Chivkeeb 12
12
Vajtswv Hu Anplas
1Tus TSWV hais rau Anplas tias, “Koj ciali tawm ntawm koj lub tebchaws, tso koj cov kwvtij neejtsa, thiab koj txiv lub zej lub zos, es mus rau lub tebchaws uas Kuv yuav qhia rau koj. 2Kuv yuav pub koj muaj xeebleej xeebntxwv coob, thiab lawv yuav dhau mus ua ib tsav tibneeg tseemceeb. Kuv yuav foom koobhmoov rau koj kom koj lub koob lub npe nto moo lug, kom koj thiaj yuav dhau tau mus ua koobhmoov rau lwmtus. #Teshl 7:2-3; Henpl 11:8
3“Kuv yuav foom koobhmoov rau cov uas foom koobhmoov rau koj,
Tiamsis Kuv yuav foom phem rau cov uas foom phem koj.
Kuv yuav foom koobhmoov los ntawm koj mus rau txhua tsav tibneeg hauv ntiajteb.”#12:3: los ntawm… txhua tsav tibneeg; lossis Txhua tsav tibneeg yuav thov kom Kuv foom koobhmoov rau lawv ib yam li Kuv tau foom koobhmoov rau koj lawm. #Kalat 3:8
4Thaum Anplas muaj hnubnyoog xyacaum-tsib xyoos, nws txawm tawm hauv lub nroog Halas mus rawsli tus TSWV tau hais rau nws lawm; thiab Lauj kuj nrog nws mus. 5Anplas coj Xalais uas yog nws tus pojniam thiab Lauj uas yog nws tus kwv Halas tus tub, thiab tagnrho nkawd tej cuabtam thiab tej qhev uas nyob hauv lub nroog Halas, ces lawv txawm sawvkev mus rau tebchaws Kana-as lawm.
Thaum lawv mus txog rau hauv tebchaws Kana-as lawm, 6Anplas tau taug kev phua lub tebchaws ntawd los txog rau ntawm Maules tsob ntoo xeeb uas nyob rau hauv lub nroog Sekhees. (Thaum lub sijhawm ntawd cov tibneeg Kana-as tseem nyob hauv lub tebchaws ntawd.) 7Tus TSWV tau los tshwm rau Anplas pom thiab hais rau nws tias, “Lub tebchaws no yog lub uas Kuv yuav muab rau koj li cajces nyob.” Ces Anplas thiaj teeb tau ib lub thaj rau qhov chaw ntawd rau tus TSWV uas tau los tshwm rau nws pom. #Teshl 7:5; Kalat 3:16 8Tomqab ntawd, Anplas thiaj tshais chaw mus rau yav qabteb ntawm lub laj roob uas nyob ntawm lub nroog Npethees sab hnubtuaj thiab nws tsa tsevntaub nyob rau ntawd. Lub nroog Npethees nyob sab hnubpoob thiab lub nroog A-is nyob sab hnubtuaj. Thaum Anplas nyob qhov ntawd, nws teeb tau ib lub thaj rau tus TSWV thiab pehawm tus TSWV. 9Nws pheej tshais chaw ib qho rau ib qho, uas yog txav zujzus mus rau yav qabteb#12:9: qabteb: lolus no lus Henplais hais tias Nenkej. ntawm tebchaws Kana-as.
Anplas Nyob Rau Tebchaws Iziv
10Lub sijhawm ntawd muaj kev tshaib nqhis loj heev nyob hauv tebchaws Kana-as, Anplas thiaj khiav mus nyob rau nram tebchaws Iziv tau ib ntus. 11Thaum nws tabtom mus yuav txog ntawm tus ciamteb uas yog mus rau hauv tebchaws Iziv, nws hais rau nws tus pojniam tias, “Kuv paub tias koj yog ib tug pojniam uas zoonkauj heev. 12Thaum cov tibneeg Iziv pom koj, lawv yuav xav tias koj yog kuv tus pojniam, ces lawv yuav muab kuv tua povtseg thiab yuav tseg koj cia. 13Koj yuav tau hais rau lawv tias koj yog kuv tus muam xwb; thaum ntawd lawv thiaj yuav tseg kuv txojsia thiab ua zoo rau kuv vim muaj koj.” #Chiv 20:2; 26:7
14Thaum Anplas mus dhau plaws ciamteb rau hauv tebchaws Iziv lawm, cov neeg Iziv pom tias nws tus pojniam zoonkauj heev. 15Muaj qeetus nomtswv pom Xalais, lawv thiaj mus piav qhia rau Falaus#12:15: Falaus: tsis yog ib lub npe tiamsis yog ib lub meejmom uas txhais tau hais tias “vajntxwv.” thiab qhuas txog Xalais txoj kev zoonkauj; yogli ntawd, luag thiaj tuaj coj Xalais mus rau hauv Falaus lub loog. 16Vim muaj Xalais, Falaus thiaj ua zoo heev rau Anplas; nws muab yaj, tshis, nyuj, neesluav, qhev thiab ntxhuav pub rau Anplas.
17Tiamsis vim Falaus tau coj Xalais mus lawm, tus TSWV thiaj tso tej kab mob phem heev los rau nws thiab cov neeg hauv nws lub loog. 18Falaus thiaj tso tibneeg mus cuag Anplas thiab nug hais tias, “Vim licas koj ua li no rau kuv? Ua licas koj tsis qhia rau kuv hais tias Xalais yog koj tus pojniam? 19Vim licas koj thiaj hais tias nws yog koj tus muam, thiab cia kuv coj nws mus yuav ua kuv tus pojniam? Koj tus pojniam nyob ntawm no, ciali coj nws thiab khiav tawm mus!” 20Falaus txawm xaaj nws cov tubtxib kom lawv xa Anplas nrog nws tus pojniam thiab coj txhua yam uas yog nws tug tawm hauv lub tebchaws mus.
Pilihan Saat Ini:
Chivkeeb 12: MWW2022
Sorotan
Bagikan
Salin
Ingin menyimpan sorotan di semua perangkat Anda? Daftar atau masuk
© 2022 United Bible Societies. All rights reserved.