Tatanigaina 26
26
Aesake Nia Abimeleki
1Kaike songeni neke auna ka ia kava, taghe neke dufuno la ka ia fafata Ebarahamu. Aesake neke lao ghu ka Abimeleki ia mane ginitaukeladi ira nonidi Filisitia ani Zera. 2Iahova neke podolo ghini Aesake neke kahe ghua ghu iahi, “Oka hinae lao ghu Izipi, nga o au ka kava ta va kahe ghinigho ini ara ta mala auna agho. 3O au laona birusuna fafata ka kava iahi a age au taremehau ghu ara nia a va vehaigho ghu e ghua. Ara a age vananigho agho nia ira pagusu ka agho kamotodi kava irahi, taghe toraina va ghuduvina nake naiungene ghinio ara ka nou mama Ebarahamu. 4Ara a age va tehiri taghe ira babaghunu ka kolangana ira pagusu ka agho nia a age vanadi leghu kava irahi nga e ghua. Ira leghu noni nga ka malau iahi peka edi age hioi ia va veha, ta ghasolo kadolo meha ka ira pagusu agho. 5Ara a age va vehaigho, vununa Ebarahamu neke leghuri ira vahina leghutau nga nake va kahe ghinio ara mala riva ghidira manei.” 6Aesake neke au ghu ani Zera.
7Ka ia notohi ira manedi ka malau ianimu ghinina ia ghaseborona, manei neke kahe ghua iahi, “Manei mu keragu fotati ara” neke ghua ghidi. Manei neke maughena kaheina, “Manei mu ghaseborogu ara” ta ghuana. Manei neke ngangana ghua iahi, “Maneri edi boka atunguau mo ara edi hioi ghu Rebeka, vununa Rebeka ne torai ghase veha ghena,” neke ghua. 8Ka ia au soduaina Aesake aianimu, Abimeleki ia mane ginitaukeladi ira nonidi Filisitia neke mato kave ka ia nona vuida neke finiri ghu Aesake ghe Rebeka riva ghidira ira vari arehai papalunoni. 9Kudoi tuna Aesake ge kahe ghua ghu iahi neke ghua Abimeleki, “!Manei mu toraina ghaseborou ma agho! ?Heve no ghua ghe noke kahei nga agho, 'Manei mu keragu fotati' ta ghuana?”
Aesake neke kahe ghua iahi ungene tughuna, “Vununa ara nake maughegu ta atunguauna kehara ta hio taguna ghu manei nato ke kahei la ara manei mu ghaseborogu, ta ghuana,” neke ghua ghini.
10“!Mighei, agho geala e deo go riva ghini ghu iahi ka ghai. Kaikeu ka mane irahi e boka nanamoi mo epu taremehanana ghaseborou nia agho nia paluhau tuna taghou va zezea ianimu ka ghai, e ghua konia!”
11Abimeleki neke kahe ghidi va gigima ghu ira noni ta balauna maneri: “Hei ta posi laoina mane iahi, ba keranau mu, e toraina mala age atungi.”
12Aesake neke rivai nunuma ka malau ianimu neke age haharuiri ghu manei ka komuhu ianimu kaike ghobi fafata tehi fuludu laorira neke numa ghidiro, vununa Iahova neke va vehai manei. 13Ira leghutau ta kutamadi manei dike age tehi fuludu neke age toraina taghotagho ghu manei. 14Manei neke kurui tehi sipisipi nia bulumakau nia tehi noniriva e ghua, dike kakabai ghini ghu ira nonidi Filisitia. 15Ira nonidi Filisitia dike va tamunu ghidi kava ghu ira seu ka Aesake. Seu irahi mu dike tohari ira noniriva ka Ebarahamu ia nona mama Aesake ka ia fafata dolina nga manei.
16Kahe ghua tuna iahi ka Aesake neke ghua Abimeleki, “Agho o rizu kave lao ka keha pelodira, vuna agho noto puina meha gigima nia taghotagho fuludu ghaina ghai.”
17Aesake neke rizu ghahe ghu aianimu neke lao ghu ka ia Lovete Zera la au hinaena aianimu. 18Aesake neke la toha tobehe leghuri ira seu dike tohariro ka ia fafata Ebarahamu. Seu irahi mu dike tamunuri ira nonidi Filisitia leghuna ia lemena Ebarahamu. Aesake neke baolori ghu seu iranimu ka ira babaolo neke va baolo ghidiro Ebarahamu sepao.
19Ira noniriva ka Aesake dike tohai kaike seu ka lovete ianimu dike la dufu ketuhu futu ghu. 20Ghe ira tanidi Zera ta kopui sipisipi dike vari giuruai taremehadi ira ta kopui sipisipi ka Aesake dike kahe ghua ghu iahi, “!Ketuhu iahi mu nomai ghai!” dike la ghua. Eseki neke ghua ghini ghu Aesake baolina seu ianimu, (fafahakanana mu “vari giuruai” e ghua). 21Ianimu tuna ghe dike tohaini nga kaike seu ira noniriva ka Aesake, ghe dike vari hahala ghini haro molamo ianimu. Sitina neke ghua ghini ghu Aesake baolina (fafahakanana mu “varikanai” e ghua). 22Manei neke rizu ghaheni aianimu neke la tohai ghu kaike seuni. Seu iahi mu neke deo hei ta vari hahala ghinina, Rehoboti neke ghua ghini ghu Aesake baolina (fafahakanana mu “kalasana” e ghua). Neke kahe ghua ghu iahi manei, “Ghatunaina Iahova neto vanada malau kalasana iahi mala auna ka ghita ta age taghotaghona ghu ghita ka kava iahi.”
23Sipana aianimu, Aesake neke rizu lao ani Biaseba. 24Ka redu ianimu, Iahova neke podolo ghini manei kahe ghuana iahi, “Ara mu ia God ka nou mama Ebarahamu. Oka maugheu ghu, vununa ara na au taremehau mo. Ara a age va vehaigho a vananigho tehi pagusu ghu, vununa ghini ia nogu naiungene nake vananio ia nogu maneriva Ebarahamu.”
25Aesake neke riva ghini kaike sopebeana aianimu neke va totoana ghini ghu Iahova. Manei neke rivai malau aianimu neke va tetui ghu ia nona suga tapole, nia ira nona noniriva gedi ke tohai ghu kaike seu, dike ghua.
Ia Varivehai Varihoataidi Aesake Ghe Abimeleki
26Kaike ravata Abimeleki ia mane ginitaukela neke sipa mehana Zera taremehana Ahuzati ia mane mala va puhipuhi nia Fikolo ia manefaana ia punugara ka manei mala fininina Aesake. 27Neke notohori ghu Aesake, “?Ne heve ghe no la meha nga ka ara ghau, vununa ghau mu noke hala ghau no ka ara noke va ghahe auno ghu ka kava ini ghau?” neke ghua ghidi.
28Dike ghua iahi ungene tughuina, “Ghatunaina ghai na avohi ta au taremehauna agho Iahova, na nganai ghu geala e veha tada riva ghinina ka varihoataida ghita kaike varivehai ta gigima mala deona ghau go magara ghai ghu. Ghai na kabai ghini ghau ta va bebereanana 29ta mala deona ghu ghau go va muko ghai ghu taghe nake ghuao la ghai nake deono gake va muko ghau ghu. Ghai mu nake sute ghau mo nake va ghahe ghau ghu ka bule. Ghatunaina mu to avoavohoana ghu ta va vehaighona agho Iahova.”
30Aesake neke va tana vanadi ghu maneri kaike sarumahai dike mahai ketuhu ghu maneri. 31Ka ia torai fufughona ka ia keha ravata, Aesake nia ia mane ginitaukela dike va bebereana haro ta deona gedi age vari magara ghu ghatu. Ianimu tuna ghe neke kubakubae laori nga Aesake, dike ghahe kaini ghu ka bule.
32Ka ravata ianimu ira noniriva ka Aesake dike lao dike la va kahe ghini ghu manei ghinina ia seu dike tohaio kahe ghuadira iahi, “!Ghai nato dufu ketuhu!” dike ghua. 33Siba neke ghua ghini ghu Aesake baolina (fafahakanana mu “bebereana”). E dufu ghu ka ravata iahi mu, babaolonana ia malau faana mu Biaseba (fafahakanana mu “seuna va bebereana” e ghua).
34Ka ia 40 komuhuna Iso, manei neke varihiori palu fotati ta tanidi ka ia butubutu-noni Heti: Zudi ia tuunaghase Beri nia Basemati ia tuunaghase Eloni, e ghua. 35Palu fotati irahi dike va muko hihingori Aesake ghe Rebeka.
Արդեն Ընտրված.
Tatanigaina 26: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.