Лука 7
7
Глава 7
Римскай офицер кэлмэвэн бэгдэчидек
1Төрэддий оддыди, Иисус Капернаумтаки хөррин. 2Тала өмэн римскай офицер кэлмэн бутэнрин, көкэсчирин. Офицер тарич кэлмэди хэрриӈнэттин. 3Теми Иисус хомиван долдариди, иудейскаилбу каганкарбу Ноӈман гөнэвкэнин, гастидатан Иисус эмдэн, кэлмэвэн айдан. 4Каганкар эмридюр, гасчидилритан:
– Эрэв бэю хи бэлэннэс. Эрэк ай бэй. 5Ноӈан муну бэллоттэн, мун нэӈэдекэкун-дэ дюв овканин.
6Иисус ноӈарнюнтан хөррин. Ноӈан укал офицер дюлан исадилракан, офицер мэн дялби ноӈантакин гөнэвкэнин:
– Мин Хунӈив! Би эсэм тачикан хэррин бис, Хин мин дюлаву идэс, 7би-дэ-титтэ эчу Хинтэки эмрэ, эми хэррин бис. Төрэснэкэс-тэ мин кэлмэв ай один. 8Би-дэ мэнкэн кэлмэгчинтэттэ бисэм, мин-дэ өйдэлив бэгэсэл бис, би-си мэнкэн солдатал бэгэнтэн бисэм. Би өмэнтэки гөндим: «Эмни эвуски», тарак эммоттэн. Кэлмэткий гөндим: «Эрэв некли», ноӈан тарав некчин.
9Иисус, тарав гөнчэвэн долдариди, мянин, амардалай ӈэнрилтэки эсэниди, ноӈартакитан гөнин:
– Хунтэки гөнэм, эррөчим эгдем хэрридеку Би ок-та, Израилла-да-титта, эчу долдар.
10Гөнэчэл, амаски мучуми, офицер кэлмэвэн абгару иттитэн.
Навун няруддён арукачак
11Амрак Иисус городтаки Наинтаки хөррин, ноӈандун хупкуттыӈэлни, хоя-да хөнтэл бэил бодаснитан. 12Городла иссадакан, тадук ноӈман дюлгич көкэчэв нёвуддытэн. Көкэчэ навун аси омнин нярудин бисин. Хоя иранучал бэил чакабтитан. 13Тарав иттыди, Хунӈит көкэчэ эньмэн илралрин.
– Эди хоӈкил, – Ноӈан аситки гөнин.
14Тадук Ноӈан көкэчэтки дагамрин, ӈалди көкэчэв инулдывум тэмиснин; көкэчэв ӈалаччал бэил илритан; нян Иисус гөнин:
– Хуркэн, хинтэки гөнэм, илли!
15Көкэчэ, арриди, тэгрин, төрэдилрин, нян Иисус ноӈман эниндун алимуканин. 16Хэӈулчэл бэил Хэвкив эскэдилритэн, гөникэн: «Мут долат Хоми бакурин, Хэвки эмрин муту бэлдэй». 17Иисус хомиван эйдули Иудея төрэӈлин, эйдулин анчиндулин-да бисили төрли долдаритан.
Иисус Христос Иоам бэилтэки хамалкавканни
18Иоанн хупкуттыӈэлни эйдувэн бичэв ноӈантакин тэлэӈритэн. 19Иоанн дӫрбу хупкуттыӈэлби мэнтэкий эмдэтэн эририн, тадук-нян Иисустэки улгэмнэвкэнин:
– Хи тарак бисэнри ӈи мунтэки эмэннэ, эв хөнтэв бу алачиннавун?
20Ноӈартан Иисустэки эмритэн, нян гөнитэн:
– Иоанн Хэвкигри муну Хинтэки улгэмнэвкэнин: «Хи тарак бисэнри, ӈи мунтэки эмэннэ, эв хөнтэв бу алачиннавун?»
21Таракам ноӈан хояв бэилбу бутэнрилбу айрин, энэкэлбутэн бэгдэттин, ариӈкалду ханачиврилбу айрин, хояв-да баликачилбу коедэтэн айрин. 22Иисус ноӈартакитан барагрин:
– Ӈэнэлрэ Иоаннтаки, болганалра чэлэвэн, яв-ка ху коерисэн, долдарисан-да: баликачил нян-да коелрэ, гөнекэл гиркавачилра, игатач бутэнрил тэссэптэ, хяӈанал долдалра, көкэчэл арра, дӫгрил өрэлдэм Мэтум долдар. 23Тарак-та несэлкэн, ӈи Мину тэдеттэн.
24Иоанн гөнэвкэнчэлни хөррэкэтэн, Иисус бэилтэки Иоам тэлэӈэдилрин:
– Ядавур ху ониӈакагтаки хөллотисэн? Коӈат эдэнду гургэлдэривэн коеттэвур? 25Яв-макан иттэвур хөллотисэн? Нодач тэтылэттыв бэю иттэвур некрисэн? Тарбач нодач тэтылэттыл бэил эӈэел тэгэмэрэл дюлдулатан бивэттэ. 26Ӈив-мэкэн ху иттэвур некрисэн? Мэтумӈэв? Айдит, хунтэки-дэ Би гөнэм, ноӈан мэтумӈэ ойдэлин бисни. 27Ноӈман Хэвки Дукундулан дукутча бисни: «Эр Би Мэн Мэтумӈэй Хин дюлдэлэс ӈэнукэнэм, ноӈан Хин Хотарӈас хотардин». 28Хунтэки гөнэм, асал балдавканчатан бэил долитан өмэндэ мэтумӈэ Иоанн Хэвкигри ойдэлин биси ачча; тарбач Хэвки Тэгэмэрэдеклэн эйдудукэн тала бисилдук кучукэӈэтэн Иоанн ойдэлин бисни.
29Эйдучэндюр бэил, Иисус гөнивэн долчиччал, тамам чакачимӈал-да, Хэвкив эскэритэн, айдитач унуритан, нян Иоаннтаки хэвкивдэгэвур авнаритан. 30Фарисеил-нян Итум хупкучимӈэлнюн Хэвки гөнчэвэн эчилтэн унумалра, Иоанндула хэвкивдэгэвур эчилтэн авамалра.
31Таракам Иисус гөнин:
– Ӈинюн тэрэмкэтчим эрэлбу бэилбу? Ӈи ноӈартан урэчилни? 32Куӈал толин тэгэттыл, мэр доливур иркамачиддыл, эчин гөнил урэчилтэн: «Бу кекэлдывунду кекэривун, ху-си эчилсэн коплэчир; бу этэрэм икэм икэривун, ху-си эчилсэн хоӈра». 33Иоанн Хэвкигри эмрин: килебу эсни дептэ, минэв-дэ эсни колра, тарбач ху гөнэс: «Ноӈан ариӈкалкан». 34Бэй Хутэн Оча эмрин, дептэн, колран, ху гөнэс: «Коетлилрэ, эр дебэтур, минэв-дэ колдай аяври, тамам чакачимӈал, төнӈэкичу-дэ некрил ноӈандин хараклатта». 35Тарбач Хэвки мулганни хурэлни тарав чэлэдюр айдитач унуритан.
Төнӈэкичилкэн аси төнӈэкичин аталаптан
36Өмэн фарисей Иисус дебнэдэн эририн, Иисус фарисей дюлан эмриди, дебэдеӈкэ анчиндулан дебэддэй тэгрин. 37Тарбач өмэн аси, городла ноӈман холгэч тутэнридин гөвэттэ, фарисей дюлан Иисус нимэгнэчэ дебэддывэн долдариди, тала эмрин, унӈэс хэтэлкэм алику эмурин. 38Иисус бодэлэн амардадун илриди, хоӈадилрин, аси инӈамтални Иисус бодэллэн оӈкэлбэритэн, аси тарав мэн нюрютчи аврин, Иисус бодэллон гуденикэн, унӈэсэч хэтэч хэсирин. 39Иисус дебнэдэн эричэ фарисей, тарав иттыди, мулгаттин: «Эрэк бэй, мэтумӈэ бими, хамчи, эрэк тэмири аси холгэ тутэнри бисивэн». 40Тарбач Иисус ноӈантакин гөнин:
– Симон, Би яв-да хинтэки гөннэв.
– Хупкучимӈэ, гөли! – тарак барагрин.
41– Өмэндулэ онумӈэлэ бэйлэ дёр бэил онуритэн, өмэн тунӈан нямав мэӈэм онурин, гя-тунӈанмяру. 42Нян ноӈартан бөргэдэвур туркуритэн, онумӈэ бэй дӫричэмэн хэлэрин. Тарбач ӈи ноӈардукутан ноӈман энтэкэеч аяваннан?
43– Би таӈаттам тарав, ӈиду онумӈэ эгдедьмэру хэлэрин, – Симон барагрин.
– Хи айдитач мулгачинри, – Иисус гөнин.
44Нян аситки ичисниди, Симонтаки гөнин:
– Тарав асив коенри? Би хин дюлас эмрив, хи Минду мөв эчис-тэ бөр, бодэли авдаку. Ноӈан-аси мэн инӈамталди, нюритчи-дэ Мин бодэлу аврин. 45Хи Мину арчами эчис гуден, ноӈан-аси Мин эмчэдукуг бодэлу унэт гудендиддэн. 46Хи Мин дылу хэтэч эчис хэсир, ноӈан-аси Мин бодэлу хунӈэсич хэсирин. 47Теми Би хинтэки гөндим, эрэк аси хояв төнӈэкичу некрин, тарак очан төнӈэкичил чэлэн аталапта, энтэкэеч ноӈан аявракан; ӈи абалач аявоттан, теми тарак төнӈэкичин абалачта аталабботтан.
48Иисус аситки гөнин:
– Төнӈэкичис аталаптан.
49Иисус анчиндулан дебэтчэл мэндэтчур мулгачидилритан: «Ӈи-нян эрэк, төнӈэкичу-дэ аталри?» 50Иисус аситки гөнин:
– Хину хин тэденси айрин, аймакань ӈэнэссоли.
Pilihan Saat Ini:
Лука 7: eve
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
