San Juan 8
8
1Tza̱j ne̱ cavii Jesús xráá tacaan cuꞌna̱j Tacaan ma̱n Chruun Olivó a.
Caꞌmii Jesús ga̱ nij síí me rá go̱ꞌ yahij man chana̱ tumé cacunꞌ a
2Dan me se rej síj güii me se caꞌanj uún Jesús rej ya̱nj nuvií noco̱o a. Ga̱a ne̱ cuchiꞌ cunuda̱nj nij yuvii̱ rihaan soꞌ, ne̱ caꞌanj ca̱yáán soꞌ, ne̱ tucuꞌyón soꞌ man nij yuvii̱ yoꞌ a. 3Veé dan, ne̱ caꞌnaꞌ nij síí naquiꞌyaj cu̱u stucua̱nj Moisés do̱ꞌ, nij síí fariseo do̱ꞌ, ne̱ nica̱j nij soꞌ man ꞌo̱ chana̱ caꞌnaꞌ nij soꞌ rihaan Jesús a. Ne̱ chana̱ nariꞌ nii otoj ga̱ ꞌo̱ snóꞌo me noꞌ, tza̱j ne̱ né ni̱ca̱ noꞌ me soꞌ maꞌ. Cheꞌé dan taꞌaa nij soꞌ man noꞌ, ne̱ nica̱j nij soꞌ man noꞌ caꞌnaꞌ nij soꞌ rihaan Jesús, ne̱ cachrón nij soꞌ man chana̱ tanu̱u̱ maꞌa̱n nij soꞌ ga̱ Jesús a. 4Ga̱a ne̱ cataj nij soꞌ rihaan Jesús a:
―Chana̱ nihánj me se ma̱an orá otoj noꞌ ga̱ ꞌó snóꞌo, ne̱ nariꞌ nii man noꞌ, ne̱ taꞌaa nii man noꞌ, maestro. 5Dan me se stucua̱nj Moisés taj se vaa no̱ xcúún níꞌ go̱ꞌ níꞌ yahij man chana̱ vaa da̱nj nda̱a se cavi̱ꞌ noꞌ, taj tucuáán yoꞌ na̱nj á. Cheꞌé dan me, da̱j quiꞌya̱j níꞌ, rá so̱ꞌ ga̱ ―taj nij soꞌ, xnáꞌanj nij soꞌ man Jesús a.
6ꞌO̱ se guun rá nij soꞌ caꞌmi̱i̱ Jesús ꞌo̱ nana̱ vaa nij cheꞌé stucua̱nj Moisés, ga̱a ne̱ caꞌve̱e cuta̱ꞌ nij soꞌ cacunꞌ xráá Jesús cheꞌé nana̱ caꞌmi̱i̱ soꞌ a.
Dan me se caꞌanj canicu̱nꞌ ru̱j Jesús, ne̱ cachrón raꞌa soꞌ letrá rihaan yoꞌóó a. 7Tza̱j ne̱ ꞌo̱ rquee̱ nij soꞌ xnáꞌanj nij soꞌ man soꞌ a. Cheꞌé dan canicunꞌ caya̱ uún soꞌ, ne̱ cataj soꞌ rihaan nij soꞌ a:
―Sese da̱nj me rá soj, ne̱ caꞌve̱e, tza̱j ne̱ a̱ me maꞌa̱n ꞌo̱ soj taj a̱ doj cacunꞌ tumé roꞌ, caꞌve̱e go̱ꞌ yahij man noꞌ asino ya̱a̱n á ―taj Jesús rihaan nij soꞌ a.
8Ga̱a ne̱ caꞌanj canicu̱nꞌ ru̱j uún Jesús, ne̱ cachrón uún soꞌ letrá rihaan yoꞌóó yoꞌ a.
9Veé dan, ga̱a ne̱ guun naꞌa̱j nij soꞌ ga̱a cuno nij soꞌ snana̱ Jesús, ne̱ nayón nij soꞌ chrej, ne̱ caꞌanj nij soꞌ a. Dan me se nda̱a ꞌo̱ ꞌo̱ nij soꞌ nayón chrej, ne̱ asino ya̱a̱n caꞌanj nij síí cachij doj, ga̱a ne̱ canocoꞌ nij síí tachru̱u̱ doj xcó nij soꞌ, ne̱ caꞌanj cunuda̱nj nij soꞌ na̱nj ado̱nj. Nda̱a síj, ga̱a ne̱ quináj u̱u̱n Jesús, ne̱ nicunꞌ o̱rúnꞌ chana̱ yoꞌ rihaan soꞌ a. 10Ga̱a ne̱ canicunꞌ caya̱ uún Jesús, ne̱ cataj soꞌ rihaan chana̱ yoꞌ a:
―Me rej vaj nij síí cutaꞌ cacunꞌ xráá so̱ꞌ ga̱. A̱ ꞌó nij soꞌ ne quisi̱j rá cavi̱ꞌ so̱ꞌ a̱ naꞌ ―taj Jesús, xnáꞌanj soꞌ man chana̱ yoꞌ a.
11Ga̱a ne̱ cataj chana̱ yoꞌ a:
―Taj va̱j a̱ ꞌó síí me rá caꞌmi̱i̱ da̱nj a̱ maan, Señor ―taj chana̱ yoꞌ rihaan Jesús a.
Ga̱a ne̱ cataj Jesús rihaan noꞌ a:
―A̱ ꞌu̱nj se̱ cataj se vaa quiꞌya̱j nii sayuun mán so̱ꞌ a̱ maꞌ. Dan me se caꞌa̱nj so̱ꞌ, ne̱ se̱ quiꞌyáá so̱ꞌ a̱ doj cacunꞌ rej rihaan so̱ꞌ a̱ maꞌ ―taj Jesús rihaan chana̱ yoꞌ a.
Cataj Jesús se vaa ya̱ vaa snana̱ soꞌ a
12Ga̱a ne̱ cataj uún Jesús rihaan nij xrej ata̱ suun noco̱o do̱ꞌ, rihaan nij síí fariseo do̱ꞌ a:
―Ase vaa yaꞌan chuguu̱n vaa ꞌu̱nj rihaan soj si̱j ma̱n rihaan chumii̱ nihánj ado̱nj. Dan me se síí noco̱ꞌ manj roꞌ, se̱ cachéé soꞌ rej rmi̱ꞌ maꞌ. ꞌU̱nj roꞌ, me yaꞌan chuguu̱n cache̱e̱ ga̱ soꞌ, ne̱ xca̱j soꞌ cuentá me rej vaj soꞌ, qui̱ꞌyáj, ne̱ cheꞌé dan ga̱a̱ iꞌna̱ꞌ ya̱ nimán soꞌ nu̱ꞌ cavii nu̱ꞌ caꞌanj ado̱nj ―taj Jesús rihaan nij soꞌ a.
13Cheꞌé dan cataj nij síí fariseo rihaan soꞌ a:
―Tza̱j ne̱ ina̱nj ma̱ꞌán so̱ꞌ me síí taj xnaꞌanj cheꞌé ma̱ꞌán so̱ꞌ á. Né na̱na̱ ya̱ me nana̱ aꞌmii so̱ꞌ cheꞌé ma̱ꞌán so̱ꞌ a̱ maꞌ ―taj nij síí fariseo rihaan Jesús a.
14Ga̱a ne̱ cataj Jesús rihaan nij soꞌ a:
―Nda̱ꞌ se ma̱ꞌanj me síí aꞌmii cheꞌej, tza̱j ne̱ ya̱ vaa snana̱j na̱nj á. ꞌO̱ se neꞌenj me rej cavij, ne̱ neꞌenj me rej caꞌa̱nj ꞌu̱nj ado̱nj. Ne̱ xa̱ꞌ soj, tza̱j ne̱ ne neꞌen soj me rej cavij ne neꞌen soj me rej caꞌa̱nj ꞌu̱nj a̱ maꞌ. 15Xa̱ꞌ soj, tza̱j ne̱ aꞌneꞌ soj cacunꞌ cheꞌé ina̱nj se vaa ruviꞌ rihaan soj na̱nj ado̱nj. Tza̱j ne̱ ꞌu̱nj me se ne aꞌnéꞌ ꞌu̱nj cacunꞌ cheꞌé da̱j ꞌyaj a̱ ꞌó yuvii̱ maꞌ. 16Tza̱j ne̱ caꞌve̱e se caꞌne̱ꞌ ꞌu̱nj cacunꞌ da̱j ꞌyaj yuvii̱, tza̱j ne̱ ya̱ xcaj ꞌu̱nj cuentá cheꞌé cacunꞌ tumé yuvii̱ ado̱nj. Dan me se né o̱rúnꞌ ꞌu̱nj me síí xcaj cuentá cheꞌé yuvii̱ maꞌ. ꞌO̱ se vaa Réj síí caꞌnéé manj rihaan chumii̱ nihánj, ne̱ soꞌ me síí racuíj manj ado̱nj. 17Ne̱ rihaan stucua̱nj Moisés tucuáán noco̱ꞌ soj nó nana̱ taj se vaa sese cuya̱a̱n vaa nana̱ aꞌmii vi̱j ro̱j soꞌ, ne̱ ya̱ vaa snana̱ ro̱j soꞌ ado̱nj. 18Dan me se ꞌu̱nj me síí taj xnaꞌanj cheꞌé ma̱ꞌanj, ne̱ taj xnaꞌanj Réj síí caꞌnéé manj uún ado̱nj ―taj Jesús rihaan nij soꞌ a.
19Cheꞌé dan xnáꞌanj nij soꞌ man Jesús, cataj nij soꞌ a:
―Me rej ne réé so̱ꞌ ga̱ ―taj nij soꞌ a.
Ga̱a ne̱ cataj Jesús a:
―Ne neꞌen uxrá soj manj do̱ꞌ, man Réj do̱ꞌ maꞌ. ꞌO̱ se sese neꞌen ya̱ soj manj, ne̱ neꞌen soj man Réj uún tza̱j ado̱nj ―taj Jesús rihaan nij soꞌ a.
20Nu̱ꞌ nihánj me nana̱ tucuꞌyón Jesús ga̱a canicunꞌ soꞌ rej ya̱nj nuvií noco̱o rej rqué nij yuvii̱ saꞌanj rihaan Yaꞌanj a. Ne̱ taj va̱j yuvii̱ taꞌaa man soꞌ a̱ maꞌ. ꞌO̱ se ataa quisi̱j güii caꞌve̱e quiꞌya̱j nii sayuun man Jesús na̱nj ado̱nj.
Cataj Jesús se vaa se̱ cuchiꞌ nij síí uun chij rihaan nij yuvii̱ israelitá síí ne amán rá niꞌya̱j man Jesús rihaan Yaꞌanj a
21Cheꞌé dan cataj uún Jesús rihaan nij síí uun chij rihaan nij yuvii̱ israelitá a:
―ꞌU̱nj nihánj me se cavi̱i̱ ꞌu̱nj caꞌa̱nj ꞌu̱nj, ga̱a ne̱ nano̱ꞌ soj manj a. Tza̱j ne̱ asa̱ꞌ caviꞌ soj, ne̱ ꞌo̱ quita̱j nu̱ꞌ cacunꞌ tumé soj xráá soj, ne̱ se̱ guun nucua̱j soj cuchi̱ꞌ soj rej caꞌa̱nj ꞌu̱nj maꞌ ―taj Jesús rihaan nij soꞌ a.
22Cheꞌé dan xnáꞌanj nij síí uun chij rihaan nij yuvii̱ israelitá man tuviꞌ nij soꞌ, cataj nij soꞌ a:
―Ticavi̱ꞌ soꞌ man maꞌa̱n soꞌ, rá soj naꞌ. Cheꞌé dan cataj soꞌ se vaa se̱ guun nucua̱j níꞌ cuchi̱ꞌ níꞌ rej caꞌa̱nj soꞌ, rá soj naꞌ ―taj nij soꞌ, xnáꞌanj nij soꞌ man tuviꞌ nij soꞌ a.
23Ga̱a ne̱ cataj Jesús rihaan nij soꞌ a:
―Soj roꞌ, me síí avii rej nica̱ꞌ, ne̱ ꞌu̱nj roꞌ, me síí avii rej xta̱ꞌ a. Soj roꞌ, me síí ma̱n rihaan chumii̱ nihánj, tza̱j ne̱ né si̱j ma̱n rihaan chumii̱ nihánj mej maꞌ. 24Cheꞌé dan cataj xnaꞌanj ꞌu̱nj rihaan soj se vaa asa̱ꞌ caviꞌ soj, ne̱ ꞌo̱ quita̱j nu̱ꞌ cacunꞌ tumé soj xráá soj na̱nj ado̱nj. ꞌO̱ se sese se̱ cuchumán rá soj se vaa mé ꞌu̱nj síí a̱j cataj xnaꞌanj ꞌu̱nj rihaan soj se vaa mej, ne̱ asa̱ꞌ caviꞌ soj, ne̱ ꞌo̱ quita̱j nu̱ꞌ cacunꞌ tumé soj xráá soj na̱nj ado̱nj ―taj Jesús rihaan nij soꞌ a.
25Cheꞌé dan xnáꞌanj nij soꞌ man Jesús, cataj nij soꞌ a:
―Me síí mé so̱ꞌ ga̱ ―taj nij soꞌ, xnáꞌanj nij soꞌ man Jesús a.
Ga̱a ne̱ cataj Jesús rihaan nij soꞌ a:
―A̱j cataj xnaꞌanj ꞌu̱nj rihaan soj asino ya̱a̱n me si̱j mej ado̱nj. 26Vaa ndoꞌo nana̱ no̱ xcúnj caꞌmi̱j cheꞌé soj, ne̱ no̱ xcúún uxraj ya̱ caꞌne̱ꞌ ꞌu̱nj cacunꞌ cheꞌé soj na̱nj á. Dan me se síí caꞌnéé manj, tza̱j ne̱ ina̱nj nana̱ ya̱ aꞌmii soꞌ, ne̱ ina̱nj nana̱ caꞌmii soꞌ cunoj me nana̱ taj xnaꞌanj ꞌu̱nj rihaan soj si̱j ma̱n rihaan chumii̱ nihánj ado̱nj ―taj Jesús rihaan nij soꞌ a.
27Tza̱j ne̱ ne queneꞌe̱n nij soꞌ se vaa caꞌmii Jesús cheꞌé Rej soꞌ Yaꞌanj si̱j caꞌnéé man Jesús a̱ maꞌ. 28Cheꞌé dan cataj Jesús rihaan nij soꞌ a:
―Asa̱ꞌ quisíj naxca̱j soj mán ꞌu̱nj cano̱j rihaan rcutze̱, ga̱a ne̱ xca̱j ya̱ soj cuentá se vaa ya̱ ya̱ Si̱j Caꞌnéé Yaꞌanj Ni̱caj Yuꞌunj man Yuvii̱ mej ado̱nj. Ne̱ ne ꞌyáá ꞌu̱nj se vaa avii ina̱nj raa̱ ma̱ꞌanj maꞌ. ꞌO̱ se aꞌmii ꞌu̱nj nda̱a vaa tucuꞌyón Réj manj ado̱nj. 29Ne̱ soꞌ me síí caꞌnéé manj rihaan soj, ne̱ ꞌo̱ nicunꞌ soꞌ ga̱ ꞌu̱nj, ne̱ a̱ doj ne ta̱náj yaníj soꞌ manj a̱ maꞌ. ꞌO̱ se ꞌyáá ꞌu̱nj ina̱nj se vaa me rá maꞌa̱n soꞌ qui̱ꞌyáj ado̱nj ―taj Jesús rihaan nij soꞌ a.
30Ga̱a quisíj caꞌmii Jesús nana̱ vaa da̱nj, ga̱a ne̱ cuchumán rá queꞌe̱e̱ ndoꞌo yuvii̱ niꞌya̱j nij soꞌ man Jesús a.
Caꞌmii Jesús ga̱ nij síí israelitá cuchumán rá niꞌya̱j man soꞌ a
31Cheꞌé dan cataj Jesús rihaan nij síí israelitá cuchumán rá niꞌya̱j man soꞌ a:
―Sese ꞌo̱ canoco̱ꞌ soj snana̱j, ne̱ si̱j ya̱ ya̱ tucuꞌyón snana̱j me soj, 32ne̱ queneꞌe̱n soj nu̱ꞌ nana̱ ya̱, ne̱ nani̱i̱ soj rihaan suun uun mozó, quiꞌya̱j nana̱ ya̱ yoꞌ chugua̱nj ―taj Jesús rihaan nij soꞌ a.
33Ga̱a ne̱ cataj nij soꞌ rihaan Jesús a:
―ꞌO̱ se taꞌníí taꞌnij siꞌno̱ síí cuꞌna̱j Abraham síí cayáán ga̱a naá me núj, ne̱ daj chiha̱a̱ míj ne gu̱un núj mozó siꞌya̱j a̱ ꞌó yuvii̱ a̱ maꞌ. Me cheꞌé cataj so̱ꞌ se vaa nani̱i̱ núj rihaan suun uun mozó ga̱ ―taj nij soꞌ, xnáꞌanj nij soꞌ man Jesús a.
34Ga̱a ne̱ cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa síí ꞌyaj cacunꞌ roꞌ, me síí uun mozó rihaan cacunꞌ yoꞌ ado̱nj. 35Ne̱ xa̱ꞌ mozó, tza̱j ne̱ se̱ caꞌvee ca̱yáán soꞌ veꞌ nu̱ꞌ cavii nu̱ꞌ caꞌanj maꞌ. Ne̱ xa̱ꞌ taꞌníí síí tucua̱ veꞌ, tza̱j ne̱ soꞌ me síí caꞌve̱e ca̱yáán veꞌ nu̱ꞌ cavii nu̱ꞌ caꞌanj ado̱nj. 36Cheꞌé dan me sese ti̱nanii Taꞌníí Yaꞌanj man soj rihaan suun uun mozó, ne̱ ya̱ ya̱ si̱j nanii rihaan suun uun mozó me soj ado̱nj.
37’A̱j neꞌenj se vaa taꞌníí taꞌnij siꞌno̱ síí cuꞌna̱j Abraham me soj á. Tza̱j ne̱ nanoꞌ uxrá soj da̱j quiꞌya̱j soj ne̱ cavi̱ꞌ ꞌu̱nj, cheꞌé se naꞌvej rá soj nari̱ꞌ soj canoco̱ꞌ soj snana̱j maꞌ. 38Dan me se aꞌmii ꞌu̱nj ina̱nj se vaa queneꞌenj ga̱a nicúnꞌ ꞌu̱nj rihaan Réj a. Tza̱j ne̱ nij soj me síí ꞌyaj nda̱a vaa cataj rej soj rihaan soj ado̱nj ―taj Jesús rihaan nij soꞌ a.
39Ga̱a ne̱ cataj nij soꞌ rihaan Jesús a:
―Xi̱i núj me síí cuꞌna̱j Abraham síí cayáán ga̱a naá ado̱nj ―taj nij soꞌ a.
Ga̱a ne̱ cataj Jesús rihaan nij soꞌ a:
―Sese ya̱ ya̱ taꞌníí taꞌnij siꞌno̱ Abraham me soj, ne̱ quiꞌyaj soj nda̱a vaa quiꞌyaj Abraham asuun tza̱j a. 40Tza̱j ne̱ cuano̱ nihánj me se nanoꞌ soj da̱j quiꞌya̱j soj ne̱ cavi̱ꞌ ꞌu̱nj, ne̱ ꞌu̱nj me síí cataj xnaꞌanj rihaan soj nu̱ꞌ nana̱ ya̱ cataj xnaꞌanj Réj Yaꞌanj rihanj ado̱nj. Dan me se ino̱ uxrá vaa ꞌyaj soj ga̱ Abraham ado̱nj. 41Ma̱an se ꞌyaj soj ina̱nj se vaa ꞌyaj rej soj na̱nj á ―taj Jesús rihaan nij soꞌ a.
Cheꞌé dan cataj nij soꞌ rihaan Jesús a:
―Né taꞌni̱j cacunꞌ me núj maꞌ. ꞌO̱ se o̱rúnꞌ Rej núj, ne̱ Yaꞌanj me soꞌ na̱nj á ―taj nij soꞌ a.
42Ga̱a ne̱ cataj Jesús rihaan nij soꞌ a:
―Sese ya̱ Yaꞌanj me Rej soj, ne̱ cara̱a̱ cochro̱j soj rihanj ado̱nj. ꞌO̱ se ꞌu̱nj me síí cavii rej nicu̱nꞌ Yaꞌanj, ne̱ caꞌnáꞌ ꞌu̱nj nihánj chugua̱nj. Dan me se ne caꞌna̱ꞌ ma̱ꞌanj nihánj maꞌ. ꞌO̱ se soꞌ me síí caꞌnéé manj caꞌnaj nihánj ado̱nj.
43’Cheꞌé se naꞌvej rá soj cuno̱ soj snana̱j roꞌ, cheꞌé dan sayu̱u̱n uxrá vaa nana̱ aꞌmij rihaan soj ado̱nj. 44ꞌO̱ se taꞌníí Síí Chre̱e me soj, ne̱ me rá soj quiꞌya̱j soj ina̱nj nda̱a vaa me rá rej soj Síí Chre̱e quiꞌya̱j soj ado̱nj. Ne̱ xa̱ꞌ soꞌ, tza̱j ne̱ síí ticaviꞌ man yuvii̱ me soꞌ asi̱j guun cheꞌe̱ chumii̱ nihánj, ne̱ daj chiha̱a̱ míj ne neꞌen soꞌ caꞌmi̱i̱ nica̱ soꞌ nana̱ ya̱ maꞌ. ꞌO̱ se ne aranꞌ rá soꞌ caꞌmi̱i̱ soꞌ nana̱ ya̱ a̱ maan ado̱nj. Da̱nj ina̱nj vaa soꞌ, aꞌmii ne̱ soꞌ, cheꞌé se síí ne̱ ina̱nj me soꞌ, ne̱ síí tucuꞌyón man yuvii̱ caꞌmi̱i̱ ne̱ yuvii̱ me uún soꞌ ado̱nj.
45’Ne̱ xa̱ꞌ ꞌu̱nj, tza̱j ne̱ cheꞌé se nana̱ ya̱ aꞌmij rihaan soj, cheꞌé dan ne amán rá soj uno soj snana̱j a̱ maꞌ. 46A̱ ꞌó soj se̱ caꞌvee quiri̱ꞌ cacunꞌ cuta̱ꞌ xráj a̱ maꞌ. Ina̱nj nana̱ ya̱ aꞌmij rihaan soj na̱nj ado̱nj. Me cheꞌé ne amán rá soj cuno̱ soj snana̱j ga̱. 47ꞌO̱ se síí noco̱ꞌ ya̱ man Yaꞌanj me síí uno snana̱ Yaꞌanj ado̱nj. Tza̱j ne̱ né si̱j noco̱ꞌ man Yaꞌanj me soj a̱ maꞌ. Cheꞌé dan ne uno soj a̱ maan ado̱nj ―taj Jesús rihaan nij yuvii̱ israelitá a.
48Ga̱a ne̱ cataj nij síí uun chij rihaan nij yuvii̱ israelitá a:
―Ya̱ uxrá vaa nana̱ caꞌmii núj se vaa né tuvi̱ꞌ núj mé so̱ꞌ a̱ maꞌ. ꞌO̱ se síí cavii estadó Samaria mé so̱ꞌ chugua̱nj. Nu̱u̱ nana̱ chre̱e nimán so̱ꞌ ado̱nj ―taj nij soꞌ rihaan Jesús a.
49Ga̱a ne̱ cataj Jesús a:
―Taj va̱j nana̱ chre̱e nuû nimanj maꞌ. ꞌO̱ se aráj co̱chróó ꞌu̱nj rihaan Réj Yaꞌanj, tza̱j ne̱ ne aráj cochro̱j soj rihanj a̱ maꞌ. 50Ne nanóꞌ ꞌu̱nj se vaa cata̱j yuvii̱ se vaa si̱j sa̱ꞌ mej maꞌ. Tza̱j ne̱ vaa Yaꞌanj, ne̱ soꞌ me síí me rá cata̱j yuvii̱ se vaa si̱j sa̱ꞌ uxrá mé ꞌu̱nj, ne̱ soꞌ me síí caꞌne̱ꞌ cacunꞌ cheꞌé yuvii̱ ado̱nj. 51Ya̱ ya̱ cata̱j xnaꞌanj ꞌu̱nj rihaan soj cuano̱ se vaa sese cuno̱ soj snana̱j, ne̱ daj chiha̱a̱ míj se̱ caviꞌ soj a̱ maꞌ ―taj Jesús a.
52Cheꞌé dan nij síí uun chij rihaan nij yuvii̱ israelitá cataj rihaan soꞌ a:
―Cuano̱ nihánj me se neꞌen ya̱ núj se vaa nu̱u̱ nana̱ chre̱e nimán so̱ꞌ á. ꞌO̱ se caviꞌ síí cuꞌna̱j Abraham caviꞌ nij síí nataꞌ snana̱ Yaꞌanj ga̱a naá caviꞌ, ne̱ nihánj me taj so̱ꞌ se vaa sese cuno̱ núj snana̱ so̱ꞌ, ne̱ daj chiha̱a̱ míj se̱ caviꞌ núj, taj so̱ꞌ maan asânj. 53Dan me se ga̱a naá me se caviꞌ xi̱i núj síí cuꞌna̱j Abraham, ne̱ si̱j sa̱ꞌ doj mé so̱ꞌ rihaan soꞌ, rá so̱ꞌ naꞌ. Ne̱ caviꞌ nij síí nataꞌ snana̱ Yaꞌanj uún a. Da̱j si̱j mé so̱ꞌ, rá so̱ꞌ ga̱ ―taj nij soꞌ rihaan Jesús a.
54Ga̱a ne̱ cataj Jesús rihaan nij soꞌ a:
―Sese cata̱j ꞌu̱nj se vaa si̱j sa̱ꞌ uxrá me ma̱ꞌanj, ne̱ taj yuꞌvee nó snana̱j a̱ maꞌ. Tza̱j ne̱ vaa Réj, ne̱ soꞌ me síí taj se vaa síí sa̱ꞌ uxrá mej ado̱nj. Dan me se Yaꞌanj me Réj, ne̱ nij soj me síí taj se vaa noco̱ꞌ soj man soꞌ, 55tza̱j ne̱ ne neꞌen uxrá soj man soꞌ a̱ maꞌ. Tza̱j ne̱ ꞌu̱nj me síí neꞌen man soꞌ ado̱nj. Dan me se sese cata̱j ꞌu̱nj se vaa ne neꞌenj man soꞌ, ne̱ tuviꞌ soj síí ne̱ mej na̱nj á. Tza̱j ne̱ ya̱ ya̱ neꞌenj man soꞌ, ne̱ noco̱ꞌ ꞌu̱nj snana̱ soꞌ chugua̱nj.
56’Dan me se guun niha̱ꞌ uxrá rá nimán xi̱i soj síí cuꞌna̱j Abraham cheꞌé se queneꞌen soꞌ se vaa vaa güii queneꞌe̱n soꞌ se vaa caꞌna̱ꞌ ꞌu̱nj rihaan chumii̱ nihánj a. Dan me se queneꞌen soꞌ se vaa caꞌnáꞌ ꞌu̱nj, ga̱a ne̱ guun niha̱ꞌ uxrá ya̱ rá nimán soꞌ ado̱nj ―taj Jesús rihaan nij soꞌ a.
57Cheꞌé dan nij síí uun chij rihaan nij yuvii̱ israelitá cataj rihaan Jesús a:
―Ataa quisi̱j so̱ꞌ vi̱j chiha̱a̱ chi̱ꞌ (50) yoꞌ a. Asa̱ꞌ aꞌvee taj so̱ꞌ se vaa queneꞌén so̱ꞌ man Abraham ga̱ ―taj nij soꞌ, xnáꞌanj nij soꞌ man Jesús a.
58Ga̱a ne̱ cataj Jesús rihaan nij soꞌ a:
―Ya̱ ya̱ cata̱j xnaꞌanj ꞌu̱nj rihaan soj cuano̱ se vaa asi̱j ataa caꞌnga̱a̱ Abraham, ne̱ a̱j vaa ꞌu̱nj na̱nj ado̱nj ―taj Jesús rihaan nij soꞌ a.
59Cheꞌé dan taꞌaa nij soꞌ yahij, ne̱ go̱ꞌ nij soꞌ man Jesús, rá nij soꞌ a. Tza̱j ne̱ curiha̱nj yuve̱ soꞌ rej ya̱nj nuvií noco̱o, ne̱ caꞌanj soꞌ a. Dan me se ma̱an tanu̱u̱ scaꞌnúj nij soꞌ cachén Jesús, caꞌanj soꞌ a.
Արդեն Ընտրված.
San Juan 8: trc
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© Wycliffe Bible Translators, Inc. 2024 segunda versión electrónica