Лука 14
14
Глава 14
Мөткэнь энэкэч бутэнрив субботала бэгдэчидэк
1Өмнэкэн субботала Иисус өмэн фарисеил бэгэнтэн дюлан килебэӈӈон тоимдэй эмрин, нян тарал Иисусу хипкаттитан. 2Ноӈман дэпки өмэн бэй, мөткэнь энэкэч бутэнри, тэгэттин. 3Иисус Итум хупкучимӈэлбу, фарисеилбу-дэ улгэмрин:
– Субботала-нян бэгдэчинмэй-гу?
4Ноӈартан эчилтэн барагра. Иисус, бутэнрив ӈалди каптарин, бэгдэрин, нян хөрдэн тинин. 5Тарбач ноӈартакитан гөнин:
– Хун-нян ӈивул учикасан, кэндэсэн-гу мөликичла тикчин, эв ху тармадит этэс тарав нуграр, субботала-да-титта тачин бисэкэн?
6Нян ноӈартан яв-да барагӈа туркуритэн.
Ӈи мэни хөнтэлдук оггэрэбуччотэн, тарак мэни хэргили овкандин
7Иисус коечиддин, нимэгнэчэл аидьмару дюлэг бисилбу тэгэлгэӈэвур хинмаривутан, нян ноӈартакитан тэлэӈу тэлэӈрин:
8– Хину олдадяк тоинэдектэки эмдес гөнэкэтэн, эди дюлэглэ тэгэлгэндулэ тэггэрэкил, хөнтэ хиндук хэрридьмэр эмэннэ бидик, 9дю хунӈин, хину эмдэс гөнчэ, хинтэки, дагамриди, гөндик: «Эрэв тэгэлгэм ноӈандун осли». Таракам, хадариникан, мудандула бисилэ тэгэлгэндулэ хин тэгэннэс один. 10Тарбач, хину эмдэс гөнэкэтэн, хи тала ӈэнриди, амаргагла бисилэ тэгэлгэндулэ тэгли, нян ок-ка эмдэс гөнчэ бэй дагамдин, хинтэки гөндин: «Хараке, эвуски эмни, дюлэгэч тэгли!» – таракам хи эйдудукун нимэгнэрилдук хэррин бидинри. 11Ӈи мэни хөнтэлдук оггэрэбуччөтэн, тарак хэргили мэни овкандин, нян ӈи-ккэ мэни хэргили хэргэбуччотэн, тарак огэрэбдин. – 12Иисус эричэтки эмдэн фарисейтаки гөнин: – Өк-ка хи инэӈ, хисэчин-гу дебэдеку овкачинри, дялби, акнилби, ханилби, эӈэелбу нимэкэлби эди эригрэкил, тамаӈгавур хину-нян эдэтэн эригрэр. 13Тоинэдеку овкали, дӫгрилбу, гөнекэлбу, баликачилбу, киндакулбу эмдэтэн эригрэли. 14Нян таракам хокаӈчидай, ноӈартан туркудир хинду бөргэӈэ, айгарарил арадяклатан хи бөргэӈэй бакчинри.
Эгден хэбдекэдек дебэдеккон тэлэӈ
15Тарав долдариди, өмэн нимэгнэчэ Иисустэки гөнин:
– Тарак нисэлкэн, ӈи Хэвки Тэгэмэрэдеклэн килебэӈӈон дебгэрэдин.
16Иисус-нян ноӈантакин гөнин:
– Өмэн бэй эгдем хэбдекэдек дебэдеккэн овканиди, хояв бэилбу эмдэтэн эририн. 17Дебэдек одилракан, мэн кэлмэй эридэн гөнэвкэнин: «Эмнилрэ, укал деплэв ириттывун, кимчал бису!» 18Тарбач эмдэтэн эричэлни бэил, гөлдэчэлгэчин, эмдэвур бадилритан. Өмэн гөнин: «Эр тек би төрэӈгэй унирив, тарав тек итнэннэв. Эмэкэн минтэки хирра». 19Гя бэй гөнин: «Би тунӈам дӫрдэлбу кэндэлгэгэй унирив, таралбу ярутнарам, эмэкэн минтэки хирра». 20Илитан гөнин: «Би эр тек олдаддам, экич эмрэ одни». 21Кэлмэ, мучуриди, хунӈиткий эйду тэлэӈрин. Таракам хиралриди, дю хунӈин кэлмэткий гөнин: «Хинмач город толлин гирватнали, эйдувэн, тали бисилбу дӫгрилбу, гөнекэлбу, баликачилбу эвуски эмукэли». 22Кэлмэн нян гөнин: «Хунӈиву, гөнчэвус нектэку мудакрам, тарбач унэт тэгэлгэр хулапта». 23Таракам хунӈин гөнин: «Эйдулин хотаралдули гиркали, городда инмэйтэкин ӈэнни, эйдувэн тали бисилбу бэилбу эвуски дебнэдэтэн касагач эмукэли, мин дюв нимэгнэдилди милтэрэндэн».
24Тарбач хунтэки гөнэм, мин эричэлбу эвуски хэбдекэдек дебэдеклэн эмдэтэн, ок-та этэр элэ дебгэрэр. Хоя эричэв, абал-да хинмачав.
Иисус Христос хупкуттыӈэн бидэй
25Иисуснюн хоял бэил гиркаритан, нян Ноӈан, ноӈартакитан эсэниди, гөнин:
26– Ӈи Минтэки эммотэн, тарбач мэн амми, эньми, атыкаӈи, хурэлби, акнилби, экнилби, мэн биний-дэ ойдэлитэн Мину эсни аявра, тарак мин хупкуттыӈдыв эннэ бис. 27Ӈи мэн киреси эсни инсэ, Миннюн-дэ эсни гиркар, тарак Мин хупкуттыӈдыв эннэ бис. 28Хундук-нян ӈивул эгдем утэм омалми, дюллэ тэгриди, эсни таӈадилотта, адыда мэӈэӈэн бисивэн, адыв-да надарий тарав утэм одай? 29Одилми, мудакӈа эдэй туркур, бэил, туркуриван мудакӈа итми, эдэтэн ининрэ, 30гөникэн: «Эрэк бэй одилми, орий мудакӈа туркун». 31Нян ирэк-ул тэгэмэр баргакнюми тэгэмэрнюн кусинь кусинэри, дюллэ-кэнэ мэн эӈий ӈинюн-дэ этэн тэгрэ укчэнмэттэй, мян тыкичэрнюн бэилнюн дӫрмеру тыкичэм дэпки эдлэй кусиилрэ? 32Тарбач баргакан унэт тэгэлэ бисэкэн, ноӈан болганамӈалби баргактакий хөрукэндин – аймулдам овкандай. 33Ху-дэ, тачин яӈур бисикэн мэндукур эми бөргэр, таракам Мин хупкуттыӈэлдыв эннэсэн бис.
34Так эрэк ай деплэ, тарбач так катагми бэрирэкэн, яч-нян таку айдир? 35Таракам так яв-да этэн айра, төру-дэ тарич этэнри айра, тарав таку буйла улэвэттэ. Ӈи кориталкан, тарак-та долдан.
Pilihan Saat Ini:
Лука 14: eve
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X
