Marukusu 11

Yesu u uwai a Urishelima

(Mat. 21:1-11; Luk. 19:28-40; Yah. 12:12-19)

1Ele a kuyawa a Urishelima, ɗevu m Bataji m Bataniya, a uɓon u Kusan ku Zaitun. Ɗa Yesu u suki mukumitoni n ni, aza e re. 2U danai le, “Banai a̱ likuci i na yi kelime ka̱ ɗa̱. I yawa baci ɗe, gogo va lo yi ta̱ a kucina ɗe maku ma majaki ma na ka̱ta̱ a saꞋwai kukumba ba. Shikpai ni ka̱ta̱ i tuka̱ mu. 3Vuza na baci de dem, we ecei ɗa̱, ‘Yi ɗa̱i i zuwai ɗa yi a kuyaꞋan nannai?’ Danai ni, ‘Vuzagbayin ɗa wi a kuciga maꞋa, wi ta̱ kpamu o kubonoko m maꞋa gogo na.’ ”

4Ɗa a lazai a kubana, ɗa a yawai a cinai maku ma majaki ma ushiyi, a̱ utsutsu u kpaꞋa ɗevu n uye, ɗa a shikpai maꞋa. 5Aza a na i lo kashani lo a̱ ubuta̱ wa e ecei le, “Yi ɗa̱i i zuwai ɗa yi a kushikpa maku ma majaki ma?”

6Ɗa a danai le ili i na Yesu u danai le a dana. Ɗa a̱ ka̱sa̱kpa̱i le a lazai m maꞋa. 7Ɗa a bankai Yesu m maku ma majaki ma. Ɗa o poloi aminya e le gaɗi, ɗa Yesu u kumbai. 8Ɗa uma n a̱bunda̱i o poloi aminya e le a uye. Ɗa aza o yoku a banai o koɗoi a̱vuku#Yah. 12:13. ɗa o poloi a uye wa. 9Aza a na i kelime n ka̱ca̱pa̱, a̱ ka̱na̱i kucanana ishipa, a danai,

“Hosana!† Ka̱shile ka zuwaka yi una̱singai, vuza na wi a kuta̱wa̱ wa̱ tsu n kula ku Vuzavaguɗu!#Ishp. 118:25-26.

10Ka̱shile ka zuwaka tsugono ce esheku a̱ tsu Dawuda una̱singai. Cikpai Ka̱shile! Hosana!”

11Ɗa u uwai a Urishelima, ɗa u banai A̱Ꞌisa̱ a Gbayin. Ana u la̱na̱i ili dem mayin ɗa u lazai adama a na kulivi ku yaꞋin ta̱ ɗe. Ɗa wu uta̱i o kubono a Bataniya koɓolo n Kupanazere a.

Yesu u yaꞋankai ma̱biri una̱

(Mat. 21:18-19)

12Ana kayin ka asai, ana a̱ ka̱sa̱kpa̱i Bataniya, ɗa kambulu ka̱ ka̱na̱i ni. 13Ana we enei ma̱biri n a̱vuku n a̱bunda̱i, ɗa u banai ko u kuciya̱ umaci u ni ka̱ta̱ u lyaꞋa. U yawai ɗe we ene ili ba, adama a na ayin a limata a̱ ni a ɗa ba. 14Ɗa u danai maɗanga ma, “Vuza u kudoku wa lyaꞋa umaci u nu ba.”

Mukumitoni n ni ta na m panaka yi ta̱ ana wi a kadanshi ka.

Yesu u lokoi aza a tsulaga a̱ A̱Ꞌisa̱ a Gbayin

(Mat. 21:12-17; Luk. 19:45-48; Yah. 2:13-22)

15Ana a yawai a Urishelima,† Yesu u uwai a̱ A̱Ꞌisa̱ a Gbayin, ɗa u lokoi aza a na i a tsulaga punu. U mutsukpa̱i irikpa a aza a na i a kusabaꞋasa ikebe kakau punu, ɗa u mutsukpa̱i irikpa a aza a na i e kudenge ntapambara. 16Ɗa u sa̱nka̱i aza a na a i a kubana n o bonoi a̱ A̱Ꞌisa̱ a n ucanuku. 17Ɗa u yaꞋankai le kadanshi, “Ta a ɗanai nannai a kadanshi ka̱ Ka̱shile:

‘KpaꞋa ku va̱ i ta̱ e kuɗeke ku ɗa ubuta̱ wa avasa, adama a uma dem.’#Ish. 56:7; Ir. 7:11. Amma a̱ɗa̱ i bonokoi ku ɗa ubuta̱ wa aza a kalyaꞋa n oboki.”

18Ana anan ganu vu gbagbaꞋin nu nlum n wila̱ m panai nannai, ɗa a̱ ka̱na̱i kula̱nsa̱ uye u na a kuna yi. I ta̱ a kupana wovon, adama a uteku u na uma i a kupana uyoꞋo kuyotsongusu ku ni.

19Ana kulivi ku yaꞋin, ɗa Yesu m mukumitoni n ni a̱ ka̱sa̱kpa̱i likuci ya.

Ubuta̱ u na ma̱biri me ɗekpei

(Mat. 21:20-22)

20Ele a kulaza lo n usana, ɗa e enei ma̱biri ma me ɗekpei n aralu a̱ ni dem. 21A̱yi Biturusu u ciɓai, ɗa u danai Yesu, “Malum, inda biꞋi ma̱biri ma na vu yaꞋankai una̱ va me ɗekpe ɗe.”

22Ɗa Yesu u danai le, “Nekei a̱ɗu a̱ ɗa̱ a̱ ubuta̱ u Ka̱shile. 23Mayun mi ta̱ a kudana ɗa̱, vuza na baci de dem u nekei ka̱ɗu ka̱ ni wa̱ va̱, wi ta̱ a kufuɗa wa dana kusan ku ɗenga̱, ku bana kuyikpa̱ a mala, ku ɗa ki ta̱ a kupanaka yi. 24Mayun ɗa mi a kudana ɗa̱, ili i na baci de dem i folonoi n kavasa, ɗa i nekei a̱ɗu, yi ta̱ a̱ kuciya̱ i ɗa. 25Ayin a na baci de dem i shamgbai a kuyaꞋan kavasa, yi baci n vuza na i remei a̱ ka̱ɗu ka̱ ɗa̱, sai i cinukpa. Adama a na esheku a̱ ɗa̱ a na i gaɗi feu, a cinukpaka ɗa̱ unushi u ɗa̱. 26[A̱ɗa̱ yi baci a kucinukpaka aza a̱ ɗa̱ unushi ba, ta feu Esheku a̱ ɗa̱ nannai a kucinukpaka ɗa̱ unushi u ɗa̱ ba.]”

E ecei Yesu ubuta̱ u na u ciya̱i utsura u ni

(Mat. 21:23-27; Luk. 20:1-8)

27Ana o bonoi a Urishelima, Yesu a̱ kula̱na̱ A̱Ꞌisa̱ a Gbayin. Ɗa anan ganu vu gbagbaꞋin nu nlum n wila̱ koɓolo nu nkoshi m gba̱ra̱-gba̱ra̱ dem a banai wa̱ ni. 28Ɗa e ecei ni, “Nu utsura we ne u ɗai vi a kuyaꞋan ili i nam pa? Ko yayi u nekei nu utsura u kuyaꞋan ili i nam pa?”

29Ɗa Yesu wu ushuki le, “Mi ta̱ a kuyaꞋanka ɗa̱ keci ku te. Mi ta̱ a kuciga yu ushuku mu, ka̱ta̱ mpa feu n yeve n dana ɗa̱, ko n utsura we ne u ɗai, mi a kuyaꞋan ili i nam pa. 30Kusumbu ka akucina ku na Yahaya† u yaꞋin, ku uma ku ɗa ko ku Ka̱shile? Danai mu.”

31Ɗa a̱ ka̱na̱i kugoɗumo uteku u le, “Tsu dana baci ubuta̱ u Ka̱shile u ɗa, wi ta̱ a kudana, ‘Yi ɗa̱i i zuwai ɗa i kpa̱ɗa̱i kushuku n a̱yi?’ 32Tsu dana baci kpamu ubuta̱ u uma ɗa.” I ta̱ a kupana wovon u uma, adama a na uma ushuku ta̱ Yahaya keneki kaꞋa. 33Adama a nan lo, ɗa a̱ ushuki Yesu, “Ci yeve ba.”

Ɗa Yesu wu ushuki le, “Ma kudana ɗa̱ feu ko te ɗai n ciya̱i utsura u na mi a kuyaꞋansa ili i nan lo ba.”

Pilihan Saat Ini:

Marukusu 11: asgNT

Sorotan

Berbagi

Salin