Luk 1
1
Lukde doraman meme Tiofilusure feiaga
1 #
Tu 1.1
Eregeam Tiofilus, na ede. Egime Keriabüde daba daba gürenakuti sin kodigo taiberar taideaga babaure, fere epürade nugengab kube fururugüdi doraman feien. 2#Jo 15.27; Hi 2.3; 1 Pi 5.1; 1 Jo 1.1Ferewar nugengab egede daba daba omogamnana tataigar kegewenwaib, baba ferewarüngab dora daiwen. Baba ferewar Keriabüb dorab saina ferewar sibe bürüdi, doraman baba, wasigen. 3#Tu 1.1; 11.4Bangar ye tugu, doraman meme feiebüregün, bangüdi na gam sugurur ogureregeaga. Ye baba daba daba gürenakutib ginimure egimenana fünaiudi idadau totogünwaib. Mügar ye baba daba daba tataigen baba sibenana surur fein. 4Dora sarigabürünen baba, baba gürenakuti kainana. Na ninaidiba, idadau sibamgeregün.
Elisabet Jon Yag Fidegib sinoyeaga Maria Jisas sinoyeaga babab doraman
(Sapta 1.5—2.52)
Keriabüb dora dugurewegi ferede Sekaraia menüm waweaga, Jon taideregeaga
5 #
1 Sto 24.10
Herot Judiawarüngab erekokayau büreaga sese gam Keriabüb kobegegi fere güre büreaga, yanim nub Sekaraia. Nu Abiyab gingamnab, Keriabüb kobegegi fere. Nub fia Aronüb gingamnab, finegeb yanim baba Elisabet. 6#Stt 17.1; 1 Kin 9.4; Tu 23.1; Fl 3.6Nugeküre Keriabüb ege gam idadau büren. Bangar nugeküre Erekokaib kabia gürenakuti tugu dora gürenakuti tugu daiwafaigen, bangar nugeküre ege nub gam menmen kene büren. 7Bangeagako, nugeküre mogoi kene, amure, Elisabet nu kedemai. Bangar nugeküre goyam abüdigen.
8 #
1 Sto 24.19; 2 Sto 8.14; 31.2 Sese güre gam Sekaraiab gin, Keriabüb fata gam kobegebüre kümünen, bangar Sekaraia tugu Keriabüb ege gam kobe fünaiweaga. 9#Kis 30.7-8; 1 Sml 2.28; 2 Sto 29.11Bangar nini Erekokaib kobegegi fere wonide, kumaub bai kebur kuri nama tugu ferebeaga, baba fere fitawebüre ai magi epürawen. Bangar nini baba epüra gamde Sekaraia kaiwen, bangar nu bai ferebüre iruweaga. 10#Wkp 16.17; IDT 8.3-4Baba bai fereg sese gam, ferefinabur epüra kedeb fata obgoime gurudi bürüdi sibdibwa büren. 11Bana bangar Erekokai Keriabüb dora dugurewegi fere güre Sekaraia gam taideaga. Bangüdi kumaub kebur kuri nama tugub, bai feregib kurub kube namayau biboudi büreaga. 12#Het 6.22; Dan 10.8; Lu 1.29; Tu 10.4Sekaraia Keriabüb dora dugurewegi fere kegeudi, tergüdi kimigeaga. 13Bangeagako, Keriabüb dora dugurewegi ferede menüm waweaga, “Sekaraia, na kimigegena. Keriab nab sibdib edfotuweaga. Fian Elisabet nono sinoyeregeaga. Bangar na nub yanim Jon yanübaue. 14Bangar nab kob nama bürar nag ebebearweregün. Bangar ferefinabur epüra nono baba taidegi gam ebebearweregen. 15#Nam 6.3; Het 13.4; Jer 1.5; Ga 1.15Amure, nu Erekokaib ege gam yanim erekokai deregeaga. Nu wain mum, kida yag tugu neregarge. Nu anab sibim gam büreaga baba sese gam, Etob Kedebüde korobaweaga. 16#Mal 4.5-6Nude bangar Israel ferefinabur epüra kob pirudi, nugengab Erekokai Keriab gam kümüneregen. 17#Mal 3.1; 4.5-6; Mt 11.14; 17.11-13; Mk 9.12Nu Elaijab kabia tugu, sogi tugu düdi, nuge kese agfürüdi kümüneregeaga, bangarie Erekokai kuri daiweregeaga. Nude emnügmana tugu mogoi toi tugu kob gürena gam difürüngeregeaga. Bangüdi dora biregawaigen baba ferewarüngab ututun idabereregeaga, bangar fere namab ututun sibe büreregen. Bangar ferewar ekotagaberar, Erekokai ogureregeaga baba, momoudi büreregen.”
18 #
Stt 18.11
Bangar Sekaraiade Keriabüb dora dugurewegi fere menüm waweaga, “Ye aranüm nab dora baba kainanagüdi sibamgüi? Ye goyamügafotün, fiai tugu nu abüdigeaga.”
19 #
Dan 8.16; 9.21; Mt 18.10; Hi 1.14 Bangar Keriabüb dora dugurewegi ferede dora menüm toweaga, “Ye Gebriel, ye Keriabüb ege gam bibougafaigün. Keriab nugede suguryar ye wanebüre oguran. Bangar dora nama fanam meme dünebüre na gam oguran. 20#Ese 3.26; 24.27; Lu 1.45Bana ede. Na yeb dora kob kainanagabge babaure, mügar nab sube gütügar dorageregabge, kümüna baba daba daba gürenakuti taifotuwarie. Dora yeb meme nugeab sese gamie taideregeaga.”
21Kedeb fata gam amdag daba taidar, Sekaraia bata büreaga. Bangar ferefinabur dagodaiudi, ututun toitoiudi büren. 22Bangar kuri füraboudi, nini gam doragegi dirugweaga. Bangar nini sibamgen, Keriabüb fatagoime daba aranümdag kegeweaga. Nugeab kube gamde gürena nini keab dorageaga. Amure, nugeab sube baba gütüweaga. 23#1 Sto 9.25Kuri, Sekaraia nugeab fünaiwegi sese kenegarbere, nugeab fib gam maigüdi kümüneaga. 24Bangar kuri fia Elisabet mube kub tugu gar, edina taba tugu iwagüdi büreaga. Elisabet menüm wageaga, 25#Stt 30.23; Ais 4.1; 54.1; 54.4“Egime ye mogoi kene gar maiagün. Bangeagako, Erekokaide ye nirarayeaga. Babaure, mügar ye mube kub tugu, bangar babade yeb maia, ferefinaburüngab ege gam kenegafotuweregeaga.”
Keriabüb dora dugurewegi ferede Maria menüm waweaga, Jisas taideregeaga
26Elisabet mube kub tugub edina kubete gam, Keriabüde nugeab dora dugurewegi fere Gebriel sugurwar, Nasaret kümüneaga. Nasaret nu Galili distrik büreaga. 27#Mt 1.18; Lu 2.5Momugo güre Devitüb gingamnab fere güre debüre dora idafotuwenwaib baba gam kümüneaga, yanim nub Josep. Momugo babab yanim Maria. 28#Het 6.12; Dan 9.23; 10.19Bana Gebriel nu gam kümünadi menüm waweaga, “Momugo, na büründe? Erekokai naküre bürüdi, unun dünüdi tauneaga.” 29Maria dora baba edüdi, tergüdi menüm utungeaga, “Dora meme aranüm?”
30Bangar Keriabüb dora dugurewegi ferede menüm waweaga, “Maria, na kimigegena. Keriab nu kob düneaga. 31#Ais 7.14; Mt 1.21; Lu 2.21Ede. Na mube kub kaiudi nono güre sinoyeregün. Bangar nub yanim Jisas yanübaue. 32#Sng 132.11; Jer 23.5; Mk 5.7#2 Sml 7.12-16; Ais 9.7Nu eregeam büreregeaga. Bangar Keriab Kekia Asaub Nono güdi yanübaweregen. Bangar Erekokai Keriabüde, oyebeb Devit sibe erekokayau difereregeaga. 33#Dan 2.44; 7.14; 7.27; Mai 4.7; Jo 12.34; Hi 1.8Nu Jekopüb gin toib erekokayau tüpür büreregeaga. Bangar nub koroba baba, kenegeregarge.”
34Bangar Mariade Keriabüb dora dugurewegi fere menüm totoweaga, “Baba daba aranüm taidebeaga? Ye fere güre küre kinürge.”
35 #
Mt 1.20; 14.33; Jo 1.34 Bangar Keriabüb dora dugurewegi ferede dora nub menüm toweaga, “Etob Kedeb na gam ogureregeaga, bangar Keriab Kekia Asaub sogide korobaneregeaga. Bangar kuri nono sinoyeregün baba, nu Keriabüb fere nama, idadau bürar, Keriabüb Nonogüdi yanübaweregen.
36“Ede. Anin fanam Elisabet abüdigfotuweagako, nu mube kub tugu gar nono sinoyeregeaga. Egime mogoi sinoyafaigargegenko, mügar nu mube kub tugu, edina nub kubete tugu kenegeaga. 37#Stt 18.14; Jer 32.17; Sek 8.6; Mt 19.26; Ro 4.21Am daba güre Keriabüde gegi dirugweregarge.”
38Bangar Mariade menüm wageaga, “Edün. Ye Erekokaib sarua finege. Nu ye gam nag wagün sibe geregeaga.” Bangar Keriabüb dora dugurewegi fere nu uriaudi kümüneaga.
Maria kümüna Elisabet kegeweaga
39Baba sese gam Maria pirikanana siradüdi, Judia distriküb gir toi gam bag komeaga. Bangüdi fib ere güre bag büreaga baba gam kümüneaga. 40Bangüdi Sekaraiab fata gam iruwaboudi, Elisabet ferebereweaga. 41#Lu 1.15Elisabet Mariab ferebere baba edar, nono Elisabetüb sibim gam büreaga baba kutuweaga. Bangar Etob Kedeb Elisabet korobaweaga. 42#Lo 28.4; Het 5.24Bangar Elisabet sogsogi igyogüdire wageaga, “Keriabüde unun düneaga, baba unun finabur gürekoi dünügeaga baba emegerweaga. Bangar nono nagüb sibim gam büregeaga baba, nu tugu Keriabüb unun deaga. 43Ye won gar, igeab Erekokaib ana ye gam ogureaga? Ye finege tün tugubge. 44Edün. Kagub yeb nab ferebere edegi sese gam, nono yeb sibim gam büreaga baba, nu tugu ebebearudi kutuweaga. 45#Lu 1.20Na Erekokai nugede waneaga baba sibenana geregeaga, babaure na kob kainanagün, babaure na ebebearue.”
Mariab mun
46 #
1 Sml 2.1-10; Sng 34.2-3; Hab 3.18 #
1 Sml 2.1-10
Maria menüm wageaga,
“Kob yeb
Erekokaib yanim
siradgabereaga.
47Bangar kob yeb
Keriabure ebebearweaga,
nu ye Maig Igayegib Fere.
48 #
1 Sml 1.11; Sng 138.6; Mal 3.12; Lu 1.25; 11.27 Ye nugeab sarua finege,
ye ugu finegeko,
nu ye kegeidi
nirarayeaga.
Mügar, kuridaka
ferefinabur gürenakuti
Keriabüde ebebear erekokai
siagagüdi, dorageregen.
49 #
Sng 71.19; 111.9; 126.2-3 Keriab nu sogi erekokai tugu,
nu ye sagiebüre
daba amdag sibe banüm geaga,
bangar yanim nub kedeb büreregeaga.
50 #
Kis 20.6; Sng 103.13-18 Nu ferefinabur nuge miniba bürfaigen baba,
nirarangafaigeaga.
Ferefinabur mügar büren tugu,
kuri tataigeregen tugu
tüpür babanüm gürena geregeaga.
51 #
2 Sml 22.28; Sng 33.10; 98.1; Ais 40.10; 1 Pi 5.5 Kube nugeabüde fünai
gugub geaganwaib,
fere simai sige gürena agferenangüdi
nugengab yanim siradgabürügafaigen baba,
kudengar sarawen.
52 #
1 Sml 2.6; Jop 5.11; 12.19; Sng 147.6 Erekokayau toi febangüdi,
nugengab gotogegi kur nama gam kudengüdi,
fere yanim kenewar baba,
yanim ere dünügeaga.
53 #
1 Sml 2.5; Sng 34.10; 107.9 Fere ogunongeaga baba,
daba daba nama nama epüra
dünügar fugongeaga.
Bangüdi fere daba daba epürage tugu baba,
kudengar uguna kümünen.
54-55 #
Stt 17.7; 17.19; 18.18; 22.17; Sng 98.3; 132.11; Ais 41.8; Mai 7.20; Ro 11.28; Ga 3.16 Keriab nugede sigeab oyebesig
Abraham dora duweaga,
baba tugu Abraham nugeab matanab mana
gürenakuti gam
tugu dora dünügeaga.
Baba dora wanügafotuweaganwaib baba,
tüpür tüpür büreregeaga.
Baba dora Keriab nugeab utun gamnana
bürar nirarangeaga.
Nu namana niraragüdi Israelwar
sagüngeaga.
Israelwar nini Keriab
nugeab sarua ferefinabur.”
56Maria Elisabet küre edina küidag banüm büreaga, bangüdie nugeab fib gam maigüdi kümüneaga.
Elisabet Jon sinoyeaga
57Elisabet mogoi sinoyegib sese taidar, nono sinoyeaga. 58Elisabet nugeab fib büreabmana tugu, nugeab giniabmana tugu, Erekokaide Elisabet nuge niraraweaga baba doraman edüdi, Elisabet keab ebebearwen.
59 #
Stt 17.12; Wkp 12.3; Lu 2.21 Dü düm kenegarbere nonob mube sike katuwebüre oguren. Yanim Sekaraia duwebüregen, emeb yanim sibe. 60#Lu 1.13Bangeagako, nonob anade wageaga, “Kene. Yanim nub Jon yanübaub.” 61Bangar wawen, “Ninagüb ginyanügmana güre yanim babanüm kene.” 62Bangar eme kubede gürena totowen, nu nono am yanim duwebüregeaga. 63Wanügar taper mara güre düdi oguredi dora feieregeaga, bangedi dora menüm feiaga, “Nub yanim Jon.” Bangar ututun toitoiwen. 64Bangar pirikanana Sekaraiab sube maig taiboyeaga. Bangar doragüdi Keriabüb yanim siradgabereaga. 65Bangar nugeab fib büreabmana gürenakuti, baba daba adab taideaga baba kegeudi kimigen. Bangar baba daba daba gürenakutib doraman baba saraudi fib gürenakuti, Judia distriküb gir toi gam büren bag kümüneaga. 66#Stt 39.2; Sng 80.17; Tu 11.21Fere gürenakuti doraman baba edüdi, ututun toitoiudi menüm totogen, “Kuri nono baba fere aranüm taidebeaga?” Nin sibam, Erekokaib sogi nuküre büreaga.
Sekaraia kiari dora pitoiaga
67 #
Jol 2.28
Bana Etob Kedeb nono babab eme Sekaraia gam gobeaga, bangar kiari dora menüm wageaga, 68#Sng 41.13; 72.18; 106.48; Lu 7.16“Erekokaib yanim siradgaberegi, Israelüb Keriab. Nude oguradi sige nugeab ferefinabur sagsigüdi maig igaisigeaga. 69#Sng 18.2Sige Maig Igaisigegi Fere güre sogi tugu, Erekokaide Devitüb gin gam, taibereaga. Devit nu Erekokai nugeab saina mogoi. 70#Jer 23.5-6; Dan 9.24; Tu 3.21; Ro 1.2Nuge egimenana nugeab kiari ferewar dora dünügar doragafotuwenwaib sibe. 71#Sng 106.10Sige sigeab karauyasigmanangab kube gam tugu, sigeure kob koigafaigen baba ferewarüngab kube gam tugu, nugede maig igaisigeregeagagüdi wageaga. 72#Stt 17.1; 17.7; Wkp 26.42; Sng 105.8-9; 106.45Nuge sigeab matuwasigmana nirarangüdi sagüngeaga. Babaure nuge egime dora idafotugeaganwaib baba, nugeab utun gamnana büreaga. 73#Stt 22.16-17; Mai 7.20Nuge sigeab matuwasig Abraham gam kürüna kekiagüdi wageaga, babaure nuge egime wageaga sibe, mügar sige gam gebüregeaga. 74#Ro 6.18; 6.22; Hi 9.14Nu sige maig karaungab kube gam igaisigebüregeaga, bangar sige nugeab fünai düdi kimigegige. 75#Ef 4.24; 2 Ti 1.9; Ta 2.12-14; 1 Pi 1.15; 2 Pi 1.4Babaure sige sese gürenakuti omo bürenan baba, nugeab ege gam kabia surur surur gam urigegi, bangar nuge kabia nama nama nimeweaga baba, sige gam goberegeaga. 76#Ais 40.3; Mal 3.1; 4.5; Mt 3.3; 11.10Nono, na ba, kuri Keriab Kekia Asaub Kiari fere güdi yanübaneregen. Nade Erekokai nugeab erekobo daiebüre agfereregün. 77-79#Ais 9.2; 49.9; 58.8; 60.1-2; Jer 31.34; Mt 4.16; Mk 1.4; Lu 3.3; Tu 26.18Nade nugeab ferefinabur sarigabürüngab, nugeab nirara erekokai baba sibamgeregen. Keriab nugengab menmen unaigafotudi maig igaingebüregeaga. Fere gituwegi gam büren tugu, fere kumegure kimigen gam tugu, baba meram dünügebüre fib nama gamnab suboyegi sugurwar sige gam ogureregeaga. Nuge sigeab kebe sururgar, sige kob ebebear erekobo gam urigegi.”
80 #
Mt 3.1; 11.7; Lu 2.40 Kuri nono baba adagar, Etob Kedebüde sogi duweaga. Bangar nu kümüna fib fere kene gam büreaga. Bangüdi kuri Israelwarüngab ege gamie, agüba taideaga.
Pilihan Saat Ini:
Luk 1: SobP15
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
Jonah
© Pioneer Bible Translators Association of Papua New Guinea 2007
Luke
© Pioneer Bible Translators Association of Papua New Guinea, Inc. 2015
© Pioneer Bible Translators of Dallas, Texas, USA 2015
This work is licensed under the Creative Commons Attribution Non-commercial No-Derivatives 4.0 license.
http://creativecommons.org/licenses/by-nc-nd/4.0/
