Mateu 2
2
Haga Typy 2
Õꞌẽ Haria Urienti Kaipyi
1Aipotypot Iesui ti tuwemoherep taꞌyn mesuwe mekewat tawa hit Perẽi yi Iuteu pe karãpe Eroti toineꞌen morekuatno itotiat turan. Miꞌi hap eꞌat pe waikiru etiat wemuꞌe haria tõꞌẽ tõꞌẽ taꞌatueꞌyi Urienti kaipywiaria tawa Ierusarẽi kape aikope pyi aat wẽtem hap kaipyi. 2Miꞌi hawyi putꞌok iꞌatuꞌe tawa wato Ierusarẽi note hawyi -Aikope som hirokat Aiporekuat pakup muat iꞌywaĩꞌĩ iꞌatuꞌe itotiaria pe. Aikope som tuweꞌywãꞌĩ eiꞌywania Iuteu ywania Potypot pakup iꞌatuꞌe. Katupono haꞌawyte raꞌyn urutaꞌakasa aat wẽtem hap kaipyi hewaikiru iꞌywaĩꞌĩ hap enoi hap urueꞌyi tote iꞌatuꞌe. Miꞌi pote urutõꞌẽ meikowo hewaikiru upi imotypot hamuat iꞌatuꞌe. 3Iꞌatuꞌe hap morekuat Eroti tikuap hawyi tuwanetup koꞌi koꞌi kahato iꞌewyte tawa Ierusarẽi miaria wy. 4Miꞌi pote morekuat Eroti tiꞌatunug naꞌyn tuwewowi paꞌi kororia akag koꞌi iꞌewyte miwan kuap haria hawyi apo e iꞌatuepe -Mehinꞌin e aikope som tuwemoherep irane Tupana Mipoꞌoro Wuatꞌi Porekuat Koro wuat sese e. 5Miꞌi hawyi taꞌatuwesat -Taꞌi tawa hit Perẽi me yi Iuteu pe tuwemoherep Miꞌi Miit iꞌatuꞌe wyti saꞌawyꞌi wuaria Tupana ehay moherep haria miwan iꞌatuꞌe. Katupono saꞌawyꞌi Tupana ehay moherep hat mio tã e miwan me yian mete iꞌatuꞌe. 6-Taꞌi ahetawa kurin moityꞌi eweiꞌe tawa Perẽi yi Iuta ywania e. Maꞌato yt eiwemoti teiꞌo ehetawa kurin hap ete katupono ti aru meiũran ehetawa hit Perẽi poꞌog poꞌog miitꞌin mikuap mo topyhuꞌat yi Iuta ywania yne tawa koꞌi kai katupono ehetawa hit Perẽi me tuwemoherep irane Isareu ywania Potypot Koro sese e ti saꞌawyꞌi Tupana ehay moherep hat Mikeia tomiwan me 5.2 pe iꞌatuꞌe morekuat Eroti pe. 7Tuwat i raꞌyn inapin haria hawyi morekuat Eroti tiꞌatukay kay aat wẽtem hap kaipywiat õꞌẽ haria waikiru etiat wemuꞌe haria iraꞌyn apo toꞌe migꞌi wo iꞌatuepiat hamo -Karapeĩ eweiꞌakasa saꞌawyꞌi mekewat waikiru e iꞌatuepe. Karapeĩ tuwemoherep saꞌawyꞌi ehewowi mekewat waikiru e. 8Miꞌi hawyi taꞌatuhenoi yne morekuat Eroti pe hawyi toꞌe waikiru etiat wemuꞌe haria pe. -Waku eweiwat tawa hit Perẽi kape uhytꞌiꞌin e. Miꞌi tote o apo eweiꞌe kahato Hirokat etiat aikope aikope tuwemoherep hap e. Miꞌi hawyi eweipuẽti hawyi waku ewehenoi uhepe aikope toineꞌen hap katupono areto mono imotypot hamo e. 9Miꞌi hawyi waikiru kuap haria tuwat raꞌyn. Teꞌeruwẽtem morekuat yat koro pyi turan teꞌeraꞌakasa i raꞌyn muap upi mekewat waikiru saꞌawyꞌi wuat aat wẽtem hap kaipywiat. Miꞌi hawyi ti toto i raꞌyn iꞌatueꞌyian me teꞌen teꞌen Hirokat ieineꞌen hap kape. Miꞌi hawyi waikiru upi tuwat tawa hit Perẽi kape. Putꞌok e waikiru itote hawyi topyhuꞌat Hirokat ieineꞌen hap apy tote. 10Teꞌeraꞌakasa raꞌyn mekewat waikiru kapiat hawyi iꞌatuwepiit kahato raꞌyn. 11Miꞌi hawyi tuwehytꞌok taꞌyn iꞌyat pe taꞌatupuẽti taꞌyn hirokat ity Maria wywo. Miꞌi hawyi teꞌeruwepỹꞌãtutuk hirokat motypot hamo. -Waku taꞌatuꞌe hawyi taꞌatumiereto koꞌi taꞌatuꞌapypok taꞌyn imehit rakat uru kawiat hawyi taꞌatuium neꞌen neꞌi hirokat pe ikyꞌe hap. Miꞌi hawyi taꞌatuium ikamhigse rakat miwuk wo ikyꞌe hap. Miꞌi hawyi mohag hy Mira e hap taꞌatuium hirokat motypot haype. 12Miꞌi hawyi iꞌatumuꞌetu Tupana tiꞌatumowatetup taꞌyn. Mio tã e -Yt eweiꞌaipok teiꞌo morekuat Eroti puo henoi topiat hamo. Miꞌi pote teꞌeraꞌaipok taꞌatueꞌyi kape wẽtup muap upi.
Tuwat Raꞌyn Esitu Kape
13Miꞌi hawyi Tupana mipoꞌoro atipy kaipywiat tuwemoherep Iuse muꞌetu hawyi toꞌe -Epoĩꞌam no Iuse e. Etioto ro hirokat wẽtup yi kape pya meiũpe pyi mekewat yi Esitu kape ity wywo e. Eweipopy ro e katupono ti aru morekuat Eroti tikat raꞌyn hirokat iꞌauka hamo neꞌi e. Waku yi Esitu pe eweikupteꞌen. Meiũran hawyi ahenoi i karãpe waku meikowo eweiꞌaipok iraꞌyn e atipy kaipywiat Iuse muꞌetu. 14Miꞌi hawyi Iuse ipoĩꞌam naꞌyn wãtym muo hawyi meremo Iuse tioto hirokat ity wywo teꞌeropopy Esitu kape. 15Miꞌi hawyi morekuat Eroti kuꞌuro hap kape tukupteꞌen yi Esitu tote aikotã saꞌawyꞌi Tupana toꞌe miwan me hap ewy -Meiũran ti aru Uhaꞌyru atikay kay yi Esitu kaipyi e saꞌawyꞌi wuat Oseia miwan me 11.1 pe.
Eroti Tiꞌatuꞌauka Hirokaria
16Maꞌato morekuat Eroti tikuap taꞌyn sehaꞌat haria yt topuo i teꞌereꞌaipok hawyi ipyꞌahak topyhuꞌat. Miꞌi hawyi morekuat Eroti tiꞌatupoꞌoro raꞌyn tesuraraꞌin tawa hit Perẽi kape yne itotiaria hirokaria ihainia hit koꞌi typy anu pyi iꞌywaĩꞌĩ rakaria atuꞌuka yne hamo. Iꞌewyte hirokaria ihainia hitꞌin yt pya hin i Perẽi kawiat ieineꞌen haria typy anu pyi yi kape rakaria toiꞌatuuka hamo. Katupono typy anu waikiru etiat wemuꞌe haria teꞌeraꞌakasa waikiru kapiat pote. 17Toiꞌatuuka yne itote aikotã Tupana ehay moherep hat Ieremia mienoi tomiwan miat saꞌawyꞌi sese hap ewy. 18-Tawa Perẽi pyi mekewat yi Hama kape ti aru iꞌahay kahato iꞌatuwoꞌokakꞌi hap yt he hin i iꞌatuetiat hap. Miꞌi turan ti Mana Hakeu ywania tawa hit Perẽi miaria toꞌokakꞌi kahato taꞌatumepytꞌin satyꞌu haype. Miꞌi hap koꞌi yt uwe kuap i imoperup i porap. Katupono iꞌatumepytꞌin totat yne raꞌyn pote ti Tupana ehay enoi hat Ieremia miwan pe 31.15 pe yian mete Perẽi miat hirokaria atuuka hamuat hap etiat.
Teꞌeruweꞌaipok Nasare Kape
19Miꞌi hawyi yi Esitu pe Iusueꞌin tukupteꞌen motꞌi maꞌato meiũran morekuat Eroti ikuꞌuro raꞌyn hawyi Tupana tipoꞌoro iraꞌyn temiit atipy kaipyi Iuse kape imuꞌetu yi Esitu piat heineꞌen turan. 20-Epoĩꞌam no Iuse e. Etioto ro hirokat ity wywo hawyi eweiꞌaipok i ro Isareu ywania eꞌyi kape katupono ti mio hirokat auka teran hat morekuat Eroti ikuꞌuro raꞌyn e atipy kaipywiat suut hat Iuse muꞌetu. 21Miꞌi hawyi Iuse ipoĩꞌam hawyi toꞌe -Pyno waku wataꞌaipok i raꞌyn ahetawa kape e hawyi tuwat iraꞌyn hirokat hawyi ity wywo taꞌatueꞌyi Isareu kape.
Iruka 2.39 Piat Ewy
22Putꞌok taꞌatuꞌe itote hawyi Iuse tikuap taꞌyn morekuat Eroti saꞌyru Akeirau e hap het rakat topyhuꞌat toꞌywot saipepiatno heiam note aiũpe pyi saꞌawyꞌi iꞌywot tiꞌatuuka hirokaria hap tote. Miꞌi pote Iuse tokenꞌẽ itotiat toineꞌen hamo. Miꞌi hawyi imuꞌetu Tupana timowatetup Iuse pe -Yt ereineꞌen neiꞌo meiũpe yi Iuteu pe e Tupana Iuse muꞌetu. Miꞌi pote tuwat i raꞌyn mekewat yi Karireia kape iraꞌyn. 23Miꞌi hawyi tukupteꞌen mekewat tawa Nasare pe raꞌyn. Miꞌi tã ti tuwemoherep aikotã saꞌyru tehay moherep haria puo pywiat imienoi ewy. Miꞌi pote wyti Iesui Nasare piat iꞌatuꞌe.
Արդեն Ընտրված.
Mateu 2: mav
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2017, Wycliffe Bible Translators, Inc. All rights reserved.