Genesis 7
7
Non namandran irayah
1Pwen YAPAN ipwai iyata Nowah ipa, “Yo unime wou opu ata hiyan pe imwonen iya mwalinga hu ndramat masih para kol pwan. Pwen pe awiri wawu hapat o pe akaya kene nondriya ndroi. 2Pe awiri hu kan para kaniyai–manandrtimou kamai pe manadritimou pihin. Pe yihu kan mepo konoho yan pwi ara awiri malmou–hamou kamai pe hamou pihin. 3Pe hu norukan ara tehen aliy yi; awiri hu manandrtimou kamai pe manandrtimou pihin, para hu kapo noruhu paiwe koro kol pwan. 4Kiro lang manandrtoyoh andre kuiki mbulou kindrut kisa pwan. Pe andre kindrut kiya manne lang mahaangui pe ping mahaangui. Tehen tora ko andre kupwasili topwe memelit masih makunuwe hu iripo kol pwan mepo umangsani hu.”
5Pwen Nowah imbusi melit masih tehe YAPAN kinpwatisingiy kinnatan.
6Iro tandrohonga mbulou indrut isa kol pwan, Nowah ara hayou tan iho mannongat (600). 7Nowah iyapolo nambuyun, norun hu pe mbuyu ngundran hu, yihu masih kene huya nondriya ndroi, paratesah, non pakeh nakirah. 8Hu kan para kaniyai pe hu kan para kaniyai pwi, iyasura hu kan masih para seselek pe norukan mepo para wohowoh, 9ara hu masih kene kamai pe pihin huya kili Nowah pe huya nondriya ndroi, tehe Ngindrai kinpwatisingiy kinna tan. 10Pwen lang manandrtoyoh ara ihipwen, pwen non irah kol pwan.
11Nowah hayou tan iro mannongat (600), pe iro mwonen lang songui pe andrtoyoh para walah luwoh, pwen pwan iramburing pe ndran isuw pe irambumbusau pe ingas isa ndrita pwan, pe mbulou indrut ikas iro paingan yang pe isa kol pwan masih. 12Mbulou irondrut, irondrut, irondrut ipoo lang mahaangui pe ping mahaangui.
13Pe iro mwonen lang nepo mbulou indrut, Nowah, nambuyun pe norun hu matimou Sem, Ham, pe Yapet, iyasura nambuyu hu, huya nondriya ndroi. 14Pe hu kan para wum pe hu kan puyap para yangiy, pe hu kan para seselek iyasura hu norukan masih kene huya nondriya ndroi. 15Hamou kamai pe hamou pihin para kan handra-handra pe norukan handra-handra, hu memelit masih kene makunuwehu ara husa kili Nowah pe huya nondriya ndroi. 16Melit masih, hamou kamai pe hamou pihin, huya nondriya ndroi tehe Ngindrai ipwatisingiy iyata Nowah, pwen pe YAPAN iwari papai.
17Non irotah, irotah ipoo lang mahaangui, pe non ingas pe irasumuluwani kol pwan pe ihiri ndroi iho hin ndrita pwan. 18Non irah iya namandran iya iro kol pwan, pe ndroi ara iho raipit ndrita non. 19Non ingas iya paingan masih, pe iramburihi hu ngondron namandran masih kene para kol pwan. 20Irah pe ingas iya paingan masih pe irasumuluwani hu ngondron topwei. Pe ndrohonga ngondron pe ndrita non ara pakeh mahaangah.#7:20 Nongna hu Hibru: 15 cubits; Eng: over twenty feet, 7 metres; TP: sevenpela mita 21Melit masih makunuwehu iripo kol pwan ara humat topwei–hu norukan masih, hu kan namandran pe mendreheh masih para wum pe para yangiy, iyapolo hu ndramat masih, ara hu masih kene huhupwen topwei. 22Melit masih tora hiringoha hu iyau ngara ndrohonguhu ara hu mat topwei. 23Pe YAPAN ipwasili topwe memelit masih makunuwehu iro kol pwan–hu ndramat pe hu kan masih, hu kan para seselek pe hu norukan masih. Hapeko Nowah iyapolo hu masih kene huro nondriya ndroi ara mwale hu.
24Pe non ara kintamat pwi ipoo iya lang sangat pe yimingui (150).
Pilihan Saat Ini:
Genesis 7: nss
Sorotan
Berbagi
Salin
Ingin menyimpan sorotan di semua perangkat Anda? Daftar atau masuk
© 2012, Wycliffe Bible Translators, Inc. All rights reserved.