KALAQAMA 20
20
ABIRIHAAMINNA ABEMELEEKI
1Abirihaamino hakkiinni kae Negebi yinanni gobba widira hige ha're, Qaadesinna Shuuri mereero hee'ri. Geraaraho wosinchimma hee'ri yannara, 2Abirihaami galtesi Saara rodoo'yaati yii; hakkunnira Geraaru moote Abemeleeki manna soye Saara abbinannisi gede assi. 3Ikkollana kayinni mitto hashsha Maganu haaqeetenni Abemeleekira leelle, «Tini mancho ayiddaanna afidhinota ikkitinohura ise adhakkira ateri geeshshaho» yiisi.
4Abemeleeki kayinni ise kisinokkihura, «Mooticha'ya ani mitte sao nafa diassoommo; anenna manna'ya beebbatenni gudattonke? 5Rodoo'yaati yiinohu umosi Abirihaamiiti; iseno iso rodoo'yaati yite kultinoe; ani konne assoommohu taalu wodaninniiti ikkinnina mitte bunsheno dihedoommo» yiisi.
6Maganuno haaqeetenni, «Konne coye taalu wodaninni assoottota ani afoommo; ise kisse cubbu giddora eattokki gede hooloommohehu kunniraati. 7Xa kayinni manchu galte qolte aguri; isi himanaancho ikkino daafira reyattokki gede aterano huuccannohe. Qola giwittoro kayinni reyattota afi; ate calla ikkittokkinni mannikki baalu ledo gooffinanni» yii.
8Abemeleekino soodo gute kae, ledosi gashshaasine baala woshshe, konne coye kulinsa; insano lowo geeshsha waajjitu. 9Abemeleekino Abirihaami woshshe, «Hiissittonke? Maaho ma"asseennaheeti, anenna gashshooti'ya aana tenne beebba assittohu? Ane aana mannu assannokkire assootto. 10Togo assittohu maricho heddeeti?» yee xa'mi.
11Abirihaamino, «Togo assoommohu, ‹Konniicho Magano waajjanno manni dihee'ranno› yee hedoommohura, galte'ya adhitara yite shitannoe yee waajjeeti. 12Qolteno ise anni'ya ilinota ikkitino daafira rodoo'yaati; ikkollana ama'ya beetto ikkitinokki daafira adhoommo. 13Maganu anni'ya mininni fule manni gobba ha'reemmo gede hajajie yannara, mareemmowa baala ‹ «Ani rodoosiiti» yiittaro baxattaeta hattennenni afeemmo› yoommose» yee dawari.
14Hakkunni gedensaanni Abemeleeki Abirihaamira Saara qole aguri; qoleno ge'reewonna lalo, labballonna meya borojje uyisi. 15Abirihaamino, «Gobba'yara hasi'rittowa hee'ra dandaatto» yiisi. 16Saararano, «Ati mittono saalsiisanno coye assoottakkita keeraancho ikkakki ledokki noo manni baalu afanno gede malaate ikkara rodiikkira Abirihaamira 1,000 kinchu birra oommosi» yii.
17-18Kaaliiqi Abirihaami galte Saara daafira yee, Abemeleeki mine noo meento baala ilannokki gede hoolinohura, Abirihaami Abemeleekiranna minisi mannira Magano huucci. Maganuno Abemeleeki, galtesinna irkote meentosi ilanno gede asseennansa ooso afi'ri.
Արդեն Ընտրված.
KALAQAMA 20: QulMax
Ընդգծել
Կիսվել
Պատճենել
Ցանկանու՞մ եք պահպանել ձեր նշումները ձեր բոլոր սարքերում: Գրանցվեք կամ մուտք գործեք
© The Bible Society of Ethiopia; Sidama Holy Bible BSE-UBS 262 P 2014