Ayat-ayat Alkitab Ternama dari Matyu 6

Berbagi

“A̱wot nyin, nyi ya ntsa kup á̱ghyi di̱ chat Tyok A̱gwaza hu ma̱ng tsotswat nggu hu. Nggu meang, a̱ na mbeang nyin a̱mgba̱m á̱kum nkyang ka nang nyi chat a̱ni.

“Mat a̱nia, nyi yok nyia̱ a̱fi̱fa da̱nian a̱tson bah. Mat a̱tson ka wu bai ma̱ng a̱fi̱fa nka. Swuo a̱bung a̱fwun hu maai a̱fwun ka.”

“Huhwa mbyia̱ n shei ma̱ng a̱nyin. Nyi yok nyia̱ a̱fi̱fa kuzang a̱tuk tazwa swuan nyin ji bah. A̱wot nyi bu yok nyia̱ a̱fi̱fa ke nyi byia̱ kyayak nang nyi na ya ma̱ng kyang nyi na swuo a̱ni bah, ku a̱yaatoot nang nyi na kup, ba̱ maai nyin a̱ni bah. Nyi lyen nang swuan nyin ji ndan kyayak, a̱wot nvam nyin na si̱ lan a̱yaatoot baa?

Da̱ a̱kwonu a̱kya, nwan, ka̱ a na naai A̱gwaza, a nwuo ma̱ swang nyuo ma̱nyin ang. A nyim nyinyiit hu, a sii naai A̱gwaza a̱ yet a̱tyia̱ ang wu a̱ni a̱ja. A̱wot A̱gwaza a̱ yet a̱tyia̱ ang wu, a̱ nwuan kuzang kyang ku shya̱ di̱ niat a̱ni, a̱ na nwuak ang zang.

A̱ni wa nang nyi na nnaai A̱gwaza wu nchi̱ri̱ng; ‘A̱tyia̱ nzi̱t wu a̱ shya̱ tswazwa ka a̱ni, á̱ ja̱u a̱lyoot ang ka. Tyok ang hu ku bai. Á̱ nyia̱ kyang hu a chat a̱ni mi̱ swanta hu, ma̱nang á̱ nyia̱ nhu tswazwa ka a̱ni.

Nang zi̱t kyayak kwa mam.

Chi a̱ka̱tuk nyia̱ wu nang zi̱ nyia̱ ang ndyo a̱ni, ma̱nang zi̱ nchi a̱bun nang á̱ghyang á̱niet bwoi nzi̱t ndyo a̱ni.

Yok ghwon zi̱t zi̱ kwa di̱n jen mak bah. Da̱ a̱kwonu a̱kya, ti̱n zi̱t ma̱ a̱ka̱tuk wu wa. [[Mat tyok, chet, ma̱ng kyenkyai shi, yet si̱ nwan hwa, si̱ nat sang sangba̱p. Samba̱rka!]]’

“Ka̱ nyi chi a̱ka̱tuk nyia̱ nang á̱ghyang á̱niet nyia̱ nyin dyo a̱ni, ma a̱nia wa A̱tyia̱ nyin wu a̱ shya̱ tswazwa ka a̱ni, na nchi a̱ka̱tuk nyia̱ nyin wu.

Nyi nwuan a̱ka̱man na, nyi lii. Na̱ ni̱ chyui yak bah. Da̱ na, na̱ ni̱ chak yak bah. Ku na̱ tung yak á̱ tyei ma̱ a̱yaagban bah. A̱mgba̱m ma̱ng a̱nia, A̱tyia̱ nyin wu a̱ shya̱ tswazwa ka a̱ni, nggu wa ni̱ nwuat na nkyayak na. A̱wot nyin, nyi swak a̱ka̱man na ma̱ng yet ma̱ za̱nzan baa?

“Nyi yok tung á̱pyia̱ nyin zwá mi̱ swanta huni, a̱vwuo nang zwú na ngya nji, ku ji̱ kwa̱i ji̱ byian, a̱wot á̱tang ba̱ nwuo ba̱ nyiin nji a̱ni bah. Da̱ a̱kwonu a̱kya, nyi tung á̱pyia̱ nyin zwá ji Ma A̱gwaza tswazwa kya, a̱vwuo da̱nang zwú na ngya zwá ji, ku ji̱ kwa̱i ji̱ byian, a̱wot á̱tang ba̱ nwuo ba̱ nyiin ji a̱ni bah. Mat a̱vwuo ka nang nyi ntung zwá nyin ji a̱ni, a̱ja wa nang a̱di̱dam nfwuo nyin wu nshya̱.

“Á̱ mbyia̱ a̱tyu a̱ na nyia̱ khwo a̱yaatyoli a̱feang a̱ni bah. Ku a̱ lak a̱tyo nyiung, a̱wot gu chat a̱tyo nyiung wu. Ma a̱nia wa, a̱ na nwuak a̱tyo nyiung wu shi, a̱wot a̱ jhyuai a̱tyo nyiung wu. Ma a̱nia wa, nyi si̱ mi̱n nyia̱ A̱gwaza khwo ntsa bu nnyia̱ khwo kurum bah.

Ka̱ A̱gwaza tyei nkywat a̱ka̱kwon mi̱ nkyai a̱yit shisham, na̱ nshya̱ a̱fwun, a̱wot a̱tson á̱ wu tyia̱ na mi̱ ndong a̱ni, ku myim nyi lyen nang gu na nnwuak nyin a̱yaatoot za̱m. Yihwa mbyia̱ nang nyi nnwuak fwuo ma̱ a̱da̱dei da̱ A̱gwaza?

A̱wot ka̱ nyi na beang á̱kunak ma̱ng kurum, nyi yok shim á̱niet ba̱ lyen kyang nang nyi nyia̱ a̱ni bah. Nyi nang za̱nang nyin ji nyonywang. A̱wot A̱tyia̱ nyin wu, a̱ nwuan kuzang kyang nang nyi nyia̱ di̱ niat a̱ni, a̱ na tan nyin zang.

“Nyi ta̱bam! Nyi yok nyia̱ a̱tan nta̱m kpa̱sai a̱zaghyi á̱niet, mat ba̱ ka chyin nyin bah. Kalak nyi na lyin zang da̱ a̱vwuo A̱tyia̱ nyin wu a̱ shya̱ tswazwa ka a̱ni.

“A̱wot jen nyi nswan a̱fa a̱khwot di̱ naai A̱gwaza a̱ni, nyi yok vwun á̱ghyi nang á̱bubuk á̱niet nnyia̱ a̱ni bah. Mat ba̱ ni̱ byian á̱ghyi, ba̱ tak kpa̱sai nang ba̱ naai A̱gwaza a̱fa a̱khwot, da̱nian á̱niet ba̱ ka li, ba̱ chyin baa. N tak nyin a̱tsak a̱lyiat, zang ji ba̱ na san a̱ni, jija a̱ja. A̱wot nyin, jen nyi na nnaai A̱gwaza a̱fa a̱khwot a̱ni, nyi kwi á̱ghyi nyin ba, nyi kwon hya̱u, a̱wot nyi zap pyia̱ nyin hu. Ka̱ nyi nyia̱ a̱nia, a̱yin si̱ mi̱n dyen nang nyi nswan a̱fa a̱khwot di̱ naai A̱gwaza bah, si̱ ma̱ A̱tyia̱ nyin wu wa, a̱ lyen kuzang kyang nang nyi nyia̱ di̱ niat a̱ni. A̱wot A̱tyia̱ nyin wu a̱ nwuan kuzang kyang di̱ niat a̱ni, nggu wa na nwuak nyin zang ji.