Luke 22
22
Tuqusukangat Jesus
1Kaasaghtuungulghii “Neqenghaghqelleghqaa Yeast‑aliimangilnguum Neqekrangllam”, atilqelghii Passover‑meng. 2Chief priest‑etlu, apeghtughikayugetlu Liilightuusaneng agghitkengngukangat naten tuqutelleghqameng Jesus. Iwernga agghitkelleteng liisimakesunghilkangit yugnun qayughllak alingelghiit seghleliighqiighllagnayukata.
Judas‑em Angeghqumakegkanga Jesus Uveghpagunnaluku
3Taagken Tughneghaam iitqaa Judas Iscariot, ilatngalghii qula maalghuk siipneqluku malighsaaghtenun. 4Enkaam aleghqughyaghtuqii chief priest‑etlu, umiilwaaghitlu Temple‑em kelengakistengita naten uveghpagunnaluku Jesus ellngitnun. 5Tawaten pinaqellghaneng quyakat enkaam akeqegkaat manililleqniluku. 6Judas‑em itagnaqluki uveghpagutilleghqangnaqutkegkaq Jesus‑meng, iwernga yugtuqami piyugumangilkanga.
Jesus‑em Malighsaaghtekek Yataaghqelghiik Passover‑mun
7Aghneq kaatkaq Neqenghaghqelleghqaanun Yeast‑aliimangilnguum Neqekrangllam. Tawani aghneghmi tamaghhaghmeng nengllugutet tuqutiighaqelghiit penniighaghaghmeng Passover‑mun. 8Enkaam Jesus‑em pikakek Peter‑enkuk John‑enkuk, “Yataaghqesaghtughtegnegu Passover‑em neqekaghqaa neghuunnaluta.”
9Aaptekaak, “Nani yataaghqestesugsigu?”
10Kiimsiqakek, “Nagataghtek! Iitquftek neghllagmun, yugem nallaghlleqiistek tugumiilguuq melghutagneng. Malignakesek mangteghamun iitqan, 11enkaam mangtegham yuga pinakesek, ‘Apeghtughistem aaptaaten, malighsaaghtekullghiini natungaawa neghvigkaghput Passover‑mun?’ 12Taagken mayuulleqiistek qemtamun nunatuqameng nelek, neghuutelleghqamun atughqalwaalek. Tawani yataaghqilghaatek.”
13Aglaghlutek piyalghiimek sangwaa qamaglluni Jesus‑em apellghatun ayuqegkaq, enkaam yataaghqegkaak Passover‑em neqekaghqaa.
Atanghem Neghestillgha
14Neghvigkaq kaasan Jesus‑llu apostle‑etlu iggasighquutkat neghnaluteng. 15Pikii, “Neghelgutkesupigtamsi Passover‑em neqnganeng sivutghulluku ikfiqelleghqaqa! 16Ungipaatamsi, alla neghyaghqaqenghitaqa taana kenlanga Ataneghpagulleghmini Kiyaghneghem apeghiiqagu uspeqelleni Passover‑mun.”
17Taagken tuguluku qayuusiq, iqamsiqayugvikluku Kiyaghneq, pikaq, “Tuguluku qayuusiq meghvikaataghteggu. 18Ungipaatamsi, whaken kenlekluku meghnaanghitaqa wine‑a kenlanga Ataneghpagullgha Kiyaghneghem kaatellghanun.”
19Taagken tuguluku neqekrangllaq, iqamsiqayugvikluku Kiyaghneq, aavgughluku tunquqii, whaten pimiita, “Una yugusiqaqa tuunegkegka elpesi apalluqlusi. Neghaqiteggu neqamikusiiluku whangamnun.” 20Neneghmeng taaqsameng tawateghpigaq tuunegkii qayuusimelngughmeng wine‑meng, whaten pimiita, “Una qayuusiq Kiyaghneghem nutaghaaguq akequsaa aamkun, kuuvelghii elpesi apalluqlusi.
21“Iwernga nagatek! Uveghpagutisteka whaantuq, neghelgusighaqaanga! 22Kiyaghneghem tawaten uspeqelqaa Ighneghan Yugem tuqulleghqaa. Iwernga seghleghwaaghunaqnguuq taana yuuk uveghpagutiyaghqaq ellnganeng!”
23Taagken malighsaaghtet aapqughaaghutkat ellmeggneng nalighteng tawaten piyaghqaatanga.
Aaghtiiraaghutelleq Angelleghpigaalleghmeng
24Taagken malighsaghtet aaghtiiraaghutkat nalighteng angelleghpigaayaghqaatanga. 25Jesus‑em pikii, “Gentile‑et umiilgita atanghutaqiit yuteng, igleghutistengitlu atightesugaqut ‘Kayutngit Yuget’ tawatenneghiteghngaaghmeng. 26Iwernga elpesi tawatesaghqaanghitusi. Itupill akulegpesini angelleghpigaat uyuqlighpigaastun lliighlit, enkaam igleghutista qepghaghtestun lliighli. 27Nalikek aangataghaghta, aqumgalghii tipelegni, nalighmeng kepsiiqulghii? Aqumgalghii aangataghaghtuq. Iwernga akulegpesini whanganguuq kepsiiqulghii elpesinun.
28“Elpesinguut whangamnitkat nanghiighsaghallemni. 29Tamaaken apalluqluku ataneghpagullelitamsi katam Atama tagivallghatun whangamnun. 30Enkaam Ataneghpagullemni neghellequsillu meghellequsillu tipelegemni. Aqumellequsillu umiilgusim aqumutiitgun nanqigsaghqaaluki qula maalghuk siipneqluku Israel‑em ramkengi.”
Jesus‑em Aapqanga Peter‑em Nallunqelleghqaa
31Jesus‑em pikaa Peter, “Simon, Simon! Nagaten! Tughneghaq pilleghqangumaaq Kiyaghneghmeng nanghiiqunaluki ugpeqillesi. Aaftesugiisi whangamneng katam piitesighaghtem avullghatun mallat wheat‑neng. 32Iwernga yughaatkumaamken Simon, ugpeqillghen pegtefqaan pisqelluku. Enkaam ugpeqenqigtekuvnga, iknaqughsaghyaghqaqaten maligsaaghtelgutegpek ugpeqillghit.”
33Peter‑em pikaa, “Ataneq, maligsaqleggiinaaghsimaamken anusimingllaghvigmun, tuqulgusighnalutenllu!”
34Jesus‑em pikaa, “Peter, ungipaatamken, unukun pingayuneng nallunqelleqaghpenga sivungani rooster‑em qalghilleghqaan.”
Jesus‑em Kelengasaaqangi Maligsaaghteni
35Taagken Jesus‑em aaptekii, “Kayagtaqngamsi manilghutangunasi, aqeftaghaangunasi, nalighmeng kaamngunasi sameng aklumatsi?” Kiimsiqaat, “Aklumangitukut.”
36Pikii, “Iwernga maaten, kina alngunak manilghutalgukumi, nalighmeng aqeftaghaalgukumi kelqelli. Kina alngunak savigpagiskumi qaasligni akiklukek pikengli. 37Ungipaatamsi, igaqngaaq Akuzitni Igaqegkani, ‘Ilalkiisimaat Liilightuusat naafqiistengitnun.’ Taana Akuzin Igaqegkaq whangamneng ayuquq, enkaam apeghiighyaghqaaghtuq.”
38Maligsaaghtet pikaat, “Ii‑i Ataneq! Whaa maalghuk savigpagek.” Jesus‑em pikii, “Tawatenginaghngam!”
Jesus Yughalghii Mount Olives‑mi
39Jesus‑enkut maligsaaghtekullghiit aanluteng Jerusalem‑emeng, piiqelleghmegestun aglaqat Mount Olives‑mun. 40Kaasameng takukameggnun pikii, “Yughaghtek aaghqutaqenghitesqellusi nanghiiqulleghmun.”
41Uyghagem miluutellghan uyaatulngatun tazingavek aglaqaq unilluki maligsaaghteni. Enkaam segesqughlluni yughaqaq, 42“Atamni, piyukellqegkuvgu awiitigu una qayuusiq whangamneng. Iwernga whanga piyukelqa avelghaghluku elpek piyukellghen apeghiighli.” 43Qilagmeng yaqulgem takuluku iknaqughsaqaa. 44Ikfiqeghllagem angtalanganeng taakunginaghhaagneng yughaqaq, qesightellghallu aawestun uqlughqaqaq nunamun.
45Yughaneghmeng taaqsami nekevluni malighsaaghteminun piyalghiimi qavaatnguftut, qayughllak qivghullghem paghyughqegkangi. 46Pikii, “Sangafsi qavaghaqetsi? Makellusi yughaghtek aaghqutaqenghitesqellusi nanghiiqulleghmun.”
Tugukangat Jesus
47Jesus akuzimaluku, Judas‑em maghyaghquqii yulghutet ellnganun. (Judas ilatngalghii qula maalghuk siipneqluku maligsaaghtenun.) Takukaa Jesus naaghnaluku. 48Taagken Jesus‑em aaptekaa, “Judas, naaghsiguu Ighnegha Yugem uveghpagunnaluku anguyaganun?”
49Maligsaaghtet Jesus‑melnguut liigikluku sangwaa sanaqutanga, aaptekaat, “Ataneq, pilluwaaltekii savigpamteggun?” 50Aga naliita savigpagmineng ilefkaghaghtekaa aghenqigneghan sigutnga qepghaghtelaaghan high priest‑em.
51Iwernga Jesus‑em pikii, “Haamangam, tawatenꞌngam pitek!” Enkaam saafluku qepghaghtelaaghem sigutnga maamestekaa.
52Taagken Jesus‑em aaptekii chief priest‑et, umiilwaaghi Temple‑em kelengakistengita, siivanlleghetlu aqfaaghilghiit ellmineng, “Tuguyaghtuungustengngaa savigpagtuumaghpesi, anagutaghtuumaghpesi nikimqun wayaghniightengulunga? 53Aghhutanga tamaghhaan elpesinitaqngama Temple‑mi, tugunaqutkumangitaghpesinga. Iwernga una aflukaghsi, qayughllak aghtughyaghqaanghillgha mamlegem igleghutinguuq.”
Peter‑em Nallunqegkanga Jesus
54Taagken Jesus tuguluku aghulaqutkaat, aglaatkaat high priest‑em mangteghaanun. Uyavaqaanlluni Peter‑em maligtekaa. 55Courtyard‑em qukaani, kumaaqiyameng qerngaghmeng aqumuutkat. Peter‑llu akulngitgun aqumegkaq. 56Taagken aghnaghaam qepghaghtem esghaghyamigu aqumgalghii kenghegni, esghapagtughluku pikaq, “Unallu yuuk ellnganitkayuguuq!”
57Iwernga Peter mesighaqaq, “Aghnami whani, nallukaqa kingangutanga!”
58Mulugpenani yugem esghaghluku pikaa, “Elpeklu naliqaaten maligsaaghtengan!” Iwernga Peter‑em pikaa, “Yugmi whani, maligsaaghtekenghitaanga!”
59Taagken entaqun ataasiq aflu naghughtaquqlu ilangan yugem sagiqutkaa, “Ipapestaaq una yuuk ellnganitkaaguq, qayughllak Galilee‑ghmiinguuq!”
60Iwernga Peter‑em pikaa, “Yugmi whani, sameng piiquten nallukaqa!” Tawaninginaq tawaten akuzimaluku, rooster‑a qalghiqaq. 61Atanghem qiivluku esghaqaa Peter iyegkenkun. Taagken Peter‑em neqanguqii Atanghem akuzitangi, pikaqegkanga, “Unukun rooster‑a qalghightestegpenaan pingayuneng nallunqelleqaghpenga.” 62Enkaam Peter aanluni qiyaaghwaghllakaq.
Jesus Legasiighwaatkegkaatlu Qevuutiiqaatlu
63Yuget kelengakilghiit Jesus‑meng legasiighwaatkegkaatlu qevuutiiqaatlu. 64Qiipaghaghmeng iiskek saaplukek tengluwaataatkaat. Taagken pikaat, “Uuknaliqistenguuten. Ungipaatikut kitum tenglugtaten?” 65Seghlequughtaakaatlu.
Jesus Agghistenun Aglaaskangat
66Aghsagu, Jews‑et siivanlleghit, chief priest‑et, apeghtughikayugetlu Liilightuusaneng qerngughulluteng, Jesus tagitestekaat. 67Pikaat, “Christ‑angukuvek ungipaatikut.” Iwernga pikii, “Ungipaaskumsi, ugpeqnaanghitaghpesinga. 68Aaptekumsillu kiimsighnaanghitaghpesinga. 69Iwernga qantaghaqun Ighnegha Yugem aqumellequq aghenqigneghakun Aghtughyaghqaanghiteghllagem Kiyaghneghem.”
70Qamaglluteng aaptekaat. “Awii, Kiyaghneghem Ighneqaten?” Kiimsiqii, “Elpesi taananguniighpesinga.”
71Taagken pikat, “Taawa liisimakistesughniighutiinkut! Ellnganeng katam nagaqughaghput Kiyaghneghmun Ighneqniluni piiq.”
Արդեն Ընտրված.
Luke 22: ess
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© 2018, Wycliffe Bible Translators, Inc. All rights reserved.