San Mateo 6

Chekʉnare re'oja'che cho'okaijʉ pa'iche'te che'chomʉ Jesús

1Ũcuarʉmʉ Jesús chʉkʉna'te repaʉ neenare ija'che chʉ'vasi'kʉa'mʉ:

—Mʉsanʉkonapi chekʉnani re'oja'che cho'okañu chini rupʉ chekʉnapi pãipi ñaa'jʉ chini re'oja'che cho'ojʉ pa'imanejʉ̃'ʉ. Mʉsanʉkonapi jã'aja'ñe cho'ojʉ pa'ito Dios mai Ja'kʉ Cʉnaʉmʉ Pa'ikʉ mʉsanʉkonare re'oja'che cho'osi'e ro'i jmamakarʉjẽ'e ĩsimaneja'mʉ.

2’Jã'ajekʉna mʉsanʉkonapi chʉova'na pa'iva'nare cho'okani pãi jainʉko ñajʉ'te cho'omanejʉ̃'ʉ. Jã'aja'ñe cho'ome pãi sẽ'sevʉchi'a re'oja'cheja'che ñoñe pa'ina. Chʉova'na pa'iva'nani kurire ĩsiñu chini, mai judíopãi chi'ivʉ'ñana kaka pãi ñajʉ'te kuri ĩsinaa'me repana, pãipi jainʉko repana cho'oche'te ña, “Re'onaa'me ina”, chiapʉ chini. Chekʉrʉmʉ callejoovʉãre eta nʉka ku'ijʉ pãi chenevʉãna chʉova'na pa'iva'nare kuri ĩsinaa'me repana, pãipi jainʉko ña, “Re'onaa'me ina”, chiapʉ chini. Jã'aja'ñe cho'ojʉ pãire ũcuare re'oja'che i'kacojñosinajejʉ, re'oja'che cho'osinare Dios ro'ijache re'oja'che pa'iche koomanejanaa'me repana. Ũcuarepaa'me jã'a. 3Mʉsanʉkonapi te'eʉ, “Chʉova'na pa'iva'nani cho'okasa”, chini mʉ'ʉ na'a rʉa ja'me pa'ikʉ'terejẽ'e kʉama'ñe te'eʉ cuasakʉ cho'okaijʉ̃'ʉ repanare. 4Kʉama'ñe mʉ'ʉchi'a te'eʉ cuasakʉ cho'okaiʉ pa'ijʉ̃'ʉ. Jã'aja'ñe cho'oru mai Ja'kʉ Dios pãi ũcuanʉko rope'e cho'oche peore Ñakʉji mʉ'ʉ te'eʉ cuasakʉ cho'osi'e ña ro'ija'mʉ —chiisi'kʉa'mʉ repaʉ.

Diore sẽeñe'te che'chomʉ Jesús

(Lc 11.1-4)

5Ũcuarʉmʉ Jesús ija'che che'chosi'kʉa'mʉ:

—Mʉsanʉkonapi Diore sẽni sẽ'sevʉchi'a re'oja'cheja'che ñoñe pa'ina cho'ocheja'che cho'omanejʉ̃'ʉ. Repana Diore sẽni mai judíopãi chi'ivʉ'ñana kaka pãi chenevʉãre nʉkajʉ sẽenaa'me, pãipi ña, “Re'onaa'me ina”, chiapʉ chini. Chekʉrʉmʉ callejoovʉãre nʉkajʉ Diore sẽenaa'me repana, chekʉnapi ña, “Re'onaa'me ina”, chiapʉ chini. Jã'aja'ñe cho'ojʉ pãire ũcuare re'oja'che i'kacojñosinajejʉ re'oja'che cho'osinare Dios ro'ijache re'oja'che pa'iche koomanejanaa'me repana. Ũcuarepaa'me jã'a. 6Mʉsanʉkonapi te'eʉ Diore sẽni mʉ'ʉ pa'iruupʉna kaka jeo mai Ja'kʉ Diore Ñoma'kʉni sẽejʉ̃'ʉ. Jã'aja'ñe cho'oto mai Ja'kʉ Dios pãi ũcuanʉko rope'e cho'oche peore Ñakʉji mʉ'ʉ te'eʉ cho'oche ña re'oja'che cho'osi'e ro'i re'oja'che ĩsija'mʉ.

7’Ũcuachi'a mʉsanʉkonapi Diore sẽni Repaʉ'te masi cuasamana cho'ocheja'che ũcuate'ere i'kajʉ sẽemanejʉ̃'ʉ. Repana Diore masi cuasamana Repaʉ'te sẽni, “Maipi chʉ'o ũcuate'ere rʉarepañoã co'chajʉ sẽeto Dios maire asa cho'okaija'mʉ”, chini cuasajʉ jã'aja'ñe i'kajʉ sẽeme. 8Repana cho'ocheja'che cho'omanejʉ̃'ʉ mʉsanʉkona. Mʉ'ʉ chuta'a Repaʉ'te sẽemarʉmʉna mʉ'ʉ chiiche masimʉ Dios. 9Mʉsanʉkonapi sẽni ija'che i'kajʉ̃'ʉ:

Ja'kʉ, Cʉnaʉmʉ Pa'ikʉ, pãi mʉ'ʉre vajʉchʉjʉ pojoa'jʉ.

10Ũcuachi'a mʉ'ʉ chʉ̃'ʉñe pãi ũcuanʉko cho'ojarʉmʉ tĩ'aa'kʉ.

Cʉnaʉmʉ pa'ina mʉ'ʉ chʉ̃'ʉñe masi cho'ocheja'che cheja pa'ina ũcuaja'che re'oja'che cho'ojʉ paapʉ.

11Ũcuachi'a chʉkʉna chiiche ãu si'aumucujña ĩsijʉ̃'ʉ, chʉkʉna ãijañe.

12Chʉkʉna cu'ache cho'oche jo'e cuasamanejʉ̃'ʉ, chʉkʉna'te pãi cu'ache cho'osi'e chʉkʉna jo'e cuasama'ñeja'ñe.

13Chʉkʉna'te vatipi chʉ̃'ʉkʉna cu'ache cho'oñu chiito mʉ'ʉpi ʉ̃sekaijʉ̃'ʉ, cho'omanea'jʉ chini.

Jã'aja'ñe i'kajʉ Diore sẽejʉ pa'ijʉ̃'ʉ.

14’Chekʉna cu'ache cho'osi'ere mʉsanʉkonapi jo'e cuasama'to mai Ja'kʉ Dios ũcuaja'che mʉsanʉkona Repaʉ'te cu'ache cho'oche jo'e cuasamaneja'mʉ. 15Jã'ata'ni mʉsanʉkonapi chekʉna cu'ache cho'osi'ere ũcua cuasajʉ pa'ito mai Ja'kʉ Dios ũcuaja'che mʉsanʉkona Repaʉ'te cu'ache cho'oche cavesʉma'ñe cuasakʉ pa'ija'mʉ —chiisi'kʉa'mʉ repaʉ.

Te'eñoã ãu ãima'ñe pa'ijʉ Diore sẽeñe'te che'chomʉ Jesús

16Ũcuarʉmʉ Jesús ija'che che'chosi'kʉa'mʉ:

—Mʉsanʉkonapi ãu ãima'ñe pa'ijʉ Dioni sẽejʉ pañu chini, sẽ'sevʉchi'a re'oja'cheja'che ñoñe pa'ina cho'ocheja'che cho'omanejʉ̃'ʉ. Repana pãi ãu ãima'ñe pa'ijʉ Dioni sẽni repana chiña, sʉmava'na ñoñe pa'inaa'me, pãipi ña, “Dioni sẽejʉ ãu ãima'ñe pa'inajejʉ re'onaa'me ina”, chiapʉ chini. Pãi repanare re'oja'che i'kasimakarʉchi'api ro'isi'eja'chea'me repanare. Ũcuarepaa'me jã'a. Mʉsanʉkonapi ãu ãima'ñe pa'ijʉ Dioni sẽni chʉova'na ñoñe pa'imanejʉ̃'ʉ. Ãu ãisina pa'icheja'che pojojʉ pa'ijʉ̃'ʉ. 17-18Mʉsanʉkonapi ũcuaʉakʉji ãu ãima'ñe pa'iʉ Dioni sẽeʉ pasa chini charo mʉsanʉkona chiña sĩ'sisõ cʉ̃'ʉ veni care'vajʉ̃'ʉ raña, pãipi mʉsanʉkona Diore sẽejʉ ãu ãima'ñe pa'iche'te ña masimanea'jʉ. Jã'aja'ñe cho'oto mai Ja'kʉ, Dios, Ñoma'kʉpi mʉsanʉkona kʉama'ñe re'oja'che cho'oche ña ro'ija'mʉ mʉsanʉkonare —chiisi'kʉa'mʉ repaʉ.

Pãi Dios pa'icheja saisirʉmʉ re'oja'che pa'iche koojachere i'kamʉ Jesús

(Lc 12.32-34)

19Ũcuarʉmʉ Jesús jo'e ija'che chʉ'vasi'kʉa'mʉ:

—Mʉsanʉkona rʉarepa põse si'ache koo paamanejʉ̃'ʉ. Icheja chejaquee põse pu'janajẽ'e pu'ja si'asõkaijʉ chekʉrʉmʉ macono phũ'ka cho'osõñe'me. Chekʉrʉmʉ ñaanapi rani peore ñaasõkaiche'me repa. 20Mʉsanʉkona paache põse icheja chejaquee si'asõjañea'me. Jã'ajekʉna repa põse rʉarepa cuasama'ñe pa'ijʉ Dioni na'a rʉa cuasajʉ pa'ijʉ̃'ʉ. Repaʉ pa'icheja sani re'oja'che koojachere cuasajʉ̃'ʉ. Repaʉ ĩsiche pu'jacu'ache'me. Ũcuachi'a Repaʉ ĩsiche macono phũ'ka cho'osõma'ñea'me. Ũcuachi'a ñaanajẽ'e peochejaa'me repacheja. 21Dios ĩsijache koojanajejʉ pojojʉ pa'ijʉ̃'ʉ mʉsanʉkona. Mʉsanʉkonapi põsere na'a rʉa cuasajʉ pani Dios ĩsijache rʉa cuasamanejanaa'me —chiisi'kʉa'mʉ repaʉ.

Re'oja'che cuasache'te kʉamʉ

(Lc 11.34-36)

22Ũcuarʉmʉ Jesús jo'e ija'che che'chosi'kʉa'mʉ:

—Mʉsanʉkona ñakocaã masi ñoto cho'oche cho'ore'omʉ. Ũcuaja'che mʉsanʉkonapi cu'ache cuasama'ñe pa'ijʉ Dioni rʉa cuasajʉ pa'ito rekoñoã re'oja'che pa'ija'mʉ mʉsanʉkonare. 23Jã'ata'ni ñakocaãpi masi ñoma'to cho'oche cho'ocu'amʉ. Ũcuaja'che mʉsanʉkonapi Dioni cuasama'ñe cu'ache cuasajʉ pa'ito re'oja'che pa'icu'aja'mʉ mʉsanʉkona rekoñoã. Mʉsanʉkonapi re'oja'che cuasani re'oja'chechi'a cho'ojʉ pa'ijanaa'me. Cu'ache cuasani ũcuachi'a cu'achechi'a cho'ojʉ pa'ijanaa'me —chiisi'kʉa'mʉ repaʉ.

Kurina'me Diore cuasache'te i'kamʉ Jesús

(Lc 16.13)

24Ũcuarʉmʉ Jesús ija'che chʉ'vasi'kʉa'mʉ:

—Pãi ka'chanapi ũcuate'eʉ'te paato repaʉ'te paanare ũcuapa'rʉvachi'a chiicu'amʉ repaʉ'te. Chekʉrʉmʉ repaʉ'te paanare te'eʉ'te na'a rʉa chiiʉ chekʉreta'ni cuhemʉ repaʉ. Ũcuachi'a kurina'me Diore ũcuapa'rʉvachi'a cuasama'me pãi. Kurire na'a rʉa cuasajʉ Dioreta'ni cuasama'me —chiisi'kʉa'mʉ repaʉ.

Dios Repaʉ neenare Repaʉ chĩijejʉna re'oja'che kuiramʉ

(Lc 12.22-31)

25Ũcuarʉmʉ Jesús jo'e ija'che chʉ'vasi'kʉa'mʉ:

—Kurina'me Diore ũcuapa'rʉvachi'a cuasacu'akʉna jo'e mʉsanʉkonare ija'chere chʉ'vamʉ chʉ'ʉ: Mʉsanʉkona pa'ichena'me ãu ãiñena'me ũkuchena'me kãña ju'iche rʉarepa cuasajʉ pa'imanejʉ̃'ʉ. Mai pa'iche ãuna'me kãñachi'ama'mʉ. 26Pĩ'ava'na pa'iche'te cuasa ñajʉ̃'ʉ. Pĩ'ava'na ãujẽ'e tãmava'naa'me. Ĩsichejẽ'e cho'omava'naa'me. Ãu care'vavʉ'ñajẽ'e peova'naa'me repava'na. Jã'aja'ñe pa'iva'nareta'ni mai Ja'kʉ Cʉnaʉmʉ Pa'ikʉji ãu ĩsikʉ'mʉ repava'nare. Repaʉ Dios pĩ'ava'nare peore cuasakʉ rʉa re'oja'che kuirakʉ'mʉ. Jã'ata'ni mʉsanʉkonare pãi na'a rʉa cuasakʉ na'a re'oja'che kuirakʉ pa'imʉ Repaʉ. 27Jã'ata'ni pãi repana ʉmʉ nʉkache rʉa cuasajʉ, “Na'a ʉmʉ ainee nʉkajanaa'me mai”, chiijʉ na'a ʉmʉ nʉkache chiinareta'ni na'a ʉmʉ nʉkacu'aja'mʉ.

28’¿Je'se pa'iʉna mʉsanʉkona kãñare rʉarepa cuasajʉ pa'iche? Korosi'e pa'iche'te cuasa ñajʉ̃'ʉ. Korosi'e cho'ochejẽ'e cho'oma'ñea'me. Kãñajẽ'e juhama'ñea'me. 29Aperʉmʉ pa'iʉ pãi chʉ̃'ʉsi'kʉ Salomón ju'isikãña, repaʉji rʉa re'ojakãñare koo ju'iʉna rʉa re'oja'che ñoasomʉ, pãipi ñato. Jã'ata'ni Salomón ju'isikãña pa'icheja'che na'a rʉa re'oja'che ñomʉ korosi'e. Dios cho'oche'me jã'a. 30Diore rʉa cuasama'me mʉsanʉkona. U'chara'ñʉrʉã iumucujña pa'ira'ñʉrʉãre pãipi ʉosõru che'ro peoja'mʉ. Rʉa jeerʉmʉ pa'imara'ñʉrʉãta'ni repara'ñʉrʉã re'oja'che kuirakʉ'mʉ Dios. Mʉsanʉkonare pãi na'a rʉa re'oja'che kuirakʉ mʉsanʉkona ju'iche kãña ĩsikʉ'mʉ Repaʉ. 31Jã'ajekʉna mʉsanʉkona si'areparʉmʉ, “¿Ʉ̃quere maiva'na ãijanaa'ñe?” “¿Ʉ̃quere maiva'na ũkujanaa'ñe?” “¿Ʉ̃quere maiva'na ju'ijanaa'ñe?”, chiijʉ rʉarepa cuasama'ñe pa'ijʉ̃'ʉ. 32Pãi Diore cuasamana jã'amajñarʉã peore si'arʉmʉ rʉa cuasajʉ pa'ime. Mʉsanʉkona chiimajñarʉã mai Ja'kʉ Dios Cʉnaʉmʉ Pa'ikʉ, “Ina chʉ'ʉre cuasana jã'amajñarʉã chiime”, chiiʉ masimʉ. 33Jã'ajekʉna jã'amajñarʉã rʉarepa cuasama'ñe pa'ijʉ Repaʉ chʉ̃'ʉñe'te na'a rʉa cuasajʉ cho'ojʉ pa'ijʉ̃'ʉ. Ũcuare Repaʉ mʉsanʉkonare ãuna'me ũkuche peore ĩsimʉ. 34Mʉsanʉkonare che'ro cu'ache ti'jñejañe cuasajʉ oima'ñe pa'ijʉ̃'ʉ. Che'ro ũcuaumucusepi ñataʉna cuasajʉ̃'ʉ repamajñarʉã. Repaumucujña pa'iche te'enarechi'a cu'ache ti'jñemʉ maire. Dios mʉsanʉkonare cu'ache ti'jñejañe masikʉjekʉ cho'okaija'mʉ —chiisi'kʉa'mʉ repaʉ.

Pilihan Saat Ini:

San Mateo 6: coe

Sorotan

Berbagi

Salin