Marukusu 1

Yahaya vu kusumbu ka akucina u lapulai uye adama e Yesu

(Mat. 3:1-12; Luk. 3:1-18; Yah. 1:19-28)

1Na ɗa ukuna wa Arabali a Singai e Yesu† Kirisiti Kishi, Maku ma̱ Ka̱shile.† 2A̱ gita̱ ta̱ a uteku u na Ka̱shile ka danai a Katagarda ke Keneki† Ishaya.

“Mi ta̱ a̱ kusuku kalingata ka̱ va̱ kelime ka̱ nu,

vuza na u kulapulaka wu uye.”#Mal. 3:1.

3“Ka̱la̱ka̱tsu e meɗevile e mere mu une,

‘Lapulakai Vuzavaguɗu uye!

Bonokoi u ɗa mejege.’ ”#Ish. 40:3.

4Ɗa Yahaya† vu Kusumbu ka Akucina u yongoi e mere mu une a kudana uma ukuna wa Arabali a Singai. Ɗa u danai a yaꞋan kusumbu ka akucina, ka̱ta̱ a̱ shika̱ unushi† u le, adama a na Ka̱shile ka cinukpaka le u ɗa. 5Ɗa aza a na i punu a̱ ka̱tsuma̱ ku uɓon u Yahuda n a̱bunda̱i, n aza a na i a̱ ubirini u Urishelima ɗa a banai wa̱ ni, ɗa a̱ ka̱na̱i kushika̱ unushi u le. Ɗa u yaꞋankai le kusumbu ka akucina o Kuɗolu ku Urdu.

6Aminya a na Yahaya u ukai, cileme tsu karakuma tsu ɗa a caꞋi, ɗa u shiyai kashiyatsu ku ukpan a̱ kukyuꞋun ku ni. IlikulyaꞋa i ni i ɗa akyuꞋun n ishigi. 7Kadanshi ka na a̱ suꞋuki ni ka ɗaɗa na, “A̱ ka̱ca̱pa̱ ka̱ va̱ vuza yoku wi ta̱ lo a̱ kuta̱wa̱, u laꞋa mu ta̱ n tsugbayin. N yawa biꞋi n foɗo ko ataka a̱ ni ba. 8Mpa n yaꞋanka ɗa̱ ta̱ kusumbu ka akucina m mini, amma a̱yi u kuyaꞋanka ɗa̱ ta̱ kusumbu ka akucina n Ayinviki a̱ Ka̱shile.”†

A yaꞋankai Yesu kusumbu ka akucina

(Mat. 3:13-17; Luk. 3:21-22)

9Ayin a nan lo Yesu wu uta̱i a̱ likuci i Nazara vu uɓon u Ga̱lili, ɗa Yahaya u yaꞋankai ni kusumbu ka akucina punu o Kuɗolu ku Urdu. 10Yesu a̱ kuta̱ punu a̱ mini ma, ɗa we enei gaɗi† u ɓa̱yuwa̱i. Ɗa Ayinviki a̱ Ka̱shile a̱ uta̱i gaɗi, ɗa a̱ cipa̱i wa̱ ni an moɗoi. 11Ɗa ka̱la̱ka̱tsu ku uta̱i ɗe gaɗi ɗa ka danai, “Avu ɗa Maku ma̱ va̱ ma na n cigai. Mi ta̱ a kupana uyoꞋo u nu mayin.”

Kalijani ka piyai Yesu

(Mat. 4:1-11; Luk. 4:1-13)

12Ɗaɗa Ayinviki a̱ Ka̱shile a ɗikai ni a kubana e mere mu une. 13A kakamba ka na u banai va u yaꞋan ta̱ ayin amangere. Punu ayin amanga e re a, ɗa MalyaꞋi† ma̱ ka̱na̱i kupiyasa yi. A̱yi ɗa u yongoi ɗe endeꞋen ni, koɓolo nu nnama n kakamba, ɗa kpamu alingata a̱ Ka̱shile a̱ ka̱na̱i kuɓa̱nka̱ yi ɗe.

Yesu u gita̱i ulinga u ni

(Mat. 4:12-17; Luk. 4:14-15; 5:1-11)

14Ana a zuwai Yahaya a̱ kunu ku ugbashi, ɗa Yesu u banai a̱ Ga̱lili a kudana uma Arabali a Singai. 15Ɗa u danai, “Ayin a yawa ta̱, tsugono tsu Ka̱shile† tsu yawa ta̱ ɗevu. Shika̱i unushi u ɗa̱ ka̱ta̱ i neke a̱ɗu a̱ ubuta̱ wa Arabali a Singai a nam pa.” 16A̱yi a nwalu kpamu a̱ ka̱kina̱ ka Mala ka̱ Ga̱lili, ɗa we enei Sima n vuza ni Andarawu a kutaɗuku maza ma̱ bilili a̱ mini, adama a na ele osoruku a ɗa.

17Ɗa Yesu u danai le, “Ta̱wa̱i i tono mu. Mi ta̱ o kuyotsongu ɗa̱ uteku u na i kutuka̱ n uma, an ya̱ tuka̱ n adan.” 18Gogo lo ɗa a̱ ka̱sa̱kpa̱i maza me le ɗa o tonoi Yesu.

19Ana u doki kelime kenu ɗa we enei Yakubu maku ma Zabidi n vuza ni Yahaya, a kpantsu a kulapula maza ma̱ bilili me le. 20Ɗa u ɗekei le, ɗa a̱ ka̱sa̱kpa̱i esheku e le Zabidi punu a kpantsu n aza a zamalinga. Ɗa o tonoi ni.

Yesu u lokoi wunla̱i u gbani-gbani

(Mat. 4:18-22; Luk. 5:1-11)

21Ɗa a lazai a kubana a̱ likuci i Kafarnahum. Ana kanna ka Ashibi ka yawai, ɗa Yesu u banai a̱ kunu ka avasa, ɗa u ka̱na̱i kuyotsongusu le. 22Ɗa uma a̱ ka̱na̱i kuyaꞋan mereve tsu na wi a kuyaꞋan kuyotsongusu ku ni. Adama a na u yotsongusu le ta̱ n utsura, amma uteku u na nlum n wila̱ n ci yaꞋan ba.

23Punu asuvu a̱ kunu ka avasa ka ɗa gogo lo vuza yoku vuza na wi n wunla̱i u gbani-gbani o kutono yi, ɗa u lapai una̱, 24“Yi ɗa̱i i burai tsu n avu, Yesu vu Nazara? Vu ta̱wa̱ ta̱ adama a na vu una tsu? N yeve ta̱ vuza na vi, Vuzaciɗa vu Ka̱shile.”

25Ɗa Yesu u dansukai le n utsura, “Paɗai bini. Uta̱i punu wa̱ ni.” 26Ɗa wunla̱i u gbani-gbani u pinda̱ra̱i vuma va, u lapai una̱, ɗa wu uta̱i wa̱ ni. 27Uma a̱ ka̱na̱i kuyaꞋan mereve. Ɗa a̱ ka̱na̱i mecenshenei, “Yi ɗa̱i nannai? Kuyotsongusu ku savu ku ɗa. Ki ta̱ n utsura, ali a kudansuka wunla̱i u gbani-gbani, ɗa ta na u panakai ni.” 28Gogo lo, kadanshi ka nan lo ɗa ka̱ ka̱ra̱Ꞌi uɓon u Ga̱lili dem.

Yesu u potsokpoi uma n a̱bunda̱i

(Mat. 8:14-17; Luk. 4:38-41)

29Ana a̱ uta̱i a̱ kunu ka avasa, ɗa Yesu u lazai koɓolo n Yakubu n Yahaya a kubana a kpaꞋa ku Sima n Andarawu. 30A̱na̱ku a vuka vu Sima u gaꞋin ba, wana ɗai a saɓanai n kuta̱nu, ɗa a danai Yesu. 31U banai ubuta̱ u na wi, ɗa u ka̱na̱i ni kukiye u ɗengusa̱i, ɗa mɓa̱la̱ n ka̱sa̱kpa̱i ni. Ɗa ma̱ma̱ci ma, u ka̱na̱i kuɓa̱nka̱ le n upecu u tsuwaꞋa.

32N kulivi ku nan lo ana kanna ka̱ yikpa̱i, ɗa uma a̱ ka̱na̱i kutuka̱ n aza a mbanaki n aza a na i n wunla̱i u gbani-gbani. 33Uma a̱ likuci dem a̱ ka̱na̱i kuvana yi a̱ utsutsu u kpaꞋa wa. 34Ɗa Yesu u potsokpoi mbanaki icuꞋu kakau n a̱bunda̱i. Ɗa kpamu u ka̱na̱i kuloko wunla̱i u gbani-gbani ubuta̱ u uma. Amma a̱yi u tsu ka̱sa̱kpa̱ le a dansa ba, adama a na e yeve ta̱ yayi Yesu.

Yesu u salai Arabali a Singai

(Luk. 4:42-44)

35M kpasani, ɗa Yesu u ɗenga̱i ɗa u banai a̱ ubuta̱ u na wi n ka̱bini, ɗa u yaꞋin kavasa. 36Sima n aza a̱ ni a banai kula̱nsa̱ yi. 37Ana e enei ni, ɗa a danai ni, “Uma dem i ta̱ ɗe a̱ kula̱nsa̱ wu.”

38Ɗa Yesu u danai le, “Ka̱sa̱kpa̱i tsu banai a̱ ubuta̱ u yoku, a̱ likuci likuci i na yi lo ɗevu. Adama a na n dana uma Arabali a Singai. Adama a na ka ɗa ka̱ tuka̱i mu.” 39Ɗa u ka̱ra̱Ꞌi Ga̱lili dem n u danai uma Arabali a Singai a̱ unu a avasa n u lokoi wunla̱i a gbani-gbani a̱ ubuta̱ u uma.

Yesu u potsokpoi ma̱kutu

(Mat. 8:1-4; Luk. 5:12-16)

40Vuma vi yoku ma̱kutu maꞋa, u ta̱wa̱i u kuɗa̱ngi e kelime ke Yesu, ɗa u folonoi ni. U danai, “Vu ushuku baci, potsokpo mu.” 41Ɗa Yesu u panai asuvayali a̱ ni, u ba̱ra̱kpa̱i kukiye ku ni, ɗa u saꞋwai ni. U danai, “Mu ushuku ta̱, ta̱na̱.” 42Gogo lo, ɗa ukutu wa u ka̱sa̱kpa̱i vuma va, ɗa u ta̱na̱i ta na. 43Ɗa Yesu u danai ni u wala n uɓarangi u nam pa, 44“Ka̱ta̱ vu dana vuza ba. Bana vu yotsongu ka̱ci ka̱ nu u ganu. Ka̱ta̱ vi neke kuneꞋe uteku u na Musa u danai a yaꞋan adama a vuza na u potsoi, ciya̱ e yeve ili i na yi lo.”#A.Gan. 14:1-32. Ɗa ta na u danai ni u laza.

45Amma vuma va u lazai, ɗa u banai u ka̱na̱i kudana uma arabali a. Ali ɗa Yesu u doku u fuɗa kuꞋuwa a̱ likuci e keteshe ba. Ɗa u shamgbai ɗe daꞋin n likuci a̱ ubuta̱ u na uma i ba, ko n nannai, ɗa uma a̱ ubuta̱ kakau a̱ ka̱na̱i kubansa wa̱ ni.

Pilihan Saat Ini:

Marukusu 1: asgNT

Sorotan

Berbagi

Salin