མེ་ཐིའུ་ལེའུ་ 5

ཡེ་ཤུ་སྒང་གུ་ཆོས་སྟོན་པའི་སྐོར།

1ཉིནམ་གཅིག་གི་ཚེ་ ཡེ་ཤུ་གིས་མི་དམངས་འཛོམས་ས་གཟིགས་ཏེ་ ཁོ་ཡར་སྒང་གཅིག་གུ་བྱོན་སྦེ་བཞུགས་ནུག་ དེ་ལས་སློབ་མ་ཚུ་ཁོ་གི་སྐུ་མདུན་ལུ་བཅར་ཏེ། 2ཡེ་ཤུ་གིས་ཆོས་སྟོན་གནང་ནི་འགོ་བཙུགས་ནུག 3སེམས་ཉིད་ནང་སྐྱོ་བ་བསྐྱེད་དེ་སྡོད་མི་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ཞིང་ཁམས་ཀྱི་རྒྱལ་སྲིད་འདི་ ཁོང་གི་དོན་ལུ་ཨིན། 4ད་ལྟོ་མྱ་ངན་འབད་མི་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ཁོང་གིས་ སེམས་གསོ་ཐོབ་ནི་ཨིན། 5མི་མཉམ་ཆུང་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་འཇིག་རྟེན་ནང་གི་རྒྱུ་ནོར་ཚུ་ ཁོང་གིས་ཐོབ་ནི་ཨིན། 6དཀོན་མཆོག་གི་ཐུགས་དང་ལྡན་པའི་ཕྲངམ་དེ་ལུ་ ལྟོཝ་བཀྱེས་ཁ་སྐོམ་མི་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ཤུལ་ལས་ ངལ་རངས་ཏོག་ཏོ་བཟོ་ནི་ཨིན། 7བྱམས་པ་དང་སྙིང་རྗེ་ཅན་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་དཀོན་མཆོག་གིས་ ཁོང་ལུ་བྱམས་པ་དང་སྙིང་རྗེ་གཟིགས་ནི་ཨིན། 8མི་སེམས་གཙངམ་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ཁོང་གིས་ དཀོན་མཆོག་མཇལ་ནི་ཨིན། 9ཞི་བདེ་དང་མཐུན་ལམ་བཟོ་མི་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ཁོང་ལུ་ དཀོན་མཆོག་གི་སྲས་དང་སྲསམོ་སྦེ་བརྩི་ནི་ཨིན། 10དཀོན་མཆོག་གི་ཐུགས་དང་ལྡན་པའི་ཕྲངམ་དེ་ལུ་ གནོད་པ་བྱུང་ཡོད་མི་ཚུ་བྱིན་རླབས་ཅན་ཨིན་ ག་ཅི་སྨོ་ཟེར་བ་ཅིན་ཞིང་ཁམས་ཀྱི་རྒྱལ་སྲིད་དེ་ ཁོང་གི་དོན་ལུ་ཨིན། 11ངེ་གི་ཞོར་ཁར་ལས་མི་ཚུ་གིས་ཁྱེད་ལུ་བརྙས་བཅོས་འབད་ གནོད་པ་སྐྱེལ་ཏེ་སྡུག་བྱིན་ དེ་ལས་གཏམ་རྫུན་མ་མ་འདྲཝ་སླབ་པ་ཅིན་ ཁྱེད་བྱིན་རླབས་ཅན་ཨིན། 12ཁྱེད་ཆ་ཁྱབ་སེམས་དགའ་སྟེ་དགའ་འཚོར་འགྱུར་ ག་ཅི་སྨོ་ཟེར་བ་ཅིན་ཁྱེད་ཀྱི་དོན་ལུ་ ཞིང་ཁམས་ལུ་གསོལ་རས་སྦོམ་གཅིག་བཞག་ཡོད་ ཁྱེད་ལུ་གནོད་པ་སྐྱེལ་ཏེ་སྡུག་བྱིན་དོཝ་བཟུམ་སྦེ་རང་ ཁྱེད་ཀྱི་ཧེ་མ་ལས་འོང་མིའི་ལུང་སྟོན་པ་ཚུ་ལུ་ཡང་འབད་ནུག།#༥:༡༢། The Beatitudes

ཚྭ་དང་འོད་ཀྱི་དཔེ་གཏམ།

13ཁྱེད་འཇིག་རྟེན་ནང་གི་ཚྭ་ཨིན་ དེ་འབདཝ་ད་ ཚྭའི་བྲོཝ་ཡལ་ཡར་སོང་པ་ཅིན་ ད་རུང་ཚྭ་དེ་བྲོཝ་ཡོདཔ་ག་དེ་སྦེ་བཟོ་ཚུགས་ནི་ འདི་ཁུངས་ག་ནི་ཡང་མེད་ ལམ་ཁར་ལུ་བཀོག་སྟེ་རྐངམ་གིས་བསྣད་འོང་། 14ཁྱེད་ཡང་འཛམ་བུ་གླིང་གི་འོད་ཨིན་ དཔེར་ན་སྒང་གུ་ཡོད་མི་ཁྲོམ་དེ་སྦ་བཞག་མི་ཚུགས། 15ད་རུང་མི་ག་གིས་ཡང་ས་ཏི་བཏེགས་ཏེ་ སྦ་ཟེ་གི་འོག་ལུ་བཙུགས་མི་བཞག་ དེ་འབདཝ་ད་ ས་ཏི་བཏེགས་སྦེ་ཡར་སྟེགས་ཁར་བཀལ་བཞགཔ་ཨིན་ དེ་ལས་ཁྱིམ་ནང་གི་མི་ག་ར་གིས་མཐོང་ཚུགས། 16དཔེ་གཏམ་འདི་བཟུམ་སྦེ་རང་ ཁྱེད་ཀྱིས་འབད་མིའི་ལཱ་བཟང་པོ་འདི་ མིའི་གདོང་ཁར་འོད་བཟུམ་སྦེ་ཤར་བཅུག་ དེ་འབདཝ་ལས་མི་ཚུ་ག་ར་གིས་མཐོང་སྟེ་ ཁོང་གིས་ཡར་ཞིང་ཁམས་ལུ་བཞུགས་ཡོད་མི་ ཁྱེད་ཀྱི་ཡབ་ལུ་བསྟོད་པ་ཕུལ་འོང་།།

བཀའ་ཁྲིམས་དང་ལུང་སྟོན་པ་གི་དེབ་ཀྱི་སྐོར།

17ང་ ཡ་ཧུ་ད་པ་གི་བཀའ་ཁྲིམས་དང་ལུང་སྟོན་པ་ཚུ་གིས་ སྟོན་མི་ཆོས་ལུ་མེདཔ་གཏང་པ་འོངམ་མས་ཟེར་མནོ་བསམ་མ་གཏང་ ང་དེ་ཚུ་མེདཔ་གཏང་པ་འོངམ་མེན་ དེ་འབདཝ་ད་ ཁོང་གིས་སྟོན་མི་ཆོས་ཚུ་གྲུབ་བཅུག་ནི་གི་དོན་ལུ་འོངམ་ཨིན། 18ང་གིས་ཁྱེད་ལུ་དོན་ལས་རང་སླབ་ཨིན་ གནམ་དང་ས་གཉིས་མེདཔ་ཐལ་མ་འགྱོ་ཚུན་ཚོད་ བཀའ་ཁྲིམས་ནང་བྲིས་ཡོད་མི་ ཡིག་འབྲུ་དང་ཚག་གཅིག་ཡང་ཡལ་མ་འགྱོ་བར་ བཀའ་ཁྲིམས་ཀྱི་དོན་དག་ཚུ་ག་ར་འགྲུབ་ནི་ཨིན། 19དེ་འབདཝ་ལས་བརྟེན་ཏེ་ ཁྱེད་ག་ར་འབད་རུང་ བཀའ་ཁྲིམས་ནང་ལས་ ཆུང་ཀུ་གཅིག་ལུ་རང་མ་ཉན་པར་ ཁག་ཆེ་ཏོག་ཏོ་མེན་ཟེར་གཞན་ལུ་སྟོན་པ་ཅིན་ ཁོ་ཞིང་ཁམས་ཀྱི་རྒྱལ་སྲིད་ནང་ལུ་སྐྱོ་ཤོས་སྦེ་བརྩི་ནི་ཨིན་ དེ་འབདཝ་ད་ ག་ར་འབད་རུང་ བཀའ་ཁྲིམས་ལུ་ཉན་ཏེ་ དེ་དང་འཁྲིལ་ གཞན་ལུ་སྟོན་པ་ཅིན་ ཞིང་ཁམས་ཀྱི་རྒྱལ་སྲིད་ནང་ལུ་ ཁོ་དྲག་ཤོས་སྦེ་བརྩི་ནི་ཨིན། 20དེ་འབདཝ་ལས་བརྟེན་ཏེ་ ང་གིས་ཁྱེད་ལུ་སླབ་དོ་ བཀའ་ཁྲིམས་ཀྱི་སློབ་དཔོན་དང་ ཕ་རུ་ཤི་པ་ལས་ལྷགཔ་སྦེ་ དཀོན་མཆོག་གི་བཀའ་ཁྲིམས་ལུ་ཉན་ཏེ་ མ་འབད་མི་འདི་གིས་ ཞིང་ཁམས་ཀྱི་རྒྱལ་སྲིད་ནང་རྩ་ལས་རང་འཛུལ་མི་ཚུགས།།

ཙིགཔ་ཟཝ་ད་མི་བསདཔ་དང་འདྲ་ཟེར་བའི་སྐོར།

21ཧེ་མ་གི་ཕ་བརྒྱུད་ཚུ་ལུ་ཁྱེད་མི་མ་བསད་ ཁྱེད་ག་ར་འབད་རུང་ མི་བསད་པ་ཅིན་ ཁྲིམས་ཕྱེ་ནི་ཨིན་ཟེར་སླབ་མི་འདི་ཁྱེད་ཀྱིས་གོ་ཡི། 22དེ་འབདཝ་ད་ ང་གིས་ཁྱེད་ལུ་སླབ་ཨིན་ ག་ར་འབད་རུང་ མི་གཞན་ལུ་བལྟ་སྟེ་ཙིགཔ་ཟ་བ་ཅིན་ ཁྱེད་ལུ་ཁྲིམས་ཕྱེ་ནི་གི་ཉེན་ཁ་ཡོད་ ད་རུང་ཁྱེད་ག་ར་འབད་རུང་ མི་གཞན་ལུ་ ཁྱོད་ག་ནི་ཡང་མ་ཤེས་པའི་རྩ་རྒས་ གོ་མ་ཆོདཔ་ཨིན་མས་ཟེར་སླབ་པ་ཅིན་ ཁྱེད་ལུ་ལྷན་ཚོགས་ནང་སྐྱེལ་ཏེ་རྩིས་གཞི་ཕྱེ་ནི་གི་ཉེན་ཁ་ཡོད་ ད་རུང་མི་གཞན་གཅིག་ལུ་ཁྱེད་ཀྱིས་ཁ་ངན་ཚིག་ངན་སླབ་སྟེ་ དམའ་ཕབ་རྐྱབ་པ་ཅིན་ཁྱེད་དམྱལ་བའི་མེ་ནང་འགྱོ་ནིའི་ཉེན་ཁ་ཡོད། 23ད་ཁྱོད་ཀྱིས་ག་དེམ་ཅིག་སྦེ་དཀོན་མཆོག་ལུ་ མཆོད་པ་ཕུལ་ནི་སྦེ་མཆོདཔ་དེ་ཚུ་མཆོད་ཁང་ནང་འབག་སྟེ་ མཆོད་ཁྲི་གུ་སྐྱེལཝ་ད་ དེ་འཕྲོ་ལས་མི་གཞན་དང་གཅིག་ཁར་མ་འཆམ་ཡོདཔ་ ཁྱོད་ཀྱི་སེམས་ཁར་དྲན་པ་ཅིན། 24མཆོདཔ་དེ་མཆོད་ཁྲི་གི་གདོང་ལས་བཞག་སྦེ་ ཧེ་མ་མི་དེ་སྡོད་སར་འགྱོ་ཞིནམ་ད་ ཁོ་དང་འཆམ་ཁ་བཟོ་ དེ་ལས་ལོག་འོངས་ཏེ་དཀོན་མཆོག་ལུ་མཆོདཔ་ཕུལ། 25ག་དེམ་ཅིག་སྦེ་ ཁྱེད་ལུ་སྐྱོན་བཏགས་མི་ཚུ་གིས་ ཁྲིམས་ཁང་ནང་འཁྱིད་འགྱོཝ་ད་ ལམ་ཁར་དུས་སྐབས་ཡོད་པའི་བསྒང་ལས་ འཆམ་ཁ་བཟོ་ དེ་མེན་པ་ཅིན་ ཁོ་གིས་དྲང་དཔོན་གྱི་ལག་པར་སྤྲོད་སྦེ་ དེ་ལས་དྲང་དཔོན་གྱིས་ཁྲིམས་སྲུང་འགག་པ་གི་ལག་པར་སྤྲོད་དེ་ ཁྱོད་ལུ་བཙོན་ཁང་ནང་བཙུགས་འོང་། 26ང་གིས་ཁྱོད་ལུ་དོན་ལས་རང་སླབ་ཨིན་ ཁྱོད་ཀྱིས་ཁྲིམས་འཐུས་ ཟངས་ཀྲམ་གཅིག་ཡང་ ཚངམ་སྦེ་ མ་སྤྲོད་ཚུན་ཚོད་ ཁྱོད་བཙོན་ཁང་ནང་ལས་འཐོན་མི་ཚུགས།།

འདོད་ཆགས་ཀྱི་སེམས་ཀྱིས་བལྟཝ་ད་ལུས་འབྲལ་འབད་ཚརཝ་དང་འདྲ།

27ཧེ་མ་གི་ཕ་བརྒྱུད་ཚུ་ལུ་ ཁྱེད་གཉེན་ལས་འགལ་བའི་ལུས་འབྲེལ་མ་འབད་ཟེར་སླབ་མི་འདི་ ཁྱེད་ཀྱིས་གོ་ཡི། 28དེ་འབདཝ་ད་ ང་གིས་ཁྱེད་ལུ་སླབ་དོ་ མི་ག་ར་འབད་རུང་ འདོད་ཆགས་ཀྱི་སེམས་ཀྱིས་ ཨམ་སྲུ་ལུ་བལྟ་བ་ཅིན་ ཁོ་གིས་གཉེན་ལས་འགལ་བའི་ལུས་འབྲེལ་འབད་ཚརཝ་བཟུམ་སྦེ་ཨིན། 29ཁྱོད་ཀྱི་མིག་ཏོ་གཡསཔ་དེ་གིས་ཁྱོད་ལུ་ སྡིག་པ་འབད་བཅུག་པ་ཅིན་ མིག་ཏོ་དེ་བཏོན་བཀོག་ད་ ཁྱོད་ཀྱི་གཟུགས་ག་ར་དམྱལ་བ་ནང་འགྱོ་བ་དེ་ གཟུགས་ཀྱི་ཡན་ལག་གཅིག་མེད་རུང་དྲག 30དེ་ལས་ཁྱོད་ཀྱི་ལགཔ་གཡསཔ་དེ་གིས་ ཁྱོད་ལུ་སྡིག་པ་འབད་བཅུག་པ་ཅིན་ ལགཔ་དེ་བཏོག་བཀོག་ད་ ཁྱོད་ཀྱི་གཟུགས་ག་ར་དམྱལ་བ་ནང་འགྱོ་བ་དེ་ གཟུགས་ཀྱི་ཡན་ལག་གཅིག་མེད་རུང་དྲག

31ཧེ་མ་གི་ཕ་བརྒྱུད་ཚུ་ལུ་ཕོ་རྒྱ་ཚུ་གིས་ རང་གི་ཨམ་སྲུ་དང་ཁ་འབྱལ་བ་ཅིན་ ཡིག་ཐི་སྤྲོད་དགོ་ཟེར་སླབ་མི་དེ་ ཁྱོད་ཀྱིས་གོ་ཡི། 32དེ་འབདཝ་ད་ ང་གིས་སླབ་ཨིན་ མི་ག་ར་འབད་རུང་ ཁོ་གི་ཨམ་སྲུ་ལུ་དོན་དག་ལུས་འབྲེལ་གྱི་ལཱ་ལས་མེན་པར་ དོན་དག་གཞན་ལས་འབད་ རང་གི་ཨམ་སྲུ་དང་ཁ་འབྱལ་བ་ཅིན་ མོ་ལུ་གཉེན་ལས་འགལ་བའི་ལུས་འབྲེལ་འབད་བཅུག་པའི་ཉེས་པ་དེ་ ཁོ་ལུ་ཕོགཔ་ཨིན་ དེ་ལས་ཕོ་རྒྱ་ག་ར་འབད་རུང་ ཧེ་མ་ཁ་འབྱལ་མི་ཨམ་སྲུ་དང་གཅིག་ཁར་གཉེན་རྐྱབ་པ་ཅིན་ དེ་གིས་ཡང་ གཉེན་ལས་འགལ་བའི་ལུས་འབྲེལ་འབདཝ་ཨིན།།

མནའ་འབོ་མ་བཏུབ་པའི་སྐོར།

33ད་རུང་ཧེ་མ་གི་ཕ་བརྒྱུད་ཚུ་ལུ་རང་གི་དམ་བཅའ་དང་ མནའ་འབོ་ནི་ལས་འགལ་ནི་མི་འོང་ དེ་འབདཝ་ད་ རང་གིས་གཙོ་བོ་ནང་ལུ་ ཕུལ་མི་དམ་བཅའ་དང་བསྟུན་ཏེ་འབད་དགོ་ཟེར་གསུངས་མི་དེ་ ཁྱོད་ཀྱིས་གོ་ཡི། 34དེ་འབདཝ་ད་ ང་གིས་ཁྱེད་ལུ་སླབ་ཨིན་ ཁྱོད་ཀྱིས་མནའ་རྩ་ལས་རང་མ་འབོ་ ཞིང་ཁམས་འཛོམ་དཔང་སྦེ་བཙུགས་ཏེ་མནའ་མ་འབོ་ ག་ཅི་སྨོ་ཟེར་བ་ཅིན་ཞིང་ཁམས་འདི་ དཀོན་མཆོག་གི་བཞུགས་ཁྲི་ཨིན། 35ས་ཡང་འཛོམ་དཔང་སྦེ་བཙུགས་ཏེ་མནའ་མ་འབོ་ ག་ཅི་སྨོ་ཟེར་བ་ཅིན་ ས་འདི་དཀོན་མཆོག་གི་ཞབས་སྟེགས་ས་ཨིན་ དེ་ལས་ ཡེ་རུ་ཤ་ལེམ་ཡང་འཛོམ་དཔང་སྦེ་བཙུགས་ཏེ་མནའ་མ་འབོ་ ག་ཅི་སྨོ་ཟེར་བ་ཅིན་ ཡེ་རུ་ཤ་ལེམ་འདི་རྒྱལཔོ་ཆེན་པོ་གི་རྒྱལ་ས་ཨིན། 36དེ་ལས་ཁྱོད་རང་གི་མགུ་ཏོ་ཡང་ འཛོམ་དཔང་སྦེ་བཙུགས་ཏེ་མནའ་མ་འབོ་ ག་ཅི་སྨོ་ཟེར་བ་ཅིན་ ཁྱོད་ཀྱི་མགུ་ཏོ་གི་སྐྱ་གཅིག་ཡང་ དཀརཔོ་དང་གནགཔོ་བཟོ་མི་ཚུགས། 37དེ་བ་འདི་གཏམ་ཨིན་མི་དེ་ཨིན་ མེན་མི་དེ་མེན་ཟེར་སླབ་ དེ་ལས་ལྷག་པའི་ལོ་རྒྱུས་གཞན་སླབ་པ་ཅིན་ དེ་ཚུ་བདུད་ལས་འོངམ་ཨིན།།

དགྲ་ལན་འཇལ་མ་བཏུབ་པའི་སྐོར།

38མིག་ཏོ་གི་ཚབ་མ་མིག་ཏོ་ སོ་གི་ཚབ་མ་སོ་ཟེར་གསུངས་མི་འདི་ཡང་ ཁྱེད་ཀྱིས་གོ་ཡི། 39དེ་འབདཝ་ད་ ང་གིས་ཁྱེད་ལུ་སླབ་ཨིན་ ཁྱོད་ལུ་ཟོགཔོ་འབད་མི་ལུ་ལོག་སྟེ་ཟོགཔོ་མ་འབད་ ག་དེམ་ཅིག་སྦེ་ མི་ག་གིས་འབད་རུང་ ཁྱོད་ཀྱི་ཟ་ལྟབ་གཡས་པའི་གུ་ ལྡན་ལྕག་དྲངས་པ་ཅིན་ ཟ་ལྟབ་གཡོནམ་དེ་ཡང་བཟེད་བྱིན། 40དེ་ལས་མི་གཅིག་གིས་ཁྱོད་ལུ་འཐབམོ་འཚོལ་ཏེ་ ཁྱོད་ཀྱི་ཁན་འཇར་འཕྱོག་འབག་པ་ཅིན་ བགོ་དེ་ཡང་བྱིན་གཏང་། 41མི་གཅིག་གིས་ཁྱོད་ལུ་ དབང་བཙོང་གི་ཐོག་ལས་ ཁུར་ཆ་འབག་སྟེ་དཔག་ཚད་གཅིག་འགྱོ་ཟེར་འཁྱིད་པ་ཅིན་ ཁོ་དང་གཅིག་ཁར་དཔག་ཚད་གཉིས་འགྱོ་བྱིན། 42ཁྱོད་ལས་ལྷང་མི་ལུ་བྱིན་ དེ་ལས་ཁྱོད་ལས་བསྐྱི་བ་འོང་མི་ལུ་ མ་བྱིན་པར་མ་བཞག།

རང་གི་དགྲ་བྱང་ཕྱད་ལུ་བྱམས་པ་འབད་དགོ་པའི་སྐོར།

43ཁྱོད་ཀྱི་ཁྱིམ་ཚང་ལུ་བྱམས་པ་འབད་ དེ་ལས་ཁྱོད་རང་གི་དགྲ་ལུ་མ་དགའཝ་འབད་ཟེར་སླབ་མི་འདི་ཁྱེད་ཀྱིས་གོ་ཡི། 44དེ་འབདཝ་ད་ ང་གིས་སླབ་ཨིན་ ཁྱེད་ཀྱིས་དགྲ་བྱང་ཕྱད་ལུ་བྱམས་པ་འབད་ དེ་ལས་ཁྱེད་ལུ་གནོད་པ་བཀལ་མི་ཚུ་གི་དོན་ལུ་སྨོན་ལམ་ཞུ་བྱིན། 45དེ་སྦེ་འབད་བ་ཅིན་ ཁྱེད་ཀྱི་ཡབ་ཞིང་ཁམས་ལུ་ བཞུགས་ཡོད་མིའི་སྲས་དང་སྲསམོ་སྦེ་སྡོད་ནི་ཨིན་ ག་ཅི་སྨོ་ཟེར་བ་ཅིན་ ཁོ་གིས་མི་བཟང་པོ་དང་ངན་པ་ གཉིས་ཆ་རང་གི་གུ་ལུ་ཉིམ་ཤར་བཅུགཔ་ཨིན་ དེ་ལས་མི་ཕྲངམ་དང་མ་ཕྲངམ་གཉིས་ཆ་རང་ལུ་ཡང་ཆརཔ་གནངམ་ཨིན། 46ཁྱེད་ཀྱིས་རང་ལུ་བྱམས་པ་འབད་མི་ལུ་ བྱམས་པ་འབད་བ་ཅིན་ ཁྱོད་ཀྱིས་དཀོན་མཆོག་ལས་གསོལ་རས་ག་ཅི་ཐོབ་ནི་སྨོ་ འདི་བཟུམ་སྦེ་ མི་གཡོ་སྒྱུ་ཅན་ཁྲལ་བསྡུ་མི་ཚུ་གིས་ཡང་འབདཝ་ཨིན། 47ཁྱེད་ཀྱིས་རང་གི་ཆ་རོགས་ལུ་རྐྱངམ་གཅིག་ལེགས་ཤོམ་འབད་བ་ཅིན་ ཁྱེད་ཀྱིས་གཞན་ལས་ཡང་དྲགཔ་སྦེ་ ག་ཅི་འབད་འབདཝ་ཡོདཔ་སྨོ་ དེ་བཟུམ་འདི་དཀོན་མཆོག་ངོ་མ་ཤེས་མི་ཚུ་གིས་ཡང་འབདཝ་ཨིན། 48དེ་འབདཝ་ལས་བརྟེན་ཏེ་ ཡར་ཞིང་ཁམས་ལུ་བཞུགས་མི་ ཁྱེད་ཀྱི་ཡབ་སྐྱོན་ག་ནི་ཡང་མེད་པར་ཀྲིག་ཀྲི་སྦེ་བཞུགས་ཡོདཔ་བཟུམ་སྦེ་ ཁྱེད་ཆ་ཁྱབ་ཡང་སྐྱོན་ག་ནི་ཡང་མེད་པར་ཀྲིག་ཀྲི་སྦེ་སྡོད་ཟེར་ཡེ་ཤུ་གིས་གསུངས་ནུག།

Pilihan Saat Ini:

མེ་ཐིའུ་ལེའུ་ 5: dzoD

Sorotan

Berbagi

Salin