Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወእምዝ በሳኒታ አንሶሰወ እግዚእ ኢየሱስ ውስተ አህጉር ወአዕጸዳት ወሰበከ ሎሙ ወመሀሮሙ በእንተ መንግሥተ እግዚአብሔር ወምስሌሁ ዐሠርቱ ወክልኤቱ አርዳኢሁ። ወአንስትኒ እለ አሕየዎን እምአጋንንት እኩያን ወእምደዌሆን ወእማንቱ ማርያም እንተ ይብልዋ መግደላዊት እንተ ሰብዐቱ አጋንንት ወፅኡ እምኔሃ። ወዮሐና ብእሲተ ኩዛ መጋቢሁ ለሄሮድስ ወሶስና ወካልኣትሂ ብዙኃት እለ ተልእካሁ በንዋዮን።

ወእንዘ ያጸምዕዎ ኵሉ ሕዝብ ወእለሂ መጽኡ ኀቤሁ እምኵሉ አህጉር ይቤሎሙ ምሳሌ እንተ ከመዝ። ወፈረ ዘይዘርዕ ከመ ይዝራዕ ዘርዖ ወእንዘ ይዘርዕ ቦ ዘወድቀ ውስተ ፍኖት ወመጽኡ ሰብእ ወኬድዎ ወበልዕዎ አዕዋፈ ሰማይ። ወቦ ዘወድቀ ውስተ ኰኵሕ ወበቍሎ የብሰ በጊዜሃ እስመ አልቦ ሥርው። ወቦ ዘወድቀ ማእከለ ሦክ ወበቊሎ ጠበቆ ሦክ። ወቦ ዘወድቀ ውስተ ምድር ሠናይት ወበቈለሂ ወፈረየሂ ምእተ ምክዕቢተ ወዘንተ ብሂሎ ይቤሎሙ ዘቦ ዕዝን ሰሚዐ ለይስማዕ። ወተስእልዎ አርዳኢሁ ወይቤልዎ ምንትኑ ይእቲ ዛቲ ምሳሌ። ወይቤሎሙ ለክሙ ተውህበ ታእምሩ ምሥጢራ ለመንግሥተ እግዚአብሔር ወለእልክቱሰ በምሳሌ ከመ ርእዮሙኒ ኢይርአዩ ወሰሚዖሙኒ ኢይስምዑ ወኢይለብዉ። ወከመዝ ይእቲ ምሳሌሃ ዘርዕሰ ቃለ እግዚአብሔር ውእቱ። ወዘሰ ውስተ ፍኖት እሉ እሙንቱ እለ ይሰምዑ ቃለ ወይመጽእ ሰይጣን ወይነሥኦ ለቃል እምልቦሙ ከመ ኢይእመኑ ወኢይሕየዉ። ወዘሰ ውስተ ኰኵሕ እለ ሰሚዖሙ ይትዌከፍዎ ለነገር በፍሥሓ ወባሕቱ ሥርው አልቦሙ ለሶቤሃ ዳእሙ የአምኑ ወእምከመ ተመንደቡ የዐልዉ። ወዘሰ ውስተ ሦክ ወድቀ እሉ እሙንቱ እለ ይሰምዑ ቃለ ወኅሊና ብዕል ወትካዘ መንበርት ወሐውዘ ተድላ ወፈጊዕ ያጠውቆሙ ወኢይገብሩ። ወዘሰ ውስተ ምድር ሠናይት እሉ እሙንቱ እለ ይሰምዑ ቃለ በሠናይ ልብ ወየዐቅብዎ ወበጥቡዕ ልብ ይትዔገሡ ወያጠብዑ ወይፈርዩ። ወአልቦ ዘያኀቱ ማኅቶተ ወይከድና ንዋየ ወያነብራ ታሕተ ዐራት ዘእንበለ ዲበ ተቅዋማ ከመ ይርአዩ ብርሃነ እለ ያንሶስዉ። ወአልቦ ኅቡእ ዘኢይትከሠት ወአልቦ ክዱን ዘኢያስተርኢ ወገሃደ ይከውን። ወአእምሩ እንከ ዘከመ ትሰምዑ እስመ ለዘቦ ይሁብዎ ወለዘሰ አልቦ እለሂ ቦ የሀይድዎ።

ወመጽኡ ኀቤሁ እሙ ወአኀዊሁ ወስእኑ ረኪቦቶ እስመ ጽፉቅ ሰብእ። ወይቤልዎ እምከ ወአኀዊከ አፍኣ ይቀውሙ ወይፈቅዱ ይርአዩከ። ወአውሥአ ወይቤሎሙ እምየ ወአኀውየ እሉ እሙንቱ እለ ይሰምዑ ቃለ እግዚአብሔር ወይገብሩ።

ወኮነ በአሐቲ ዕለት ዐርገ ውእቱ ውስተ ሐመር ወአርዳኢሁኒ ወይቤሎሙ ንዑ ንዕዱ ማዕዶተ ቀላይ ወሖሩ። ወእንዘ የሐውሩ ኖመ ወመጽአ ነፋሰ ዐውሎ ውስተ ባሕር ወመልአ ማየ ሐመሮሙ ወተመንደቡ። ወሖሩ ወአንቅህዎ ወይቤልዎ ኦ ሊቅ አድኀነነ ከመ ኢንሙት ወተንሥአ ወገሠጾሙ ለነፋሳትኒ ወለማዕበለ ባሕርኒ ወአርመሙ ወኮነ ዛኅነ ዐቢየ። ወይቤሎሙ አይቴኑ ሃይማኖትክሙ ወፈርሁ ወአንከሩ ወይቤሉ በበይናቲሆሙ መኑ እንጋ ውእቱ ዝንቱ ዘይትኤዘዙ ሎቱ ባሕርኒ ወነፋሳትኒ።

ወእምዝ ሖረ እግዚእ ኢየሱስ በሐመር ወነገዱ ብሔረ ጌርጌሴኖን ዘአንጻረ ማዕዶተ ገሊላ። ወወሪዶሙ ምድረ ተቀበሎ ብእሲ ዘጋኔን ወፂኦ እምሀገር ወጕንዱይ መዋዕል እምዘኢለብሰ ልብሶ ወኢቦአ ቤተ ዘእንበለ ዳእሙ ይነብር ውስተ መቃብር። ወሶበ ርእዮ ለእግዚእ ኢየሱስ ከልሐ ወሮጸ ወሰገደ ሎቱ ወዐውየወ በዐቢይ ቃል ወይቤ ምንት ብየ ምስሌከ ኢየሱስ ወልደ እግዚአብሔር ልዑል ወአስተብቍዖ ኢይሣቅዮ። እስመ አዘዞ ለውእቱ ጋኔን እኩይ ይፃእ እምላዕለ ውእቱ ብእሲ እስመ ዘልፈ ያአብዶ ወይሞቅሕዎ በመዋቅሕት ወየዐቅብዎ ደቅ ወይሰብር መዋቅሕቲሁ ወያረውጾ ጋኔኑ ውስተ ገዳም። ወተስእሎ እግዚእ ኢየሱስ ወይቤሎ መኑ ስምከ ወይቤሎ ሌጌዎን ስምየ እስመ ብዙኃን አጋንንት አኀዝዎ። ወአስተብቍዕዎ ከመ ኢይፈንዎሙ ይረዱ ውስተ ሲኦል። ወቦ ህየ መራዕየ አሕርው ብዙኅ ይትረዐይ ውስተ ደብር ወአስተብቍዕዎ ከመ ያብሖሙ ይባኡ ላእለ አሕርው ወአብሖሙ። ወወፂኦሙ እሙንቱ አጋንንት እምላዕለ ውእቱ ብእሲ ቦኡ ላዕለ አሕርው ወአብዱ ኵሉ መራዕየ አሕርው ወወድቁ እንተ ጸድፍ ወውስተ ቀላይ ወሞቱ። ወርእዮሙ ኖሎት ዘኮነ ጐዩ ወሖሩ ወአተዉ ወዜነዉ ለአህጉር ወለአዕጻዳት። ወወፅኡ ሰብእ ከመ ይርአዩ ዘኮነ ወሖሩ ወበጽሑ ኀበ እግዚእ ኢየሱስ ወረከብዎ ለውእቱ ብእሲ ዘወፅኡ እምኔሁ አጋንንት እንዘ ይነብር ኀበ እገሪሁ ለእግዚእ ኢየሱስ ወልቡሰ ልብሶ ወገብኦ ልቡ ወፈርሁ። ወነገርዎሙ እለሂ ርእዩ ዘከመ ሐይወ ዘጋኔን። ወአስተብቍዕዎ ኵሎሙ ሰብአ አድያም ዘጌርጌሴኖን ወይቤልዎ ከመ ይሑር እምኀቤሆሙ እስመ ፍርሀት ዐቢይ አኀዞሙ ወዐርገ እግዚእ ኢየሱስ ሐመረ ወተመይጠ። ወአስተብቍዖ ለእግዚእ ኢየሱስ ውእቱ ብእሲ ዘወፅኡ እምኔሁ አጋንንት ከመ ይሑር ምስሌሁ ወፈነዎ ወይቤሎ። እቱ ቤተከ ወንግር ኵሎ ዘገብረ ለከ እግዚአብሔር ወሖረ ውስተ ኵሉ አህጉር ወነገረ ኵሎ ዘገብረ ሎቱ እግዚእ ኢየሱስ። ወሶበ ተመይጠ እግዚእ ኢየሱስ ተቀበልዎ ሕዝብ ኅቡረ እስመ ኮኑ ኵሎሙ ይጸንሕዎ።

ወመጽአ ብእሲ ዘስሙ ኢያኢሮስ ወውእቱ መጋቤ ምኵራብ ወሰገደ ሎቱ ታሕተ እገሪሁ ለእግዚእ ኢየሱስ ወአስተብቍዖ ይባእ ቤቶ። እስመ ቦቱ አሐቲ ወለት ዘዐሠርቱ ወክልኤቱ ክረምታ ወይእቲ አልጸቀት ትሙት። ወእምዝ እንዘ የሐውር ምስሌሁ እግዚእ ኢየሱስ ይትጋፍዕዎ ሰብእ ወመጽአት ብእሲት እንተ ደም ይውኅዛ እምዐሠርቱ ወክልኤቱ ክረምት ወአኅለቀት ኵሎ ንዋያ ለዐቀበተ ሥራይ ወአልቦ ዘክህለ ፈውሶታ። ወቀርበት ወቆመት እንተ ድኅሬሁ ለእግዚእ ኢየሱስ ወገሠሠት ጽንፈ ልብሱ ወቆመ ሶቤሃ ውኅዘተ ደማ፤ ወይቤ እግዚእ ኢየሱስ መኑ ገሠሠኒ ወክሕዱ ኵሎሙ ወይቤልዎ ጴጥሮስ ወእለሂ ምስሌሁ ሊቅ አኮኑ ሰብእ ይጣወቅ ወይጻዐቀከ ወትብል መኑ ገሠሠኒ። ወይቤሎሙ እግዚእ ኢየሱስ ቦ ዘገሠሠኒ እስመ አነ አአምር ከመ ኀይል ወፅአ እምኔየ። ወርእያ ይእቲ ብእሲት ከመ ኢተከብተ ላቲ ርዕደት ወሖረት ወሰገደት ሎቱ ወነገረት በቅድመ ኵሉ ሕዝብ ዘከመ ሐይወት ሶቤሃ። ወይቤላ እመኒ ወለትየ ሃይማኖትኪ አሕየወተኪ እትዊ በሰላም። ወእንዘ ዘንተ ይትናገር መጽአ አሐዱ ብእሲ እምቤተ መጋቤ ምኵራብ ወይቤሎ ወለትከሰ ሞተት ወኢታጻምዎ እንከ ለሊቅ። ወሰሚዖ እግዚእ ኢየሱስ ይቤሎ ለመጋቤ ምኵራብ ኢትፍራህ ዳእሙ ተአመን ወለትከሰ ተሐዩ። ወበዊኦ ቤተ ከልአ ባዕደ ኢይባእ ምስሌሁ ወኢመኑሂ ዘእንበለ ጴጥሮስ ወያዕቆብ ወዮሐንስ ወአቡሃ ወእማ ለሕፃን። ወኵሎሙ ይበክዩ ወያስቈቅውዋ ወይቤሎሙ እግዚእ ኢየሱስ ኢትብክዩ ሕፃንሰ ኢሞተት አላ ትነውም። ወሰሐቅዎ እስመ አእመሩ ከመ ሞተት። ወአውፅአ አፍኣ ኵሎ ወአኀዛ እዴሃ ወጸውዓ ወይቤላ ተንሥኢ ወለትየ። ወሶቤሃ ገብአ ነፍሳ ወተሰውጠ መንፈሳ ላዕሌሃ ወተንሥአት ሶቤሃ ወአዘዘ የሀብዋ ዘትበልዕ። ወደንገፁ አቡሃ ወእማ ወከልኦሙ ኢይንግሩ ወኢለመኑሂ ዘኮነ።

Dengarkan ወንጌል ዘሉቃስ 8