Matiyu 21

Yesu u uwai a Urishelima

(Mar. 11:1-11; Luk. 19:28-40; Yah. 12:12-19)

1Ana Yesu m mukumitoni n ni i a kubana a Urishelima, a yawai ɗevu n likuci i Bataji a Kusan ku Zaitun.† Yesu u suki aza e re e le kelime. 2U danai le, “Banai a̱ likuci i na yi kelime ka̱ ɗa̱. I yawa baci ɗe, gogo va lo yi ta̱ a kucina ɗe majaki m maku ma̱ ni. Shikpai le ka̱ta̱ i tuka̱ le wa̱ va̱. 3Vuza yoku we ece ɗa̱ baci ili i na i zuwai ɗa yi a kuyaꞋan nannai, danai ni, ‘Vuzagbayin ɗa wi a kuciga le.’ Gogo lo wi ta̱ a̱ kuka̱sa̱kpa̱ ɗa̱ i wala n ele.”

4Ili i nam pa i yaꞋan ta̱ nannai adama a na a shatangu ili i na keneki Zakariya u danai:

5“Salaka uma a Sihiyona:

‘Mogono ma̱ ɗa̱ mi ta̱ a̱ kuta̱wa̱ wa̱ ɗa̱!

A̱yi vuza ɗa vu na u goyoi ka̱ci ka̱ ni, wi ta̱ ukumbi a majaki.

Wi ta̱ a̱ kuta̱wa̱ gaɗi vu maku ma majaki.’ ”#Zak. 9:9.

6Ɗa mukumitoni ma m banai n yaꞋin uteku u na Yesu u danai le a yaꞋan. 7A̱ tuka̱i m majaki m maku ma̱ ni, ɗa o poloi aminya e le a̱ kucina̱ ku njaki ka. Ɗa Yesu u kumbai. 8Uma n a̱bunda̱i o poloi aminya e le a uye. Aza o yoku o koɗoi avaga ɗa o poloi feu a uye wa. 9Uma o yoku a walai kelime ke Yesu aza o yoku tamkpamu o tonoi ni ka̱ca̱pa̱. Ra̱ka̱ vi le o yongoi a kacaꞋa,

“Cikpai Maku ma Dawuda!

Ka̱shile ka zuwaka yi una̱singai a̱yi na u ta̱wa̱i n kula ku Vuzavaguɗu!

Cikpai Ka̱shile!”

10Ana Yesu u uwai a Urishelima,† likuci ya ra̱ka̱ i shanai n kacakaꞋuma. Ɗa a̱ gita̱i kece, “Yayi vuma vu nam pa?”

11Ka̱bunda̱i ka uma ka danai, “Vuma vu nam pa va Yesu ɗa, keneki ka na ku uta̱i a̱ likuci i Nazara vu Ga̱lili.”

Yesu u lokoi aza a tsulaga a̱ A̱Ꞌisa̱ a Gbayin

(Mar. 11:15-19; Luk. 19:45-48; Yah. 2:13-22)

12Yesu u uwai a̱ A̱Ꞌisa̱ a Gbayin, ɗa u lokoi aza a na i a tsulaga punu. U mutsukpa̱i irikpa a aza a na i a kusabaꞋasa ikebe kakau punu, ɗa u mutsukpa̱i irikpa a aza a na i e kudenge ntapambara. 13U danai le, “Katagarda ka Ciɗa ka danai, ‘I ta̱ e kuɗeke kpaꞋa ku va̱ ubuta̱ wa avasa.’ Amma a̱ɗa̱ i bonokoi ku ɗa ubuta̱ u na oboki e kusheɗeku.”

14A̱yimba̱ nu nkutsuma̱ a̱ ta̱wa̱i u Yesu punu a̱ A̱Ꞌisa̱ a, ɗa u potsokpoi le. 15Anan ganu vu gbagbaꞋin nu nlum n Wila̱ a yaꞋin wupa ka̱u ana e enei Yesu a kuyaꞋan ili i mereve, ɗa kpamu e enei tsu na muku mi a kucikpa yi a̱ A̱Ꞌisa̱ n a danai, “Cikpai Maku ma Dawuda!”

16Ɗa e ecei Yesu, “Vu pana ta̱ ili i na muku n nam pa mi a kudansa?”

Wu ushuki, “E, mayun i kece ta̱ a Katagarda ka Ciɗa:

‘Avu Ka̱shile, vu zuwa ta̱ muku ni nreɓu a cananaka wu ishipa i kucikpa.’ ”#Ishp. 8:2.

17Ɗaɗa Yesu u lazai wu uta̱i pulai vi likuci a kubana a Bataniya, a̱ ubuta̱ u na wa asai.

Yesu u yaꞋankai ma̱biri una̱

(Mar. 11:12-14, 20-24)

18N usana ka̱lika̱li, ana Yesu wi o kubono a̱ likuci, ɗa kambulu ka̱ ka̱na̱i ni. 19Ɗa we enei maɗanga ma̱ ma̱biri a̱ ka̱kina̱ ku uye ɗa u banai ɗe, amma u cina ɗe ili ba, sai a̱vuku. Ɗa u danai maɗanga ma, “Vi o kudoku va matsa ba!” GogoꞋo va lo ɗa ma̱biri ma me ɗekpei.

20Ana mukumitoni n ni me enei nannai, ɗa a yaꞋin mereve. Ɗa e ecei, “Nini ɗai ɗa maɗanga ma me ɗekpei gogoꞋo lo?”

21Yesu wu ushuki, “N dana ɗa̱ mayun, yi baci n uneki wa̱ a̱ɗu ɗa u kpa̱ɗa̱i kugusa̱, yi ta̱ a kufuɗa ya yaꞋan ili i na n yaꞋankai maɗanga ma nam pa, ali i na i laꞋi nannai. Yi ta̱ a kufuɗa ya danaka kusan ku nam pa, ‘Bana, vi yikpa̱ a mala,’ ki ta̱ a kuyaꞋan nannai. 22Yi baci n uneki wa̱ a̱ɗu, yi ta̱ a̱ kuciya̱ ili dem i na i folonoi ayin a na yi a kuyaꞋansa kavasa.”

E ecei Yesu ubuta̱ u na u ciya̱i utsura u ni

(Mar. 11:27-33; Luk. 20:1-8)

23Yesu u bonoi punu a̱ A̱Ꞌisa̱ a Gbayin, ɗa u gita̱i kuyaꞋan kuyotsongusu. Ɗa anan ganu vu gbagbaꞋin nu nkoshi m gba̱ra̱-gba̱ra̱ n ta̱wa̱i wa̱ ni ɗa e ecei, “N utsura we ne u ɗai vi a kuyaꞋan ili i nam pa dem? Yayi u nekei nu utsura u nan lo?”

24Yesu wu ushuki, “Mi ta̱ n keci ku te ku na n kuyaꞋanka ɗa̱. Yu ushuku baci ku ɗa, mi ta̱ a kudana ɗa̱ feu ubuta̱ u na n ciya̱i utsura u na mi a kuyaꞋan ili i nam pa ya. 25Yayi u nekei Yahaya utsura u na u yaꞋan kusumbu ka akucina? Ka̱shile kaꞋa ko uma a ɗa?”

Ɗa o goɗumoi kadanshi ka uteku u le, “Tsu dana baci, ‘A̱ ubuta̱ u Ka̱shile u ɗa wu uta̱i,’ wi ta̱ e kece tsu ili i na i zuwai ɗa tsu kpa̱ɗa̱i kushuku n a̱yi. 26Amma tsu dana baci, ‘A̱ ubuta̱ u uma u ɗa wu uta̱i,’ ci ta̱ o wovon wi ili i na uma a kuyaꞋan, adama a na uma ra̱ka̱ a̱ ushuku ta̱ a na Yahaya keneki kaꞋa.”

27Ɗa a danai ni, “A̱tsu ci yeve ba.”

Ɗa u danai, “Mpa feu n kudana ɗa̱ vuza na u nekei mu utsura u na mi a kuyaꞋan ili i nam pa ya ba.”

Agisana a̱ muku n re

28Yesu u danai, “Mi ta̱ a kudana ɗa̱ arabali a vuza yoku na wi m muku n re. Ka̱ta̱ i dana mu ili i na ye enei. N usana u yoku esheku e le a banai u vuzagbayin va ɗa u danai, ‘Bana vi yaꞋan ulinga a kashina ka̱ nɗimbi.’

29“Ɗa maku ma mu ushuki, ‘Mi a kubana ba.’ Amma ana megeshe ma yaꞋin kenu, ɗa u yaꞋansakai ka̱ɗu ka̱ ni, ɗa u banai.

30“Ɗaɗa esheku a a banai u maku ma na ma buwai va, ɗa u danai, ‘Bana vi yaꞋan ulinga a kashina ka.’ Ɗa wu ushuki, ‘To, dada, mi ta̱ a kubana,’ amma u bana ba.

31“Vuza ve ne ɗai a̱ ka̱tsuma̱ ka̱ muku ma u panakai esheku?”

Ɗa anan ganu nu nkoshi m gba̱ra̱-gba̱ra̱ a̱ ushuki, “Maku ma iyain.”

Ɗa Yesu u danai le, “N dana ɗa̱ mayun, aza a kisa utafu n ashakanlai i ta̱ a kuꞋuwa o tsugono tsu Ka̱shile a cau n a̱ɗa. 32Yahaya Vuza vu Kusumbu ka Akucina u ta̱wa̱ ta̱ kuyotsongu ɗa̱ uye u singai u na i kuyaꞋan wuma u ma̱riki. Yu ushuku n a̱yi ba, amma aza a kisa utafu n ashakanlai a̱ ushuki n a̱yi. Ko a na ye enei nannai, ɗa i iwain i kuyaꞋansaka a̱ɗu, ka̱ta̱ yu ushuku n a̱yi.”

Agisana a aza a zamalinga a gbani-gbani

(Mar. 12:1-12; Luk. 20:9-19)

33Ɗa Yesu u danai, “Panai arabali a nam pa: Vuma vi yoku ɗa u yaꞋin kashina ka̱ nɗimbi. Ɗa u kanzai kaꞋa u ka̱ra̱Ꞌa̱ka̱i, ɗa u ga̱va̱i ubuta̱ u na a kupisha umaci wa punu, ɗa u maꞋi ubuta̱ ugaɗi adama a vuza na u kindaka yi kashina ka. Ɗaɗa u zuwai aza a zamalinga a lapulaka yi kaꞋa, ɗa u lazai a kubana nwalu. 34Ana ayin a yaꞋin a na a taꞋa umaci wa, ɗa u suki agbashi a̱ ni wa acimbi wa adama a na a isaka yi i na u ciya̱i.

35“Amma ɗa acimbi a a̱ ka̱na̱i agbashi a. Ɗaɗa a lapai vuza te, ɗa a unai vuza yoku, ɗaɗa a varai vuza tatsu sapu u kuwa̱i. 36Ɗa vuza vu kashina va u doki u suki agbashi a̱ ni n a̱bunda̱i a isaka yi kpamu. Amma ɗa acimbi a yaꞋankai agbashi a uteku u na a yaꞋankai aza a cau a. 37A uteku, vuza vu kashina va u suki maku mu umaci ma̱ ni we le, adama a na u sheshe ta̱ i ta̱ a kupanaka yi.

38“Amma ana acimbi a enei maku ma, ɗa a dananai, ‘Maku ma nam pa u kokpo ta̱ n kawalatsu ka kashina ka. Tsu una yi baci, ki ta̱ o kokpo ka̱ tsu!’ 39Ɗa a̱ ka̱na̱i ni, a ɗikai ni n utsura a̱ uta̱ka̱i a kashina ka, ɗa a unai ni.”

40Yesu we ecei, “Ayin a na baci vuza vu kashina nan lo u bonoi, yi ɗa̱i i sheshei u kuyaꞋanka acimbi a nan lo?”

41Anan ganu vu gbagbaꞋin nu nkoshi m gba̱ra̱-gba̱ra̱ a̱ ushuki, “Mayun u kuna ta̱ uma a gbani-gbani a nan lo, ka̱ta̱ u neke kashina ka kokpo a̱ ubuta̱ wa acimbi o yoku, aza a na e kuneke yi ili i na i yotsoi u ciya̱.”

42Yesu u danai le, “Mayun i kece ta̱ ili i nam pa a Katagarda ka Ciɗa:

‘Katali ka na amaꞋi a iwain, ka ɗa ko okpoi kenene ke mere.

Vuzavaguɗu ɗa u yaꞋin ili i nam pa,

i ɗa yi ta̱ m mereve a̱ a̱shi a̱ tsu.’#Ishp. 118:22-23.

43“Adama a nan lo, n dana ɗa̱ ta̱ i ta̱ a kufa̱ba̱na̱ tsugono tsu Ka̱shile wa̱ ɗa̱ ka̱ta̱ e neke aza a na a yaꞋin ili i na Ka̱shile ka cigai. 44Vuza na baci u yikpa̱i a katali ka nam pa, wi ta̱ o kukoɗo miri-miri, vuza na baci kpamu katali ka nam pa ka̱ yikpa̱ka̱i ni, ki ta̱ a kuvara yi pete.”#21:44 Atagarda a̱ kuku o yoku i n kabaꞋin ka nam pa 44 ba.

45Ana anan ganu vu gbagbaꞋin n Afarishi a panai arabali a nam pa, ɗa e yevei a na ele ɗa Yesu u ciya̱i kudansaka. 46Ɗa a cigai kuka̱na̱ yi, amma ɗa a panai wovon u uma, adama a na uma a a̱ ushuku ta̱ a na Yesu keneki kaꞋa.

Pilihan Saat Ini:

Matiyu 21: asgNT

Sorotan

Berbagi

Salin