Mateo 9
9
Jesusba ẽbẽra b̶akara bʉʉ nii aribiabid̶a
Marcos 2:1-12; Lucas 5:17-26
1Jesús jãbad̶e atauped̶a waya mar kĩaraa wãped̶a ichi b̶uabarii puurud̶aa neesii. 2Aria ẽbẽra ab̶a b̶akara bʉʉ nii ichi jira adoebadaud̶e Jesusmaa eneesid̶au. Jesusba unusiid̶e mau ẽbẽra eneeped̶aad̶aba biawãra ijãa panuu ichiba chi b̶akara bʉʉ nii poyaa aribiabii b̶uu. Maud̶eeba Jesusba chi b̶akara bʉʉ niimaa jarasii:
—Kĩrajʉʉse kũudrãa, bichiba kachirua waud̶a mʉʉba perdonasiid̶eeba.
3Aria Moisesba b̶ʉd̶a jaradeabadaurã chi waabenarã duanasid̶au. Maarãba kʉ̃risiasid̶au: «Ichiba Dachi Akõre ʉ̃rʉbena kachirua berrea b̶uu». 4Maamina ãchiba kʉ̃risia panuu Jesusba kuitaasii. Maud̶eeba jarasii:
—Machiba ¿sakãe kachirua kʉ̃risia panuma?#9:4 Griego bed̶ead̶e chi b̶ee kartad̶e b̶ʉ kub̶uu: Machi sõd̶e. 5Machimaarã ¿sãu bed̶ea aude chaarea b̶uma jarai baita? ¿Bichi kachirua waud̶a perdonasii ai maebʉrã nau ẽbẽra b̶akara bʉʉ nii jiradubiped̶a nibabii? 6Dachi Akõreba mʉ, chi Ẽbẽra Ba B̶uad̶a b̶usii nau druad̶e panuuba kachirua waubadau perdonabiamera. Mau machimaa unubiai.
Ara makʉd̶e chi b̶akara bʉʉ niimaa naka jarasii:
—Jiraduse. Chi bichi jira adoebadau adauped̶a deed̶aa wãse.
7Ara makʉd̶e chi b̶akara bʉʉ b̶uad̶a jiraduped̶a deed̶aa wãsii. 8Mau unusid̶aud̶e chi aria duanuu pera duanuu kĩra bara b̶eesii.#9:8 Pera duanuu kĩra bara b̶eesii. Griego bed̶ead̶e chi b̶ee kartad̶e b̶ʉ kub̶uu: Kuitaa kʉ̃risiad̶aabasii. Maamina Dachi Akõremaa bed̶ea bia berreasid̶au, ichiba chi poyaabarii ẽbẽramaa deasiid̶eeba, kakua kachirua panuu aribiabimera.
Jesusba Mateo iud̶a
Marcos 2:13-17; Lucas 5:27-32
9Jesús mamabena wãaruud̶e ẽbẽra Mateo abadau unusii. Mau ẽbẽra Romad̶ebena chi aude mechiu nii baita chi nejarra deabadau ded̶e akʉ b̶uasii. Jesusba Mateomaa jarasii: «Mʉ ome nibase».
Ara makʉd̶e Mateo jiraduped̶a Jesús ome wãsii.
10Mau maad̶akare Jesús Mateo ded̶e ko b̶uasii. Jesús baara nibabadaurã, Romad̶ebena baita chi nejarra pebadaurã maud̶e kachirua waubadaurã Jesús baara komaa duanasid̶au. 11Waabenarã fariseorãba mau unusid̶au. Maud̶eeba Jesús baara nibabadaurãmaa id̶isid̶au:
—Machi jaradeabarii ¿sakãe Romad̶ebena baita chi nejarra pebadaurã baara maud̶e waabena kachirua waubadaurã baara ko akʉ b̶uma?
12Ãchiba maka id̶iiduud̶e Jesusba ũriped̶a jarasii:
—Ẽpermo nureeba ʉrrmid̶ia deabarii jʉrʉd̶akau. Maumaarã chi ẽpermo nuréburu jʉrʉbadau. 13Nau bed̶eaba kãare jara b̶uu kuitaad̶e wã́sturu: “Ãnimara baa dead̶ai bad̶amaarã mʉʉba kʉ̃ria b̶uu machiba waabenarã kĩra chuburia panad̶ai”.#Oseas 6:6. Mʉ, chi jipa nuree iui baita need̶awãe, maumaarã chi kachirua waubadaurã́turu iui baita nee b̶uu Dachi Akõremaa need̶amera.#9:13 Dachi Akõremaa need̶amera. Griego bed̶ead̶e chi b̶ee kartad̶e mau wãꞌãe.
Chi Dachi Akõre baara b̶uayua kokau ewari ʉ̃rʉbena
Marcos 2:18-22; Lucas 5:33-39
14Mau maad̶akare Juan chi Boro Eabarii baara nibabadaurã Jesusmaa need̶aped̶a id̶isid̶au:
—Dai maud̶e fariseorã baarauba chiko kod̶akau ewari waubadau, maamina bichi baara nibabadaurãba ¿sakãe maka waud̶akama?
15Jesusba ãchimaa jarasii:
—Mukĩra kãibadau kĩrajʉʉ ewari wau b̶uud̶e ¿kai kĩra nomaa b̶uaima? Mau mukĩra wabid̶a ichiba iukuad̶a ome b̶uumisa kĩrajʉʉ panad̶ai. Maamina ewari ab̶ad̶e waabena ẽbẽrarãba ichi ãyaa adoed̶ai. Maabáeburu ichiba iud̶arãba chiko kod̶akau ewari waud̶ai.
16»Ab̶au bid̶a paru wid̶id̶ebena b̶aꞌãra tõobai, paru soremaa kaapirui baita. Makaaruubʉrã, chi paru wid̶i araa chiraduuruuba chi paru sore aude kõai. 17Maud̶e ab̶au bid̶a uva b̶aa wid̶i ãnimara e waud̶a sored̶e tʉd̶akau. Maka wauduubʉrã b̶aaka kob̶eeruud̶e chi ãnimara e waud̶a chi sore tojĩidrʉi. Maabae chi uva b̶aa eawãi, maud̶e chi ãnimara e waud̶a ãrii. Maud̶eeba uva b̶aa wid̶i ãnimara e waud̶a wid̶id̶e tʉd̶ai panuu. Maka omea dauchia jãadua choroa panad̶ai.#9:17 Maud̶eeba Jesusba kuitaabisii ichiba jaradead̶a ãchi nabẽraed̶ebena kʉ̃risia ome arab̶aud̶e jaradeakau.
Jesusba wẽrakau aribiabid̶a
Marcos 5:21-43; Lucas 8:40-56
18Jesusba maka jaradeamaa b̶uud̶e judiorã chi karr mechiu neesii. Mau ẽbẽra Jesús daad̶e õdarrd̶e kob̶eeped̶a jarasii:
—Mʉ kau ara ʉ̃ra biusii. Maamina bichi wãaruubʉrã maud̶e bichi jua jãu ʉ̃rʉ kub̶uuruubʉrã waya chokae nibabii.
19Jesús jiraduped̶a mau ẽbẽra ome wãsii. Maud̶e chi baara nibabadaurã wãsid̶au. 20Mau wãaduu nid̶aud̶e wẽra ab̶a 12 año oamia inii Jesusmaa ara kaita wãped̶a kaad̶eeba, ichi anab̶ari jʉ̃barii i wausii». 21Maka wausii kʉ̃risiaped̶a mau anab̶ari jʉ̃barii wauruuba ichi aribia b̶eei. 22Jesusba waya ekarrnaa ichiaped̶a mau wẽra unusiid̶e naka jarasii:
—Kau, kĩrajʉʉse. Bichiba biawãra ijãasiid̶eeba aribiasii.
Ara makʉd̶e mau wẽra aribiasii.
23Jesús chi karr mechiu ded̶e neesiid̶e purrsiru chaabadaurã maud̶e b̶ia jẽabadaurã unusii.#9:23 Israeld̶ebenarãba purrsiru chaabadaurãmaa, kĩra nomaa jẽabadaurãmaa bid̶a chi nejarra deabachid̶au kariiduuba kĩra nomaa jẽad̶e need̶amera. 24Jesusba jarakuasii:
—Awara wãurísturu. Nau wẽrakau biuwẽa b̶uu. Bari kãi nub̶uu.
Maud̶eeba ẽbẽrarãba ichimaa ichiad̶aped̶a ʉisid̶au. 25Maamina ẽbẽrarã duabʉikaped̶a Jesús deed̶a ed̶a wãsii. Maabae chi wẽrakau juad̶e jidauped̶a jiradubisii. 26Jesusba waud̶a ʉ̃rʉbena joma mau druad̶e ũrisid̶au.
Jesusba dau pãriu nuree aribiabiad̶a
27Jesús mamabena wãsiid̶e dau pãriu nid̶au ome ichi kaad̶e b̶ia neesid̶au. Mau ẽbẽrarãba b̶ia kopanuuba jarasid̶au:
—¡Jesús, Davidd̶ebena need̶a, dai kĩra chuburiáse!
28Jesús deed̶aa neesiid̶e, mau dau pãriu nid̶au ichimaa ara kaita neesid̶au. Maabae Jesusba ãchimaa id̶isii:
—¿Machiba biawãra ijãa panuu kĩra mʉʉba machi poyaa aribiabiai b̶uu?
Ãchiba panausid̶au:
—Maerã, dai mechiu.
29Maabae Jesusba ãchi dau wauped̶a jarasii:
—Mʉʉba waui machiba ijãa panuu kĩra.
30Ara makʉd̶e unu kopaneesid̶au. Maabae Jesusba kĩrud̶eeba jarasii mau ʉ̃rʉbena ab̶aumaa bid̶a nebʉrʉrãad̶amera. 31Maamina arabena wãaduud̶e Jesusba ãchi ome waud̶a mau druad̶e jarad̶e wãsid̶au.
32Biawãra dau pãriu panad̶a wãaduu nid̶aud̶e ẽbẽra bosara nii maud̶e jai kachirua inii eneesid̶au. 33Jesusba mau jai kachirua duabʉisiid̶e chi bosara nibad̶a berrea kob̶eesii. Mau unusid̶aud̶e, chi aria panad̶aba kãare kʉ̃risiad̶ai adua basiid̶eeba jarasid̶au:
—¡Israeld̶e wabid̶a nau unud̶akau!
34Maamina fariseorãba jara duanasid̶au:
—Jãu Jesusba jai kachirua duabʉibarii, jai kachiruarã karrba mau poyaabarii deasiid̶eeba.
Jesusba ẽbẽrarã kĩra chuburiad̶a
35Mau maad̶akare Jesús puuru mechiu b̶eecha maud̶e puuru kaebe b̶eecha nibabachii. Judiorã araa ãbua imibadau ded̶e chi bed̶ea bia jaradeabachii Bajãad̶e B̶uu neeruu ichid̶irã ichi juad̶e ua b̶uai ʉ̃rʉbena. Maud̶e joma ẽpermo nuree maud̶e chi kakua pira nuree aribiabiabachii. 36Ẽbẽrarã ãrea araa ãbua imi nub̶uu unusiid̶e kĩra chuburiasii, miichuburi panasiid̶eeba, kĩra nomaa panasid̶aud̶eeba, oeja nubariiwãe nuree kĩra.#Números 27:15-17. 37Maabae ichi baara nibabadaurãmaa jarasii:
—Biawãra nau ẽbẽrarã ne uud̶a ãrea chau kub̶uu kĩra nuree. Maamina chi trajabadaurã b̶aꞌãra panuu. 38Maud̶eeba chi ne uud̶a Chibarimaa id̶ísturu trajabadaurã ichi ne uu nub̶uumaa bʉikamera.
Pilihan Saat Ini:
Mateo 9: cmi
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2021, Wycliffe Bible Translators, Inc. All Rights Reserved
