Mbula- Bwazza for Nigeria 2016 NBTT/WBT - Non-Drama (NT)

Mbula

A ɓe kǝ pwari Yesu naban kani aɓwana gir a Ndàmǝgule mala Ɓakuli, sǝ kǝ hamnǝ Cau Amsǝban, agbani pǝris andǝ amalǝm Nggurcau mala Musa andǝ akapana yia kat à yiu abani. À yì ne wi ama, “Bangga sǝm, nǝ ya rǝcandǝa sǝ a kǝ pakki amǝnia yì agir, sǝ yana po mǝnia yì gara mala pea ka?”
Yesu pǝlǝia wia ama, “Mǝ nǝ ɗi wun gbal. Wu banggam, batisǝma mala Yohana ka, pur nǝ kuli le, ko pur nǝ ban ɓwapǝndǝa?”
Pǝlǝa à pǝlǝki ce a rǝarǝia ama, “Ɓǝ̀ sǝm bangŋa ama ‘Pur nǝ kuli ka,’ nǝ̀ ɗi sǝm ama, ‘Sǝ palang sǝ wu pa ɓamur wun a rǝì ɗang?’ Sǝ ɓǝ̀ sǝm na ama, ‘Pur nǝ ban ɓwapǝndǝa ka, aɓwana mǝnia kat ka à nǝ̀ ɓukki sǝm, acemǝnana yia ka à earǝna ama Yohana ka mǝɓangna mala Ɓakuli na.’ ” Pǝlǝa à eare ama, “Sǝm surǝ ban mǝnana pur kam ngga ɗang.”
Pǝlǝa Yesu nea wia ama, “Mim gbal ka pa mǝ nǝ bangga wun nǝ koya rǝcandǝa sǝ ǝn nggǝ pakki amǝnia yì agir ka ɗang.”


Yesu lidǝmbǝa aban ne aɓwana mǝnia yì kanicau ka ama:
Ɓe ɓwa tsǝk ɓaban nggun anap, sǝ nyesǝi pe aɓea amǝturo rya, sǝ kutio o a bǝri banì kya sau kam. Kun pwan ɓǝlanggun anap karǝna adyan ngga, pǝlǝa tur ɓe mǝturo-ɓala male aban amǝturo ɓǝa kya aki wi ɓǝlanggun. Kara amǝturo yi walki mǝturo-ɓala man, sǝ à pǝrì um nǝ ɓabui. Nyare tur ɓe mǝturo-ɓala, yì gbal ka à walki à lǝmndǝì wi gir kǝsǝkya sǝ à pǝri um nǝ ɓabui. Nyar ɗǝm tur tāruia, à yì tsǝki wi anpenye à ramte à turi nǝ nza.
Pǝlǝa mǝtala ɓaban na ama, “Mana ado mǝ nǝ pa? Mǝ nǝ tasǝ munem mǝnana ǝn earkiyi ace raka, yakǝla à nǝ̀ pe wi gulo!”
Lang amǝturo nǝ̀ yia sǝni ka, à kur kunarǝia amuri ama, “Yauwa! Mǝnia ka nda mǝliɓala. Sǝm nǝ̀ wal-lui, sǝ ɓaban ngga nǝ̀ duk ma'sǝm!” Pǝlǝa à yasǝli à turi nǝ nzǝm nkandan, sǝ à kar ate à kya wali wu.
Pǝlǝa Yesu ɗiban ama, “Mana ado wu kǝ sǝni mǝnia yì mǝtala ɓaban ngga nǝ̀ yia pakkia wia? Nǝ̀ yiu nǝ̀ yia wal-lú amǝturo mǝnia sǝ nǝ̀ nyesǝ ɓaban nǝ̀ pe aɓea aɓwana!”
Lang ɓwapǝndǝa nǝ̀ ok mǝnia ka à na ama, “Ɓǝ̀ Ɓakuli twalban mani!”
Pǝlǝa Yesu sǝnia kyap-kyap sǝ na ama, “Sǝ mana ɗe nda tǝrcau mǝnana malǝmce bangŋi ama:
“ ‘Tali mǝnana amǝɓa ginǝi ka,
nda à nyesǝi yi bwal
ɓǎ kàngkàng ngga.’
Ɓwa mǝnana kat sǝ kpa amur mǝno yì tali ka nǝ̀ arkya nǝ̀ mesǝke mwashat-mwashat, sǝ ɓwa mǝnana tali man kpa amuri ka, nǝ̀ betǝki.”
Amalǝm Nggurcau mala Musa andǝ agbani Pǝris alta njargula mǝnana à nǝ̀ bwali nǝi tsuk-tsuk ka, acemǝnana à sǝlǝna ama mǝnia yì kanicau ka nda a rǝia. Sǝa ma ɓangciu kǝ pakkia wia arǝ aɓwana.


Aɓiamǝbura tsǝki wi mǝsǝu, pǝlǝa à tasǝ amǝ'iucau, mǝnana à lǝmndǝa kǝla amǝ'mǝsǝcau na ka. A ɗenyicau malea ka à nǝ̀ bwal Yesu aɓa cau mǝnana pur a kuni ka, sǝ à nǝ̀ ká nǝi a ɓabu mǝtala-nzali, yì nggwamna mala amǝ Roma. Pǝlǝa amǝ'iucau ɗi Yesu ama, “Malǝm, sǝm sǝlǝ ama cau mo andǝ kanigir mo ka mǝsǝcau na kat. Aɓwana kat abano ka amǝ'mwashati na. A kǝ kani njargula mala Ɓakuli nǝ mǝsǝcau. Nggearǝì ka ɓoaro ɓǝ̀ sǝm mbwe Kaisar, murǝm mǝgule mala amǝ nzali Roma boalo-cemi le, ko ɓǝ̀ sǝm ká pe wi ɗang?”
Yì ka, surǝna ɓa kutan malea pǝlǝa nea wia ama, “Wu lǝmndǝam mǝsǝboalo dinari. Ɓamǝsǝ ɓwa andǝ gir mǝnana à gilǝa rǝì ka mala yana?”
À eari wi ama, “Mala Kaisar na.”
Pǝlǝa nea wia ma, “Wu pe Kaisar gir mǝnana mala Kaisar na ka, sǝ Ɓakuli ka wu pe wi gir mǝnana male na ka.”
À gandǝ kume nǝ ɓwarkio aɓa cau male a ɓadǝm ɓwapǝndǝa ɗang. À ndali nǝ cau male, kara à do kunia ɗǝong.


Sǝ aɓea amǝ Saduki, mǝnana à na ama aɓwana pà nǝ̀ lo anzǝm lú raka, à yiu aban Yesu nǝ ɗiban. À na ama:
Malǝm, Musa gilǝa sǝm ama, “Ɓǝ̀ mǝ'eam ɓwa wú sǝ ɗeki mami amuna pà kàm raka, ɓwe ka nǝ̀ al man-lú ace mǝnana ɓǝ̀ ɓǝli mǝ'eambǝi amuna.” Sǝ a pwaryan ngga aɓea aɓwana nakam yia tongno-nong-ɓari à nda amǝ'eambu. Mǝdǝmbǝa al mɓwama yi wu à pànǝ muna ɗang. Sǝ ɓaria ka anggo gbal, al ɓwame sǝ yi wu pànǝ muna ɗang. Tàruia gbal ka yi twal ɓwame, anggo sǝ yia mǝnia tongno-nong-ɓari ka à yì wú à ɗeki mɓwama, ko kǝ muna pa kàm ɗang. A masǝlǝate ka, mɓwama gbal ka yi wu. Sǝ ado ka, a pwari loapi ɓembe ka nǝ̀ duk mala yana atea le, acemǝnana yia mǝnia tongno-nong-ɓari ka à dumǝna nǝi?
Yesu earia wia ama:
Aɓwana mǝnana a ɓanza man ngga à kǝ al rǝia sǝ à kǝ isǝ amunia. Sǝ aɓwana mǝnana à sǝnia à karǝna à nǝ̀ lo a ɓembe sǝ à nǝ̀ kum kutio a ɓanza mǝno kǝ yiu ka, à pà nǝ̀ al rǝia ko à nǝ̀ isǝ amunia ɗang. Sǝ à pà nǝ̀ wu ɗǝm ɗang, acemǝnana à nda kǝla amǝturonjar. Amuna mala Ɓakuli na. Yia ka à ndaka ɓwana mǝnana à loapi ɓembe ka. Sǝ amur cau mala loapi ɓembe ka, nggearǝ Musa ka lǝmndǝ ama alú nǝ̀ loapi ɓembe. Aɓa cau mǝnana à gilǝe amur mǝ'ndanggun mǝnana kǝ earki bǝsa ka, bangŋa ama Mǝtalabangŋo ka nda, “Ɓakuli mala Ibǝrayim, Ɓakuli mala Ishaku, sǝ Ɓakuli mala Yakupu.” Yì ka, Ɓakuli mala alú na ɗang, nda Ɓakuli mala aɓwana mǝnana nǝ yilǝmu ka, acemǝnana sǝlǝna ama yia kat ka à ndanǝ yilǝmu.
Aɓea amalǝm Nggurcau mala Musa pǝlǝi wi ama, “Malǝm, cau mo ka mǝsǝcau na!” Anggo ka kǝɓwa nyare loasǝ kuni ama nǝ̀ ɗi ɓe kǝ cau ɗǝm ɗang.


Yesu pǝlǝa turia wia ɓe ɗiban ama, “Mana tsǝa sǝ à kǝ na ama Kǝrǝsti ka Muna mala Dauda na? Dauda nǝ nggearǝì ka bangŋa aɓa malǝmce mala Anggyal ama,
“ ‘Ɓakuli, Mǝtalabangŋo,
ne Mǝtalem ama,
Do a buam mǝli
she ɓǝn nyesǝna
aɓeo amǝbura à pǝlǝna
muna-buno tsǝk kusǝu
a ɓakusǝo ka.’
Dauda ka tunǝ Kǝrǝsti ama ‘Mǝtalem.’ Sǝ palang ado sǝ Kǝrǝsti duk muni ɗǝm?”


Lang aɓwana kat na arǝ kwaki kiria à nǝ̀ nggǝ oe ka, Yesu pǝlǝa ne alaggana male ama, “Wu tsǝkir wun arǝ amalǝm Nggurcau mala Musa. À earce gya nǝ anggea-daura, sǝ à earce ɓǝa kǝ makkia wia kun aɓalǝ alimo, à earce aban-do mǝɓoarne arǝ andakpapi andǝ abuno mala aɓwana-mǝgule arǝ aban pakiɗire lili. À kǝ ɓǝmbǝri aman-lú arǝ agirkuma malea, sǝ à kǝ ɓosǝki aɓwana nǝ pakki ahiwi mǝ'sake. A ulang yia ka à nǝ̀ pakkia wia ɓashi mǝcande.”

Dengarkan Luka 20