Tuumba Tuma PILIGU
PILIGU
Yisa Tuumba Tuma litaafi ŋɔ nyɛla Luk ni daa sabi lahibal’ suŋ shɛli la tuɣili. Daliri kpeen’ shɛli zuɣu o ni daa sabi li maa nyɛla o daa bɔrimi ni o yɛli Naawuni Shia Kasi ni daa sɔŋ Yisa tuuli nyaandoliba la ka bɛ moli lahibal’ suŋ din yɛri o yɛla gili “Jɛrusalɛm mini Judia ni Samaria zaa zaŋ tabili dunia luɣilikam zaa shɛm” (1.8). Di nyɛla Kristiɛn adiini lahibali kaman di ni daa piligi Yɛhudianim’ sani m-mali hal ti leei dunia zaa ni niŋ adiini shɛli yɛda la. O sabbu maa nia daa lan nyɛla o chɛ ka bɛn karindi la baŋ ni Kristiɛnnim’ pala politiksi paati niriba bɛn mali nia biɛɣu zaŋ chaŋ Romnim’ nam sulinsi polo, amaa ni Kristiɛn daadiini nyɛla Yɛhudianim’ daadiini pali niŋbu.
Tuumba Tuma ŋɔ ni tooi pirigi ʒii buta zuɣu, ka wuhiri Yisa lahibal’ suŋ maa molibu ni daa kul yɛligir’ shɛm hal ka Cheechi daa ti zani. (1) Kristiɛn adiini piligu Jɛrusalɛm Yisa ni daa labi alizanda ni la nyaaŋa; (2) Di ni daa yɛligi paai Palɛstan luɣ’ shɛŋa polo la; (3) Di ni daa lan yɛligi pahi hal ti paai Mɛditirɛniɛn tiŋgbɔna ni m-mali hal ti paai Rom tiŋgbɔŋ ni la.
Binshɛli din nyɛ yɛl’ kpiɔŋ Tuumba Tuma ŋɔ ni nyɛla Shia Kasi tuma, Shia Kasi ŋun daa siɣi yɛdaniŋdiba zuɣu na Jɛrusalɛm ni yiko Pɛntikɔst chuɣu dali la. O na kul nyɛla ŋun wuhiri Cheechi mini di toondaannim’ soli, ka kpaŋsiri ba bɛ ni yɛli ni binshɛŋa daa niŋya kundi ŋɔ ni maa zaa puuni. Tuuli Kristiɛnnim’ maa lahibali maa ŋmahiŋmahila jiajia waazunim’ pam yihibu puuni. Ka bɛ ni sabi binshɛŋa din daa niŋ n-sɔŋ Tuumba Tuma litaafi ŋɔ puuni wuhirila lahibali maa yiko tuma ni daa nyɛ shɛm yɛdaniŋdiba biɛhigu ni mini cheechi puuni dolintabitali yɛla.
Din be litaafi ŋɔ puuni
Shɛhira niŋbu shili malibu 1.1-26
a. Yisa zaligu din bahindi nyaaŋa min’ o daalikauli 1.1-14
b. Ninvuɣ’ so ŋun zani Judas zaani 1.15-26
Jɛrusalɛm tiŋ’ puuni shɛhira niŋbu 2.1—8.3
Judia mini Samaria tiŋgbana ni shɛhira niŋbu 8.4—12.25
Pool tuma 13.1—28.31
a. Pool waazu yihibu gɔrim din daŋ tooni 13.1—14.28
b. Jɛrusalɛm tiŋ’ puuni jina tɔbu 15.1-35
c. Pool waazu yihibu gɔrim din pahi ayi 15.36—18.22
d. Pool waazu yihibu gɔrim din pahi ata 18.23—21.16
e. Pool ni kpe sarika Jɛrusalɛm mini Siizaria ni Rom shɛm 21.17—28.31
Pilihan Saat Ini:
Tuumba Tuma PILIGU: DBwDB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Dagbani Bible with Deuterocanonical Books © Bible Society of Ghana, 2011.