Ayat-ayat Alkitab Ternama dari Génesis 17

Berbagi

Abram ime wɨreko noventa y nueve año yawe, Tumpa uyekuaa ye chupe jare jei chupe: “Che ko jae Tumpa chembaepuere tuichaete wae,” jei chupe. “Iñemɨïru kawi che ndiwe jare iyapo jupi waeño.

“Jare ndarau ye ma nderee Abram. Añawe wiwe nderee ko Abraham, echa’ä che nduyapota aï jeta ambɨe ɨwɨ pewa reta tamɨrä.

“Jare jaeño mái pewa chemanduata aï kua yemɨngeta ikawi wae re ayapo nde ndiwe jare niñemoñaa reta ndiwe wae. Jare che aikota jaeño mái pewa ndeTumparä jare niñemoñaa reta iTumparä wi,” jei.

Jayawe Abram uñeñono ɨwɨ re uipɨu rewe. Jare Tumpa jei chupe: “Che ayapo aï pëti yemɨngeta ikawi wae nde ndiwe. Jetaeteta ko niñemoñaa reta jare jae reta uyeyapota jeta ambɨe ɨwɨ pewa retarä,” jei chupe.

Jayawe Tumpa jei chupe: “Kua yemɨngeta ayapo nde ndiwe wae, jae’ä ko Ismael pewarä. Echa’ä Sara etei imembɨta nemaerä jare nembɨjeeta Isaac. Jae jare iñemoñaa reta pewarä ko kua yemɨngeta jaeño mái pewa ayapo nde ndiwe wae,” jei chupe.

“Kua ɨwɨ Canaán nde neï pɨpe wae pëti ambɨe ɨwɨ pewa rami, ameeta aï ndewe nemaerä jare niñemoñaa reta imaerä wi jaeño mái pewa. Jare che aikota jae reta iTumparä,” jei Tumpa Abraham pe.

Jayawe Abraham uñeñono ɨwɨ re uipɨu rewe. Erëi ipɨa pe uyemɨngeta kua Tumpa jei wae rewa yawe, upuka: “¿Këraita ra chepuere amɨmembɨ chembireko ime ma anoi cien año rupi wae? Jare ¿ipuereta ra Sara imembɨ ime ma onoi noventa año rupi wae? Yawaiete ko,” jei uyemɨngeta ipɨa pe.

Jare Tumpa jei wi chupe: “Nembireko ndarau ye ma jee Sarai. Añawe wiwe jeeta Sara,” jei.

“Opaete pe reta kuimbae piko wae reta imeta ko piyembɨcircuncidaka kɨse pe. Jare jokua ikota pëti yembɨjaanga kua yemɨngeta ayapo aï pe reta ndiwe wae re,” jei.

“Erëitu ayapota aï kua yemɨngeta ikawi wae Isaac jare iñemoñaa reta ndiweño. Ïruwe año pe kua nunga ara rupi, oata oï Sara imembɨ Isaac,” jei Tumpa Abraham pe.

“Añawe wiwe pembɨcircuncidakata ko opaete kunumi raɨ pepɨte pe oa reta wae juri ara ma onoi yawe. Jukuärái wi pembɨcircuncidakata ko opaete pepione kuimbae reta pepɨte pe ñonoï wae, jare jae reta taɨ pepɨte pe oa reta wae, jare ïru kunumi raɨ reta pewakue ambɨe ɨwɨ wi wae,” jei. “Pëti pëti wae tuyembɨcircuncidaka. Kua ikota yemɨngeta jaangarä perete pe oï wae uikuaaka waerä kua yemɨngeta ayapo aï pe reta ndiwe wae jaeño mái pewa ko,” jei.