San Marcos 7

(Mt. 15:1-20)

1De fariseu cun de maistrɨ ni nán ley de ni zá Jerusalén, güebiideb rut zuguaa Jesús. 2Chiy chi gunádeb dec nuu de xpɨny Jesús bquiindeb ne quɨt gudibynaatideb zec ni ná costumbrɨ xte de maistrɨqui, ax guniyádeb laadeb. 3Te pur de fariseu ne irateru de bniety Israel zanalddeb de costumbrɨ xte de bniety gulal xtendeb dec quɨt iquiintideb anste quibynaadeb zienzi güelt. 4Ziyza chi riecquideb redeb lo guee, quɨt rquiintideb anste chaady naadeb zecpac ni ná costumbrɨ. Ne zienziru de costumbrɨ ni zenuudeb, xa xquel quiibydeb de vas, de camplory, de trast guiib ne axt néru de luun xtendeb. 5Pur ningui de fariseu cun de maistrɨqui gunabdiidxdeb Jesús:

—¿Xínii quɨt zenuu de xpɨnbiu costumbrɨ ni bsáan de to xpɨngul gulalnɨ? ¿Xínii rquiindeb sin quɨt rguibynaatideb zecpac ni rquiiny gúndeb?

6Chiy raipy Jesús laadeb:

—Runzit dec nabánytɨ xnezni. Didxldíquɨy ni gunii profet Isaías pur laat chi bcuaab:

De bnietré de diidxzi rtodeb nare,

per niclɨ dudxiin quɨt rtotideb nare dibyquia dibylaazdeb.

7Xíteete zeloti ni rtodeb nare

pur ni rseeddeb bniety púrzi ni rguichlaaz bɨnguɨchliu.

8Anre laat rsáantɨ xtiidx Dios tuby lad par chanaldtɨ de costumbrɨ xte bɨnguɨchliu, zeclɨ xa xquel quiibytɨ de camplory, de vas ne irateru saa de cosqui.

9Ziyza raipy Jesús laadeb:

—Par quɨt nitlo de xcostumbrɨt ax rsáantɨ xtiidx Dios tuby lad. 10Ne Moisés guniib: “Gúp didxdoo xtadu cun xnanu”, ne “Elquɨ ni cudé xtadni o xnanni, ná par gatybɨ.” 11Per laat rniit dec zelee gaipy bniety xtadni o xnanni: “Quɨt chaleeti gacnía laaguibtɨ, te pur irate ni napa ná Corbán” (Corbán zelo ni a ná par Dios). 12Ax rniit dec ni inii ziy, aquɨt chaleeti gacnéb xtadbɨ o xnanbɨ. 13Ziy xquel rbelaaztɨ xtiidx Dios pur zanaldtɨ de costumbrɨ ni rseedtɨ iraru de saat ne zienziru saa de cosquɨ runtɨ.

14Chiyru gurɨdx Jesús de bniety ax guniiny:

—Gulcuadiag ne gulgacbee ni iniia laat. 15Gati ni rquiinti bniety ná ni run ná bniety bɨnduld sino que pur ni rdiia ruu bniety o ni runza bniety, niy ná ni run ná bniety bɨnduld. 16Ni rcaaz chané cuend de diidxquɨ, gulcuadiagni.

17Chi bsáan Jesús de bnietqui, deni biiuny laniuu ax gunabdiidx de xpɨnny laany xi zelo ni guniiny. 18Chiy raipny laadeb:

—¿Ta néza laat quɨt racbeet ni caniia? ¿Ta quɨt gántɨ dec gati ni rquiinti bniety ná ni run ná bniety bɨnduld, 19te pur ni rquiiny bniety quɨt riabtini láani lazdoob sino que láanbɨy riabni chiyru rdiiani?

Ziy xquel gudixtee Jesús dec quɨt náti bniety bɨnduld pur causɨzi comid ni iquiinbɨ. 20Ax raipny laadeb:

—Pur causɨ ni rdiia ruu bniety o ni runza bniety ningui run, run bniety duld. 21Te pur láani quia bniety zéed iralote de mal xgab, guél ibánydxab cun de saani, guelrbaan, guelrguinxusaa, 22guelráp stuby nguiu o stuby gunaa, guelrzebylaaz xixte bniety, guelrun de mal, guelrun engany, guelráp de vicy, guelracnalaaz, guelruee dixú, guelnaroo, ne guelrun iraloizru de ni quɨt illiú. 23Irate de cos malré zéed láani quia bniety ax ninguidey run, run bniety duld.

(Mt. 15:21-28)

24Deni bza Jesús ruy ax zégacny nez Tiro ne Sidón, chiy biiuny tuby yuu te pur quɨt rcaaztiny tu niacbee zuguaany ruy. Per quɨt nialeeti nicuatslony. 25Te pur gucbeegac xnan tuby dxapeen, ne dxapeenqui nuu tuby bɨndxab láanby. Ax güe xnanby rut zuguaa Jesús guzullibbɨ lony. 26Ne gati bniety Israelti laab sino que bniety Sirofenicia laab. Chiy baanlasbɨ lo Jesús cuéeny bɨndxabqui láani llindxapeenbɨ. 27Per Jesús raipny laab:

—Bsaan iquiinllga de bniiny, te quɨt náti güen idzɨcá bniety guechtily lo lliinni par ideedbɨni de beecu.

28Chiy ax cuaibbɨ:

—Guldícbiu, Dad, per de beecu ropacdem de guechtily biu xte de bniiny chi riabni niguét mɨlly.

29Chiyru raipy Jesús laab:

—Güenquɨ guniiu. Azelee yiuu, abdiia bɨndxabqui láani llindxaapu.

30Chiy chi bdzɨnbɨ lizbɨ, allindxapeenbɨqui nágaa, per abdiia bɨndxabqui láanby.

31Jesús gubíi bdiiany nez Tiro, ax gudeedny nez Sidón ne de guɨdx xte Decápolis ax bdzɨnny ruu nis xte Galilea. 32Ruy güené de bniety tuby bniety nguiu ni ná cuaat ne quɨtza ruezaactib diidx, chiy gunaabdeb lony izubnaany quiab. 33Chiyru güené Jesús bnietqui tuby lad ax bzeeny xcuanaany iropte láani diagbɨ ne bguaaldny ludxbɨ cun xɨ́nny. 34Chiy bguiaany nez llayabaa bgalaazny ax guniiny:

—¡Efata! —zelo diidxqui: ¡Bllal!

35Hóracqui bllal de diag bnietqui ne gubány ludxbɨ, ax guíllyguilliu guzulo rueeb diidx. 36Chiy raipy Jesús de bnietqui dec quɨt tu chagüenétideb diidx pur ni gucqui. Per caniilny ziy laadeb mazrul regüeedebɨy. 37Quesentiand rdxalodeb, rniideb:

—Güen ná irate de ni runny, axt de cuaat runny rindiag ne de gúp relee ruee diidx.

Pilihan Saat Ini:

San Marcos 7: zab

Sorotan

Berbagi

Salin