Ayat-ayat Alkitab Ternama dari ลามูลา 9

Berbagi

ตูฮัด เดะ อาตัซ_ มือเลา จะ_ “นี เลอ_ ฌาดี ปือนานา นะ ปือมือเลา บือฌาญี บือตือตู_ นู กู บือฌาญี ฌางัน กาเญา_ ฌางัน โกะ บือนาตัก นู ฮีโดะ ฌางัน กาเญา ซือมูฮา_ นู ตูโรด มือนูโรด มาแรฮ ซือมูฮา ดัฮ เตอ. ฌาดี จะ_ กู นะ ตืองะ ลายัยํ นะ กู_ เดะ กือมูวัง. ลายัยํ อีตู เลอ_ นะ ฌาดี ปือนานา_ นะ ปือมือเลา บือฌาญี บือตือตู_ บือกะ กู ฌางัน ดือนียา.

ตานา อาดา ลายัยํ อีตู เดะ กือมูวัง_ กู นะ ลีฮัจ_ กู นะ บรีงัจ กะ ปือมือเลา บือฌาญี บือตือตู นู อาดา ซือลาลู_ ซามา ตืองัฮ ตูฮัด ฌางัน บือนา นู ฮีโดะ เดะ ดือนียา ซือมูฮา” ตูฮัด ญา จะ.

ดัฮ ซือมียา ซืออูรัก บูนอฮ กาวัด_ บูวัจ บรี ดารัฮ นะ ญา ตรือเบะ_ โกะ ซือมียา อาซิก_ กือนา บูวัจ บรี ดารัฮ นะ ซือมียา อีตู_ ตรือเบะ ฌูฆา. กรานา ตูฮัด เตอ_ ญา บือฌาดี อูมัจ ซือมียา ดัฮ_ บือกะ รูปา นะ ญา.

กะฆีเตอ_ ตูฮัด เดะ อาตัซ เตอ_ บรี ซือลามัจ กะ โนอา_ ฌางัน โกะ นานะ กีลากี นะ ญา_ มือเลา ฌางัน กูญา จะ_ “กาเญา เลอ_ กือนา บรี อาดา นานะ ลือบัจ_ บรี บือตามัฮ บาญะ_ ฌู ปือนอฮ เดะ ดือนียา.

บือนา นู ฮีโดะ บือฌาลัด ปี มาแรฮ ซือมูฮา_ นะ ฌาดี บารัก มากัด นะ กาเญา. บือกะ กู บรี กาเญา มากัด ตาโระ นู ฮีเฌา เตอ_ วะตู อีนี_ กู นะ บรี กาเญา มากัด_ ราตา มาจับ.

โกะ บือนาตัก เดะ ตานัฮ ซือมูฮา_ โกะ บูโรก เดะ ลาแงะ ซือมูฮา เตอ_ โกะ บือนาตัก มือรากะ เดะ ตานัฮ ซือมูฮา ฌูฆา_ โกะ อีกัด เดะ ลาโวจ ซือมูฮา ซามา_ ญา นะ ตาโกจ เดะ กาเญา. กู ซรัฮ โกะ บือนาตัก อีนี ซือมูฮา_ ตาโรฮ เดะ ตางัน นะ ลูมอฮ กาเญา.

กะฆีเตอ_ กาเญา กือนา บูวัจ บรี อาดา นานะ บาญะ เลอ_ บรี โกะ บือแนฮ นะ กาเญา_ นะ ปี ดูโดะ ราตา เดะ ดือนียา” ตูฮัด ญา จะ.