Tatanigaina 11
11
Ia Suga Kokuna Babiloni
1Ka kaike fafata, ira noni ka malau kamoto iahi peka dike ngengene ma ka kaike ngengene mo. 2Ka ia rizu vai laodi visi fateo mo, maneri dike la dufui kaike sare leghaha ka ia kava ani Babilonia, dike la au hinae ghu aianimu.
3Dike kahe ghua ghu iahi ka vari taghodighi, “Meha, aria da rivai biriki ghu ka kava palaki, da va gimari ghu ka totoi.” Maneri dike rivai biriki mala rivai sugana, nga eka ghahipa ghu, nia dike hio taa mu mala posi va gima birikina e ghua, nga eka simede ghu. 4Ianimu tuna ghe dike kahe ghua nga iahi, “Meha, aria da riva ghini ghu kaike noda malau leghaha taremehana kaike suga koku ta toraina sula dufu lao ka kolangana fateni, da mala varanga babaoloda ghu. Iahi e age posi varighara ghini ghita e deo ghu age rirahadana ka ira leghu pelodi nga ka malau iahi peka.”
5Ghe Iahova neke la hinae meha mala fininina ia malau leghaha, nia ia suga koku dike riva ghinio ira noni. 6Iahova neke kahe ghua iahi, “Fini, noni irahi mu nonidi ma ka kaike malau mo, nia ngengene tuna ka kaike ngengene mo, di ghua. Suga koku iahi mu va kenuna riva ma ka maneri. Leghuna iahi mu e deo heve riva ta mala riva ghinina maneri ta age marutana vanadira. 7Meha, aria da hinae age ghu, da age va zirini ghu ngengene ani ka maneri, mala heve ta kaheina kehana, e deo ghu ia keha ge va fafahaki ghu.”
8Ka ghaghahena ianimu neke va riraharira ghu Iahova ka ira leghu pelodi nga ka malau iahi peka, dike nodo ghu riva ghinina ia malau leghaha. 9Neke ghua mamu ghe neke va kudo ghini Babiloni#11:9 Taghe ngengene Hiburu fafahakanana “ziri” ne ghua. nga ia malau leghaha, vununa aianimu lamu neke va zirinina Iahova ia ngengene ka ira leghu noni nga nia aianimu lamu neke va riraharira manei maneri haroharo ka ira leghu pelodi nga ka malau iahi peka.
Ira Pagusu Sipa Ka Semu Dufu Ghu Ka Ebaramu
10Irahi mu ia tuturina ia pagusu ka Semu.
Palu komuhu leghuna ia ologho, ka ia 100 komuhuna Semu, manei neke kurui kaike tuunamane babaolonana Afakasadi. 11Leghuna ianimu manei neke au laoni keha 500 komuhu neke kurui ghu keha tuuna manera nia tuuna ghasera.
12Ka ia 35 komuhuna Afakasadi, manei neke kurui kaike tuunamane babaolonana Sela. 13Leghuna ianimu, manei neke au laoni keha 403 komuhu neke kurui ghu keha tuuna manera nia tuuna ghasera.
14Ka ia 30 komuhuna Sela, manei neke kurui kaike tuunamane babaolonana Eba. 15Leghuna ianimu manei neke au laoni keha 403 komuhu, neke kurui ghu keha tuuna manera nia tuuna ghasera.
16Ka ia 34 komuhuna Eba, manei neke kurui kaike tuunamane babaolonana Pelegi. 17Leghuna ianimu manei neke au laoni keha 430 komuhu neke kurui ghu keha tuuna manera nia tuuna ghasera.
18Ka ia 30 komuhuna Pelegi, manei neke kurui kaike tuunamane babaolonana Reu. 19Leghuna ianimu manei neke au laoni keha 209 komuhu, neke kurui ghu keha tuuna manera nia tuuna ghasera.
20Ka ia 32 komuhuna Reu, manei neke kurui kaike tuunamane babaolonana, Serugu. 21Leghuna ianimu manei neke au laoni keha 207 komuhu, neke kurui ghu keha tuuna manera nia tuuna ghasera.
22Ka ia 30 komuhuna Serugu, manei neke kurui kaike tuunamane babaolonana Nehoa. 23Leghuna ianimu manei neke au laoni keha 200 komuhu neke kurui ghu keha tuuna manera nia tuuna ghasera.
24Ka ia 29 komuhuna Nehoa, manei neke au kaike tuunamane babaolonana Tera. 25Leghuna ianimu manei neke au laoni keha 119 komuhu, neke kurui ghu keha tuuna manera nia tuuna ghasera.
26Ka leghuna neke to 70 komuhunao Tera, manei neke meha nodi mamana, Ebaramu, Nehoa nia Harani, e ghua.
27Iahi mu ia tuturina ira pagusu ka Tera.
Tera mu neke meha nodi mamana Ebaramu, Nehoa nia Harani. Nia Harani geke meha nona mama ghu Loti, neke ghua. 28Ka fafata neke dolino nga Tera, neke leme ghu Harani ia tuunamane ka ia malau faana Uri aianihi Babilonia neke dolino manei. 29Ebaramu ghe Nehoa mu dike varihio haro. Sarai mu neke ghaseboronana Ebaramu nia Milika tuna mu neke ghaseboronana Nehoa neke ghua; manei mu neke tuunaghase Harani ia nodi mama Milika ghe Isika. 30Sarai mu neke sasahaka neke deoi rekaha ghu.
31Tera neke hioi Ebaramu ia tuunamane nia Loti ia tuunamane Harani ia keha tuunamane taghonai Tera, nia Sarai ia nona vasagha, ia ghaseboro ka Ebaramu ia tuunamane taghonai e ghua, dike kave varighara ghu sipadina ka ia malau faana Uri ani Babilonia mala laona ka ia kava Kenani. Ghe ka ia la dufudi Harani, maneri dike to la au hinae ma aianimu. 32Tera neke la leme aianimu ka ia age palu ghobi gaha komuhuna manei.
Արդեն Ընտրված.
Tatanigaina 11: kji
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2022, Islands Bible Ministries. All rights reserved.