aMatiyu 4

Ishetan bo̱so̱p aYeso

(aMar 1.12-13; aLuk 4.1-13)

1Iyong Kabik Kazhe̱l tseng be aYeso kaye̱e̱r katse ne Ishetan su ku bo̱mo̱ng. 2Nama aYeso tá nye azumi kuko̱s iso̱k inaas, katuk be kunom iyong izong tú ku ro̱. 3Ishetan be̱ a tá fe̱ be wu ye, “Ke wan ne i nye Igon Adakunom, to̱, fe̱ be ata na nong á ta te abiredi.”

4Ayong aYeso fe̱ be wu ye, “Ise ni izibir ye: ‘Sang anerawe ta sor be naya tsek baꞌ, amma be koakye kuri rife̱ ri ta wuruk nanu Adakunom.’ ”

5Ne Ishetan ame tseng be wu kaye̱e̱r kuwo̱p aUshalima kuzhe̱l'e ne a ku sak a ta nyeseng naro̱ ka ta se ring ring natoon agbang kutu kuya Adakunom iben. 6Ne a fe̱ be aYeso'me ye, “Ke wan ne i nye Igon Adakunom, to̱, furuk ma kaben. Kamok ise ni izibir ye:

“ ‘A tà fe̱ be ámaleka wu be agbang kuto̱

nong á tà ka te̱ne̱ng, ne á ka tor be ibo̱k,

fan wan bu rus kutak nuta.’ ”

7Ayong aYeso fe̱ be wu ye, “Ise ni izibir gip ye: ‘Sang wan tu bo̱mo̱ng Agwo̱m Ágwo̱m wan Adakunom baꞌ.’ ”

8Ne Ishetan ame bun a tseng be wu natoon rifan ri ta se garang dide̱ng gbak, nong a tú ku tosong rigwo̱m kazatse ne kuyiik'e cice̱r. 9Ne a fe̱ be aYeso'me ye, “Ike̱re̱ na cice̱r mi tà ka no̱o̱k, ke wan tà kpa kaben nong i tin ya iben.”

10aYeso fe̱ be wu ye, “Kam be mi Ishetan! Kamok ise ni izibir ye, ‘Agwo̱m Ágwo̱m wan Adakunom ne wan tù ku ya iben ne i ku nye itomong wu ze̱r tsek.’ ”

11Iyong Ishetan tú ku won. Ámaleka be̱ nong a tin sak riye̱ na aYeso ame.

aYeso san itomong wu na aGalili

(aMar 1.14-15; aLuk 4.14-15)

12Nizen aYeso tá fok ye an te aYohana ni itso̱m, iyong a tú ku bun ni iben aGalili. 13A won aNazaret nong a tá be na aKapanum be kusor, ku tase nanu kudung, ni igak kaben aZebulun ne aNaptali, 14nong a tá shining ike̱ng iya Ishaya tá fe̱, ye:

15“Kaben aZebulun ne kaben aNaptali,

yin i tá se yin nabas agbang kudung, a ta tar Isho̱ng aUrdun.

Ne kaben aGalili nabas aya sang a tá nye áner aYahuda baꞌ.

16Áfe a ta sor na awhi an di agbang akanang;

áfe a ta sor na nawu riku akanang min wuruk ni ba.”

17Kum be izen iyong aYeso san awazi, ye; “Shishing yin kuse yin kamok rigwo̱m kaza m be̱ bubarak.”

aYeso yis áfe kuyising izos

(aMar 1.16-20; aLuk 5.1-11)

18Nizen aYeso tá se be kutseng nukim Kudung aGalili, iyong a di aner be aronyining, aSiman a tú ku yis ye aBitrus ne aronyining wu Adarawus. Á sen te agunung ba kaye̱e̱r kudung, kamok ba nye áfe kuyising izos. 19Ne aYeso fe̱ be ba ye, “Be̱, ni kuus yin, mi tà ka sak yin tin be̱s yin be ánerawe.” 20Gbashak, á wor á won agunung ba ame, nong á ta kuus aYeso.

21aYeso tá fa ya kasho̱o̱n be kutseng ne a di aner be aronyining, aYakub igon aZabedi ne aronyining wu aYohana. Á se kaye̱e̱r kukpara ashi be ada ba aZabedi'me, á ta se be kunye kanye̱k agunung ba, ne aYeso ku yis ba, 22ne a wor a won kukpara ashi ame be ada ba nong á ta kuus aYeso.

aYeso sak áfe iro̱k tá te atser

(aLuk 6.17-19)

23aYeso gorok kaben aGalili cice̱r ne a bo̱so̱p ánerawe'me kaye̱e̱r atu aduwa ba, ne a ku taas ba Rife̱ Ritek natoon rigwo̱m kaza. Ne a sak áfe iro̱k iriri me tá te atser. 24Anong, itak wu tseng cei ma ni iben aSuriya ne á ku be̱s be áfe iro̱k ze̱r ze̱r cice̱r ne áfe á ta se risam dide̱ng, ne áfe amaan nabik be áfe kuro̱k kucicirim ne áfe a tá we̱ abas azining. A tú sak ba á tá te atser. 25Rigwo̱m ánerawe whe̱re̱ nes na aGalili ne kaben ka ta be iwo̱p kuso̱k be afa ne áfe aUshalima be áfe iben aYahuda ne áfe a ta tar Isho̱ng aUrdun cice̱r be̱s nufu.

Pilihan Saat Ini:

aMatiyu 4: izrNT

Sorotan

Berbagi

Salin