Matayi 13

Ishiholanyo sha mupesambeyu

1-23: Mal. 4,1-20. Luk. 8,4-15.

1Umusanya wuyo uYesu ahafuma munyumba, ahavalʼukutendama kushipuma sha sumbi. 2Pe vahavungana pupo pʼali avantu ve vinji. Pʼuwene ahazuva mwivoti mwʼahatendama. Avenʼavantʼimpuga vahavamba kushipuma. 3Pʼuwenʼahavavuzya zye nyinjʼinongwa, ahayanjila muṿiholanyo ukuvavuzya ahati: Yenyi, lumʼumupesambeyu ahavalʼukupesʼimbeyu yakwe. 4Ilelo lwʼamakupesʼimbeyu, pe yoka yihagwa pidala, pʼinyunyi zihinza zihaseva zihamala. 5Yoka iyamwavo nyene yihagwa pansi ya mavwe, pʼintopʼitalʼinyinji. Yihamula luvilo luvilo shʼintopʼitalʼinyinji. 6Ilelo lwe litukuyʼizuva, pʼihapwa yihuma shʼitali namazi. 7Yoka iyamwavo nyene yihasangana nulwangwa lwe yagwa, ilelo lwe lumezilʼulwangwa, pe luhayibuda. 8Yoka iyamwavo nyene yihagwa pansʼinyinza, yihahomʼinsanga. Yokʼihahomʼamashumʼishumi, yokʼihahomʼamashumʼumutanda, yokʼihahomʼamashumi gatatu. 9Uno wengʼamakutwi ali nago wʼatejelezyaje.

Ukuvombelwa kwa ṿiholanyo

10Pe vahapalamila kukwakwe avasundikwa vakwe vahamuvuzilizya vahati: Ukuyanjila shonu mumivi lwʼukuvavuzya? 11Uwene ahavavuzya ahati: Shʼimwe mupelilwe ukuzimanyinsanya izya kukwilu zya vumwene vwa kumwanya, avene vala nyene ve vatapelilwe. 12Shʼuno wengʼali naṿwo yimo, wʼakwonjelezelwa ukupelwa niṿwamwavo, we ṿikwinza ṿikulafuha. Uwene nyene wʼate naṿwo naṿimo, we hakusompolwa nahuho hengʼali naho. 13Mwe mumwo nkuyanjila navo muṿiholanyo, she nashenga vakwenya vatakuzilola nazimo, nashenga vakwiṿwa vatakuzitejelezya nazimo, havili vatakuzimanyinsanya. 14Zikuvinzila zila zyʼahakuvwagʼuYesaya lwʼatili:

Ukwiṿwa namakutwi kwe muliyiṿwa,

nkandi mutalizimanyinsanya,

ukwenya naminso kwe muliyenya,

nkandi mutalizilola,

15Shʼamoyo ga vantu vanava

gayipezilʼukuva mamwamu,

amakutwi gavo gali namapuli ukwiṿwa,

vasinziliye naminso.

Mwe mumwo vakupotwa ukwenya naminso,

nukwiṿwa namakutwi,

nukuzimanyinsanyʼinongwa mumoyo,

nukupinduha, ukuti imbazuzuvushizyaje.

16Nkandi masangalusʼaminso ginyu she gakwenya, namakutwi ginyu she gakwiṿwa. 17She nkuvavuzyʼine nalyoli nkuti: Navakuvwi navagolosu ve vinji vahasungwaga ukwenya zizyo zye mukwenyʼimwe, vahapotwʼukuzyenya nakumo, vahati twiṿwaje zizyo zye mukuzyiṿwʼimwe, vahapotwʼukuzyiṿwa nakumo.

Uvulondovozi vwa shiholanyo sha mupesambeyu

18Ilelʼimwe mutejelezyajʼishiholanyo shʼula wʼahapesagʼimbeyu. 19Uno wengʼakutejelezyʼizwi lya vumwene, ingʼatakulimanyinsanya, akwinzʼumunyala akusompola huho he hapesilwe mumwoyo wakwe. Uno lelo ye yiyo ye yapesilwe mwidala. 20Iyene nyene ye yapesilwe pansi ya mavwe we wuyo wʼakwiṿwʼizwi ilelo pʼakuseshela, 21nkandʼamazi gʼate nago, wʼakusimpʼisiku lyoka vwelele. Lwʼayazilʼizwi likumu-pʼukuyimṿilwa nukuṿwimwa shʼali nalyo, pʼatakuhavʼukugalamuha zyenezyo. 22Iyene nyene ye yapesilwe mulwangwa, we wuyo wʼayazilʼayiṿuyʼizwi, ilelo pe havili ukukutana kwʼikumupelelʼinsʼino, nishifumbo sha vulonsi, zyenezyo zye zikubudʼizwi, ilelo pe ninsanga zisite nukwela. 23Iyene nyene ye yapesilwe munsʼinyinza, we wuyo wʼayazilʼayiṿuyʼizwi, pʼakujenda nukulimanyinsanya nukuhomʼinsanga. Wokʼakuhomʼamashumʼishumi, wokʼamashumʼumutanda, wokʼamashumi gatatu.

Ishiholanyo sha ndezye

24Ahavavuzya nishamwavʼishiholanyo ahati: Uvumwene vwa kumwanya vuli fwe muntu wʼahapesagʼimbeyʼinyinza mumugunda wakwe. 25Ilelo lwe vakasitʼutulʼavantu, pʼumulugu wakwe ahavalʼukupesʼindezye mungana mumwo, ahepa. 26Ilelo lwʼamezilʼumulemṿwe, lwe gakufuma namatwe, pe zihaloleha Zyope nindezye. 27Pʼavanyamata vahavalʼukuyanga numuhatankaya vahati: Mwene, amwʼutapesilʼimbeyʼinyinza mumugunda waho? Zifumile kwi lelo indezyʼizi? 28Uwene nyene ahavavuzya ahati: Zyʼapesilʼumuntʼumulugu. Pʼavanyamata vahati: Vulʼiwe, ingavanga tuvale tusagulilaje? 29Uwene nyene ahahana ahati: Ndali, mungasagulila poka ningana lwe mukusagulʼindezye. 30Simuleshe zikulile poka zye zivili, zihafishe pamṿuno. Apene pamṿuno lelo pe ndiva-vuzyʼavaṿuni nditi: Simusagule suti zye ndezye, mupinyʼutusunzo, muzipembe mumwoto. Iyenʼingana nyene ye musezezyaje mumulaza wane.

Ishiholanyo sha Insanga lwa muzimwa ninyambo

31-32: Mal. 4,30-32. Luk. 13,18-19.

31Ahavavuzya nishamwavʼishiholanyo ahati: Uvumwene vwa kumwanya vuli fwe hasanga ha muzimwa, hʼumuntu ahahasenda ahahapesa mumugunda wakwe. 32Shʼahene he hansi kumbeyu zyonti, apene nyene lwenga hakuzile, pe hakulusya ṿwontʼiṿiyavo uvupiti, hakuyipelʼukuvʼikwi, ilelo pe ninyunyi zya kumwanya zijende nukutenga iṿisanzo munsamba zyakwe.

33: Luk. 13,20-21.

33Ahavavuzya nishamwavʼishiholanyo ahati: Uvumwene vwa kumwanya vuli fwe ṿiluzizyo, ṿwʼahasendʼumwantanda, ahasanganya nuvusu iṿwivo ṿitatu pe vuhajenda nukulula vwonti.

34-35: Mal. 4,33-34.

34Zyonti zinizi uYesu ahayanjila muṿiholanyo lwʼakuvavuzyʼavantu ve vavunginʼimpuga, ukwenʼukuyanga vwelele kwʼatahayanga nazimo, 35ukuti zilunjihaje zizyo zyʼahayangʼuYesaya umukuvwi lwʼahati:

Ndivusyʼilomu ukuyanjila muṿiholanyo,

ndikumusya zizyo zye zyali kukwilu

ukufuma pe yapezilwʼinsi.

Ukulondovolwa kwa shiholanyo sha ndezye

36Ilelo pʼuYesu ahavavwezyʼavantu mwe vavaliyʼimpuga yonti, vahavala, uwenʼahinjila munyumba. Pʼavasundikwa vakwe vahapalamila kukwakwe vahati: Utwilulilʼiswe ishiholanyo shila isha ndezye mumugunda. 37Uwenʼahavamula ahati: Uno wʼakupesʼimbeyʼinyinza we Mwanamuntu. 38Uwenʼumugunda we nsi. Iyenʼimbeyʼinyinza ve vanashinamwene, izyenʼindezye ve vana va vunyala. 39Uwenʼumulugu wʼakupesa we mukwalanzi; iyenʼimṿuno vwe vusilo vwa nsʼino. Avenʼavaṿuni ve vahavizya. 40Ilelo inza she vakuvunganihʼindezye vakuzipemba mumwoto, she valihonzya vovulo pavusilo vwa nsi. 41PʼuMwanamuntu alivatumʼavahavizya vakwe ukuvunganiha zyonti ninyazyo navilankomelezyo vonti muvumwene vwakwe ukuzifumwa. 42Ve valivataga mwipalazya mwʼakwahʼumwoto. Mwe ziliva zye nkuta ntupu, mwe luliva lwe lulumanyo lwa mino lutupu. 43Pʼavagolosu valilangalila fwe lizuva mushinamwene sha Yise. Uno wengʼali namakutwi wʼatejelezyaje.

Ishiholanyo sha havwʼahagomu nishuma nulwelo

44Havili uvumwene vwa kumwanya vuli fwe shuma she vazyisile mumugunda, she wokʼumuntu ahashaga havili ahashizyiha. Pʼahaseshela ahavalʼukukazya ṿwonti ṿwʼali naṿwo, ahakalʼumugunda wununo.

45Havili uvumwene vwa kumwanya vuli fwe mukazi wʼahanzagʼuvwambʼuvwinza. 46Ilelo lwʼavwazile vwokʼuvwambʼuvugomu nkani, pʼahavalʼukukazya ṿwonti ṿwʼali naṿwo ahakala vuvwo.

47Havili uvumwene vwa kumwanya vuli fwe lwelo lwe lwatazilwe mwa sumbi, luhavunganiha zyontʼinswi mwe zivaliye muluho muluho. 48Ilelo lwe zyizuye mumwo pe vahalukwesela kushipuma, vahatendamʼukusevʼinyinza zye vahaviha muṿiseje, izyenʼimbivi zye vahataga. 49She zili vovulo nizya vusilo vwa nsi. Pʼavahavizya valivuhʼukuvasavulʼavavivi mumpuga ya vagolosu. 50Valivataga mwipalazya mwʼakwahʼumwoto. Mwe ziliva zye nkuta ntupu, mwe luliva lwe lulumanyo lwa mino lutupu.

51Muzimanyile zyonti zinizi? Avene vahati: Ena Mwene. 52Uwenʼahavavuzya ahati: Mwe mumwo vontʼavamanyakalata venga vayipezilʼukuva vasundikwa va vumwene vwa kumwanya, vali fwe muhatankaya wʼakuṿumbula nimpwa ninkali mwʼavisilʼishuma shakwe.

UYesu ahanilwe mu-Nazaleti

53-58: Mal. 6,1-6. Luk. 4,16-30.

53IlelʼuYesu lwʼamazilʼiṿiholanyo ṿiniṿi, pʼahavuhʼukuvala. 54Ahavalʼukufiha munkaya mwʼakuliye, ahavasambilizyʼinongwa musinagogi yavo. Pe vahasukumila nkani vahati: Umuntʼuno azyazile kwi injelʼizi namamfindango ganaga? 55Amwe wuyo ate mwana wa selemala? Amwe ate wʼunyina uMaliya izina? Avanine amwe vate ve vaYakobu nuYosefu nuSimoni nuYuda? 56Avenʼavanavavo avalindu amwe tute navo panapa vonti? Azyazile kwi lelo zyonti zinizi? 57Vahapunula muli wuyo. UwenʼuYesu nyene ahavavuzya ahati: Umukuvwi atakusovʼumushinzi nkandi kwe kumwavo namunyumba yakwe. 58Atahapelʼaminjʼamamfindango aga maha mumwo shʼavenʼulwitiho vatali nalwo nalumo.

Pilihan Saat Ini:

Matayi 13: NYi1965

Sorotan

Berbagi

Salin