Génesis 4
4
Abelta Caín wanusishqan
1Saypitanami Adánwan tarna Eva qeshyaq rikakurqan. Nirkur wawan yuriptinmi nirqan: <<Tayta Dios munaptinmi olqu wawata tarishkä>>.
Saymi wawanta jutisirqan Caín#4.1 Caín ninanqa tarish ninanmi. jutin kananpaq.
2Saypitanami yapay olqu wamrata wachar jutisirqan Abel jutin kananpaq. Abel winarkurnami uyshata y cabrata ashmakuq karqan. Caínnami chakra aruq karqan.
3Saypita watakuna päsarkuptinnami Caínqa mikuyta cosechashqanpita Tayta Diospaq ofrendata aparqan. 4Saynömi Abelpis Tayta Diospaq aparqan uyshankunapa y cabrankunapa punta yuriq wawankunata. Apashqanta pishtarkurmi wirankunata Diospaq rupasirqan. Saytami Tayta Dios kushish chaskirqan.#Heb. 11.4. 5Caín apashqantami isanqa chaskirqansu. Saymi Caín fiyupa rabyaptin cäranpis jukniraqyarqan.
6Saymi Caínta Tayta Dios nirqan: <<¿Imanirtaq rabyash y jukniraqyash puriykanki? 7Alita rurarqa manami jukniraqyash kaykankimansu. Mana alita ruraptikimi jusalikuy watqaraykäshunki munayninman churashunaykipaq. Sayno kaptinpis shumaq tantiyakurqa manami jusalikunkisu>>.
8Saypita juk junaqmi Caínqa wawqin Abelta nirqan: <<Jirkapa rikachakuq aku>>.
Jirkaman chaykurnami traicionpita sarir Abelta wanusirqan.#Mat. 23.35; Luc. 11.51; 1Juan 3.12.
9Saymi Caínta Tayta Dios tapurqan: <<¿Maytaq wawqiki Abel?>>
Sayno tapuptinmi nirqan: <<Manami musyäsu. ¿Wawqï rikaqku kaykä imami?>>
10Niptinmi Tayta Dios nirqan: <<¿Imatataq ruraykushkanki? Wawqikipa yawarninta jichashqaykimi qayakaykäman.#Heb. 12.24. 11Saymi kay pasacho maldicionädu kar qarqush kankipaq. Wawqikipa yawarninta jichashqaykipitami 12murupakushqaykipis wayunqasu. Saynölami jamayta mana tariypa maysaypapis purikunkipaq>>.
13Niptinmi Caín nirqan: <<Sayno castigamaptiki manami awantämansu, Taytay. 14Kaypita qarqamarqa nawpaykipita karumanmi qarqaykämanki. Sayno karqa jamaytapis mana tariypachir maysaypapis puriykushaq. Sayno puriykaqtachir pipis wanusimanqa>>.
15Saymi Tayta Dios nirqan: <<Pipis wanusishuqnikiqa qanchis kuti fiyupa castigashqami kanqa>>.
Sayno nirmi señalta churaparqan Caínta pipis mana wanusinanpaq. 16Saymi Tayta Diospa nawpanpita Nod#4.16 Nod ninanqa purikuq ninanmi. partiman Caín aywakurqan saycho tänanpaq. Sayqa karqan Edén huertaman inti jeqamunanlächömi.
Caínpita miraqkuna
17Saypitanami Caínpa warmin qeshyaq rikakur olqu wamrata qeshyakurqan. Say wamrantami jutisirqan Enoc jutin kananpaq. Nirkurmi Caín juk markata sharkarkasir say markapa jutinta churaparqan surinpa jutilanta. 18Enocmi karqan Iradpa taytan. Iradmi karqan Mehujaelpa taytan. Mehujaelmi karqan Metusaelpa taytan. Metusaelmi karqan Lamecpa taytan.
19Lamec karqan ishkay warmiyuqmi. Jukaq warminpa jutinmi karqan Ada y jukaqpanami Zila. 20Adami wawanta jutisirqan Jabal jutin kananpaq. Jabalmi wakin runakunapita mas puntata toldukunacho tashpan uywakunata ashmakurqan. 21Jabalpa wawqinmi karqan Jubal. Jubalmi puntata arpata y kënata tukayta yachakurqan.
22Zilanami qeshyakurqan Tubal-caínta. Tubal-caín herrëru karmi broncipita y fiërrupita imaykatapis ruraq. Paninpa jutinmi karqan Naama.
23Juk kutichömi ishkan warminkunata Lamec nirqan: <<¡Ada, Zila, nishqäta wiyayämay! Maqapakamaptinmi juk runata wanurasishkä. Maqta kaptinpis saripakamaptinmi supayninta apasishkä. 24Caínta pipis wanusir qanchis kuti castigash kananpaq kaptinqa noqata yatamaq kaqqa qanchis chunka qanchis (77) kuti masmi castigash kanqa>>.
Set yurishqan
25Adánpa warmin yapay qeshyaq rikakurmi olqu wamrata wacharqan. Yuriykuptinmi nirqan: <<Wawä Abelta Caín wanusish kaptinmi Tayta Dios munash Abelpa trukan juk wawata tarinäpaq. Saymi paypa jutin kanqa Set>>.#4.25 Set ninanqa trukanta qoykush ninanmi.
26Setnami surin yuriykuptin jutin churaparqan Enós kananpaq. Enós kashqanpitaraqmi runakuna Tayta Diosta adorar qalaykuyarqan.
Արդեն Ընտրված.
Génesis 4: qvhB
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2003, Wycliffe Bible Translators, Inc. All rights reserved.