6
O mensheskro tchilatchepen
1I menshe wan bud un budeder ap i phub. Un tcha wan boldo lendar. 2Koi dikan i Debleskre tchawe#6:2 Kowa nai kharella: ‘bolepangre’ (dik: Hiob 1:6) ninna ‘rajengre mursh tchawe’ (dik: 2. Samuel 7:14)., har shukar i menshengre tcha hi. Un jon lan penge kolen, kai jon kaman, te romedinerenn jon len. 3Koi penas o baro Dewel: “Miro djipaskro ducho atchell gar hako tsiro an o mensheste. Job hi mass. Job well gar phureder har 120 (sheel-te-biish) bersha.”
4An ko tsiro, har i Debleskre tchawe khetne wan i menshengre tchentsa un lendar tchawe bolde wan, djiwan bare menshe ap i phub. Ninna pal ko tsiro. Kolla his tchatche mursha an ko phuro tsiro: baro un an-diklo.
5O baro Dewel dikas, kai o menshengro tchilatchepen baro hi ap i phub. Halauter, hoi len an lengre djia hi, his tchilatcho o tselo diwes. 6Kowa dukas les an leskro dji. Un o baro Debles khaitas, kai kras job i menshen ap i phub. 7Doleske penas o baro Dewel: “Me lau i tsele menshen, kai me krom, pale krik i phubjatar, ninna i viechen, i baren un i tiknen, un i tchirkle. Khaitell man, kai krom len.”
8O Noah kokres his latcho glan o baro Debleskre jaka.
O Noah krell i panjeskro kheer
9Kowa hi ko liil, kai tchinlo hi pral o Noah peskre tchawentsa. O Noah his i mursh, kai latcho un tchatcho his. I tsele menshendar an ko tsiro kras job kokres kek tchilatchepen. O Noah djiwas o Debleha. 10Les his triin tchawe: o Sem, o Ham un o Jafet. 11-12Un i phub his buder gar latcho glan o Debleskre jaka. I menshe kran, kai his i phub pherdo tchilatchepen un midjak koowa. Har o Dewel ap i phub dikas, dikas lo, te djan i tsele menshe ap i tchilatcho drom. 13Doleske penas o Dewel ap o Noah: “Kolla, kai djiwenn ap i phub, kran, te was i phub pherdo tchilatchepen un midjak koowa. Kamau gar, te djiwenn le dureder. Awa, me krau, te merenn i tsele menshe un halauter, hoi ap i phub hi.
14Kre tuke i panjeskro kheer dran sorelo kasht. Kre bud isema dren. Un mak win un dren teera pre! 15Kre ko panjeskro kheer jaake: 150 (sheel-te-pantch-desha) metarja lengsto, 25 (biish-te-pantch) metarja buchlo un 15 (deesh-te-pantch) metarja pral. 16Kre i dacha! Un tel i dacha muk i paash metari pre trul o tselo kheer! Un kre i wudar ap i rig! Kre ko panjeskro kheer jaake, te wenn triin isema jek pral o wawar. Jaake hi les bud isema tella, mashkral un pral.
17Dik! Me mukau i baro pani te well pral i tseli phub, te tassenn lauter, kai djipen an lende hi. Halauter merella, hoi ap i phub djiwella. 18Tut dau miro lab, kai atcheh djido. Koi dau miro wast pre. Un tu djas tire tchawentsa un tiri romjah un tire tchawengre romjentsa an o panjeskro kheer dren. 19I tsele viechendar, an dui kotar an o panjeskro kheer dren: i mursh un i djuwel, te atchenn le ninna djido. 20Dui kotar hake tchirklendar un hake viechendar, ninna hake tikne viechendar ap i phub, hunte djan pash tute an o panjeskro kheer, te atchenn le djido. 21Le hako viecheske peskro chapen peha un ninna doha tuke un tire menshenge!”
22Un o Noah kras lauter jaake, har o Dewel leske penas.
