik, y ku ts'ek u tsoyta in wor.
A ki bin in ts'ae in pixʌn ti',
lʌji' ku bin u tsikbʌte tu woro a ba' ne tsoy ki metik ti',
tu woro a winik a tiʌ yok'o lu'm.
19Mʌnʌ' u ts'iki mix u yabot,
mix mok ku bin u yue tʌn t'ʌn yok'o bej.
20Mʌnʌ' u p'ikik a che' a wʌtʌ
mix u tupik a k'ak' a tʌn u yʌ t'a'ba,
hasta turu ts'ek u ki' metchʌ tu woro u tsoy ba'.
21Tu woro a winik a kʌjʌ' yok'o lu'm ku bin u ch'ukto' u yʌnta' ten a Jesús.»
Jesús ku kʌ'sik yok'o a winik a ku yei'ko' mo' tsoy ba' ti' u Pixʌn K'uj
(Mr. 3.20-30; Lc. 11.14-23)
22Tu tiʌ a Jesús, tasa junturi' xi'ra a yʌn kiksin tu yok'o, muj yik ba' y muj jok'o u tʌn; toj se'p' tu ch'ensa y je'chʌ u yirik ba' ij ka' jok'i u tʌn. 23Tu woro laj pekno' u yoro' y tʌn u k'atko' yete u bojo': «¿Jach lʌji' a je' u ti'a a David?»
24Ka tu yuo' u winiko' a judíos a ku ya'batio' fariseos tu yao': «Beelzebú, u ts'uri a kisin lʌji' tu ts'ati' a je' a xi'ra u muk' ti' u jarik a kisin.»
25Jesús, toj u ye baiki ku tukriko' a winik, tu ya'tio': «Tu woro kʌjta wa u winki ku ts'iko' yete u yet bojo', a lay u kʌjto' jeu' laj ts'oko. Wa ti' kʌjʌ' winik yok'o jump'eri' nʌj, wa ku chu'mpʌjo' u ts'iko' yete u yet bojo', a layo' binukaj ts'oko u kʌjto' ket. 26Wa a kisin u k'aba' a Satanás ku lik'o tu ts'iki yete u yet kisin u k'aba' Satanás u bʌji' ku jʌtsik u bʌjo', ¿bi u ts'ose tuku wesintik? 27Wa jach tu jʌy kin jarik a kisin yete u muk' a Beelzebú, ¿moki ku ts'ek u muk' a kʌ'sa winiko' ti' u jarik kisin? Ben lʌjio' ku bin u ya'e wa mo' taj ta wa'ex. 28Chen wo ten kin jarik kisin yete u muk' u pixʌn K'uj, lʌji' ku jach e'sik tu ku wesintik K'uj a tiʌ kʌ' yaj tari ti' teche'x.
29»¿Bik ku bin oko' yoko u yatoch junturi' xi'ra u yakre u ba', wa u winki a nʌj ne chich u muk', mo' wo yʌnti' u yʌ k'ʌxik? Toj ja'ri' bex je'e u yakrik. 30»A mok mo' tiʌ yete ten lʌji' mo' ket u yor yete ten, a mok mo ket ku much'ik yete ten lʌji' ku ts'ek u laj bin u bojo'. 31»Bein kin wei'k te'x, K'uj jeu' laj sa'sik u k'ebʌno' a winik y tu woro a mo' tsoy ba' ku yei'ko'; chen jai' a mok ku yei'k mo' tsoy ba' ti' u Pixʌn K'uj, mʌnʌ' u sa'sa' ti'. 32Tu woro a mok ku yei'k mo' tsoy ba' ti' u Ti'a Xi'ra, K'uj je'e u sa'sik ti', chen a mok ku yei'k mo' tsoy ba' ti' u Pixʌn K'uj, a lay mʌnʌ' u sa'sa' u si'pi ten K'uj mix way yok'o lu'm mix a ku bij tar.
A che' jeu k'o'ota' yok'o u wich
(Lc. 6.43-45)
33»A che' tsoy, jeu' ki ichʌnkʌj, a mo' tsoy u che'i bexi' mʌnʌ' u ki ichʌnkʌj, a che' jeu k'o'ota' yok'o u wich. 34¡A teche'x mo' pajtie'x bex a kʌno'! ¿Bik ka' wei'ke'x tsoy ba' si teche'x mo' pajtie'x? A ba' yʌn ne yap' yok'o a pixʌn lʌji' ku jok'o a wei'k. 35A xi'ra a tsoy u tuku tsoy ba' ku yei'k tu tsoy ba' yʌn tu pixʌn, y a xi'ra a mo' tsoy u tuku ne ku yei'k mo' tsoy ba' tu toj yʌn yok'o u pixʌn ne mo' tsoy ba'. 36Toj taj ki wei'k teche'x u k'ini tuk'in ku bij bo'ta si'pi, tu woro yʌn tiu ts'ek u t'ʌn ti K'uj tu woro t'ʌn a mo' tsoy tu yao'. 37Toj a wʌsʌk' t'ʌni, ku bij a'ba o yʌn a si'pi o mʌnʌ'.»
Yʌn mok ku k'atko' ka' e'sak tio' jump'e ba' yete u muk' K'uj
(Lc. 11.29-32)
38Tu nuko' a ku kʌ'sko' u t'ʌn K'uj a toj u ts'ibtamʌ a Moisés uchik y u winiko' a judíos a ku ya'batio' fariseos, ka tu ya'o':
—Wʌjkʌ'si, pochʌk irik a we'sik a metik ba' yete u muk' K'uj.
39Jesús tu nuka:
—A muj ki uik' u t'ʌn K'uj, y a mo' pajtio' ku k'atik u ye'sa ba' tio'; chen ya mʌnʌ' u ye'sa tio', toj jari a toj e'sʌ uchik baij mʌni ti' a profeta Jonás. 40Bex a Jonás kaj luk'a ten a nukuch kʌy ij mʌni yok'o u jʌ'mne oxp'e ak'ʌ' y oxp'e k'in, bexi' oxp'e k'in y oxp'e ak'ʌ' u Ti'a Xi'ra ku bin u mʌse yok'o tʌmi a lu'm. 41Ka' k'uchuk u k'ini u yei'k K'uj o yʌn u si'pi a winik, u winki Nínive ku bij lik'o y ku bin u ya'e ti' a je' a winiko' kuxo' beje' a ba' ne mo' tsoy tu meto' ti' K'uj, ka wirik u winki Nínive kaj u yuo' u tsikba a Jonás a tio' tu jach suto' u t'ʌno' ti K'uj y ki wei'k teche'x a mok tiʌ beje' yete teche'x más t'o'o y mo' bex, bex a Jonás. 42Ka' k'uchuk u k'ini u yei'k K'uj o yʌn u si'pi a winik, ku bij lik'i junturi' ch'upra a lʌji' u wesi u kʌjta Sabá, ti' ku bin u ya'e a ba' ne mo tsoy tu meto' a winik ti' K'uj, kaj wirik a lay ch'upra jach nʌch tari uch kaj tari u yu'e u t'ʌn Salomón tumen u ne jach yue a ba' Salomón, y a mok beje' tiʌ yete teche'x más t'o'o y mo' bex, bex a Salomón.
A kisin ku ka' sut oko
(Lc. 11.24-26)
43»Tuk'in ku jok'o a kisin tu yok'o winik, ku mʌn yok'o lu'm tu ne tikin u kʌxte tuku je'sik u bʌj y muj yirik. 44Y ku yei'k: “Binikaj ka' sut tin watoch tuj jok'en;” y tuk'in ku sut, ku yirik mix k'ʌs mok tiʌ, ki' mistʌ y ki utskintʌ'. 45Lʌji' tuk'in ku bin u pʌye u jer siete u yet kisin jach más ne mo tsoy, ku laj oko' tu kʌjta ti' a xi'ra, y a xi'ra ku waya más ne mo' tsoy u tuku y mo' bex uchik k'ʌs ts'ets'i'. Y bexi' ku bij mʌn tio' a winik a mo' pajtio' a kuxo' beje'.
U nʌ' y u yits'ino' a Jesús
(Mr. 3.31-35; Lc. 8.19-21)
46Tuk'in a Jesús xu'ri tʌn u t'ʌn yete a winik, u nʌ' y u yits'ino' tiʌ jaknʌki, y poch u t'ʌnko' a Jesús. 47Yʌn mok tu ya'ti' Jesús:
—A nʌ' tiʌ jaknʌki yete a wits'ino', poch u t'ʌn yete tech.
48Chen ti' tu nuka ti' a mok tu mʌsa a t'ʌn ti Jesús:
—¿Moki in nʌ', y moki lʌji' in wits'ino'?
49Ka tu tuch'meta u kʌ'sa winik, tu ya'a:
—A jeo' lʌji' in nʌ' yete u xi'ra in bojo'. 50A mok ku jach metik a baij u k'at in Tet a tiʌ kʌ', a lay lʌji' u xi'ra in bojo', u ch'upra in bojo' y lʌji' in nʌ'.
Pilihan Saat Ini:
San Mateo 12: PLacNaha
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sociedad Biblica de México AC
