Mateo 19
19
So Jesús ỹa'axat da lataxac ca nalate' aca lhua
(Marcos 10.1-12; Lucas 16.18)
1Qaq co'ollaq imat da lapaxaguenataxanaxac So Jesús, nache ca'ai ye Galilea da nqo'ona yem 'alhua maye huaigui ye Judea, yem pa'aigue da yo'oxoñi so tala Jordán. 2Nache ỹataqta qalota so shiỹaxauapi na ca'attague' Somaye. Huaña, nache nataren 'enauac so sa no'onpi.
3Nache huo'o so fariseopi da nqocheneua'a So Jesús da ỹauotaique da huo'o ca ỹachegoxotchigui da lasouaxashet naqa'en Somaye. Nache inattac, 'eeta':
–¿Peta'a ishet da qaỹasheetem ca ỹale da nalate' aca lhua da huo'otaq huo'o ca camachaqca lasouaxashet?
4Nache So Jesús 'enapeco':
–¿Saisheto' peta'a da qautaxaỹaxañi' naua ñiyigui'she maye nanettalec ana nere maye huetalec na la'aqtacpi Ñim Lo'onatac 'Enauacna? Anamaye nanettalec co'ollaq cheta'ague da do'onataxan Ñimaye, nache ỹo'ot so ỹale qataq aso 'alo da yaqto' nmayaxau'. 5Ỹoqo'oye Ñim Lo'onatac 'Enauacna 'enapeco': «Ca ỹale ca'ai ca lta'a qataq aca late'e, da yaqto' lmayaxaua aca lhua. Huaña, nache caamaye 'eeta'ama da 'oonolec shiỹaxaua.» 6Ỹoqo'oye caua mashe huarona't caamaye saishet da 'eeta'am da dos shiỹaxau', nacherata da 'eeta'am da 'oonolec. Qaq ỹoqo'oye Ñim Lo'onatac 'Enauacna da mashe ỹauaxaỹaxana't ca ỹale qataq aca 'alo, nache qaica ca ishet da icolaxachiguilo.
7Nache som chegaqaigui na fariseopi inattaco' So Jesús, 'eeta':
–Qaq ¿ta'ainco' qone' so Moisés ye qomi' no'onaxata'agueta da lamaxasoxonaxac da 'eetega ca ỹale ishet da ỹalat aca lhua, da ime da ỹo'ot aca lmalate da ỹalat acamaye?
8Qalaxaye So Jesús 'enapeco':
–So Moisés ỹasheeta da qaỹalat aca nhua co'ollaxa, cha'aye ỹataqta qami' qaramchiguilo qataq saishet da qaualaqaiguet Ñim Lo'onatac 'Enauacna. Qalaxaye Ñimaye nache chegoqchiguiña co'ollaq cheta'ague da do'onataxan da saishet da ỹaỹamaxaren da ca ỹale ỹalat aca lhua. 9Qaq Aỹem shenapec da aca 'arhua da saishet da ncacheỹa'ai' ca lỹa ỹale, nache saishet da 'aualat qataq saishet da 'auaroneguet aca lỹa 'alo. Cha'aye da nache qonetec de'era, nache qaỹauo'o ca 'anhuaxanaguec, souaxat da 'auaroneguet aca lỹa 'alo.
10Nache soua lapaxaguenataqa 'ena'apo':
–Da nache 'eetec de'era da lataxac ca ỹale qataq aca lhua, qaq ỹaỹamaqchiguiñi qone' da saishet da huaron ca shiỹaxaua.
11Nache So Jesús 'enapeco':
–De'era napaxaguenataxanaxac ỹaỹateeteguet ca shiỹaxaua, maye maiche ỹami' Ñim Lo'onatac 'Enauacna da nala'aguet da saishet da huaron. 12Ỹoqta 'eesa da huo'o na saishet da huaron, cha'aye maiche nacte' da lataxac. Qataq huo'o na saishet da huaron, cha'aye huo'o ca na'aqchet da lo'ocỹaxac. Qalaxaye nataqa'en huo'o na shiỹaxauapi da saishet da huaron souaxat da huotaique da nalemaqte' da do'onataxanot Ñim Lo'onatac 'Enauacna. Ỹoqo'oye de'era napaxaguenataxanaxac talec nam maiche lhuennataxac da nache 'eetec de'era da lataxac.
So Jesús ỹaalec da no'on la'aqtac so ñaqpiolec
(Marcos 10.13-16; Lucas 18.15-17)
13Huo'o aso nate'elpi ỹauegueua'a so llalaqpi So Jesús, da yaqto' Somaye ỹashel-lec qataq da natameelec somayepi. Qalaxaye soua lapaxaguenataqa So Jesús nlaqtrega asomayepi. 14Nache So Jesús 'enapegalo soua lapaxaguenataqa 'eeta': «Qauaqaita'a na ñaqpiolec da Aỹem naua'a. Saishet da qauquiyoqoitapeeguet namayepi, cha'aye cam huetaigui da lo'onataxanaxac Ñim Lo'onatac 'Enauacna, camaye 'eeta'am namayepi.»
15Nache So Jesús ỹashel-lec na lqaic ñi 'oonolec so ñaqpiolec, qaq co'ollaq ime, nache ca'ai se'eso 'alhua.
So nsoqolec sallaxanec
(Marcos 10.17-31; Lucas 18.18-30)
16Huo'o so nsoq naua'a So Jesús, nache inattac, 'eeta':
–'Am Napaxaguenataxanaq ¿negue't cam ỹoqta ỹaỹamaqchiguiñi da so'ot, da yaqto' huo'o ca ica'alaxa chochaq tatec?
17Nache So Jesús 'enapeco':
–¿Ta'ainco' da Aỹem 'aunattac da chaq negue't ca ỹoqta ỹaỹamaqchiguiñi? Ye 'oonolec Ñim Lo'onatac 'Enauacna da soxoraic. Qaq 'am da ỹoqta 'eesa da 'anshetaique da 'anca'alec, nache no'on da ỹataqta 'aualaxalec nam namaxasoxonaxacpi.
18Nache so nsoq denataxan 'eeta':
–¿Negue't cam namaxasoxonaxacpi?
Nache So Jesús 'enapeco':
–Qomye saishet da 'aualaataxan; qataq saishet da 'ancachetague' aca sa 'arhua; saishet da 'aucache, saishet da 'auatenataxan da choche 'auauotaique da 'ana'aqchet ca 'arỹa, 19'aualaxaguet qataq 'antela'a ca 'arta'a qataq aca 'arate'e, 'auauotec na laỹe shiỹaxauapi, 'eeta'am da 'arauotaxanaqtaic da maiche 'anachaalataxac.
20Nache so nsoq 'enapeco':
–'Enauac ne'ena namaxasoxonaxacpi ỹataqta salaxalec. Qaq ¿negue't ca lỹa ishet da so'ot?
21Nache So Jesús 'enapeco':
–Da 'anshetaique da ỹataqta nalochiguiñi da 'arataxac, qaq no'on da qojec, nache 'aumen 'enauac na 'am hueto'ot, qaq aca lasheue nache 'aỹa'anem na choxoraqpi, yaqto' Ñim Lo'onatac 'Enauacna maye imattalecna 'am ỹami' ca 'araueguec. Qaq da ime, nache 'auanac da Aỹem 'auca'ategue.
22Qalaxaye co'ollaq hua'axaỹa de'era so nsoq nache ỹataqta daquico, cha'aye somaye ỹataqta sallaxanec.
23Nache So Jesús 'enapegalo soua lapaxaguenataqa, 'eeta':
–Ỹataqta 'eesa de'era qami' sa'axatema, da ỹataqta huo'o da lqalaic na sallaxanecpi da inoxoneua'a da lo'onataxanaxac Ñim Lo'onatac 'Enauacna maye imattalecna da la'añaxac. 24Qaq ỹoqta 'eesa da saqalaq aca shiguiỹac le'enaxat nauanaxanaxa da taigui qanqa'en ca lauac aca qana, qaq saq 'ena'am da lqalaic ca sallaxanec da inoxoneua'a da lo'onataxanaxac Ñim Lo'onatac 'Enauacna.
25Qaq co'ollaq hua'axaỹa de'era soua lapaxaguenataqa, nache ỹataqta lta'araic da la'aalaqa'. Nache nnattega't, 'eeta':
–Da nache 'eetec de'era, nache ¿negue't qone' ca ishet da nca'alec?
26Nache So Jesús ỹamataiguilo soomaye, nache 'enapeco':
–Na shiỹaxauapi ỹataqta lta'araic naqa'en da lqalaic de'era. Qalaxaye Ñim Lo'onatac 'Enauacna saishet da huo'o ca ỹaqalanapec.
27Nache so Pedro 'enapeco':
–'Am Qarataxala', qomi' ño'onaxataqchigui 'enauac nam qomi' hueto'oto, ime, nache 'am seca'ataxague, qaq ¿chaq negue't qome ca qaraueguec?
28Nache So Jesús 'enapeco':
–Ỹataqta 'eesa de'era qami' sa'axatema da 'enauac da qoñiita qami' ỹo'onataxanaxau' Aỹem Shiỹaxaua Llalec qom ñeso'ooñi da samaxasoxonapec. Huaña, nache Ñim Lo'onatac 'Enauacna naralaxat 'enauac na lataxaguesat, nache ñi 'oonolec da qoñiita ilo'ogue ca 'oonolec soua doce llalqa so Israel. 29Nache 'enauac nam no'onaxatchigui na lma'pi, huo'otaq ca lqaỹañecpi ỹalleppi qataq 'alpi, huo'otaq lta'a qataq aca late'e, huo'otaq lhua qataq ca llalaqpi huo'otaq na na'alhuapi, souaxat Aỹem, nache camaye ivi' qome ca cien nam qoỹami'pi. Nataqa'en qoỹami' dam nca'alaxa maye chochaq tatec. 30Qalaxaye ỹataqta qalota qome nam shiỹaxauapi nam huo'o da la'amaqchec nagui, qalaq qaica ca la'amaqchec qome. Qataq qalota nam qaica ca la'amaqchec nagui, nam huo'o da la'amaqchec qome.
Արդեն Ընտրված.
Mateo 19: LÑLE13
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
Biblia Toba Qom, La'aqtaqa Ñim Lo'onatac 'Enauacna © Sociedad Bíblica Argentina, 2013.