CAWA'TA TUNITA 3
3
1May guyna ay hiɗi yalla suw muuriyan ma hay sinen kafe ma Lawn kotomna. Nam di tam cata: Lawn digi gasi ala gun ma hay sinen kaf lakŋi nigi su? 2Cata hot dit tam guyn ala: Numa ti vuɗna vi guna ma ka hay sinena. 3May Lawn di tuma ala: gu ma hay way-sinen zawni nigi tumɗi, tun ɓigi talamɗi lay, kay a nigi ma mitɗi. 4Bugolda guyna di tam cata: nigi may mit noŋ ne'ɗi; 5may Lawn wi ala, hay buur ma nigi tumawa, irgi ma mal goyo, nigi ma muɗ ki nam nala, nigi as wi ŋaata hiɗi joota.
6Cata wi gun kayn nam ŋaa'a; kay ti'e, nam ɗuw kira' jifiy ŋolo kay san fi yal kuɗumu; na' ja vuɗna valamu, tumu may. Bugol kayni na' vul mi jufa'a nam ti'e kaw.
7Wulini wulini nisi ma' pet irsi mali goyo, nisi wiyawa ala nisi ka goy nala'a. Nisi ja hum gu-gumna, junum kuɗsi bagasiya. 8Hay li ma liyn laawa vulatiya, Ma-Vatɗina ka poy hay sinena. Nisi hum della valamu. Sana hiɗi cata valamu ŋay tuwsi goy gine'e hay vok ir Ma-Vatɗin Lawna, goy jar gu ma hay sinena. 9May Lawn Ma-Vatɗin yi sana, nan jobomu: Naŋ ka arige? 10Sana hotom dita: nan hum della vaŋu hay sinena, nan liy nari kay tuwan goy nala'a, kay na'ta nan ŋay tuwanu.
11Lawna hot jobomu: Sa ma ɗekaŋ ala naŋ coli zawn goy nala'an mi gige? Naŋ ti kuɗ vuɗ-guna ma nan daŋ ala naŋ tumɗin klasige? 12San hotom dita: Cat ta naŋ vulantita, na' vulan kuɗ vuɗ-guna, nan tumu. 13Lawn Ma-Vatɗina job cata: van kayni nak lumu kay mige? Cat hotom dita: Guyna ɗutanu, nan ti'e. 14Lawn Ma-Vatɗina di tam guyna: Kay naŋ li van kayni, naŋ beɗay goyo jar muuriyan ma hay sinen kaf, naŋ ma sab hiɗi hayaŋu, hay buura vi irita vaŋ kaf naŋ ma tum mi buɗufna vi nagata.
15Nan min tun gawt jaraŋ hiɗi na'a, jar jafna vaŋu hiɗi jafna vi cata. Jafna va'a nam ma munaŋ yaŋ goyo, naŋ ma calam dubukamu may. 16Nam di tam cata: Nak ma ziy guron hayag hiɗi makka ŋolo, nak ma vuɗ guron hiɗi tuw-tita, darta vag ma zutag kat jufagu, may nam ma ti mul kagu.
17Bugolda nam di tam Adam: Kay naŋ hum kuɗ cata vaŋu, naŋ ti kuɗ gu ma nan vulaŋ gatta kalam ala naŋ tumɗina, kay na'ta nagat beɗay goyo kuɗaŋ naŋu, wulin kayni, hay buura vi irita vaŋ kaf naŋ ma fi tina vaŋ hiɗi zumalda. 18Nagata ma dayaŋ gu-zigiyna hiɗi olla, naŋ ma tum mi hadaf ma hay sinena. 19Naŋ ma fi tina vaŋ hiɗi ɦiɓiyn hay vokaŋu, ta-ta naŋ ma hot gaa hay nagata ta naŋ may goy haya' pata. Kay naŋu mi buɗufna, naŋ ma hot hay buɗufna lo.
20Adam tun sem cata valam ala Eva, kay sum sa irin kaf na' ti susiya. 21Lawn Ma-Vatɗin kot sligar bakŋa mi Adam hiɗi cata valamu, nisi cukum tisiya.
22Ma-Vatɗin Lawn di'e, san wulini muɗi ki nay nala, kay nam wi ŋaata hiɗi joota, nala nay ma telemu, hinim a nam meɗ ɓalam goyo yaw kuɗ guna vi irita kay tumu, a mus iri dok-doko loɗi. 23Kay na'ta Lawn Ma-Vatɗin digiɗim goy hay sinen Edena, kay nam ma zum nagata ta nam may goy haya' pata. 24Ki kayn nala nam digiɗ Adam goyo; hay gal ma kuɗuwna vi sinena nam lak sa kerubena valamu, nisi ka hiɗi kew-gaferaŋa hay ɓisiya, nam wile'e ki sin-kuta nala, nisi ka ŋom hagata vi guna vi irita.
Արդեն Ընտրված.
CAWA'TA TUNITA 3: Massana
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
BIBALDA TA PELDETTA © L'Alliance Biblique du Cameroun, 2001