San Mateo 10
10
V. A TSIKBA TUKU YA'BA BIK KU BIN U METE A BA' A APOSTOLES
(10.1—11.1)
Jesús ku tejtik doce apóstoles
(Mr. 3.13-19; Lc. 6.12-16)
1Jesús tu t'ʌna a doce u apóstoles, tu ts'ati' u muk' ti' u jarik kisin y bexi' ti' u ch'ensik tu woro ba' tak ya'ji. 2A je' lʌji' u k'aba' a doce u apóstoles a Jesús: U yʌj chuni u kʌ'sa winik u k'aba' Simón, a lʌiti' u k'aba' Pedro, y a juntu u k'aba' Andrés a lʌji' u bojo' a Pedro; a juntu u k'aba' Jacobo u ti'a Zebedeo, y a juntu u k'aba' Juan a lʌji' u bojo' a Jacobo; 3A yʌno' u k'aba': Felipe, Bartolomé, Tomás, Mateo a ku meaj ti' wes a ku k'atik u bo'ri u ba' u bojo', y a juntu Jacobo u ti'a Alfeo, a juntu u k'aba' Lebeo, a bexi' ku ya'bati' a k'aba' Tadeo, a lʌiti' u ka' ti'a a Alfeo. 4A juntu u k'aba' Simón a u winki Caná, y a juntu u k'aba' Judas Iscariote, a mok lʌji' tu k'uba a Jesús ti' u yʌj p'akti.
Jesús ku tuchi'tik u apóstoles y ku ye'sik tio' baij ku bin u meto'
(Mr. 6.7-13; Lc. 9.1-6)
5Jesús tu tuchi'ta a je' a doce u apóstoles y tu ki' a'tio' baij ku bin u meto' y bex tu ya'tio': «Ma' bine'x yok'o u kʌjta a to'o a moko' mo' judíos, mix bexi' ka woke'x yok'o u kʌjtai u lu'mi Samaria, 6ti' a bine'x tu tio' u winki Israel, ka wirik a tio' bex bexo' aj me' aj sa'tio' y mʌnʌ' mok ku kʌnʌntiko'. 7Xene'x y tsikbʌte'x ti' a winik: Yaj xok'i a tuku wesintik K'uj. 8Laj Ch'ense'x a mok mo' uts, laj ch'ense a winik a bex ku laj ts'uku u yot'e, laj li'se'x a mok kimen, laj jare'x a kisin ti' a mok akʌ' tu yok'o; a teche'x jach sijbi ts'abi teche'x u muk' K'uj tiʌ metke'x bex, bexi' mʌnʌ' a k'atke'x u bo'ri tu ka metke'x.
9»Ma' ch'eike'x a tak'in. 10Mix a poxa, ma' a ch'eik u jer a nok', mix u jer a xʌnʌ' mix u jer a xote', ka wirik a mok ku meaj yʌnti' u ts'aba u yo'ch.
11»Tuk'in ka k'uche'x yok'o kʌjta o meje kʌjta, kʌxte'x tu' tsoy u winki tuba a p'ate'x y ti' a p'ate'x yok'o u yatoch hasta ka' ka' jok'ex tita. 12Tuk'in ka k'uche'x yok'o u yatoch, mʌche'x u k'ʌ' a mok kʌjʌ' tita. 13Wo u winkio' a lay a nʌj tsoy u tuko', jeu yʌnta ti' K'uj, chen wo mo' tsoyo' u tuko', mʌnʌ' u yʌnta' y teche'x mix k'ʌs ba' ka bin a sʌte'x. 14Wo yʌn jump'e nʌj o jump'e kʌjta muj cheik a woke'x, mu kat u ch'extike'x a tsikbe'x, jok'ene'x yok'o a lay u nʌj o yok'o a lay a kʌjta, y tite'x u lu'mi a woke'x. 15Jach toj tu jay kin jach ei'k teche'x a bex mʌni ti Sodoma y Gomorra, a je' a kʌjta jach más ne yaj ku bin u yue u bo'tik a si'pi, ka' k'uchuk u k'ini u bo'ta' si'pi.
U yakʌsta' a mok akʌ' ti' u t'ʌn K'uj ti' u chuka'
16»¡Toj ki ue'x! Ten ki tuchit'ke'x bex aj me' tu chumuki tu yʌn nukuch u pek'i k'ax; chen t'aje'x a metik a bʌje'x bix a kʌn, y mete'x tsoy a tuke'x bix a uk. 17Ki' kʌnʌnta bʌje'x ti' a winik, ti' ma' k'ubae'x ti a jak'o u kuch, y yok'o u nʌji tuku much'ik u bʌjo' a judíos u xake u t'ʌn K'uj, ti' ku bin u jʌtse'x. 18Bexi' ku laj bin u pure'x ti u ts'uri a lu'm y bexi' ti u wesi, che yok'o ten ku laj bij pure'x ti' y bex jea tsikbʌtik tio' y ti' a moko' mo' judíos, a baij tin meta. 19Chen tuk'in ka laj bin k'ubae'x ti a mok jak'o u kuch, ma' sʌjtike'x a t'ʌnex o baij ka bin a wa'ex ti, chen K'uj ku bin u ya'e baij ka bin a wa'ex ti a lay u k'ini. 20Jach taj kin wei'k teche'x, mo teche'x ka bij t'ʌnex, a ku bij t'ʌn lʌji' u Pixʌn K'uj yok'o teche'x.
21»Bexi' ku bij k'uchu tu k'ini tuk'in u bojo' ku bin u ts'ae u kinsa' u ka' wʌsʌk' bojo', y u tet u wʌsʌk' ti'a; y u ti'a ku ka' bij lik'i ti' u kʌxmetik u tet y bexi' ku bin u kinse. 22Tura a laj p'akte'x ti tu woro winik, chen yok'o ten; chen a mok ku jach muk'tik u ki metik u t'ʌn a K'uj turu kimi a lay jeu bin ix kʌ'. 23Tuk'in ka u yakʌste'x ti' a chukae'x yok'o a je' u kʌjta, jok'ene'x y xene'x yok'o u jer u kʌjta; jach taj kin wei'k teche'x pʌti ku bin k'uchu u Ti'a Xi'ra, tuk'in mo' laj ts'o'kok a mʌne'x yok'o tu woro u kʌjta u lu'mi Israel.
24»A mok ku kʌ'sa' mo lʌji' más u yue a bex u yʌj kʌsi, mix a mok ku k'ʌna' mo lʌji' más t'o'o ti' u ka' ts'uri. 25A mok ku kʌ'sa' yʌnti' u tsoyta u yor tuk'in ka' k'uchuk bix u yʌjkʌ'si, y a mok ku k'ʌna' bix in ts'uri. ¿Muj bin t'ʌna bexi' u ti'a wo u tet ku ya'ba ti' Beelzebú?
Ma' sʌjtik a t'ʌne'x
(Lc. 12.2-9)
26»Ma' sʌjtike'x a winik, ki wei'k te'x, mʌnʌ' ba' a mukrʌ' mu bij laj eta', y tu woro a ba' a laj ta'kʌ' binukaj laj eta' baiki. 27A ba' ki wei'k teche'x tu ts'uak'ʌ, teche'x a'e chuk'in; a ba' ki wei'k teche'x mukra'bi, teche'x tsikbʌte'x ti' tu woro a winik. 28Ma' sʌjtike'x a mok je' u kinsik a bʌk'e'x, ka wirik mo bik u kinsik a pixʌn; sʌjte'x a mok jeu' kinsik a pixʌn y u pich'itke'x ix k'ak' a bʌk'e'x.
29»A teche'x a we'ex ku kana' ka'p'e cho ch'ich', jai' yete jump'eri' chix tak'in, chen ten kin wei'k te'x, a layo' mʌnʌ' u kimi a cho ch'ich' mix junturi' wo a Tet K'uj muj li'sik u t'ʌni, ka wirik lʌji' ku kʌnʌntik. 30U ka' sut a teche'x laj xakʌ' tu woro u tso'tse a joe'x, jujump'e jujump'e. 31Bein ma' naj sʌjtik ba', a teche'x más ko'je'x y mo' bexe'x a bex a ch'ich' u bo'ri.
U k'o'ota a Jesús ten a winiko'
(Lc. 12.8-9)
32»Tu woro a mok ku laj tsikbʌtik tia' winik, a ti' u yaksa mʌn tu yor ti ten, bexi' ten kin bin in wae tsoy ba' ti' in Tet a tiʌ kʌ'. 33Bexi' a mok ku yei'k mu' k'o'muen ti a winik, bexi' ten ki bin in wae mi' k'o'mo' tu yiknʌ in Tet a mok tiʌ ix kʌ'.
Jesús ku ts'ek u jʌtsik u bʌj a winik
(Lc. 12.49-53; 14.26-27)
34»Ma' tukrike'x wo ten taren in tase u tsoyta or ti' a winiko'; a ten mo' lʌji' taren in tase, a ten taren in tase ts'iki. 35A ten taren in ts'ae u ts'iki u ti'a ti' u tet, u ch'upra u ti'a ku ts'iki ti' u nʌ' u yixkit ku ts'ikta yete u yixkit. 36Toj a mok u yet kʌjtai a xi'ra lʌji' ku bin p'aktik.
37»A mok más ne otsi u yirik u tet o u nʌ' y a ten mo' jach otsi u yiriken, mo' tsoy ti' u xok'o ti ten; a mok más ne otsi u yirik u xi'ra ti'a o u ch'upra u ti'a y a ten mo' jach otsi u yiriken, mo' tsoy ti' u xok'o ti ten. 38Y a mok muj ch'eik u cruz y muj tar tin pach, mo tsoy ti' u xok'o ti' ten. 39Tu woro a mok ku tukrik u takik u bʌj ti' mu' kimi, a lay binukaj kimi; y a mok ku kimi yok'o ten, a lay jeu bin ix kʌ'.
U bo'ri a ku ts'ae K'uj tuku meta tsoy ba'
(Mr. 9.41)
40»A mok ku yaksike'x, ten ku yaksiken y a mok ku yaksiken, ku yaksik a mok tu tuchi'ten. 41A mok ku yaksik junturi' profeta tu' lʌji' profeta, bexi' tsoy ba' ku bin ts'aba ti' a bex ku ts'aba ti' a profeta; a mok ku yaksik junturi' a mok ku jach metik u t'ʌn K'uj tuku jach metik u t'ʌn K'uj, bexi' ku bij ts'aba ba' ti a bex ku ts'ab ti'a mok a ku jach metik u t'ʌn K'uj. 42A mok ku ts'ek ti' jump'e luch yete ja' in kʌ'sa winiko', jach taj kin wei'k teche'x jeu jach ts'aba ti' u bo'ri ti' K'uj tu tu meta.»
Pilihan Saat Ini:
San Mateo 10: PLacNaha
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Sociedad Biblica de México AC
