Luki 22

Yutasiʼmo kutulu yaʼmo neʼniya gemae

(Mt 26:1-5,14-16; Mk 14:1-2,10-11; Yo 11:45-53)

1Lusi neʼyaʼmo yagita nehaya hopa afinaʼmo aeno apafu noleya peleti mayamo neʼnaya afinaʼmo agiʼamo Pasova afinaʼmo afole aisiyafeʼmo huʼniye. 2#Lu 20:19Mono huʼa neʼapataya vayaʼaiteʼmo yagaiʼa neʼapataya vayaʼe keʼaepa gemo avoʼmo kaeʼa aliʼa apaya neʼmalaya vayaʼmogiʼeʼmo Yesuʼmo amagisaya kafeʼmo kahauya huʼnayaʼmonanafa vayaʼaifeʼmo koli huteʼa oʼatafauʼnae. 3#Yo 13:2,27Ani afinaʼmo Sataniʼa Isakaliyoti kotega vekamo Yutasiʼmo tuolofuʼa vayapati vekamo aipafiʼmo uno haino maiʼniye. 4Yutasiʼa apatalenuno mono huʼa neʼapataya vayaʼaifenagi ati vayaʼaiteʼmo yagaiʼa neʼapataya vayaʼaifenagi huno hapa painoʼaeʼmo, haiya agufa kavaʼmo huʼna avaleʼna lapamisufi, huno hapa paiʼnigeʼapaeʼmo ge huge afige huʼa maiʼnae. 5Yutasiʼa huʼniya gemo afiteʼapaeʼmo apamogaga aiteʼapaeʼmo, mago monimo kamigune, huʼa ha paiʼnagenoʼaeʼmo, 6he, kanalene, huno hutenoʼaeʼmo apataleno uno Yesuʼa muki vayaʼeʼmo magokepi lokaeno oʼmaino agaiʼageʼmo maisiya afinaʼmo avaleno apamisiyafeʼmo yagaino maiʼniye.

Geʼamo neʼafiʼa vekalaʼmo uʼana Pasova neʼyaʼmo yagita huʼnaʼa gemae

(Mt 26:17-25; Mk 14:12-21; Yo 13:21-30)

7 # Hat 12:1-27 Inagi hopa afinaʼmo aeno apafu noleya peleti mayamo neʼnaya afinaʼmo Pasova neʼyaʼmo nesayafeʼmo aikeli sipisipimo neʼamagiya afinaʼmo afole aiʼniye. 8Yesuʼa Pitaʼe Yoniʼefeʼmo hunoʼaeʼmo, utana Pasova neʼyaʼmo nesunafeʼmo yagita hiʼao, huno hana paiʼnigeʼanaeʼmo, 9haiyaʼaleʼmo utaʼa yagita hisuʼae, huʼana ge huʼana afi geʼnaʼagenoʼaeʼmo, 10afiʼao, huno, alopa taonifiʼmo uta haitana agesaʼana mago vekamoʼmo ani keʼmo alinino neʼvisigetanaeʼmo fotu hugaʼae. Akame hutana utanaeʼmo uno haisiya nopiʼmo uta haiʼao. 11Noʼmo afoʼamofeʼmo ina gemo hutana ge hutana afi geʼao, tisa vekamoʼmo kaha painoʼaeʼmo, nagaeʼe geʼnimo neʼafiya vayaʼeʼmo Pasova neʼyaʼmo nesunafeʼmo haiyaʼafiʼmo aeka hanagi maleʼnane, hutana afi geʼao. 12Agaemo anaga aeno hanagi maleʼniya yapiʼmo hiʼyalamuʼe siyaʼeʼmo haneʼniyanageno alino lanaveligiye. Ani nopiʼmo muki yaʼmo yagita hiʼao, huno hana paiʼniye. 13#Lu 19:32Hana paiteno alino anateʼnigeʼana uʼana agaʼana hana paiʼniya agufa kavakeʼmo huno haneʼnigeʼana ageteʼana yagita huʼnaʼae.

Yesuʼa kaveʼmo alino apamiʼniya kavafeʼmo ava gemo huʼniya gemae

(Mt 26:26-30; Mk 14:22-26; 1 Ko 11:23-25)

14Neʼyaʼmo nesaya afinaʼmo ago afole aiʼnigeʼapaeʼmo Yesuʼe geʼamo neʼafiya vayaʼeʼmo uʼa haiʼa hiʼyalamuteʼmo siyateʼmo fai maiʼnae. 15Agaemo hapa painoʼaeʼmo, nagafu kisiya kavaʼmo afole oʼaiʼninageʼna hogoteʼna lapakaeʼeʼmo magokepi neʼyaʼmo nesunafeʼmo lusi kava huno nahauʼniye. 16#Lu 13:29Lapa nepauve, huno, halate Pasova neʼyaʼmo oʼneʼna maime maime neʼvisugeno muki kavaʼmo afole aitesigeʼna negauve. 17Kapumo alino nunumuʼmo huno hao ke hetenoʼaeʼmo, alita fako huta neyo. 18Mani afinatetiʼmo halate nofi alagafati aniʼmo oʼneʼna maime maime neʼvisugeno Gotiʼa yagaino apatesiya kavaʼmo afole aisigeʼnaeʼmo negauve, huno hapa paiʼniye. 19#Lu 24:30Peleti mayamo alino nunumuʼmo huno hao ke heteno alino akaya heno apamitenoʼaeʼmo, manimona nagufaʼniye. Lapakaetefeʼmo Gotina amiguve. Mani afinatetiʼmo nagaefeʼmo lapakesamo afita ho hisayafeʼmo ani kavaʼmo huge huge huta maiyo. 20Neʼyaʼmo neteʼapaeʼmo ani kavaʼmo huno kapumo aliʼnenoʼaeʼmo, mani kapufi aniʼmo Gotiʼe lapakaeʼeʼmo magokepi lokaeta maisayafeʼmo saufa kotalakemo hu maleteʼna lapa maesiya kolaʼnimo aiʼna lakiguve. 21#Sam 41:9; Yo 13:21-22Afiyo, huno, nagae kutulu yaʼmo neʼniya vekamo ayaʼmo hiʼyalamuteʼmo haneʼniye. 22Vemo Mafaʼnemoʼmo Gotiʼa lekana paino ateʼniya kateʼmo afaʼa neʼviyaʼmonanafa vaehae agaemo kutulu yaʼmo neʼniya vekamoʼmo lusi kava huno kage kage huno yulagefaʼmo aigiye, huno hapa paiʼnigeʼapaeʼmo 23apakaiʼapimo ge huge afige huʼapaeʼmo, lagaepatiʼmo ina laʼmo ani kavaʼmo hugiye, huʼa huʼnae.

Ina laʼmo lagaepatiʼmo hogote vekamo maiʼniye, huʼa huteʼa ge vaiʼnaya gemae

24 # Lu 9:46 Geʼamo neʼafiya vayaʼmogi apakaiʼapieʼmo huʼapaeʼmo, lagaepatiʼmo ina laʼmo hogote vekamo maiʼniye, huʼa huteʼa ge vaiʼnae. 25#Mt 20:25-27; Mk 10:42-45Yesuʼa hunoʼaeʼmo, ma mopafi vayaʼmogi alaʼapimo maiʼneʼa yagaiʼa neʼapataya vayaʼmogi aliʼa afepi apatesayafeʼmo yagaiʼa neʼapatae. Muki vayaʼamogi huʼapaeʼmo, alagepa huʼa laha maeteʼa yagaiʼa nelataya vayane, huʼa hisayafekeʼmo hapauʼniye. 26#Mt 23:11; Mk 9:35Ani agufa kavaʼmo nehayaʼmonanafa lapakaemo ani agufa kavaʼmo osiyo. Lapakaepatiʼmo hogote vekamoʼmo henaga vekagana huno maino. Lapakaeteʼmo yagaino lapatesiya vekamo aliʼyaʼmo neʼaliya vekagana huno maino. Hiʼyalamuteʼmo siyateʼmo fai maiʼniya vekamo hogote vekamo maiʼnifi neʼyaʼmo alino neʼapamiya vekamo hogote vekamo maiʼniye. 27#Yo 13:12-15Hiʼyalamuteʼmo maiʼneno neʼyaʼmo neʼniya vekamo hogote vekamo maiʼniyaʼmonanafa nagaemo neʼyaʼmo alino nelapamiya vekagana huʼna maiʼnove. 28Namalageka nehagetapaeʼmo oʼnataleta nagaeʼeʼmo magokepiʼmo lokaeta maime maime eʼnae. 29#Lu 12:32Afoʼnimoʼmo ala vekaʼapimo yagaika apatesana vekae, huno lekana paino nateʼniya kavaʼmo huʼna yagaita apatesaya vayane, huʼna lekana paiʼna lapateʼnove. 30#Mt 19:28Yagaiʼna apatesuva koteʼmo hiʼyalamuʼnileʼmo siyateʼmo fai maiʼnetapa neʼyaʼmo nege aniʼmo nege huta maiʼnetapaeʼmo Isaleli vayaʼmo tuolofuʼa nofi vayaʼaiteʼmo yagaiʼa neʼapataya vayaʼai siyateʼmo fai maiʼnetapa yagaita apatesayafeʼmo lekana paiʼna lapateʼnove, huno hapa paiteno 31#2 Ko 2:11Pitafeʼmo hunoʼaeʼmo, Saimoniyo, Saimoniyo, huʼna, Sataniʼa Gotifeʼmo hunoʼaeʼmo, apakaemo apavaleka namigeʼnao haiya agufa kavaʼmo hisafigeʼna apamalageka huʼna apakegauve, huno ha paiʼniye. 32#Yo 17:11,15,20; Sam 51:13Ha paiʼniyaʼmonanafa kagesamo afika fatago nehana kavakamo hano osisiyafeʼmo nunumuʼmo huʼna kateʼnovaʼmofeʼmo kaipamo alika afe letekaeʼmo konagakamogimo alika lokiya vaika apato, huno ha paiʼnigenoʼaeʼmo, 33#Lu 22:54Ala kava nene, huno, ago alo huʼnovanagetaʼa kagaeʼeʼmo magokepiʼmo kalavusi hutetaʼa faliguʼae, huno ha paiʼnigenoʼaeʼmo, 34Pitao, huno, nagaemo kaha nepauve, kokolemoʼmo age oʼaiʼnisigeka ani afinaʼmo loleʼe magoʼe afinaʼmo nagaefeʼmo hukaeʼmo, oʼageʼnova vekae, huka hugane, huno ha paiʼniye.

Yesuʼa hosu afinaʼmo afole aigiyanagi alo hiyo, huno hapa paiʼniya gemae

35 # Lu 9:3; 10:4 Yesuʼa hunoʼaeʼmo, monitapigi kutapigi sutapigi hutapa alinita oʼviyo, huʼna lapa paiteʼna aliʼna lapateʼnogeta uʼnaya afinaʼmo mago yatapimo ohaneʼnifiye, huno ge huno apafi geʼnigeʼapaeʼmo, haʼao, muki yatimo afaʼa haneʼniye, huʼa ha paiʼnagenoʼaeʼmo, 36#Lu 22:49haneʼniyaʼmonanafa hemenimo monitapiʼe kutapiʼeʼmo haneʼnisiya vayaʼmogitapamo alo hiyo. Naipeʼamo oʼaliʼnisiya vekamoʼmo yasi siyotiʼamo alininuno maleʼnisigeʼa miya faisageno moni aliteno naipeʼamo miya faino. 37#Aiy 53:12; Lu 22:52Lapa nepauve, huno, Goti mukufiʼmo avoʼmo kae maleʼniya gemoʼmo hunoʼaeʼmo, keʼaepa gemo amagiʼa neʼatalaya vayapiʼmo maiʼniya vekae, huʼa apakesamo afiʼnae, huno nava gemo huno avoʼmo kae maleʼniya gemo afole aigiye. Muki kavaʼaeʼmo nava gemo huʼa avoʼmo kae maleʼnaya gemo afole neʼaiye, huno hapa paiʼnigeʼapaeʼmo, 38Ala kava nene, huʼa, ago, lole naipelaʼmo haneʼniye, huʼa ha paiʼnagenoʼaeʼmo, alagine, huno hapa paiʼniye.

Yesuʼa Alifiʼaepa avefiʼmo uno haino nunumuʼmo huʼniya gemae

(Mt 26:36-46; Mk 14:32-42)

39 # Lu 21:37; Yo 18:1 Taonifatiʼmo ataleno uno Alifiʼaepa avefiʼmo nunumuʼmo nehiya yategamo neʼvigeʼapaeʼmo geʼamo neʼafiya vayaʼmo akame huʼa uʼnae. 40Uʼa avaʼyi huteʼapaeʼmo, lapamalageka hisiya kavapiʼmo haita ofalesayafeʼmo nunumuʼmo hiyo, huno hapa paiteno 41apatalenuno yafa kayoʼmo yaga aunageno uno nehaneya agufa afafaleʼmo uno aleʼya faiʼneno nunumuʼmo hunoʼaeʼmo, 42#Mt 6:10Afo, huno, kapufiʼmo atu ofa anikana huno haneʼnigi oʼnesuvafeʼmo kahauʼnisiyana alika atalo, huʼna huvaʼmonanafa nagaemo nahauʼniya kavaʼmo akame osuka kagaikamo kahauʼnisiya kavaʼmo akame huvo, huno nunumuʼmo huʼniye, 43Mago enisole vekamo kokuʼnapatiʼmo emineno agaemo lokiya vaino ateʼniye. 44Lusi kava huno kana hauʼnigeno aipafiʼmo kaveta hugekana huʼnigeno maiʼnenoʼaeʼmo magoʼe huno lokiya vaino nunumuʼmo nehigenoʼaeʼmo amuko hauteno haisemoʼmo kolakana huno lusi kava huno mopafiʼmo lape tape huno asagauno aiʼniye. 45He tino eno geʼamo neʼafiya vayaʼmo apakeyana apaipamoʼmo kana huʼniyaʼmofeʼmo apau kaleʼa maiʼnageno apakeʼniye. 46Agaemo hunoʼaeʼmo, na kava higetapaeʼmo lapau kaleta maiʼnae. Lapamalageka hisiya kavapiʼmo haita ofalesayafeʼmo he tita nunumuʼmo hiyo, huno hapa paiʼniye.

Yesuʼmo atafauʼa kalavusi huʼa ateʼnaya gemae

(Mt 26:47-56; Mk 14:43-50; Yo 18:3-11)

47Ani gemo huno hapa nepaigeʼapaeʼmo asole vayaʼmo Yutasiʼa tuolofuʼa vayapati vekamo akame huʼa eʼnae. Agaemo Yesuʼmo haeno nesiyafeʼmo haopaleʼmo eʼnigenoʼaeʼmo 48Yesuʼa hunoʼaeʼmo, Yutasiyo, huno, Vemo Mafaʼnemo kame vayaʼamogi apayapiʼmo avaleka apamisanafeʼmo haeka neʼnapiye, huno ha paiʼnigeʼapaeʼmo 49#Lu 22:36agaeʼeʼmo lokaeʼa maiʼnaya vayaʼmogi agaetegamo na agufa kavaʼmo afole aisifi huʼa ageʼa maiʼneʼapaeʼmo, Ala kava nene, huʼa, naipetiletiʼmo apaisupiye, huʼa ge huʼa afi geʼapaeʼmo 50apakaepatiʼmo mono huʼa neʼapataya vayaʼaiteʼmo yagaino neʼapateya vekamo aliʼyaʼamo neʼaliya vekamo agesamo heno lafe hutalegeno asagauno aiʼniye. 51Yesuʼa hunoʼaeʼmo, ina kavaʼmo osuta afaʼa ataleyo, huno hapa paiteno agesaleʼmo ame aliteno halate alino maleno kamaeno ateʼniye. 52#Lu 22:37; Yo 7:30; 8:20; Kl 1:13Yesuʼa mono huʼa neʼapataya vayaʼaiteʼmo yagaiʼa neʼapataya vayaʼaifenagi mono noteʼmo neʼyagaiya vayaʼaiteʼmo yagaiʼa neʼapataya vayaʼaifenagi vayatama vayaʼaifenagi huno hapa painoʼaeʼmo, vayaʼmo apamagiteno kumayaʼmo neʼaliya vekamo kalavusi huʼa atesayafeʼmo naipe alige kayoʼmo alige huliʼa neʼaya agufa kavaʼmo hutapa kalavusi huta natesayafeʼmo neʼafiye. 53Nagaemo lapakaeʼeʼmo muki afinaʼae afinaʼaeʼmo alopa mono nopiʼmo maiʼnogetapaeʼmo oʼnatafauʼnayaʼmonanafa hemenimo lapakaemo ani kavaʼmo hisayafeʼmo hani nehiya kavateʼmo neʼyagaiya vekamo himamuʼaletiʼmo hisiya afinaʼmo ago afole aiʼnigetapaeʼmo nehae, huno hapa paiʼniye.

Pitaʼa Yesufeʼmo oʼageʼnova vekae, huno huʼniya gemae

(Mt 26:57-58,69-75; Mk 14:53-54,66-72; Yo 18:12-18,25-27)

54 # Sam 31:11; Lu 22:33 Apakaemo kalavusi huʼa ateteʼa avaleli uʼa mono huʼa neʼapataya vayaʼaiteʼmo yagaino neʼapateya vekamo nopiʼmo uʼa haiʼnageno Pitaʼa apasa hulino uʼniye. 55Kumateʼmo ata kaeteʼa loto huʼa maiʼnagenoʼaeʼmo Pitaʼa eno apakaeʼeʼmo magokepi ataleʼmo loto huʼa maiʼnae. 56#Ap 4:13Mago a kanomoʼmo aliya neʼaliya a kanomoʼa eno ageyana atamoʼmo aeno ha leya yateʼmo Pitaʼa maiʼnigeno aulu haeno agetenoʼaeʼmo, ani vekamo agaeʼeʼmo magokepi lokaeno neʼmaiya vekae, huno nehigenoʼaeʼmo, 57Ane, huno, nagaemo oʼageʼnova vekae, huno ha paiʼniye. 58Aise afinaʼmo utegeno alu vekamoʼmo agetenoʼaeʼmo, kagaemo apakaepati vekamo maiʼnane, huno huʼnigenoʼaeʼmo, ma vekae, huno, nagaemo apakaepati vekamo oʼmaiʼnove, huno ha paiʼniye. 59Magoʼe huno aise afinaʼmo utegeno mago alu vekamoʼmo lokiya gefatiʼmo hunoʼaeʼmo, ani vekamo Galeliya kotega vekamo maiʼniyaʼmofeʼmo agaeʼeʼmo magokepi lokaeno neʼmaiya vekae, huno huge huge huno maiʼnigenoʼaeʼmo 60Pitaʼa hunoʼaeʼmo, ma vekae, huno, oʼafuva agufa gemo nehanagi na agufa yane huka nehane, huno nehigenoʼaeʼmo kokolemoʼmo age aiʼnigenoʼaeʼmo 61#Lu 22:34Ala kava neʼmoʼa aino afe leno Pitana ageʼniye. Ala kava neʼmoʼa hogoteno Pitafeʼmo hunoʼaeʼmo, kokolemoʼmo age oʼaiʼnisigeka loleʼe magoʼe afinaʼmo nagaefeʼmo hukaeʼmo, oʼageʼnova vekae, huka hugane, huno ha paiʼniya geeʼmo agesamo afino ho hutenoʼaeʼmo 62malaga uno lamino aipafatiʼmo atu haegekana huʼnigeno aviʼyaʼmo huʼniye.

Yesufeʼmo kigi huʼa ateteʼa amagiʼnaya gemae

(Mt 26:67-68; Mk 14:65)

63Yesuʼa atafauʼnaya vayaʼmogimo kigi huʼa atege amagige huteʼapaeʼmo 64lavolavoletiʼmo aulagafiʼmo aiʼa ati kaeʼa ateʼneʼa eʼa amagite amagite huteʼapaeʼmo, ina laʼmo kamagiʼnifigi kaune gemo huka laha paiyo, huʼa ge huʼa afi geʼnae. 65Magoʼe magoʼe gemo huteʼa huʼa faipa huʼa ateʼnae.

Kanisole vayaʼmogimo agoti huʼa ateʼnaya gemae

(Mt 26:59-66; Mk 14:55-64; Yo 18:19-24)

66Gotilamiyapiʼmo kanisole vayanagi vayatama vayanagi mono huʼa neʼapataya vayaʼaiteʼmo yagaiʼa neʼapataya vayanagi keʼaepa gemo avoʼmo kaeʼa aliʼa apaya neʼmalaya vayanagi huʼa eʼa aliʼa anupa huteʼa Yesuʼmo kanisole vayaʼaitegamo avaleliʼeʼapaeʼmo, 67#Yo 3:12; 8:45; 10:24Kalaisi vekamo maiʼnisanana laha paiyo, huʼa ha paiʼnagenoʼaeʼmo, lapa paisuvana lapakesamo afita fatago osugae. 68Loka huʼna lapafi gesuvana lapakaemo geʼnileʼmo aeta atagaina huta naha paitetapaeʼmo afaʼa oʼnatalegae. 69#Ap 7:56Ani afinaʼmo utesigeno Vemo mafaʼnemoʼmo uno haino himamuʼaʼe vekamo Gotiʼa lamaga haopaleʼmo fai maigiye, huno hapa paiʼnigeʼapaeʼmo 70#Lu 4:3,9inagi kagaemo hukaeʼmo, Goti Mafaʼneʼamo maiʼnove, huka nehapiye, huʼa ge huʼa afi geʼnagenoʼaeʼmo, lapakaitapimo ani gemo alagi nehae, huno hapa paiʼnigeʼapaeʼmo, 71magoʼe huʼa faigoko gemo hisageta afisuna gemo alagi ohaneʼniye. Agaiʼamo ani gemo avayafatiʼmo ago higeta alagi afune, huʼa huʼnae.

Pilihan Saat Ini:

Luki 22: kyg2013

Sorotan

Berbagi

Salin