Smnlean 8
8
Meelih ka Rnecux
1Lmngelung Noax ma kana camac ma tnbugan ga ckceka asu Noax hiya ka Utux Baro. Utux Baro de psbhurun na bgihur ka dxeral, kiya de meelih ka qsiya. 2Leban ka pusu hrean ebun toma ma bais karac baro de, ini peeyah baro qmuyux da. 3Wada peeyah bobo dxeral dmudul meelih ka qsiya. Bobo mk1'50 ali de meelih ka qsiya da. 4Idas 7 ali 17 ciida, pqeya bobo dgiyaq Ararat ka asu. 5Dmudul meelih nana ka qsiya, betaq 10 idas. Idas 10 ali 1 ciida, mtqita kana ka pngepung dgiyaq.
6Bobo mk40 ali de, rmaguh bais asu snmalu na ka Noax. 7Psaun na ka kingal tyaqung. Mosa ni meyah ida skiya ka tyaqung, betaq mdengu kana ka qsiya gaga bobo dxeral. 8Posa kingal byugu dungal ka Noax. Qtaan na teta wada meelih ka qsiya. 9Kiya de ida gaga srclingan dxeral ka qsiya, uka ssaun na staril ka byugu de, mbrinah meyah asu Noax hiya. Hmkero baga na ka Noax ma qmerac byugu, desun na asu truma ka byugu. 10Tmara mk7 ali dungal ka Noax, speeyah na asu posa ngerac ka byugu dungal. 11Betaq keeman de, mbrinah meyah heya ka byugu. Qtai! Quwaq na we gisu qmiyuc waso curung hani qniyuc. Noax de klaun na, wada dmudul meelih kana ka qsiya da. 12Tmara mk7 ali dungal ka heya de, psaun na dungal ka byugu. Texal nii de ini npusal meyah hiya ka byugu da.
136'01 knkawas na ka Noax, kiya ka ali tgkingal idas knkawas ciida, wada mdengu ka qsiya bobo dxeral. Rmaguh neluk asu baro ka Noax ma qmita, tai, wada mdengu kana ka dxeral da. 14Betaq 27 ali 2 idas de mdengu kana ka dxeral da. 15Rmengo Noax ka Utux Baro: 16“Latac peeyah asu kana ka isu, mqedil su, laqi ma ina su. 17Kana ga msuupu isu ka klegan mlgelu niqan heyi, kiya ka qbheni, tnbugan ma kuyi ga mkkarang kana dxeral we, desi nganguc kana. Dheya we maha mrana kndesan daha bobo dxeral ma kkrehak egu bobo dxeral.” 18Kiya de Noax we mtheyaq laqi na, mqedil na ma ina na meyah nganguc da. 19Kana camac, ma kuyi mkkarang, qbheni ma, kana lmlamu klegan camac meyah nganguc kana uri da.
Mege Snapuh ka Noax
20Noax we ririh Utux Tmninun smmalu 1 spuhan, mangal klegan bgurah tmnbugan ma qbheni uka rutiq, psaun na bobo spuhan psqmaun na smapuh. 21Smkenux malu sknexan nii ka Utux Tmninun de, rmengo ckceka lhebun na ka Utux Tmninun: “Ririh seediq uxe ku mnpusal cmiyus bobo dxeral, ado seediq we peeyah lqlaqi ciida de ida niqan qnnaqah ka lhebun daha da. Uxe mu spuyu ndaan mu smeeliq kana klegan muudus da. 22Meniq ciida ka dxeral hayan we, rmehak rehak, qmburung, msekuy ma mtilux, rbagan ma misan, diyan ma keeman we uxe mpsetuq betaq ani knuwan.”
Pilihan Saat Ini:
Smnlean 8: Stgdaya
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
The Bible Society in Taiwan, 2020
© 台灣聖經公會版權所有，2020