Tuumba Tuma 2
2
Naawuni Shia Kasi kandina Pɛntikɔst dali yɛla
1 #
Lɛv 23.15-21; Zal 16.9-11 Ka Pɛntikɔst Chuɣu dali daa ti paai, ka Yisa nyaandoliba zaa laɣim luɣ’ yini. 2Yim ka bɛ ti wum vu’ shɛli damli, ka di yi zuɣusaa na kaman pɔhim tital’ la nti pali bɛ ni daa ʒi du’ shɛli ni maa zaa. 3Ka binshɛli din ŋmani buɣim zilima puhi yina nti tamtam bɛ zaa yinoyino zuɣu ni ti kpa. 4Ka Naawuni Shia Kasi daa pali bɛ zaa, ka bɛ piligi tɔɣisiri tinzun yɛligu balibu kam yɛtɔɣa Naawuni Shia Kasi maa yiko ni.
5Di saha maa ka Yɛhudianim’ bɛn nyɛ wuntizɔriba ka yi tinzun tinsi balibu kam ni na la daa laɣim be Jɛrusalɛm. 6Vuri maa ni daa yɔri maa, ka salo laɣimna nti wum ka Yisa nyaandoliba maa tɔɣisirila bɛn’ bɛn laɣimna maa zaa yinoyino ya yɛligu, ka di gari ba pam. 7Ka di daa niŋ bɛ zaa alahiziba ka bɛ yɛri taba, “Nyamiya, bɛn zaa tɔɣisiri ŋɔ pala Galilinima? 8Ka di chaŋ wula ka ti ti wumdi ka bɛ tɔɣisirila ti zaa yinoyino ya yɛligu?” 9-10Ti ni shɛb’ nyɛla Yɛhudianim’ mini bɛn pa Yɛhudianima, ka nyɛ bɛn doli Yɛhudianim’ daadiini soli, ka yi Paatia mini Miidia ni Ɛlam ni Mɛsopoteemia ni Judia ni Kapadɔsia ni Pɔntus ni Ɛsha na. Ka ti ni shɛb’ yi Firijia mini Pamfilia ni Ijipti ni Libia tinduya din miri Sairiini la, ka ti ni shɛb’ yi Rom na. 11Ka ti ni shɛb’ mi yi Kriit mini Areebia na, amaa ka ti ti wumdi ka bɛ tɔɣisiri Naawuni daalahiziba tumtumsa yɛla timaŋmaŋ’ ya yɛligu ni. 12Ka di daa niŋ ba alahiziba ka gari ba pam ka bɛ bɔhiri taba, “Ka bɔ n-lee bala?”
13Amaa ka bɛ ni shɛb’ maani Yisa nyaandoliba maa ansarisi yɛra, “Bɛ nyula dam kuli!”
Pita waazu yihibu
14Ka Pita min’ o nyaandolitab’ piniyin’ la daa yiɣisi zani ka Pita duh’ o yee pam yɛli, “Yinim’ Judianim’ mini yi zaa bɛn be Jɛrusalɛm ŋɔ, wummiya n ni yɛn yɛli ya shɛm ŋɔ ka baŋ yɛlli ŋɔ gbinni. 15Ti bi nyu dam kuli kaman yi ni tɛhiri shɛm maa, dama yi mi ni pumpɔŋɔ na kul nyɛla asiba kurig’ awɛi. 16Amaa dimbɔŋɔ nyɛla Anabi Joɛl ni daa yɛli shɛm la. O ni daa yɛli shɛm maa m-bɔŋɔ:
17‘Naawuni yɛliya, ʒiɛmani din bahindi nyaaŋa puuni
n ni ti zaŋ n Shia Kasi niŋ daadam kam ni.
Ka yi bidibisi mini yi bipuɣinsi ti tɔɣisi
anabitali yɛtɔɣa;
ka yi nachimba ti nya ʒii;
ka yi ninkura mi ti zahim zahima.
18Yɛlimaŋli, n shiri ni ti zaŋ Shia Kasi niŋ
n dab’ bidibisi mini n dab’ bipuɣinsi ni,
ka bɛ ti tɔɣisi anabitali yɛtɔɣa.
19Ka n ni ti chɛ ka alahiziba tumtumsa tum zuɣusaa ha,
ka wuhi shihira din nyɛ ʒim mini buɣim
ni nyɔhi dunia tiŋgbani puuni;
20ka wuntaŋ’ ti zibigi ka goli mi ti niŋ
kaman ʒim la pɔi,
ka ti Duuma dabisi’ titali din mali jilima pam la naanyi kana.
21 #
Joɛl 2.28-32
Ka ŋunkam ti kuhi boli ti Duuma yuli ni tiligi.’ ”
22Pita daa lan yɛli, “Yinim’ Izraɛlnima, wummiya n ni yɛn tɔɣisi ya yɛtɔɣ’ shɛli ŋɔ: Naawuni daa wuhi ya ni o nini tiɣi Yisa Nazarɛt nir’ la, dama o daa chɛ ka o tum tuun’ kara mini alahiziba tumtumsa balibu kam, ka wuhi ya shihira balibu kam ka yi zaa mi, dama o daa niŋla di zaa ha yi sani. 23#Mat 27.35; Maak 15.24; Luk 23.33; Jɔn 19.18 Ka Naawuni ni daa zal’ li shɛm o nia lɔbu min’ o milinsi puuni zuɣu ka o daa zaŋ o niŋ yi nuu ni, ka yi mi daa chɛ ka ninvuɣ’ biɛri kpah’ o tabili dapulli zuɣu ku o. 24#Mat 28.5-6; Maak 16.6; Luk 24.5 Amaa ka Naawuni daa neeg’ o kum maa ni ka yih’ o di biɛrim ni, dama o daa pala ŋun ni kpi n-kpalim kum ni. 25Dama Naa Dauda gba daa tɔɣisi ŋun’ Yisa yɛla n-yɛli:
‘N kul nyarila n Duuma n sani sahakam;
o bela n nudirigu polo
ni di chɛ ka n suhu ku zɔhira:
26dinzuɣu ka n suhu piɛla,
ka m paɣiri Naawuni pam.
Din pahi dimbɔŋɔ zuɣu nyɛla,
n niŋgbuŋ gba mali tahima;
27dama nyini n Duuma Naawuni, a ku chɛ ma
ka n kpalim be kpiimba biɛhigu shee;
ka a mi ku chɛ ka a Ninvuɣ’ suŋ niŋgbuŋ pooi.
28 #
Yila 16.8-11
Nyini n-wuhi ma so’ shɛŋa din kuni nyɛvili shee,
ka chɛ ka n suhu paligi zaa,
n ni be a san’ la zuɣu.’ ”
29Pita daa lan yɛli yaha, “M mabihi, n ni maan yɛli ya ti yab’ Naa Dauda yɛla. O daa kpiya ka bɛ sɔɣ’ o, ka o gballi na be kpe hal ni zuŋɔ. 30#Yila 132.11; 2 Sam 7.12-13 Amaa o ni daa nyɛ anabi zuɣu ka o daa mi ni Naawuni pun lo o alikauli ni o ni ti zaŋ o zuliya ni ninvuɣ’ so leei naa ka o zani o zaani. 31Ŋun’ Naa Dauda daa daŋ nya Masia kum ni neebu ka tɔɣisi di yɛla yɛli:
‘O ti ku kpalim be kpiimba biɛhigu shee
bee o niŋgbuŋ ti pooi.’ ”
32Pita daa lan yɛli pahi, “Yisa ŋɔ ka Naawuni daa neei kum ni ka ti zaa leei di shɛhiranima. 33Naawuni ni daa duh’ o n-zaŋ o ʒili o nudirigu polo maa ka o deei Shia Kasi so o Ba Naawuni ni daa zaŋ lo ti alikauli la n-ti ti na. Alikauli maa palibu shihira ka yi nya ka wum ŋɔ. 34#Yila 110.1 Dama Naa Dauda maŋmaŋ’ daa na bi chaŋ alizanda ni, amaa ka daa yɛli:
‘Ti Duuma yɛli n Duuma, ʒinimi n nudirigu polo 35hal ka n ti chɛ ka a dimnim’ leeg’ a napɔntamdigu.’
36“Dinzuɣu lzraɛlnima, baŋmiya ni Yisa so yi ni daa kpahi tabili dapulli zuɣu maa ka Naawuni zaŋ leei dunia ŋɔ nim’ zaa Duuma ni bɛ Masia.”
37Niriba maa ni daa wum lala maa ka bɛ suhuri chihi pam, ka bɛ bɔhi Pita min’ o tab’ maa, “Ti mabihi, ka wula ka ti lee yɛn niŋ?”
38Ka Pita garigi yɛli ba, “Niŋmiya tuuba ka deeya kom baptaizibu Yisa Masia yul’ ni, ka Naawuni chɛ yi daalahichi paŋ ya, ka yi deeg’ o Shia Kasi ŋun nyɛ pin’ la. 39Dama alikauli maa nyɛla yi mini yi bihi zaŋ tabili bɛn be katiŋ’ ha ka nyɛ ti Duuma Naawuni ni na yɛn boli ninvuɣ’ shɛb’ zaa dini.”
40Ka Pita daa lan tɔɣisi yɛtɔɣa pam n-saɣisiri ba yɛra, “Tiligimiya yimaŋ’ ʒiɛmaan’ biɛɣu ŋɔ ni!” 41Ka niriba bɛn daa deeg’ o yɛligu maa deei kom baptaizibu pahi yɛdaniŋdib’ maa zuɣu dindali maa. Bɛ kalinli daa nyɛla kaman ninvuɣ’ tusaata laasabu. 42Ka bɛ zaa daa kpaŋdi bɛmaŋa n-doli tuumba maa wuhibu, ka zaŋ bɛmaŋ’ bali bɛ ni n-wuhiri bɛ dolintabitali ni nyɛ shɛm bɛ laɣimdi mini bɛ wunsuhigu ni.
Bɛn daa tuui niŋ yɛda biɛhigu
43Ka tuumba maa daa tumd’ alahiziba tumtumsa ka wuhiri shihira balibu kam, ka dabiɛm daa kpe sokam. 44#Tuma 4.32-35 Ka bɛn zaa daa niŋ yɛda maa laɣim be, ka laɣim su bɛ ni mali shɛlikam zaa. 45Ka bɛ daa kɔhi bɛ ni su shɛlikam zaa m-pirigipirigi ti taba kaman di ni daa simdi ni sokam deei shɛm tariga. 46Ka bɛ daa kul laɣindi Naawuni jɛmbu duu ni suhu yini biɛɣukam, ka laɣindi taba yinsi n-laɣindi diri ni suhupiɛlli, 47ka ti Duuma daa chɛ ka ninvuɣ’ shɛb’ bɛn nyari tiliginsim kul pahiri bɛ ni biɛɣukam.
Pilihan Saat Ini:
Tuumba Tuma 2: DBwDB
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Dagbani Bible with Deuterocanonical Books © Bible Society of Ghana, 2011.
