Matááyo 10
10
Yíésu lalillé tomon a naamaká alb fie
1Aaléka, Yíésu lalillé tomon a naamaká hol ˈdu gáá vie, gáál fargogint gaalí aryáán ubaa basham, tá fursam met lulle gálaat yiem gaa ˈdeđuoká shie. 2Gál láli tomon tikiˈde a naamáállá meetle hééllá: gál erkobká Símon giri gaalí Bétiro yegetká ubaa nyárlé Ánˈduru, Yákob giri iny Dhebeˈdayaká ubaa nyárlé Yuána, 3Fílib ubaa Bartolomáyo, Tómas ubaa Matááyo giri gálaat birm gaa gugusatká, Yákob giri iny Alfaayaká, ubaa Dhádias, 4Símon giri gál Rooma kansimle nebeneyká, tá Yúúˈdas Iskáryot máá waaséél Yíésu gál hí oos ˈgieká ˈdú eeyká.
5Yíésu gál tomon tikiˈde a naamáállá alb fie, gáál kieˈde, kieye, Haí lés gál gál Yuuˈdi muuninyká síen, héétí haí ˈjien Samaria é tikiˈd úba ki fáminy. 6Wala ˈbíl íl Yisirayel-, bađayká tákámle ˈdú seesemíe. 7Tá hí hol gaa seseennoká gálaat ki ˈdiiyimíe, Guch Waaˈgiet hé ká ˈjobonte, yiedhíe. 8Gál basham ˈguoká bisía, gál kufeká sidham geđi káa, gál nyókot hí faanneká ría, aryáán gálaat yiem gaa ˈdeeyyíe. Fargogintééllá hállééllá hí argiyye, hallééllá gálaat ki bisía. 9Hí seseennoká haí bíre horkiká ubaa bíre ííkarská, tá bíre sibilaam raagarká đafaraam af ki hísan. 10Tokolaam haí éen, kossam ubaa koiy nannam haí shúúnan, gasaram haí shúúnan. Máá hujich nannuoká hé ˈduuw máálle gálaat hé geer gaa aargiroká ˈguo.
11Aaléka, ˈjien ubaa ény hí ki fafaannaká, máá hí uroká ebitíe, mú ˈbílle gaa yíéđía, ˈjíig af giri he hí kím yegetká. 12ˈBíl hí hillaká naanná naalle met naanatíe. 13Har gál ˈbil kinaalloká hí rokoˈd ki goleka, naannakícho hí gaal íín gaa yíéđiyyo. Har gaal hí rokoˈd ma ki golinyka, naannakícho itle hí hol ˈdu gáá naat. 14Tá har gálaat hí rokoˈd ki gogoloká điidhe-, ubaa gaal ˈdeenykícho nee ma kokonyka, af giri hí ˈbíl kinaal yíekaʼ, muuninyka, ény kinaal yíekaʼ hí yé gaa ˈdeˈdeennoká ˈgaskícho shére gaa ˈdodhdhíe. 15Yú hí hé ˈdúwaká geeye, kúlích gálaat Waag hí ˈdéé ki iđimichoká ali kí ˈdiiyyeka, gál eny kinaalloká manyjany il hí aargiˈdoká hé tág ˈdeew! Manyjany gál ˈjien Soˈdom ubaa gál ˈjien Gomora il hí aargiˈdoká úba ˈdiefiyya.
Lali Yiesu hé lésal il hí gaa aargiˈdoká
16Bá dhaayyíe, yú albo hí fafaa, hát wala đányar hursam gaa seseenká haí cheedhe. Aaléka, hát chárka ˈdaaliledhíe, hát hóleka sáa yiedhíe. 17Tá gálaat hol ˈdeeˈdemíe, gaal ar haí ˈdú egee, gaal énylé ˈdiiyiminyká haí gaa tuuna. 18ˈDaa giri itín hí lalichúká, gaal gál les met ki ˈgieká ubaa gál kaansúoká met haí siidha, tá gál kinaallá ubaa gál gál Yuuˈdi muuninyká metle ˈduuwchú haí gaa hogoto. 19Aaléka, gaalí ˈgiiliˈgayka, hé hí hogotoká tawunyle haí ˈgar aayáˈginy. Waag af kinaallá hé hí hogotoká a gerkícho haí ká fafiyya. 20Af kinaallá ˈdeeny kíchia hí hogotoká hé itín dhúrkícho hí yé ma gáá ˈdeˈdeminy, Hím Naasan ˈJaa kíchia hí gaa iđoká in ˈdéé hogoto.
21Máádhat nyárlé hol ki ˈdalidheká ar gíl hai gaa kakaa, mú ha gaalí yeese. Héétí iny ˈjaalle ar gíl hai gaa kakaa, mú ha gaalí yeese. Um gállé hí ˈdaloká af hai ká điidhma, gáál kúfach mé hai ki kokoo. 22Itín gálaat lulle ˈdaa meenychú ˈdugaka haí neebeedhe. Tá máá hééllá lulle mé ki chirsat-, ˈjíig he mé đig yeetká Waag haí rianna. 23Ény gálle hí maanyjasuoká kar gaa ˈdóo, ény éíy taakaká mé náa. Tá yú hí hé ˈdúwaká geeye, itín ˈdaab yáá Iny Máádhátallá guchchú ma kí yímenká it ény Yisirayel lúl mé ma ki ˈdaraminy.
24Máá láliká hé máállé hí he oonisuoká ma ˈdú ˈduwanany. Héétí gedech hé máállé he hujich ki nannuoká ma ˈdú ˈduwanany. 25Máá láliká har hát máállé hí he oonisuoká yieka, hé kinaallá hí faagsuo. Héétí gedech har hát máállé he hujich ki nannuoká yieka, hé kinaallá geerle hí gaa meet. Gálaat har máá ˈbíl mé ki yaalká chacharo-, mú Belsebul yegetka, gál ˈbil kinaalloká chaarim gaalí ˈdú muuroká ebá súm ˈdéen! #10:25 Meeny Bélsebul lééllá úba he meeny Satan.
Sierm hayyíe, sidhamkícho Waago hí gílká ˈgayya
26Tá gál hatallóóllá haí siermle ˈgíiny. Hé níínní gaalí kakaw-, Waag hí yé ma ká ˈdeđinyká mán. ˈDeeny gaalí les đireká yé hai ká ˈdeeme. 27Hé yú hí tol egeet-, yú hí geđuoká, bííy mé édhká gaa hoogodhóo! ˈDeeny yú hí geey-, hí ye gaa maalleká é met ˈdug ˈdú ˈdée, ˈdiiyimíe.#10:27 Ény gál Yuuˈdi bar kinaalloká hé met hursam gaa ˈbaarasso-, gálaat hí ˈdú yíéđianká. 28Haí gál gon yeges-, sidh ma yegesinyká kikían. Máá fargogínt ˈguo-, gálaat gónle ubaa sidhamle yeges-, gáál ˈjiet biiyoká ki lalaanká kiikiadhíe. 29Húrúm niginiká naam hé bíre raar gaalí higiatká hí tikiˈd ma onnôny? Tá hurum hé húrmáách níínní úba hí úr gáá ˈjeˈjeen-, kufunanká mán, har ˈJaa kíchia Waag hí ma ká murinyka. 30ˈDaakíchoka, metkícho dhúrlé hí gaa ˈgieká túóyle lulle hé Waag hí óg. 31Aaléka, sierm hayyíe, itín it húrúm burnayká súm ˈdú ˈdúwa.
Máá ke ki ˈgađasanká
32Máá gálaat metle yú ye mááchú gaa yeetká, ˈJaa chia úr ijoká metle úba mááchú ha yú gaa yeedhe. 33Tá máá gálaat metle ye gaa điidhoká, yú úba ˈJaa chia úr ijoká metle mú ha yú gaa điidhma. 34Tawunykíchoka, haí kieye, Mu les ka yimíéllá naanná ká sidhe, haí chéen! Yáá naanná les ma ka sîn, yú oosó les ká sidhe.
35Yú ka yimíéllá íny ubaa ˈjaallé, ini ubaa ˈjiellé,
min ubaa suoglé hol eiy gaa ˈgiˈgidhia.
36Tá máádhat gál hí súm neebeetká
he mú gállé mú hol ˈbíl geer tikiˈd af ijoká.#10:36 Míka 7:6
37Máádhat har ye gielnítaka, hí gielmit ye ka ˈguo kinaallá hí gielmit muí ˈjaalle, ˈjielle, inyle, tá inille ka ˈguoká af ˈdú ˈderneyo. Har hát kinaal ma ˈdiinyka, hé mááchú muuniny. 38Máá ˈgórlé đarám yaalká ma een-,#10:38 ˈGór đarám yaalká een, hélle kieye, hef ˈdaa Kiristoka muun gáál ka higiloká ke gaa yíéđian-, ke mé ki chichirsatká. ye el ma gáá véérinyká, hé mááchú muuniny. 39Máá sidh tág chiratká sídhle hai baađisia, máá sídhle ˈdaachúka bađisuoká sídhle hai riima.
Waag hé hé shiicho gálaat ká ˈgayyo
40Máá itín hí rokoˈd ki goloká yaa ye rokoˈd ki gole, tá máá yú dhúrchú ye rokoˈd ki goloká, máá kinaallá Máá ye ali gáá kaayká he rokoˈd ki gole. 41Máá máá Waag hí ˈdeem ka shigichoká rokoˈd ki goloká hé shiicho-, Waag hí gállé hí ˈdeem ka shigichoká shigichoká úba hai aargira. Héétí máá máá hé ˈdúwaká el gaa igiroká rokoˈd ki goloká hé shiicho-, Waag hí gállé hé ˈdúwaká el gaa igiroká shigichoká úba hai aargira. 42Tá yú hí hé ˈdúwaká geeye, máá gál chia niginííllá mú tikiˈd ˈdaa giri mu he lalichúká mú úba bíé abunaká shuoká, máá mú bie shie kinaallá hé hé shiicho Waag ma gaa ˈdaabiny, Yíésu hí gáál yie.
Pilihan Saat Ini:
Matááyo 10: dsh
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Bible Translation and Literacy
