San Lucas 14
14
Nahuun ꞌo̱ snóꞌo quixíj cuꞌmaan man, quiꞌyaj Jesús güii naránj rá a
1Dan me se ꞌo̱ güii naránj rá nij yuvii̱ israelitá me se catúj Jesús rá veꞌ tucuá ꞌo̱ síí uun chij rihaan nij síí fariseo cha̱ soꞌ, ne̱ nij síí fariseo roꞌ, tumé uxrá man soꞌ da̱j quiꞌya̱j soꞌ a. 2Ne̱ veé da̱nj nicu̱nꞌ ꞌo̱ síí quixíj cuꞌmaan man rihaan Jesús a. 3Ga̱a ne̱ xnáꞌanj Jesús man nij síí naquiꞌyaj cu̱u stucua̱nj Moisés do̱ꞌ, man nij síí fariseo do̱ꞌ, cataj soꞌ a:
―No̱ xcúún níꞌ caꞌne̱e̱ níꞌ chiꞌii̱ xráá síí ranꞌ güii naránj rá níꞌ, rá soj naꞌ. Ase ne nó xcúún níꞌ xa̱ꞌ ―taj Jesús, xnáꞌanj Jesús man nij soꞌ a.
4Tza̱j ne̱ guun dínj tuꞌva nij soꞌ a.
Ga̱a ne̱ taꞌaa Jesús man síí ranꞌ yoꞌ, ne̱ nahuun sa̱ꞌ soꞌ, quiꞌyaj Jesús, ga̱a ne̱ naꞌnéé Jesús chrej man soꞌ a. 5Ga̱a ne̱ niꞌya̱j Jesús rihaan nij síí fariseo yoꞌ, cataj soꞌ a:
―Ne̱ sese quini̱j taꞌníí ꞌo̱ soj do̱ꞌ, ꞌo̱ daán soj scúj do̱ꞌ, rá cuxruj na güii naránj rá níꞌ, ne̱ raꞌya̱nj quiri̱i̱ soj man taꞌníí soj do̱ꞌ, man daán soj scúj do̱ꞌ, rá ꞌu̱nj na̱nj asânj ―taj Jesús rihaan nij síí fariseo a.
6Veé dan me se a̱ ꞌó nana̱ ne quiri̱ꞌ nij soꞌ caꞌmi̱i̱ nij soꞌ rihaan Jesús maꞌ.
Cataj Jesús se vaa se̱ narii níꞌ rej sa̱ꞌ doj quita̱j níꞌ a
7Dan me se queneꞌen Jesús se vaa nij síí ꞌnaꞌ tucuá síí fariseo yoꞌ roꞌ, narii nij soꞌ rej sa̱ꞌ doj quita̱j nij soꞌ, ne̱ cheꞌé dan nagoꞌ Jesús chrej man nij soꞌ, cataj soꞌ a:
8―Asa̱ꞌ canacúún ꞌo̱ yuvii̱ mán so̱ꞌ caꞌa̱nj so̱ꞌ chaꞌanj naraꞌa̱a, ne̱ se̱ caꞌanj quita̱j so̱ꞌ chruun xlá sa̱ꞌ doj maꞌ. ꞌO̱ se ne neꞌén so̱ꞌ sese canacu̱nj nii man ꞌó síí noco̱o doj rihaan so̱ꞌ quita̱j soꞌ chruun xlá ta̱j so̱ꞌ maan ado̱nj. 9Ne̱ síí ꞌyaj chaꞌanj roꞌ, cata̱j soꞌ rihaan so̱ꞌ a: “Rque̱ so̱ꞌ chruun yoꞌ quita̱j síí nihánj á”, cata̱j soꞌ rihaan so̱ꞌ, ga̱a ne̱ gu̱un naꞌa̱j so̱ꞌ, ne̱ chruun xlá nij doj caꞌa̱nj quita̱j so̱ꞌ, quiꞌya̱j soꞌ a. 10Dan me se asa̱ꞌ canacúún nii mán so̱ꞌ, ne̱ asa̱ꞌ cuchíꞌ so̱ꞌ rej ca̱nuû chaꞌanj, ne̱ rej nij doj roꞌ, quita̱j so̱ꞌ á. Ga̱a ne̱ asa̱ꞌ caꞌnaꞌ síí canacúún mán so̱ꞌ, ga̱a ne̱ cata̱j soꞌ rihaan so̱ꞌ a: “Cavi̱i̱ so̱ꞌ quita̱j so̱ꞌ rej sa̱ꞌ doj nihánj, tinu̱j”, cata̱j soꞌ rihaan so̱ꞌ, ga̱a ne̱ cara̱yaꞌa̱nj uxrá cunuda̱nj nij síí ꞌnaꞌ chaꞌanj yoꞌ ni̱ꞌyaj nij soꞌ mán so̱ꞌ na̱nj ado̱nj. 11ꞌO̱ se xa̱ꞌ síí me rá ti̱cavii sa̱ꞌ man maꞌa̱n ni̱ꞌyaj yuvii̱, tza̱j ne̱ quiri̱ꞌ soꞌ, ne̱ gu̱un naꞌa̱j soꞌ ado̱nj. Ne̱ xa̱ꞌ síí ꞌyaj nica̱ꞌ nimán, tza̱j ne̱ cavi̱i̱ sa̱ꞌ soꞌ ni̱ꞌyaj yuvii̱ ado̱nj ―taj Jesús rihaan nij síí fariseo do̱ꞌ, rihaan nij síí naquiꞌyaj cu̱u stucua̱nj Moisés do̱ꞌ a.
Cataj Jesús me síí nacu̱nj níꞌ cha̱ ga̱ níꞌ a
12Ga̱a ne̱ cataj Jesús rihaan síí canacúún man soꞌ cha̱ soꞌ a:
―Asa̱ꞌ guun rá so̱ꞌ caꞌna̱ꞌ yuvii̱ cha̱ yuvii̱ veꞌ tucuá so̱ꞌ, ne̱ se̱ canacúún so̱ꞌ man tuvíꞌ so̱ꞌ do̱ꞌ, man tinúú so̱ꞌ do̱ꞌ, man nij síí ruꞌvee ma̱n chiháán so̱ꞌ do̱ꞌ maꞌ. ꞌO̱ se sese canacu̱nj so̱ꞌ man ina̱nj maꞌa̱n nij soꞌ, ga̱a ne̱ vaa güii canacu̱nj nij soꞌ mán so̱ꞌ cha̱ so̱ꞌ ga̱ nij soꞌ, ga̱a ne̱ a̱j naruꞌvee nij soꞌ nu̱ꞌ se chá rihaan so̱ꞌ vaa ga̱a na̱nj ado̱nj. 13Tza̱j ne̱ asa̱ꞌ canuû chaꞌanj qui̱ꞌyáá so̱ꞌ, ne̱ canacu̱nj so̱ꞌ man nij síí nique̱ do̱ꞌ, man nij síí larihuu̱ raꞌa do̱ꞌ, man nij síí chéé rengo̱ do̱ꞌ, man nij síí tuchri̱i do̱ꞌ, cha̱ nij soꞌ á. 14Da̱nj qui̱ꞌyáá so̱ꞌ, ga̱a ne̱ nij soꞌ me se taj rasu̱u̱n rihaan nij soꞌ na̱ruꞌvee nij soꞌ rihaan so̱ꞌ maꞌ. Ga̱a ne̱ asa̱ꞌ cunuu iꞌna̱ꞌ uún nij síí sa̱ꞌ rihaan Yaꞌanj, ne̱ maꞌa̱n Yaꞌanj na̱ruꞌvee rihaan so̱ꞌ, ga̱a ne̱ cavi̱i̱ sa̱ꞌ uxrá so̱ꞌ ado̱nj ―taj Jesús rihaan síí canacúún man soꞌ cha̱ soꞌ a.
Nanó Jesús cuentó cheꞌé chaꞌanj noco̱o quiꞌyaj ꞌo̱ soꞌ a
15Dan me se cuno ꞌo̱ síí chá ga̱ Jesús nana̱ caꞌmii Jesús, ga̱a ne̱ cheꞌé dan cataj soꞌ rihaan Jesús a:
―Cavi̱i̱ sa̱ꞌ cunuda̱nj nij síí cha̱ ga̱ Yaꞌanj asa̱ꞌ guun chij Yaꞌanj na̱nj ado̱nj ―taj soꞌ rihaan Jesús a.
16Ga̱a ne̱ cataj Jesús rihaan soꞌ a:
―Síí navij rá chaꞌanj noco̱o ndoꞌo me ꞌo̱ soꞌ, ne̱ nacúún soꞌ caꞌna̱ꞌ queꞌe̱e̱ ndoꞌo yuvii̱ chaꞌanj a. 17Ga̱a ne̱ ma̱an orá cha̱ xtiꞌno̱ nij soꞌ me caꞌnéé síí navij rá chaꞌanj man se‑mo̱zó soꞌ caꞌa̱nj cata̱j mozó yoꞌ nana̱ nihánj rihaan nij síí caꞌna̱ꞌ a. “A̱j quisíj guun chuvi̱i, ne̱ caꞌa̱nj níꞌ cha̱ nij soj á”, taj mozó yoꞌ rihaan nij síí caꞌna̱ꞌ chaꞌanj yoꞌ a. 18Ga̱a ne̱ guun cheꞌe̱ cunuda̱nj nij soꞌ cataj nij soꞌ rihaan mozó yoꞌ se vaa se̱ caꞌvee cuchi̱ꞌ nij soꞌ chaꞌanj maꞌ. ꞌO̱ soꞌ cataj a: “Tiha̱j quiránj ꞌu̱nj ꞌo̱ yoꞌóó, ne̱ vaa cheꞌé caꞌa̱nj que̱neꞌén ꞌu̱nj a. Cara̱a̱ xꞌnaa so̱ꞌ, se̱ caꞌvee cuchi̱ꞌ ꞌu̱nj maꞌ”, taj soꞌ rihaan mozó yoꞌ a. 19Ga̱a ne̱ ꞌó soꞌ cataj a: “Quiránj ꞌu̱nj ꞌu̱nꞌ yuntá scúj, ne̱ caꞌa̱nj que̱neꞌén ꞌu̱nj da̱j vaa nij xoꞌ a. Cara̱a̱ xꞌnaa so̱ꞌ, se̱ caꞌvee cuchi̱ꞌ ꞌu̱nj maꞌ”, taj soꞌ rihaan mozó yoꞌ a. 20Ne̱ ꞌó soꞌ roꞌ, cataj a: “Tiha̱j xcaj ꞌu̱nj chana̱, ne̱ cheꞌé dan se̱ caꞌvee cuchi̱ꞌ ꞌu̱nj maꞌ”, taj soꞌ rihaan mozó yoꞌ a.
21’Dan me se namán mozó, ne̱ nataꞌ mozó nu̱ꞌ se vaa caꞌmii ꞌo̱ ꞌo̱ nij soꞌ rihaan se‑ruꞌve̱e̱ mozó a. Ga̱a ne̱ caꞌmaan ndoꞌo rá síí navij rá chaꞌanj yoꞌ ga̱a cuno soꞌ snana̱ se‑mo̱zó soꞌ, ne̱ cataj soꞌ rihaan se‑mo̱zó soꞌ a: “Raꞌya̱nj cavi̱i̱ so̱ꞌ caꞌa̱nj so̱ꞌ da̱j a̱ nij callé, ne̱ ni̱caj so̱ꞌ man nij síí nique̱ do̱ꞌ, man nij síí larihuu̱ raꞌa do̱ꞌ, man nij síí chéé rengo̱ do̱ꞌ, man nij síí tuchri̱i do̱ꞌ, caꞌna̱ꞌ so̱ꞌ nihánj, ne̱ cha̱ nij soꞌ ga̱ níꞌ á”, taj soꞌ rihaan se‑mo̱zó soꞌ a. 22Veé da̱nj quiꞌyaj se‑mo̱zó soꞌ, ne̱ cuchiꞌ uún mozó yoꞌ rihaan se‑ruꞌve̱e̱ soꞌ, ne̱ cataj soꞌ a: “A̱j quiꞌyáj nu̱ꞌ suun caꞌnéꞌ so̱ꞌ rihanj, señor. Tza̱j ne̱ vaa rej quisi̱j cuma̱n doj yuvii̱ uún a”, taj mozó yoꞌ rihaan se‑ruꞌve̱e̱ soꞌ a. 23Ga̱a ne̱ cataj ruꞌvee yoꞌ rihaan mozó a: “Cavi̱i̱ so̱ꞌ caꞌa̱nj so̱ꞌ nu̱ꞌ nij chrej caꞌa̱a̱n do̱ꞌ, nu̱ꞌ nij chrej catu̱u̱n do̱ꞌ, ne̱ que̱rqueé so̱ꞌ man nij yuvii̱ se vaa caꞌna̱ꞌ nij soꞌ á. Ga̱a ne̱ cara̱a nu̱ꞌ veꞌ tucuaj na̱nj á. 24ꞌO̱ se cuano̱ nihánj me se cata̱j xnaꞌanj ꞌu̱nj rihaan so̱ꞌ se vaa xa̱ꞌ nij síí canacúún níꞌ asino ya̱a̱n, tza̱j ne̱ a̱ ꞌó nij soꞌ se̱ caꞌvee caꞌna̱ꞌ cha̱ ga̱ níꞌ a̱ maan ado̱nj”, taj soꞌ rihaan se‑mo̱zó soꞌ a ―taj Jesús a.
Cataj Jesús se vaa yu̱u̱n cheꞌe̱ caꞌne̱j nimán níꞌ canoco̱ꞌ níꞌ man o̱rúnꞌ Jesús a
25Dan me se ri̱i̱ uxrá yuvii̱ vaj ga̱ Jesús, ne̱ canica̱j soꞌ, cataj soꞌ rihaan nij yuvii̱ a:
26―Sese me rá ꞌo̱ soꞌ caꞌna̱ꞌ soꞌ rihanj, ne̱ sese gu̱un rá soꞌ se vaa vaa se uun doj rej soꞌ do̱ꞌ, nii soꞌ do̱ꞌ, nica̱ soꞌ do̱ꞌ, taꞌníí soꞌ do̱ꞌ, tinúú soꞌ do̱ꞌ, raꞌvij soꞌ do̱ꞌ, nda̱a nimán maꞌa̱n soꞌ do̱ꞌ, rihanj, ne̱ se̱ caꞌvee gu̱un soꞌ ꞌo̱ síí tucuꞌyón snana̱j a̱ maꞌ. 27Ne̱ síí naꞌvej rá quira̱nꞌ sayuun cheꞌé se me soꞌ síí noco̱ꞌ manj roꞌ, se̱ caꞌvee gu̱un soꞌ ꞌo̱ síí tucuꞌyón snana̱j a̱ maꞌ.
28’Dan me se sese gu̱un rá ꞌo̱ soj cune̱ꞌ soꞌ veꞌ nataꞌ xca̱a̱n, ne̱ síí quiꞌya̱j veꞌ yoꞌ me se asino nuchru̱j soꞌ cuentá sese quisi̱j se‑saꞌa̱nj soꞌ quisi̱j nu̱ꞌ veꞌ yoꞌ, raj a. 29Ne̱ sese se̱ quiꞌyaj soꞌ da̱nj nuchru̱j soꞌ cuentá asino ya̱a̱n, ga̱a ne̱ asa̱ꞌ cuchruj soꞌ tacóó veꞌ, ga̱a ne̱ se̱ caꞌvee quisi̱j veꞌ quiꞌya̱j soꞌ a̱ maꞌ. Ne̱ nij síí neꞌen se vaa quiꞌyaj soꞌ roꞌ, caꞌnga̱ꞌ naco̱o̱ nij soꞌ ni̱ꞌyaj nij soꞌ man soꞌ, 30ne̱ cata̱j nij soꞌ a: “Síí nihánj me se guun cheꞌe̱ soꞌ cuneꞌ soꞌ veꞌ, tza̱j ne̱ ne gu̱un nucua̱j soꞌ quisi̱j nu̱ꞌ veꞌ quiꞌya̱j soꞌ a̱ maꞌ”, cata̱j nij soꞌ ni̱ꞌyaj nij soꞌ man síí guun cheꞌe̱ veꞌ yoꞌ a.
31’Ne̱ dan me se sese vaa ꞌo̱ síí nica̱j suun rey vaa chi̱ꞌ míj tanuu rihaan, ne̱ sese caꞌna̱ꞌ ꞌó síí nica̱j suun rey vaa ico̱ míj tanuu rihaan cunu̱ꞌ ga̱ soꞌ, ga̱a ne̱ asino ya̱a̱n xca̱j soꞌ cuentá sese gu̱un nucua̱j soꞌ quiꞌya̱j canaán soꞌ rihaan síí vaa ico̱ míj tanuu rihaan a. 32Sese se̱ guun nucua̱j soꞌ quiꞌya̱j canaán soꞌ rá soꞌ, ga̱a ne̱ caꞌne̱j soꞌ síí caꞌanj suun caꞌmi̱i̱ ga̱ síí ꞌnaꞌ yoꞌ se vaa se̱ guun cunu̱ꞌ nij soꞌ a. Da̱nj cata̱j soꞌ ga̱a tiha̱j ꞌnaꞌ síí cunu̱ꞌ ga̱ soꞌ ga̱nꞌ a. Ga̱a ne̱ cachi̱nj niꞌya̱j síí caꞌanj suun yoꞌ rihaan síí ꞌnaꞌ, da̱j ga̱a̱ naꞌmi̱i̱ sa̱ꞌ ro̱j rey yoꞌ ga̱a ne̱ se̱ cunuꞌ ro̱j soꞌ maꞌ.
33’Dan me se ase vaa xcaj síí cune̱ꞌ veꞌ do̱ꞌ, rey cunu̱ꞌ ga̱ tuviꞌ do̱ꞌ, cuentá sese gu̱un nucua̱j ro̱j soꞌ quiꞌya̱j ro̱j soꞌ da̱nj roꞌ, veé da̱nj quiꞌya̱j gue̱e̱ soj si̱j me rá canoco̱ꞌ manj á. Ne̱ sese se̱ guun rá soj ta̱náj xco̱ soj nu̱ꞌ siꞌyaj soj do̱ꞌ, nu̱ꞌ tuviꞌ soj do̱ꞌ, canoco̱ꞌ soj manj, ne̱ se̱ caꞌvee gu̱un soj síí tucuꞌyón snana̱j a̱ maꞌ.
34’ꞌO̱ se ase vaa yaan ga̱ se chá roꞌ, da̱nj vaa nij síí tucuꞌyón snana̱j ga̱ chumii̱ nihánj, ne̱ vaa se uun ndoꞌo yaan na̱nj á. Dan me se sese ne ꞌne̱ꞌ chá yaan yoꞌ, ga̱a ne̱ taj se qui̱ꞌyáꞌ cunu̱u sa̱ꞌ yaan ga̱a a̱ maꞌ. 35Taj se gu̱un yaan yoꞌ rihaan toꞌóó níꞌ cunu̱u sa̱ꞌ toꞌóó níꞌ maꞌ. Taj se gu̱un yaan yoꞌ rihaan yaꞌluj se vaa cunu̱u sa̱ꞌ doj yaꞌluj maꞌ. Ma̱an se riꞌi̱j u̱u̱n nii man yaan vaa da̱nj xeꞌ a.
’Dan me se sese ta̱j yuꞌuj xréé soj, ne̱ cuno̱ soj nana̱ nihánj á ―taj Jesús rihaan nij yuvii̱ yoꞌ a.
Արդեն Ընտրված.
San Lucas 14: trc
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. 2024 segunda versión electrónica