Tatanigaina 23
23
Ia Leme Ka Sera
1Sera mu neke doli dufui 127 komuhuna. 2Manei neke leme ani Kiriataba (ia ta va kudo ghini Heboroni ghatunaina) ka ia kavana Kenani. Ebarahamu neke lao ghu aianimu la au muko hihingo nia nakele ghinina manei.
3Ianimu tuna ghe neke tetu ghahe nga Ebarahamu ka neke epuno ia tinina ta leme ia ghaseborona neke la kahe ghua ghu iahi ka ira butubutu noni Heti, 4“Ara mu kaike noni mehagu ta au taremehamu ghau. Va malumu vanagu ta tabara tamuna ara kaike kobosona kava tei aiahi, a boka gilu ghini ghu ara ghaseborogu ini,” neke ghua ghidi.
5Dike kahe ghua ghu iahi ka Ebarahamu ira butubutu noni Heti, 6“Nomoho meha ka ghai faghina agho. Ghai mu a mato ageigho agho taghe kaike mane ginitau ta torai mana. O gilu ghini ghaseborou nia ka ia lianga beku ta torai veha ta taghoi ghai. E deo hei ka ghai ta age sisiro ghinina ka agho ia nona lianga beku, mala gilunana ghaseborou nia.”
7Ianimu tuna ghe neke maimanihi hinae nga Ebarahamu ka kenudi ira butubutu noni Heti. 8Manei neke kahe ghua iahi ka maneri, “Noto lao hihingomu la ta gilu ghinina ara ghaseborogu ini aiahi, o fangai ko Eforoni ia tuunamane Zoha 9ta tatabara ghinina ka ara ia lianga ka manei ani Makapela ia ta namo ka va kukuruna kobosona kava ani manei. Fangai manei mala tatabara ghinina ka ara ka ia kamotona tabarana ka kenumu ghau aiahi, a boka taghoi ghu ara taghe malana kaike kava mala giugilu, ta ghuana.”
10Taghonai Eforoni mu neke nohe taremehadi mo ira keha butubutu-noni Heti ka ia malau mala varighara ka ia makatanana malau leghaha. Manei neke ungene tughu ka giliona haedu ani maneri haroharo aianimu, 11“Nonomoho meha faghina agho. Ara a vananigho ghatu ia kamotona galahena kava nia ia lianga ta au ka giliona ani, e ghua. Aiahi ka kenudi nogu noni irahi taghogu ta age vananighona ara, o boka gilu ghini ghu agho ghaseborou nia.”
12Kaike fafatani Ebarahamu neke maimanihi hinae ka kenudi ira butubutu noni Heti 13nia kahe ghua lao tuna iahi ka Eforoni mala boka nonomohona maneri haroharo, neke ghua, “Ara na fanga ghau ta nonomoho mehana. Ara a tabari ghatu ia kamotona kobosona kava. O hio tagu tabara ini a gilu ghini ghu ara aianimu ghaseborogu ini.”
14Eforoni neke ungene tughui Ebarahamu kahe ghuana iahi, 15“Faghina agho, nonomoho meha ko ka ara. Ia kava mu e rodana ghobi kunegeledi siliva#23:15 Rodana ghobi kunegeledi siliva mu e varifata ka 4.6 kilo ka siliva. tabaranana, ghe ianimu e deo fafahakana ma ka varihoataida ghita palu. O gilu ghini ma agho ghaseborou nia ka giliona ani.”
16Ebarahamu neke veha vanani mo, neke fata vanani kave ghu ia tabara neke kahe kaveio Eforoni dike nomohio ira butubutu noni Heti. Rodana ghobi kunegeledi siliva leghuina ia tahu ta mala riva ira mane bisinisi ka fafata ianimu.
17Neke ghua ghu ianimu mu ia kava ka Eforoni ani Makapela gheremena Mamare ghe neke meha nona nga Ebarahamu. Kava ianimu neke hio varighara taremehana ghu ia kobosona kava tei, ia lianga ta au giliona nia ira leghu heke nga gilio ka kobosona kava teina ta dufu lao ghu ka va kukuruna kobosona kava tei ani. 18Ira leghu butubutu noni Heti nga dike auro ka ia haedu, dike fini avohi ghu ta nonana Ebarahamu kava ianimu. 19Gilu ghini tuna Sera ia ghaseborona neke ghua Ebarahamu ka ia lianga ka giliona ia kavana Kenani ka ia galahena kavana Makapela gheremena Mamare (ia ta au ani Heboroni). 20Ia kobosona kava tei neke nodio ira butubutu noni Heti nia ia lianga ka ia giliona e ghua mu, neke meha kaike nona kava mala giugilu ghu Ebarahamu.
Արդեն Ընտրված.
Tatanigaina 23: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.