Kaba for CAR - ACATBA; 2020  Drama (NT)

Jeju bbar njê-njaje goe tə̂ dɔku gire joo ngaâ narəde singa tubba nɛ̂n ndilje kə̂ maji ang, karə daji nɛ̂n njê-rɔ-toje tɔyn, karə daji nɛ̂n dəwje kə̂ dəbbə rɔde oy darə rɔde ddee maji. Ri njê-njaje go Jeju tə̂ kə̂ dɔku gire joo le nan: Dɔngɔrɛ̂ to Simɔn kə̂ daw bbarɛ̂ nan Piyɛr kə ngokɔɛ̂n Andere. Jakə ngonn lə Jebede kə ngokɔɛ̂n Jan. Pilipi de kə Bartelemi, Toma de kə Matiye kə̂ to nje-taa narɛ lambo, Jakə ngonn lə Alpe kə Tade. Simɔn dəw kə̂ ndiki bbe laa nya, kə Judas Iskariyotə.

Kete bba karə Jeju ula njê-kaw-kulaje kə̂ dɔku gire joo le, n̂-ndəjəde nan: «Dəwje kə̂ toje to Jiipije ang ta awje rɔde tə̂ ang ddəm andəje mə bbe tə̂ lə dəwje kə̂ Samari ang ddəm. A ta awje rɔ dəwje tə̂ kə̂ Ijarayɛl kə̂ toje tokə lə batəje kə̂ naynje kə kɔrɔ̂. Kar kaw ləse a, ilaje mbər kə ddəw ddəw ə-paje nan: Bbe-kɔn kə̂ darâ nayn ngɔsi ngaa. Ajije njê-rɔ-toje, ə-ndolje dəwje kə̂ oyje, ajije njê-banjije arəje rɔde ddee maji, ə-tubbaje ndilje kə̂ maji ang. Lubba arəse nɛ̂n le baa, yeenn a, maji karə arəje dəwje baa tɔ. Unnje andə wase narɛ wase narɛ kə̂ to kandɛ̂ bbərse tə̂ bba awje nɛ̂n ang. Unnje bbɔl awje nɛ̂n ang. Awje kə kubbu-kul joo ang ddəm nɛ̂n-gɔl ang ddəm unnje kakə mba kuwa jise tə̂ ang ddəm. Mba to tar lə dəw kə̂ dda kula ta kinga kuka laa.»
«Bbo ə-teeje marə tɔkə bbe tə̂ wase ngonn bbe tə̂ a, ə-sangəje dəw kə̂ asə karə ə-toje kə̂y laa ta ə-naynje rɔɛ̂ tə̂ ndərəng ɔtuje nɛ̂n. Bbo a ta kandəje mə kə̂y tə̂ a, ə-ddaje lapiya njê-kəyje le. A bbo njê-kəyje le asəje ta kinga mə-wul-lɔm a, maji karə lapiya ləse le arəde mə-wul-lɔm. A bbo dasəje ang a, maji karə mə-wul-lɔm ləse təl rɔse tə̂. Bbo ə-teeje marə kəy tə̂ wase marə tɔkə bbe tə̂, a bbo dəwje taase kə kə̂y ang a, kar kɔtu ləse a, ə-tundaje bum nangə kə̂ gɔlse tə̂. M-pa tar kə̂ tɔkɔrɔ marəse. Ndɔ gangə sariya a, sariya kə̂ dɔ dəwje tə̂ kə̂ dɔ nangə tə̂ənn a ngəng kuta sariya kə̂ dɔ bbeje tə̂ kə̂ Sɔdɔm kə Gɔmɔr.»

«Ooje, mulase tokə lə batəje horo ənjakəmnjarje tə̂. Yeenn a, maji karə aaje rɔse tokə lə li kə̂ aw aa rɔɛ̂ ngaâ ta arəje tar to dɔse tə̂ ang tokə lə dərje. Aaje rɔse, mba dâ kaw kə se sariya tə̂ ta dâ tundase kə ndəy mə kəy mbɔn-naanje tə̂ ləde. Dâ kaw kə se nɔn ngann mbayje tə̂ kə nɔn tɔkə mbayje tə̂ mbam. Kar tə̂ənn, â paje tar-naji ləm karəde ddəm karə dəwje kə̂ toje to Jiipije ang ddəm. A bbo daw kə se sariya tə̂ a, əjəje tar kə̂ â paje wase gusu kə̂ a paje nɛ̂n tar le ang. Kar tə̂ənn njaa, Lubba a karəse tar kə̂ â paje. Mba, sese njaa â paje tar le ang, Ndil lə Bɔsese â a kunda tar le tase tə̂ karə ə-paje.
«Dəwje a kila ngakɔnde ji dəwje tə̂ karə n̂-tɔlde. Bɔ ngannje a ddaje tokə baann kə ngannde tɔ. Ngannje a təlje to njê-baanje lə bɔdede kə lə kɔndede ngaâ dâ karə n̂-tɔlde. Dəwje tɔyn a mbətəjese mbam. A dəw kə̂ uwa arə ngəng ndərəng ddutu ndɔ tə̂ a, a kinga kaji. Bbo n̂-dda singa kə se marə tɔkə bbe tə̂ a, aynje awje marɛ̂ tə̂. M-pa tar kə̂ tɔkɔrɔ, â nayn njaje mə tɔkə bbeje tə̂ kə̂ Ijarayɛl tɔyn ang bbay a, Ngonn lə dəw a ddee.
«Nje-nja go dəw tə̂ uta dəw kə̂ naw nja goe tə̂ le ang ddəm nje-kula a kuta əbbeeje ang ddəm. Bbay nɛ̂n njaa to karə nje-nɛ̂n-ndo ddee tokə lə nje-nɛ̂n-tɔju laa wase nje-kula ddee tokə lə əbbeeje. Bbo dəwje bbarje nje-kəy nan Bɛljebul a, dâ kunda ri kə̂ maji ang uta yeenn dɔ ngann njê-kəyje tə̂.»

«Arəje bbəəl lə dəw ddase ang, mba nɛ̂n kə̂ to lo-kiyɛ̂ tə̂ kə̂ a tee kə ddaka ang goto, nɛ̂n tɔyn kə̂ n̂-kusu dɔɛ̂ kə̂ a tee kəm dəwje tə̂ kə ddaka ang goto. Tar kə̂ m-pa marəse lo ndul tə̂ a, sese, maji karə ə-ndajije arəje dəwje dann karâ. Tar kə̂ n̂-pa mbise tə̂ hɔy be a, maji karə ilaje nɛ̂n mbər dɔ kəy tə̂ taar. Dəwje kə̂ da-rɔ dəw â a kasəje ta tɔl bbo kəwn lə dəw ang, ə-bbəəljede ang. Lubba â maji karə ə-bbəəleje. Ne â nasə ta dda karə kəwn lə dəw ddəm da-rɔ dəw ddəm gotoje kə ddang kəm puru tə̂ kə̂ aw ɔn kə ndɔ kə ndɔ. Daw labbə ngann əəlje joo bba kandə narɛ kâra ang wa? A Bɔsese ndiki tə̂ bba ngonn əəl kâra a kasə koso nangə̂. A sese, biin dɔse njaa kara Lubba tura kɔrɛ̂ tɔyn. Yeenn a, ə-bbəəlje ang, mba gatəse uta gatə ngann əəlje kə̂ banya.
«Yeenn a, dəw kə̂ pa kəm dəwje tə̂ nan n̂-to dəw ləm a, əman kara mâ pa nɔn Bɔy tə̂ kə̂ isi darâ nan n̂-to dəw ləm tɔ. A dəw kə̂ mayn tar ləm kəm dəwje tə̂ nan: ‹M-gərə Jeju ang› a, əman kara mâ mayn tar laa nɔn Bɔy tə̂ kə̂ darâ nan: ‹Dəw nəənn to dəw ləm ang› tɔ.»

«Əjəje to m-ddee ta karə mə-wul-lɔm dɔ nangə tə̂ wa? M-ddee kə mə-wul-lɔm ang, ddɔ â m-ddee nɛ̂n. M-ddee ta karə tin-naan to horo ngonn tə̂ kə bɔɛ̂je, horo ngonn kə̂ dɛnɛ̂n tə̂ kə kɔɛ̂nje, horo ngonn kə̂ dɛnɛ̂n tə̂ kə mumɛ̂je kə̂ dɛnɛ̂n. Njê kə̂ mə kəy tə̂ lə dəw njaa a toje to njê-baanje laa.»

«Dəw kə̂ ndiki bɔɛ̂je wase kɔɛ̂nje utam, a kasə ta ddee to dəw ləm ang. Dəw kə̂ ndiki ngonnɛ̂ kə̂ dingaw wase kə̂ dɛnɛ̂n utam, a ddee to dəw ləm ang. Dəw kə̂ oto kakə-dəsə laa ang ddəm uwa gom ang ddəm a kasə ta ddee to dəw ləm ang. Dəw kə̂ ndiki ta ngəm təbbə laa, təbbə laa le a nayn kə̂ kɔrɔ̂ nyɔm. A dəw kə̂ arə təbbə laa nayn kə kɔrɔ̂ mbam, a təl kinga təbbə laa le.»

«Bbo dəw taase kə rɔɛ̂ tə̂ a, əman njaa n̂-taam. A dəw kə̂ taam kə rɔɛ̂ tə̂ a, taa dəw kə̂ ulam tɔ. Dəw kə̂ taa nje-kila mbər tar lə Lubba kə rɔɛ̂ tə̂, mba dəw kə̂ n̂-tɛɛ̂ le to nje-kila mbər tar lə Lubba a, nâ kinga kuka kə̂ nje-kila mbər tar lə Lubba aw inga. A bbo dəw taa dəw kə̂ gatə gatə kə rɔɛ̂ tə̂, mba dəw kə̂ n̂-tɛɛ̂ le to dəw kə̂ gatə gatə a, nâ kinga kuka kə̂ dəw kə̂ gatə gatə aw inga. M-pa tar kə̂ tɔkɔrɔ marəse, dəw kə̂ maann kə̂ wul kə̂ əngo tə̂ baa njaa bba arə dəw kə̂ ngaji horo ngamarɛ̂je tə̂ nəənn, mba dəw kə̂ ngaji le to nje-nja gom tə̂ a, kuka laa a koso nangə̂ ang tɔ.»

Dengarkan Matiye 10