Matie 3
3
Zaa Batise 'na bhulɛweli
(Malke 1.1-8; Luke 3.1-18; Zaa 1.19-28)
1"Ɛ "tɛnye -wɛ "me 'ye Zaa Batise 'wlole- -lɔ Zude 'na 'kɔsɛku zɔ "ne 'ɔ "pɔle 'awɔ -lɔ "bhle weli nɛɛ : 2«'A 'bheliɔ- kɔ, -mɔ, Lagɔ 'na 'Kamalezikpɛ "ne -la 'anye dɛ tlole-.»
3'Ɔnɛɛ "ku 'na weli 'ye "guɔkwɔmenyɔ Ezayi -bhulɛ 'awɔ -lɔ nɛɛ:
'Nyɔkpɔ -bholo "pɔle 'kɔsɛku weli. 'Ɔ nɛɛ:
«'A -sɛ Anyinɛnyɔ 'na -gwe,
-se 'a 'jeɛ- -kɛ 'wli gbii.»
4Zaa 'pɔ- 'awɔ samoŋɛnelokwi "ku. 'Ɔ -bhlele 'awɔ nɛmɛku -bɛto "mene. 'Kpakpaa nyɛ lɔgwea kpe "bhaa 'ye 'ɔ li 'awɔ -lɔ. 5"Ne 'nyakpa 'bhale 'awɔ Zeluzalɛme, Zude "ne Zludɛbɔ 'na moɔ 'klekle, "ne 'wa yi 'awɔ -lɔ Zaa yɔko. 6"Ne 'wa sɛ 'awɔ -lɔ 'wanɛɛ 'nyinyonoli 'na 'de, "ne Zaa 'nyoa 'awɔ -lɔ batɛme Zludɛbɔ "me.
Zaa 'na weli
(Luke 3.7-9)
7Faliziɛnya "ne Saduseɛnya 'na 'gbagboa yli 'awɔ Zaa lo, -se 'wa "kɛ batɛme yle. 'Ɔ yoa- lɛ 'ylime ne, 'ɔ nɛɛ: «"Ŋwetɛbhea 'na -zakpɛ -lɛ, -ɔ -sloa bhɔ 'anye -see 'a "kɛ Lagɔ 'na 'kɛle -ɛ yi -wɛ nu 'bha- 'a? 8'A 'tlo- bhi, -se 'wa "kɛ sɛ yibhlele- -gbɔ 'a 'bheliɔ- kɔ. 9-Mɔ, 'a te -kɛ no -gbɔ nɛɛ: -Anye, Ablame 'na yua 'na yua 'ye -a -noɔ -lɔ. Sɛne 'ye 'e bhulɛle lɛ 'anye nɛɛ: 'Tiyi ne, -ye 'a 'wolo dɛne "ku ne, Lagɔ 'yi Ablame 'na yua 'na yua "zoa-! 10-Dɛme ne, "gbupɛ 'pe- su -kpulu 'wɔ yɔko -se 'ɛ 'cɛ glu -sɛ. Zaa, su 'na -ɛ "ne tlo bhi 'na -bhi -wɛ yi 'ce 'kɔlɔ-, "ne 'ɛ yi 'ce -kosu "me 'pɔ-.»
-Ɔ yi -wɛ
(Malke 1.7-8; Luke 3.15-18; Zaa 1.19-23)
11«-Ame, 'ŋu nu 'ye 'e "nyɛle lɛ 'anye batɛme, -se 'a "kɛ kɔ 'bheliɔ-. -Mɔ, -ɔ 'bhale -ame 'beme -wɛ 'ɔ 'kpɔ- "ne 'ɔ -zi -ame "ku: 'E "ne 'bhɛle- "ne 'e "kɔ 'ɔnɛɛ 'kpɔkolo 'bho "me -sɛ. 'Ɔyi, Zuzu Wlewle "me, "ne -kosu "me, 'ɔ "kɛ -lɔ 'anye batɛme "nyɛle. 12'Ɔ -su -kɛ -bitɛ, 'ɔ "kɛ "me fo. -Ɛ 'nɛne -wɛ, 'ɔ 'cɛ 'wlo "me "zo -se 'ɔ "kɛ -didi -kosu 'na -ɛ "ne nyimɔ -wɛ "me siɛle-.»
Zaa 'nyɛ- Zezu batɛme
(Malke 1.9-11; Luke 3.21-22; Zaa 1.29-34)
13"Ne Zezu yi -lɔ Galile 'bha-, "ne 'ɔ yi -lɔ Zludɛbɔ "me Zaa yɔko yi, -se 'ɔ "kɔ batɛme "nyɛ. 14Zaa 'nasɛ lo: «'Ɔ nɛɛ: -Eyi -mɔɔ "kɛ -lɔ -ame batɛme "nyɛ, "ne -e nɛɛ 'mɔɔ -na "nyɛ -eyi batɛme!» 15-Mɔ, Zezu nɛɛ: «'Tale- -namlɛ soɔ 'yi, "naa- soɔ 'ye -a "kɛ -lɔ -ye Lagɔ 'yɔbhɔ lo -wɛ no.» "Ne Zaa yi -la -lɔ "ku 'ŋunu. 16Zezu -yle lɛ batɛme "bhuɔ ne, 'ŋu "me 'ye 'ɔ 'bha- -lɔ. "Ne "nɔgɔ "me yi -lɔ nuɔ 'diɔ, "ne 'ɔ yi -lɔ Lagɔ Zuzu -ɛ 'bhale "nɔgɔ "me -wɛ 'ylime 'ye sɛgbɛɛ -kobhlele, "ne 'ɔ yu -lɔ "ku 'kwile-. 17"Ne weli yi -lɔ "nɔgɔ "me 'bhale- nɛɛ: «-Ɔne 'neɛ -wawayu yɔ -lɔ, 'ɔyi 'ye 'e -sɛ -lɔ 'ŋwɛnɛsɛ "ku lɔbhɔ.»
Արդեն Ընտրված.
Matie 3: btg
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2024 (Active), Wycliffe Bible Translators, Inc. All rights reserved.