Marukusu 3

Yesu u potsokpoi vuza na wi n kukiye ku uɓishi

(Mat. 12:9-14; Luk. 6:6-11)

1Kanna ko yoku Yesu u banai a̱ kunu ku avasa, ɗa u cinai vuza yoku punu n kukiye ku uɓishi. 2Aza o yoku a̱ kula̱nsa̱ Yesu adama a na a̱ ka̱na̱ yi n unushi. Ɗa a̱ ka̱na̱i kinda yi, ko u kupotsotongu vuza va a kanna ka Ashibi. 3Ɗa Yesu u danai vuza na wi n kukiye ku uɓishi ka, “Ɗenga̱, vu ta̱wa̱ na kelime adama a na uma dem e ene wu.”

4Ɗa we ecei uma a, “Yi ɗa̱i Wila̱ u tsu u danai ci yaꞋan a kanna ka Ashibi? Ci yaꞋan ili i singai ko ci yaꞋan ili i gbani-gbani? Ci isa wuma ko tsu una?” Amma a fuɗa a dana yi ili ba. 5Ɗa Yesu wi indai le n wupa. We enei le asuvayali, adama a na i ta̱ n ugbawansuvu. Ɗa u danai vuza na wi n kukiye ku uɓishi ka, “Ba̱ra̱kpa̱ kukiye ku nu.” U ba̱ra̱kpa̱i kukiye ku ni, ɗa ku ta̱na̱i. 6Ɗa Afarishi a̱ uta̱i, ɗa a banai a yaꞋin oɓolo n aza a na i o kutono Hiridu, e sheshei uteku u na a kuna Yesu.

Uma n a̱bunda̱i o tonoi Yesu

7Yesu m mukumitoni n ni a lazai a kubana a Mala ma̱ Ga̱lili, ɗa uma n a̱bunda̱i o tonoi ni. Aza o yoku a̱ uta̱i a̱ Ga̱lili, n Yahuda, 8n Urishelima, n iɗika i Idumiya, n iɗika i na yi a kasana ka̱ Urdu, n uɓon u likuci i Taya n Sida. Uma a nam pa dem ta ɗe a banai u Yesu, adama a na a pana ta̱ ili i na Yesu wi a kuyaꞋansa. 9Uma a na a banai u Yesu i ta̱ n a̱bunda̱i, ali ɗa u danai mukumitoni n ni a̱ ciya̱ka̱ yi kpantsu, adama a na u da̱sa̱ngu endeꞋen ni. 10U potsotongu ta̱ uma n a̱bunda̱i, ɗa aza a na i nu mɓa̱la̱ a̱ ka̱na̱i kubana wa̱ ni adama a na a̱ ciya̱ a saꞋwa yi. 11Aza a na i n wunla̱i u gbani-gbani e ene yi baci dem, a̱ ci yikpa̱ ta̱ kelime ka̱ ni. Ka̱ta̱ o orukpo, “Avu ɗa Maku ma̱ Ka̱shile.” 12Ɗa Yesu u danai wunla̱i u gbani-gbani n utsura, ka̱ta̱ a dana vuza ko a̱yi ɗa ya ba.

Yesu u zagbai Kupanazere

(Mat. 10:1-4; Luk. 6:12-16)

13Ɗa Yesu u banai a kusan, ɗa u ɗekei aza a na wi a kuciga a bana wa̱ ni, ɗa a banai. 14Ɗa u zagbai uma kupa n aza e re, ɗa u bonokoi le azusuki† a̱ ni ka̱ta̱ a̱ ciya̱ o yongo n a̱yi. U suki le adama a na a dana uma Arabali a Singai. 15Ɗa u nekei le utsura u na o kuloko wunla̱i u gbani-gbani. 16Na va ele ɗa Kupanazere† a na u zagbai: Sima (vuza na Yesu u neꞋi kula Biturusu.) 17Yakubu n vuza ni Yahaya, muku n Zabidi (ele ɗa Yesu u neꞋi le ula anan Buwanaji, ɗaɗa Muku n Kakpanga.) 18U zagba ta̱ feu Andarawu, n Filibu, m Batalamawu, ɗa u zagbai feu Matiyu, n Toma, n Yakubu ulobo u Alfa, koɓolo n Tadawu, n Sima vu Ziloti. 19Ɗa kpamu u zagbai Yahuza Iskaryoti vuza na u dengei Yesu.

Yesu m BaꞋalzabu

(Mat. 12:22-32; Luk. 11:14-23; 12:10)

20Ɗa Yesu u lazai a kubana a kpaꞋa, ɗa uma n a̱bunda̱i o tonoi ni, ali Yesu m mukumitoni n ni a̱ ciya̱ a lyaꞋa ilikulyaꞋa ba. 21Ana aza a kpaꞋa a̱ ni a panai nannai, ɗa a̱ uta̱i kula̱nsa̱ yi, adama a na a pana ta̱ uma a danai, “Yesu va u gita̱ ta̱ kujara.”

22Nlum n Wila̱ n yoku n na mu uta̱i a Urishelima a̱ ka̱na̱i kudana, “Yesu va wi ta̱ n BaꞋalzabu,† mogono ma̱ wunla̱i u gbani-gbani. A̱yi ɗa we kuneke yi utsura u na wi o kuloko wunla̱i u gbani-gbani.” 23Ɗa Yesu u ɗekei le u yaꞋankai le agisana a kadanshi, u danai, “Nini ɗai MalyaꞋi mo kuloko MalyaꞋi? 24Tsugono tsu pecuku baci ugboku u re ɗa i a̱ vishili, tsugono tsu nan lo ci a̱ kusuɓa̱ ba. 25KpaꞋa ku pecuku baci ugboku u re, ɗa i a̱ vishili uteku u le. KpaꞋa ku nan lo ka kuyaꞋan n una̱ u te ba. 26MalyaꞋi mi baci o kuloko MalyaꞋi, ashe tsugono tsu MalyaꞋi ci ta̱ upeci ɗe, tsu ɗa ci ta̱ kpamu a̱ kuyikpa̱ babu megeshe.

27“Babu vuza na u kuꞋuwa a kpaꞋa ku vuza vu utsura u ɗika ili i ni, sai u laꞋa vuza vu kpaꞋa vu nan lo utsura ka̱ta̱ u uwa u shiya yi, adama a na u fuɗa u ɗika ili i kpaꞋa i ni.

28“N dana ɗa̱ mayun, i ta̱ a kufuɗa a cinukpaka uma n unushi u na i a kuyaꞋansa, n kadanshi ki ishikushi† ka na a dansai dem. 29Amma vuza na baci dem u yaꞋin kadanshi ki ishikushi wa Ayinviki a̱ Ka̱shile, a kucinukpaka yi unushi u nan lo ba, adama a na unushi u nan lo wi o kukotso ba.” 30U dana le ta̱ kadanshi ka nam pa ka, adama a na a dana ta̱ wi ta̱ n wunla̱i u gbani-gbani.

Amgbu e Yesu n a̱na̱ku e le

(Mat. 12:46-50; Luk. 8:19-21)

31Ɗa amgbu e Yesu a banai wa̱ ni koɓolo n a̱na̱ku e le. Ɗa a shamgbai pulai ɗa a̱ suki vuza u bana u ɗeke yi. 32Uma n a̱bunda̱i a̱ da̱sa̱ngi ɗa a kanzai ni, ɗa a danai ni, “A̱na̱vu a ɗa na ɗe, koɓolo n amgbu a̱ nu a kuvana wu.”

33Ɗa we ecei, “Yayi a̱na̱ku a̱ va̱? Anan yayi amgbu a̱ va̱?” 34Ɗa u la̱na̱i aza a na i lo ida̱shi dem, ɗa u danai, “Indanai, ele na ɗa a̱na̱ku a̱ va̱ n amgbu a̱ va̱. 35Vuza na baci dem u yaꞋin ili i na Ka̱shile ki a kuciga ele ɗa amgbu a̱ va̱ n itaku i va̱ n a̱na̱ku a̱ va̱.”

Pilihan Saat Ini:

Marukusu 3: asgNT

Sorotan

Berbagi

Salin