Luka 1

1Vuzagbayin Tiyofilo: Uma n a̱bunda̱i a piya ta̱ ɗe kuɗana adama a na a dana tsu uteku u na tsumani ci shanai wa̱ tsu. 2Ele a ɗana ta̱ ili i na aza a na e enei ili ya ali n ayin a̱ ugiti, ɗa a danai tsu. Aza a nam pa e ene ta̱ Yesu, aza a ulinga a̱ ni a ɗa kpamu. 3Mpa feu n la̱na̱ ta̱ ili mayin dem ali n ugiti, me enei u gaꞋan ta̱ n ɗanaka wu tsumani tsa mayin. 4N yaꞋan ta̱ ili i nam pa adama a na vi yeve mayun vi ili i na o yotsongushi nu dem.

A yaꞋin kadanshi ka kumatsa Yahaya

5A yaꞋan ta̱ ili i nam pa a ayin a na Hiridu† wi mogono ma Yahuda. Ganu#1:5 La̱na̱ a kaci ku udani “Ganu” a̱ Ubuta̱ wi ili i Kuyeve. vi yoku ɗa, kula ku ni ku ɗa Zakariya, vuza na wi punu a̱ ka̱tsuma̱ ka anan ganu va Abija. Vuka vi ni kpamu kula ku ni ku ɗa Alisabatu. Ele dem ntsukaya n Haruna† n ɗa. 6I ta̱ kpamu o kuyongo n usuɓi a̱ ubuta̱ u Ka̱shile, ɗa i o kutono mayin ili i na Vuzavaguɗu u danai dem. 7Ele kpamu i m maku ba, adama a na Alisabatu madari maꞋa. Dem vi le kpamu a yaꞋan ta̱ ayin e re.

8Kanna ke te, Zakariya, a̱yi a kuyaꞋan ulinga u tsuganu u ni punu a̱ A̱Ꞌisa̱ a Gbayin† a Vuzavaguɗu, adama a na ayin a ulinga e le a ɗa. 9A yaꞋan ta̱ kazagba ka̱ ni uteku u na anan ganu a kiwanai kuyaꞋansa, wo okpo vuza vu kusongu ili i ma̱gula̱ni† a katalikalyuka. Ɗa u banai o Mololo ma Ciɗa.† 10A̱yi punu o kusongu ili i ma̱gula̱ni ya, ka̱bunda̱i ka uma lo pulai a kuyaꞋan avasa.

11Ɗa kalingata ka Vuzavaguɗu ka banai wa̱ ni, ɗa ka shamgbai e kukiye ku usingai a katalikalyuka ka. 12Ana Zakariya we enei ni, ɗa u rikpa̱i ɗa kpamu u panai wovon. 13Ɗa kalingata ka ka danai, “Zakariya, ka̱ta̱ vu pana wovon ba. A pana ta̱ avasa a̱ nu. Vuka vu nu vi ta̱ a kumatsaka wu maku mo kolobo, ka̱ta̱ vi ɗeke kula ku ni Yahaya.† 14Vi ta̱ a kuyaꞋan ma̱za̱nga̱ n a̱bunda̱i, uma kpamu a kupana ta̱ uyoꞋo n umaci u ni. 15Wi ta̱ kpamu o kokpo vuzagbayin a̱ ubuta̱ u Vuzavaguɗu. Ka̱ta̱ kpamu u soꞋo ma̱ra̱ ba, ko ili i na i kuzuwa i maka yi. Wi ta̱ kpamu a kushana n Ayinviki a̱ Ka̱shile† kafu a matsa yi. 16Wi ta̱ o kubonoko aza a Israila n a̱bunda̱i a̱ ubuta̱ u Vuzavaguɗu Ka̱shile ke le. 17Wi ta̱ o kokpo vuza vu utsura n ka̱ɗu uteku ci Iliya. Ka̱ta̱ kpamu u lapula a̱ɗu a uma adama a̱ kuta̱wa̱ ku Vuzagbayin. U ɓolongu a̱ɗu a isheku m muku n le. Wi ta̱ a kuzuwa aza a ugbawansuvu n Ka̱shile o bono a uye wa aza a̱ usuɓi.”

18Ɗa Zakariya we ecei kalingata ka, “Nini ɗai mpa n kushuku n ili i nam pa? Mpa n kutsa ta̱, vuka vu va̱ kpamu vu kutsa ta̱.”

19Ɗa kalingata† ka ka danai, “Mpa ɗa JibaraꞋilu. N ci shamgba ta̱ e kelime ka̱ Ka̱shile. A̱yi ɗa kpamu u suki mu n dana wu arabali a singai a nam pa. 20Gogo na vi ta̱ a kupaɗa bini vo okpo kebebe. Vo kudoku va fuɗa va kudansa ba, sai ayin a na u matsai, adama a na avu vi neke ka̱ɗu ka̱ nu n kadanshi ka̱ va̱ ba.”

21Uma a na i lo pulai a kuvana Zakariya, ɗa a̱ ka̱na̱i mereve adama a ili i na i zuwai ɗa u geshei nannai punu o Mololo ma Ciɗa ma. 22Ana wu uta̱i, ɗa u ka̱na̱i kuyaꞋan tsubebe n ele. Ɗa e yevei vuma va we ene ta̱ ili i na i laꞋi ni punu o Mololo ma. Ɗa u ka̱na̱i kuyaꞋan kadanshi n ekiye adama a na u fuɗa u dansa ba.

23Ana ayin a ulinga a̱ ni o kotsoi, ɗa u bonoi a kpaꞋa. 24Ɗa vuka vi ni vi yaꞋin ka̱tsuma̱, ali wotoi u tawun a̱yi e kusheɗekusu. 25Ɗa u danai, “Mpa mo okpo ta̱ macigi ma Vuzavaguɗu, adama a na u yaꞋanka mu ta̱ ili i nam pa: U takpaka mu ta̱ kpamu wono u va̱ a̱ ubuta̱ wa aza a na i o kugoyo mu.”

A yaꞋin kadanshi ka kumatsa Yesu

26Ana ka̱tsuma̱ ka Alisabatu ka yawai wotoi u ta̱li, ɗa Ka̱shile ka̱ suki kalingata ka̱ ni JibaraꞋilu a kubana Nazara, likuci i yoku i ɗa punu a̱ Ga̱lili. 27Kalingata ka ka banai u mekere ma na me yevei vali ba, kula ku ni ku ɗa Meri. Wi ta̱ n kamana, kula ku ni ku ɗa Isuhu.† A̱yi kpamu wi ta̱ a̱ ka̱tsuma̱ ka ntsukaya m Mogono Dawuda. 28Ɗa kalingata ka danai ni, “Mi ta̱ a̱ kukya̱sa̱ wu, avu macigi ma̱ Ka̱shile. Vuzavaguɗu kpamu wi ta̱ koɓolo n avu.”

29Ɗa Meri u na̱mgba̱i ka̱tsuma̱ n a̱bunda̱i adama a kadanshi ka na a yaꞋankai ni va. Ɗa u ka̱na̱i kece ka̱ci ka̱ ni icuꞋu yi ikya̱shi yi iya̱n i ɗai nannai. 30Amma ɗa kalingata ka danai ni, “Meri, ka̱ta̱ vu pana wovon ba. Vo okpo ta̱ macigi ma̱ Ka̱shile. 31Vi ta̱ a kuyaꞋan ka̱tsuma̱ ka̱ta̱ vu matsa kolobo, ka̱ta̱ vi neꞋi kula Yesu. 32Wi ta̱ o kokpo vuzagbayin. I ta̱ e kuɗeke yi kpamu Maku ma MalaꞋimili dem. Ka̱shile Vuzavaguɗu wi ta̱ e kuneke yi kakuba ko tsugono ke esheku a̱ ni Dawuda. 33A̱yi wi ta̱ a kulyaꞋa tsugono a ntsukaya n Yakubu. Tsugono ci ni kpamu tsu ɗa ci lo o kukotso ba.”

34Ɗa Meri we ecei, “Nini ɗai ili i nam pa i kokpo? Mpa ɗa na mekere maꞋa, n yeve kpamu vali ba.”

35Ɗa wu ushuki, “Ayinviki a̱ Ka̱shile i ta̱ a̱ kuta̱wa̱ wa̱ nu n utsura u MalaꞋimili, ka̱ta̱ u pala wu. Vuma vi ciɗa vu na a kumatsa va, e kuɗeke yi ta̱ Maku ma̱ Ka̱shile.† 36Alisabatu vuza nu wi ta̱ a kumatsa maku n tsukutsa ci ni. A̱yi na a danai madari maꞋa, ka̱tsuma̱ ka̱ ni wotoi u ta̱li u ɗa na. 37Ili dem i laꞋa Ka̱shile utsura ba.”

38Ɗa Meri u danai, “Mpa kagbashi ka Vuzavaguɗu kaꞋa. YaꞋan ili i na vu danai dem yo okpo mayun wa̱ va̱.” Ɗa kalingata ka ka̱ ka̱sa̱kpa̱i ni.

Meri u banai u Alisabatu

39Ayin a nan lo, ɗa Meri u ɗenga̱i ɗa u foɓusoi, ɗa u yaꞋin moloko a kubana a̱ likuci yi nsasan a uɓon u Yahuda. 40Ana u yawai, u uwai a kpaꞋa ku Zakariya, ɗa u kya̱sa̱i vuka vi ni Alisabatu. 41Ana u panai ikya̱shi ya, ɗa maku ma na mi punu a̱ ka̱tsuma̱ ka ma̱ ka̱na̱i kuzumgba̱sa̱ m ma̱za̱nga̱. Ɗa Alisabatu u shanai n Ayinviki a̱ Ka̱shile.

42Ɗa u yaꞋin kadanshi n ka̱la̱ka̱tsu ka̱u, “Avu a zuwaka wu ta̱ una̱singai a̱ ubuta̱ wa̱ a̱ma̱ci dem. Ili i na yi punu a̱ ka̱tsuma̱ ka̱ nu dem a zuwaka ta̱ i ɗa una̱singai. 43Yi ɗa̱i i zuwai ɗa ili i gbangam i nam pa i ta̱wa̱i wa̱ va̱, ali a̱na̱ku a Vuzagbayin a̱ va̱ a̱ ta̱wa̱i wa̱ va̱ adama a na we ene mu? 44Ayin a na m panai ikya̱shi i nu, maku ma na mi punu a̱ ka̱tsuma̱ ka va̱, ɗa ma ikpangi adama a̱ ma̱za̱nga̱. 45Una̱singai u tono wu, adama a na vi neke ta̱ ka̱ɗu ka̱ nu n ili i na Vuzavaguɗu u danai i ta̱ a kushatangu i ɗa.”

Vishipa vi Meri

46Ɗa Meri u danai,

“Ka̱sa̱kpa̱ ka̱ɗu ka̱ va̱ ka cikpa Vuzavaguɗu.

47Ka̱ɗu ka̱ va̱ dem kpamu ka yaꞋan ta̱ ma̱za̱nga̱ a̱ ubuta̱ u Ka̱shile vuza na u kisa mu,

48adama a na u ciɓa ta̱ nu mpa, kagbashi ka̱ ni koci. Punu anana a kubana u uma a na a̱ kuta̱wa̱, i ta̱ e kuɗeke mu vuza na Ka̱shile ka zuwakai una̱singai,

49adama a na Uba̱nga̱ri u yaꞋanka mu ta̱ ili i na i laꞋi n kugaꞋan. Kula ku ni ku ciɗa ku ɗa.

50U tsu pana ta̱ asuvayali a aza a na i a kupana wovon u ni a kubana wu ntsukaya dem.

51U yaꞋan ta̱ ulinga u gbagbaꞋin n ekiye a̱ ni. U wacuwa ta̱ aza a na i n a̱ra̱ɗi punu a̱ a̱ɗu e le.

52U takpa ta̱ ngono gaɗi va akuba e le, u ɗengusa̱ ta̱ kpamu aza a na o goyoi ka̱ci ke le.

53U neke ta̱ kpamu aza a kambulu ilikulyaꞋa i singai. Amma u zuwa ta̱ aza a na i n uciyi o okpo n kambulu.

54U ɓa̱nka̱ ta̱ kagbashi ka̱ ni Israila. U ciɓa ta̱ kpamu uzuwakpani u kupana ta̱ asuvayali a̱ ni.

55U yaꞋin uzuwakpani wa n akaya a̱ tsu Ibrahim† nu ntsukaya n ni ko wanai.”

56Ɗa Meri u da̱sa̱ngi ɗe u Alisabatu ali wotoi u tatsu, ɗa u yevei u bonoi a kpaꞋa.

A matsai Yahaya vu kusumbu ka akucina

57Ana ayin a yawai, Alisabatu u matsai maku mo kolobo ma. 58Mmaci n ni n aza a na i ɗevu a panai ili i singai i na Vuzavaguɗu u yaꞋankai ni, ɗa a̱ ɓa̱nka̱i ni ma̱za̱nga̱.

59A kanna ka̱ kunla̱i, a banai adama a na a kiɗa maku ma kavaja, ka̱ta̱ feu e neꞋe yi kula ke esheku Zakariya. 60Amma ɗa a̱na̱ku a a danai, “A̱Ꞌa̱, kula ku ni ku ɗa Yahaya.”

61Ɗa a danai ni, “Babu vuza na wi n kula tsu nan lo a̱ ka̱tsuma̱ ku umaci u tsu.”

62Ɗa a yaꞋankai esheku a kadanshi n ekiye, adama a na e yeve kula ku na e kuɗeke maku ma. 63Ɗa u danai e neke yi ili yi iɗani, ɗa u ɗanai, “Kula ku ni ku ɗa Yahaya.” Uma lo feu kashani a kinda m mereve. 64Gogo lo, ɗa tsubebe ci ni tsu ka̱sa̱kpa̱i ni, ɗa u ka̱na̱i kadanshi n u cikpai Ka̱shile. 65Aza a na i ɗevu n a̱yi dem ɗa a̱ ka̱na̱i mereve. Aza a na i punu uɓon wu nsasan n Yahuda dem ɗa a̱ ka̱na̱i kuka̱ra̱Ꞌa̱ n a dansai arabali a. 66Vuza na baci u panai kadanshi ka dem sai u ka̱na̱ kuciɓasa, ka̱ta̱ we ece, “Yi ɗa̱i tamkpamu maku ma nam pa mi o kokpo?” Adama a na uma e ene ta̱ Vuzavaguɗu wi ta̱ n a̱yi.

Vishipa vu Zakariya

67Esheku a maku a, Zakariya ɗa u shanai n Ayinviki a̱ Ka̱shile, ɗa u yaꞋin kene,

68“Cikpai Vuzavaguɗu, Ka̱shile ki Israila, adama a na a̱yi u ta̱wa̱ ta̱, ɗa kpamu u ba̱ruwa̱i uma a̱ ni.

69U ɗengusa̱ ta̱ Kishi ku utsura adama a̱ tsu a kpaꞋa ku kagbashi ka̱ ni Dawuda,

70(uteku u na u dansai a̱ ubuta̱ u eneki a̱ ni m megeshe ma ɗe.)

71Wi isa tsu ta̱ a̱ ubuta̱ wa aza a na i a kuꞋiwan tsu, n irala i tsu.

72U yotsongu ta̱ isheku i tsu asuvayali, u ciɓai kpamu n uzuwakpani† u ciɗa u ni,

73uzuwakpani u na u kucinakai esheku a̱ tsu Ibrahim.

74U danai wi ta̱ a kisa tsu e ekiye a aza a na i a kuꞋiwan tsu. Ka̱ta̱ u zuwa kpamu tsu tono yi babu wovon.

75Ci ta̱ o kuyongo ciɗa ciɗa n usuɓi u ka̱ɗu ayin tutu.

76Avu maku ma̱ va̱, i ta̱ e kuɗeke wu keneki ka MalaꞋimili. Adama a na avu vi ta̱ a kubana e kelime ka Vuzagbayin, ka̱ta̱ vu lapulaka yi uye.

77Vi ta̱ e kuneke aza a̱ ni e yeve uteku u na Ka̱shile ka ki isai uma, a̱ ubuta̱ u kucinukpa n unushi u le.

78Ka̱shile ka̱ tsu ki ta̱ n asuvayali n kuleꞋeshe uma. Adama a nannai kutashi ku usana ku Ka̱shile ki ta̱ a kuciga kuta̱wa̱ wa̱ tsu.

79Wa akana kpamu a̱ ubuta̱ wa aza a na i o kuyongo a̱ ka̱yimbi, ko ubuta̱ u kululu ku ukpa̱. Wi ta̱ kpamu a̱ kuta̱ka̱ tsu punu a kubana a uye u ma̱ta̱na̱.”

80Ɗa maku ma mo gbonguroi, ɗa wo okpoi vuza vu utsura wi ikyamba n ka̱ɗu ka̱u. Ɗa u ka̱na̱i kuyongo e mere ma kakamba ali ayin a na u yotsongi ka̱ci ka̱ ni wa aza a Israila.

Pilihan Saat Ini:

Luka 1: asgNT

Sorotan

Berbagi

Salin