Tatanigaina 28
28
1Aesake neke kudoi ghu Zekopu neke ungene vehai ghu, kahe ghuana iahi, “Agho oka puina varihio ghu ka kaike fotati ta tanina Kenani. 2Agho oto lao aianihi Padani Aramu ka ia sugana Betueli ia nou kakamane o la varihio ghu ka kaike ghu ka ira tuunaghase nou maghiha Labani. 3Ara a verevere fangai God ta Torai Mana e va vehai ghu ia varihio ka agho nia e vananigho va tehi rekaha ghu e ghua, mala meha nodi mamana agho tehi butubutu noni. 4Ara na verevere fangai God e va vehaigho ghu agho nia ira pagusu ka agho e ghua, taghe neke ghuao la va vehaina manei Ebarahamu. Nia ara a verevere fangai God o hio kadoli ghu agho kava noto ke aui iahi agho, ia kava neke vananio God Ebarahamu.” 5Aesake neke va ghahe laoi ghu Zekopu ani Padani Aramu ka Labani ia tuunamane Betueli ia tanina Aramu nia neke tahinamaneo Rebeka ia nodi uke Zekopu ghe Iso.
6Iso neke avohi Aesake neke va vehaina Zekopu neke va ghahe laoina ghu Padani Aramu mala la hioina kaike ghaseborona aianimu. Manei neke avohi molamo kahe va gigimaina Aesake ka ia va vehai Zekopu, taka varihiona ghu ka kaike fotatina Kenani. 7Manei neke hadu kavei neke nomohorina Zekopu nona mama ghe nona uke neke to laona ghu ani Padani Aramu. 8Iso neke avohi ghu Aesake ia nona mama neke deona ge veha vanani ghu ka ira fotatidi Kenani. 9Manei neke lao ghu ka Isimaeli ia tuunamane Ebarahamu neke la varihio ghu ka Mahalati ia tuunaghase Isimaeli. Mahalati mu neke kerana fotati Nebaioti.
Ia Epu Baghunai Ka Zekopu Ani Betolo
10Zekopu neke ghahe kaini Biaseba neke ghahe vai lao ghu Harani. 11Ka ia eroai laona ia taunu manei neke la dufu ka kaike malau, neke la nodo ghu aianimu la epuna redu ani. Manei neke hioi kaike ghahipa neke mala vavahelu ghu epuna aianimu. 12Ka ia epuna aianimu, manei neke fini ka epubaghunai kaike rangana sipana ka malau iahi peka ta dufu laona ghu ka malauo God fate, ka dike ghahe vona hinaero ira engizeli. 13Ka ranganani fate, Iahova neke tetu aianimu neke kahe ghua ghu iahi, “Ara mu Iahova, ia God ka Ebarahamu ia nou kakamane nia ka Aesake ia nou mama. Ara a age vananigho agho nia ira pagusu ka agho kava iamu ka ta epu iamu agho. 14Ira pagusu ka agho edi age tehi taghe ira foroku ka malau iahi peka, o age pirara kave ghu ghau pakao mo nia fateo mo, pelovona mo nia pelopeka mo, e ghua. Ira leghu noni nga ka malau iahi peka edi age hioi ia va veha, ta ghasolo kadolo meha ka agho nia ia pagusu ka agho, e ghua. 15Ara a age au taremehau nia kagara ghinigho hae ghe hae ta laona agho, nia ara ake age hio leghu mehaigho ka kava iahi, e ghua. Ara e deo ga age ghahe kaigho ghu a vuhai riva ghidi va hokoto ghu ira vahina leghutau nga nato ke naiungene vananighoro ara.”
16Zekopu neke baghunu vona neke kahe ghua ghu iahi, “!Iahova mu ne toraina au aiahi! Manei mu ne au ka malau iahi, ghe ara e deo ma gake avohi ghu.” 17Manei neke maughena neke kahe ghua ghu iahi, “!Ka mamaghuanara malau iahi! Iahi mu toraina sugana mamu God, ia toraina makatana ta tobehe haghele lao ka malauo God fate.”
18Torai fufugho ngama neke hioi ghu Zekopu ia ghahipa neke mala vavaheluo, neke va nohe tetu vonai ghu taghe kaike ghahipa merumeru va tetetu ta ghuana. Ianimu tuna ghe neke va oranga ghini lao olivi oele nga ka ia fatena mala va maduanaina. 19Betolo#28:19 Betolo fafahakanana musugana God. neke ghua ghini ghu manei baolina malau ianimu. (Babaolonana malau faana iahi sepao mu Luzi.)
20Ianimu tuna ghe neke riva ghini nga Zekopu va bebereana iahi: “Neto age au taremehagu la nia age kagara ghinagu la God ka ghaghahe iahi ara nia neto age vanagu ghano nia poko la manei, 21nato ke leghu siakale ghu ara ka sugao nogu mama, ghe ge age toraina nogu God nga ara Iahova. 22Ghahipa merumeru va tetetu nato ke va tetui iahi ara mu, e age malau mala va totoana ghinigho agho nia ara a age vananigho kaikeu ka leleghu va tazona taho ka ira vahina leghutau ta vanagu nga agho, e ghua.”
Արդեն Ընտրված.
Tatanigaina 28: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.